“Lohiabada Ena Imana be Idia Dekenai Ia Noho”
“Inai bamona dala mai siahu danu, Lohiabada ena hereva ia bada daekau bona ia kwalimu.”—KARA 19:20.
LAGANI 1,900 mai kahana gunanai, Keristen taudia ese idia harorolaia sivaraina bona aposetolo Paulo edia inai henidia taudia idia maumau, idia gwau: “Inai taudia be gabu ibounai dekenai kerere idia havaraia, bona hari idia mai iniseni. . . . Kaisara ena taravatu idia makohia noho. Idia gwau, ‘King ta ma ia noho, ladana be Iesu.’ ” (Kara 17:6, 7) Paulo ia lao henidia gabudia iboudiai lalodiai, taunimanima ese kara ta idia karaia, eiava lalohadai idia abia iena hesiai gaukarana dainai, bona nega momo Paulo idia dagedage henia. Keristen taudia ginigunadia ma haida idia dagedage henidia danu. To nega ibounai “Lohiabada ena imana be idia dekenai ia noho.”—Kara 11:21.
2 To, daika ese unai misinari gaukarana ia hamatamaia momokani? Iesu ese. Ia be tau hereadaena bona ia harorolaia sivaraina ese taunimanima edia lalona ia hamarerea, bona unai sivarai ia halasia dalana be idau. Namona be ita laloaboio lasi, Iesu, Dirava ena Natuna, ese Iuda taudia vairadiai hadibaia herevana idauna ta ia gwauraia hedinarai, Dirava ena Basileia sivaraina unai. To, Iuda taudia ese sibodia edia roho mauri dalana Taravatu badinaia karana amo sibona idia laloa bada.—Mataio 4:17; Luka 8:1; 11:45, 46.
“Tanobada Ibounai Dekenai”
3 Unai dainai ita diba, dina 4 idia do noho ela bona Iesu ia mase neganai ia gwauraia herevana, be ena Iuda hahediba taudia ese idia hoalaia; ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” Iesu ena hahediba taudia ese “tanobada ibounai dekenai” Basileia ena sivarai namona harorolaia gaukarana karaia dalana idia daradaralaia. Bona unai abidadama taudia edia orea maragina be edena bamona unai gaukara badana momokanina do ia karaia guguru diba?—Mataio 24:14; Mareko 13:10.
4 Gabeai, Iesu ia toreisi lou murinai, hahegani ta ia henia danu; ia gwau: “Siahu ibounai guba dekenai bona tanobada dekenai be lau dekenai ia henia vadaeni. Unai dainai do umui lao, bese ibounai be diba tahua taudia do umui halaoa, bona Tamana, Natuna, Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” Edia gaukara be inai: Edia Biaguna ena hereva be “bese ibounai” dekenai do idia abia lao.—Mataio 28:18-20.
5 Unai gaukara do idia karaia totona, idau bese taudia danu do idia haroro henidia, bona unai gaukara be auka. Lagani toi murinai Petro ena kara ta ese unai ia hamomokania. Matahanai amo, aneru ta ese Petro ia hagania, vamu mai edia miro do ia ania. Dirava ese Petro ia hadibaia, guna idia gwauraia miro gaudia be hari do idia gwauraia goeva gaudia be maoro. Unai neganai Petro ia daradara. Bena Dirava ena lauma ese Petro ia hamaoroa, Iuda lasi tauna ta, Roma tuari oreana ena kapitan ta, Korenelio, ena ruma do ia vadivadi henia. Unai neganai Petro ia lalo-parara ena be guna ia laloa idau bese taudia danu idia noho hebou eiava idia vadivadi hebou be mai taravatu, to Dirava ena ura be Korenelio do ia haroro henia. Petro ese unai Iuda lasi ruma besena ia haroro henia negana lalonai, lauma helaga be idia latanai ia diho, bona unai ese ia hahedinaraia, unai nega amo Keristen misinari gaukarana be Iuda lasi besedia bogaragidiai danu do idia karaia.—Kara 10:9-16, 28, 34, 35, 44.
6 Petro ese unai sivarai be Ierusalem ena elda taudia dekenai ia gwauraia neganai, idia hoa, to “edia hereva idia hadokoa, bona Dirava idia hanamoa, idia gwau, ‘Namo, Dirava ese lalona giroa ia henia vadaeni idau bese taudia dekenai, mauri do idia abia totona.’ ” (Kara 11:18) Vadaeni, dala idia kehoa, Iuda lasi besedia ese Keriso bona Dirava ena Basileia ena sivarai namona do idia kamonai diba!
