Iesu ena Mauri bona Gaukara

Hekokoroku Taudia bona Manau Taudia

IESU ese Ioane Bapatiso ena namo ia gwauraia guna, bena ia kahirakahira dekenai idia noho hekokoroku taudia ia gwauraidia. Ia gwau: “Inai nega taudia . . . be memero maragimaragi bamona, hanua lalonai idia helai, edia turadia dekenai idia boiboi. Idia gwau: ‘Ai be gitara ai gadaralaia, to umui be umui mavaru lasi. Ai be mase guria ane ai abia, to umui be umui taitai lasi.’ ”

Iesu ena hereva ena anina be dahaka? Ia gwau: “Ioane Bapatiso ia mai, ia aniani lasi, ia inuinu lasi. To idia gwau, ‘Ia be kavakava.’ To Taunimanima ena Natuna be ia mai vadaeni. Ia aniani bona ia inuinu. Vadaeni idia gwau, ‘Inai be aniani momo bona uaina ia inua momo tauna. Ia be takisi gogoa taudia bona kara dika taudia edia turana.’ ”

Herevana dahaka idia karaia, to taunimanima idia hamoaledia diba lasi. Ioane be ogogami tauna bamona ia noho. Nasiri taudia edia taravatu hegeregerena, sibona ena ura gaudia ia dadaraidia. Aneru ena hereva “uaina eiava kekero muramura do ia inua lasi” herevana ia badinaia unai. To taunimanima idia gwau demoni ese idia boloa. To Iesu be idau, taunimanima iboudiai edia mauri hegeregeredia ia mauri, to taunimanima idia gwau ia be aniani momo tauna bona inuinu kekero tauna.

Unai taudia hamoaledia dalana be auka herea! Idia be gadara hebou memerodia bamona. Edia turadia ese gitara idia hataia neganai idia ura lasi idia mavaru eiava mase guria ane idia abia neganai idia taitai lasi. Vadaeni, Iesu ia gwau: “Dirava ena aonega ese anina namona do ia havaraia.” Unai “anina namona” karadia ese idia hahedinaraia Ioane bona Iesu dekenai idia gwauraia samani herevadia be idia koikoi.

Vadaeni, Iesu ese Korasin, Betesaida, bona Kaperanaum, idia lalodiai hoa karadia momo ia karaia hanuadia, ia gwau henidia. Iesu ia gwau, Turo bona Sidono ai unai hoa karadia bema ia karadia, do idia helalo-kerehai momokani, mai puse dabua bona lahi kahuna danu edia tauanina dekenai. Kaperanaum dekenai ia gwau: “Kota karaia dinana neganai Sodoma be do ia dika maragi, to oi be do oi dika bada.”

Iesu ena hereva ena anina be, Kaperanaum taudia be idia kamonai lasi momokani dainai, Kota Dinana Badana ai do idia helalo-kerehai diba lasi.

Unai murinai, taunimanima vairadiai Iesu ese ena Tamana guba ai ia hanamoa, badina be Dirava ese lauma ena hereva namodia be aonega taudia bona lalo-parara taudia edia amo ia hunidia, to manau taudia, beibi bamona taudia dekediai ia hahedinaraidia.

Bena dokona ai, Iesu ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina be lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.”

Iesu ese edena bamona ia durudia do idia laga-ani totona? Tomadiho gunalaia taudia ese sibodia edia tomadiho taravatudia, hegeregere Sabati taravatu haida, be taunimanima dekediai idia atoa, to Iesu be unai taravatu metaudia amo ia ruhadia. Danu, politikol oreadia ese haida idia hametaudia bona haida idia lalo-metau sibodia edia kara dika dainai, to Iesu ese unai metau kokia daladia ia hahedinaraia. Unai taudia dekediai ia hahedinaraia edena dala amo Dirava ese edia dika do ia gwauatao bona edena bamona idia ese Dirava do idia tura henia diba.

Iesu ia ura ita huaia auna be inai: Sibona eda mauri ibounai ita gwauhamatalaia Dirava dekenai, bona iseda hebogahisi bona lalokau guba Tamana ena hesiai gaukara ita karaia. Ia dekenai idia mai taudia ia henidia metau lasi huaia auna be, Dirava ena hahegani mauri abia totona. Iena taravatu unai, idia metau lasi gaudia, do idia badinadia. Mataio 11:​16-30; Luka 1:15; 7:​31-35; 1 Ioane 5:⁠3.

◆ Edena dala ai Iesu ena negai idia noho taudia be maragidia bamona?

◆ Dahaka dahaka ese taunimanima idia hametaudia, bona Iesu ese edena heduru ia henidia?