Tanobada Sivarai Ena Anina

Lalohadai Dikana ese Ia Dogoatao

Vanegai January ai, taunimanima momo ia aladia mase tauna Theodore Robert Bundy, be Florida State Prison ena electric chair dekenai idia hamasea. Polisi taudia idia gwau ia ese hahine 36 ia aladia mase, to reana ia hamasea taudia edia namba be 100.

Idia do hamasea lasi neganai, Bundy ese ia hamaorodia mata bodaga ena laulau dikadia [pornography] ia itaia momo dainai unai ese ena lalona ia veria taravatu utua karadia ia karaia totona. Daily News ena magasin dekenai, Dr. James Dobson ese Bundy ena sivarai ia torea bona ia gwau, “iena lagani be 12 eiava 13 ia abia neganai, ia ese pornography ia tahua sitoa dekenai, bona dala dekenai, bona unai ese iena lalona ia ania ore, hegeregere ia gorere bamona.”

Bundy ena hereva be Arthur Gary Bishop ena hereva bamona. Vanegai lagani ai, idia ese ia danu idia hamasea badina ia ese memero ima ia aladia idia dekenai ia mata-bodaga henidia dainai. San Diego ena niuspepa ta, The Tribune dekenai, Bishop ia gwau pornography ese ia “ena lalona ia hadikaia ia be mero neganai bona unai ese iena dala ia hakererea momokani.” Darana ena gaukara dalana ia stadilaia tauna ta be Bishop ena kota dekenai ia hereva bona ia gwau “taunimanima be unai gorere [pornography duahia momo karana] dekenai idia manada neganai, edia hegahusi ia siahu ia lao, bona kara namo ena mamina idia laloaboio ela bona idia duahia gaudia idia karaia danu.” Bishop ia gwau: “Lau danu unai bamona. Lau be memero ida nega tamona lau mahuta hebou bona lau ese lau aladia, bona ponography ese lau ia hakererea.”

Ena be sibodia edia kerere idia gwauraia hedinarai ala-ala taudia idia gwau pornography ese taunimanima ia hakereredia diba, to taunimanima haida idia do laloa noho unai bukadia duahia karana be gau ta lasi. Unai bamona taudia dekenai Isaia 5:20 ena sisiba be mai anina bada: “Dika ia gwauraia namo bona namo ia gwauraia dika taudia ese dika do idia davaria, dibura be diari ai bona diari be dibura ai idia halaoa taudia.”

Daradara be Lasi

Canada ena niuspepa ta, The Toronto Star dekenai, United Church ena minista ta, Phyllis Smith, ia gwau dubu ena tau badadia haida edia abidadama ia manoka ia lao badina idia mase gwauraia gorere taudia haida be henanadai idia henidia dainai. Smith ia gwau, “idia mase gwauraia taudia be mauri bona mase idia henanadailaidia bona ta ese haere ia henia diba lasi.” Ia gwau: “Namo lasi iseda abidadama ia manoka badina ita dekenai haere ia noho lasi dainai.” Smith ia gwau lauma dalana ai henanadai aukadia idia henidia neganai, “namo lasi” dubu taudia “idia hekwarahi Dirava ena kara idia hamomokania totona.”

Ena be nega haida taunimanima dekediai mauri bona mase edia henanadai edia haere idia noho lasi, to Bible dekenai haere iboudiai idia noho. Bema tau ta ia gwau ia be Dirava ena hesiai tauna, namona be iena Hereva ia diba, ani? Aposetolo Petro ia gwau abidadama taudia dekenai “haida ese emui abidadama bona lalona namo totona umui idia nanadaia neganai, nega ibounai do umui naria hegaegae idia do umui haere henia totona.” (1 Petero 3:15) Gunaguna idia noho Keristen taudia idia daradara lasi mase taudia dekenai eiava dahaka helarona do ia vara mase taunimanima dekediai. Idia be Kohelete 9:5 ena hereva idia diba, ia gwau: “Badina mauri taudia idia diba do idia mase; to mase taudia be gau ta idia diba lasi.” Bona Iesu be ia murinai idia raka taudia ia hamaorodia, ia gwau: “Nega ta do ia mai, mase guria gabu dekenai idia noho taudia ibounai ese iena gadona do idia kamonai.” (Ioane 5:​28, 29) Dirava ena hesiai taudia korikoridia idia daradara lasi momokani mauri bona mase ena sivarai dekenai.