Idau Bese Taudia Bogaragidiai Misinari Gaukara Idia Karaia
7 Stefano idia hamasea murinai, Keristen haroro gaukara ia bada ia lao, to gabeai unai gaukara idia karaia dalana ia idau. Ierusalem kongregesen taudia iboudiai be gabu idauidau ai idia heau lao, aposetolo taudia sibodia be Ierusalem idia rakatania lasi. Idia dagedage henidia Iuda abidadama taudia ese Iuda taudia sibodia Foinike dekenai, Kupro dekenai bona Antioka dekenai idia haroro henidia. “To idia haida be Kupro bona Kurene taudia, bona . . . idia ese Helene taudia dekenai Lohiabada Iesu ena Sivarai Namona idia gwauraia.” Iehova ese unai misinari gaukara idau bese taudia bogaragidiai be edena bamona ia laloa? “Lohiabada ena imana be idia dekenai ia noho, bona hutuma bada ese edia hereva idia abia dae, bona Lohiabada dekenai idia giroa.” Unai Keristen taudia ginigunadia idia gari lasi dainai, mai anina bada misinari gaukarana be Davara Badana hegegemadai idia noho tanodia dekenai idia karaia matamaia. To ma gaukara haida do idia karadia.—Kara 4:31; 8:1; 11:19-21.
8 Lagani 47-48 C.E. bamona lalonai, Dirava ese iena lauma helaga amo dala ia kehoa misinari gaukara do ia bada ia lao totona. Kara 13:2-4 dekenai ia gwau: “Lauma Helaga ese idia ia hamaoroa, ia gwau, ‘Banaba bona Saulo ruaosi umui abia siri, badina be gaukara ta lau abia hidi idia karaia totona.’ . . . Lauma Helaga ese idia ia siaia lao dainai ruaosi idia diho lao Seleukia [Suria Antioka ena sisima vareai gabuna] kone dekenai. Unuseni amo idia hanaia Kupro motumotu dekenai.” Unai ese Paulo bona Banaba edia lalona ia hamoalea bada herea—edia misinari gaukara karaia gabuna ginigunana dekenai idia lao unai! Aposetolo Paulo ese Keristen misinari gaukara ia gunalaia. Danu, do idia karaia ema bona hari inai negai gaukarana ena badina ia atoa.
9 Paulo ese misinari laolaodia toi ia karaia guguru, bena Roma dekenai ia lao, iena laolao ginigabena unai. Unai laolao iboudiai ia karaia negana lalonai, Basileia gaukarana be Europe dekenai ia hamatamaia, bona Basileia sivaraina ia abia lao Syria, Cyprus, Crete, Turkey, Greece, Malta, bona Sicily dekediai. Reana Spain dekenai ia lao danu. Hanua momo lalodiai tadikaka ia durudia kongregesen matamatadia haginidia totona. Dahaka dainai iena misinari gaukarana be namo herea?
Taunimanima Hadibadia Namonamo
10 Paulo ese Keriso ena hahediba dalana ia tohotohoa. Unai dainai taunimanima edia lalona hamarerea dalana ia diba namonamo. Taunimanima hadibadia dalana bona hahediba gaukara be ma haida dekenai ia hadibaia karana ia diba. Iena hahediba herevadia be Bible ena hereva hegeregerena. Sibona ena aonega ia heagilaia lasi taunimanima edia lalona veria totona, to idau, taunimanima danu ia kiki hebou neganai Bible siridia ia gaukaralaidia. (Kara 17:2, 3) Danu, Paulo ese ia hereva henidia taudia edia kara bona idia noholaia gabuna ena toana hegeregeredia iena haroro dalana ia haidaua, Basileia sivaraina do ia halasia namonamo totona. Ia gwau: “Taunimanima ibounai edia hesiai mai guia danu tauna lau lao noho, momo herea do lau veria mauri totona. . . . Lau be taunimanima idauidau ibounai edia mauri dalana dekenai lau halaoa, dala idauidau ibounai dekena amo haida do lau veria mauri totona.”—1 Korinto 9:19-23; Kara 17:22, 23.
11 Paulo bona iena bamodia ese edia misinari gaukara idia karaia namonamo. Idia gaukara goadagoada bona idia haheauka dainai, idia lao henidia gabudia iboudiai dekenai kongregesen matamatadia idia haginidia bona kongregesen taudia edia lalona idia hagoadaia. (Kara 13:14, 43, 48, 49; 14:19-28) Keristen taudia ginigunadia be gabu momo herea dekediai edia hesiai gaukara idia karaia dainai, Paulo ia gwau diba: “Tanobada ibounai ese Sivarai Namona ena hahenamo idia davaria umui ese ena hahenamo umui davaria hegeregerena. . . . [Sivarai Namona be] tanobada ibounai dekenai ai harorolaia vadaeni.” Momokani, Keristen taudia ginigunadia edia misinari gaukarana be mai anina bada taunimanima dekenai.—Kolose 1:5, 6, 23.
12 To, Iesu bona aposetolo ese idia perovetalaia hegeregerena, lagani 100 C.E. murinai hereva momokani idia dadaraia taudia haida be Keristen kongregesen lalonai idia vareai matamaia. (Mataio 7:15, 21-23; Kara 20:29, 30; 1 Ioane 2:18, 19) Lagani handred momo lalodiai tomadiho idauidau idia stadilaia taudia bona tomadiho koikoidia edia hahediba herevadia ese Basileia sivaraina idia hunia. Kerisendom ese misinari taudia ia siaidia lao, Dirava ena Basileia korikorina harorolaia totona lasi, to ogogami besedia doridia totona—nega momo mai edia tuari kaia amo—edia politikol biagudia bona idia siaidia lao oreadia edia basileia henunai do idia noho totona. Unai neganai misinari gaukarana korikorina ena anina ia boio, to ia boio hanaihanai lasi.
13 Lagani 1900 bamona Charles T. Russell, Watch Tower Society ena presiden ginigunana, ia diba misinari gaukara idia karaia be namo herea, bona ia hegaegae haroro gaukara badana do ia karaia totona, bona United States ena hanua badadia momo dekenai ia loaloa, bona bouti amo ia loaloa tano momo herea ia vadivadi henidia totona. Bible ena hereva amo ena toretore be gado idauidau 35 ai idia printaia, bona tano momo lalodiai dala ia kehoa haroro gaukara do idia hamatamaia totona. Idia gwau kilomita milion ta mai kahana ia loaloa pablik haroro henia gaukarana do ia karaia totona, bona pablik haroro 30,000 ma haida ia henidia ema bona lagani 1916, ia mase laganina unai.
14 Joseph F. Rutherford ese iena gabu ia abia. Ia danu ia diba, misinari gaukara idia karaia be gau badana. Lagani 1922 bamona, diba momo taudia ia siaidia lao tano idauidau dekenai, haroro gaukara do idia hamatamaia totona. Misinari taudia be Spain, South America, bona West Africa dekenai Basileia ena gaukara idia gunalaia. Lagani 1931 dekenai volantia taudia idia boiridia, Spain dekenai haroro gaukara do idia durua totona. England tauhau toi idia gwau idia ura lao durudia totona. Lagani 4 lalodiai hekwakwanai idia haheaukalaidia ema bona Spain Tuarina Badana be lagani 1936 ai ia vara. Unai neganai Spain idia heautania, do idia mase garina.
15 Lagani 1940 murinai, misinari gaukara idia durua bada. Watch Tower Society ena presiden ihatoina, Nathan H. Knorr, danu idia gaukara taudia be mai edia lalo-goada. Lagani 1942 lalonai lauma helaga ena heduru amo ia lalo-parara, misinari sikuli ta idia kehoa be namo, unai amo do idia hegaegae diba, Tanobada Ibounai Tuarina Iharuana murinai edia gaukara do idia karaia namonamo totona. Unai tanobada tuarina idia do hadokoa lasi neganai, February 1943 ai, Tadikaka Knorr ia kara haraga bona Watchtower School of Gilead be New York State dekenai ia kehoa. Hahediba taudia 4 ese Bible idia gaukaralaia, misinari gaukara be tadikaka bona taihu 100 100 mai kahana be hua 6 6 lalodiai idia hadibalaidia. Unai gaukara ese namo ia havaraia vadaeni, a?
16 Lagani 1943 lalonai, Witness taudia 126,329 sibodia ese tano 54 lalodiai haroro gaukara idia karaia. Hari inai negai be edena bamona? Hari lagani 45 murinai, Witness taudia edia namba be nega 28 amo ia bada daekau. Witness taudia milion toi mai kahana be tano 212 lalodiai idia gaukara noho. Edia namba ia bada daekau ena badina ta be Gilead School ena kosi idia haorea misinari taudia 6,000 ma haida idia gaukara dainai. Unai misinari taudia be tano 59 amo idia mai, bona idia hanai vadaeni lagani 50 lalodiai tano 148 dekediai idia siaidia lao. Lagani 45 gunanai tanobada hegegemadai idia noho Witness taudia iboudiai edia namba be 100,000 mai kahana, to misinari taudia edia heduru dainai, hari inai negai tano 10, ta ta lalodiai, Witness taudia edia namba ese 100,000 ia hanaia bona idia ese sivarai namona harorolaia bona hadibaia gaukaradia idia karaia noho. Unai tano momo lalodiai misinari taudia ese sivarai namona harorolaia gaukarana idia gunalaia.
17 Keristen misinari taudia ginigunadia edia gaukara eiava hari inai negai idia karaia misinari gaukarana be badina haida dainai namo ia havaraia. Unai badina ta be, gabu idauidau bona nega idauidau dekenai idia haroro neganai, bona ruma ta ruma ta gaukara bona Bible stadi idia karaia neganai, taunimanima ida idia hedavari heheni. (Ioane 4:7-26; Kara 20:20) Badina ma ta be idia harorolaia herevana, Bible, ia gwau Dirava ena Basileia sibona ese taunimanima edia hekwakwanai do ia kokidia herevana unai. (Kara 19:8; 28:16, 23, 30, 31) Misinari taudia momo be ogogami tanodia lalodiai idia gaukara; unuseniai ia hedinarai goevagoeva kara maoromaoro Diravana ese gau iboudiai do ia lohiaia be namo. Badina ihatoina be, Keriso ese ia gwauraia lalokauna, be misinari taudia ese edia mauri ibounai lalonai idia hahedinaraia bese idauidau taudia dekediai. Momokani, idia hanai lagani 45 lalodiai, Watch Tower Society ese ia siaidia misinari taudia edia gaukara badana dainai Iehova ena orea taudia edia namba ia bada daekau.—Roma 1:14-17; 1 Korinto 3:5, 6.
Pioneer Lalohadaina Ia Bada Ia Lao
18 Gilead School ena kosi idia haorea taudia edia lalo-goada ese tadikaka bona taihu ma haida ia ha-uraia, pioneer gaukara do idia karaia totona. Hari inai negai, Witness taudia tausen momo ese misinari lalohadaina idia hahedinaraia danu. Idia danu ese pioneer gaukara korikorina idia karaia, badina Iesu, edia “Hahemauri Tauna korikori bona gunalaia tauna momokani” ena aena maka dekenai idia raka.—Heberu 2:10; 12:2.
19 Lagani 1960 amo misinari taudia be tano haida dekenai idia siaidia lao be auka herea. Watchtower Bible School of Gilead ese ena diba hegeregerena, misinari taudia be tano idauidau dekenai ia siaidia noho, unuseniai hesiai gaukara do idia durua totona. To pioneer lalohadaina korikorina idia hahedinaraia taudia ese tanobada ibounai lalonai haroro gaukara idia karaia diba. Idia momo idia gwau idia ura sibodia edia dala do idia hegaegaelaia, idau tanodia dekenai do idia lao, heduru do idia henia totona. Oi ese unai gaukara oi karaia diba, a? Unai bamona idia karaia taudia idia gwau, ena be hekwakwanai idia davaridia bona edia ura haida idia dadaraidia, to Basileia ena sivarai be mamoe bamona taudia, ogogami tanodia lalodiai idia henidia neganai, moale bada idia davaria dainai, edia hekwakwanai idia lalodia lasi. Edia davana namodia be nega 100 bamona idia habadaia, ‘tadikakana, taihuna, sinana, bona natuna’ idia davaridia dainai bona “vairai neganai mauri hanaihanai” ena helarona idia henidia dainai.—Mareko 10:28-30.
20 Danu, hari inai negai Iehova ena hesiai taudia tausen momo ese regular eiava heduru pioneer gaukara idia karaia hua ta ta iboudiai dekenai. Idia momo idia gaukara goadagoada edia hanua dekenai. Tano momo lalodiai haroro gaukara badana be unai pioneer taudia ese idia karaia, bona nega momo ruma taudia haida be wiki ta ta iboudiai idia vadivadi henidia. Edia toana namona bona edia moale ese ia hahedinaraia idia be mai edia Basileia helarona. Edia kongregesen edia teritori lalodiai ruma taudia idia tura henidia bona kamonai taudia idia lou henidia. Pioneer taudia be momo neganai, hora momo be Dirava hanamoa gaukarana lalonai idia negedia. Japan dekenai Witness taudia momo be guna Buddhist tomadihona idia badinaia. Idia hanaia laganidia 10 bona ma haida lalodiai, Japan Witness taudia ese lagani ta ta iboudiai lalonai hora momo herea be haroro gaukara lalonai idia negea. Unai hora ena namba ese tano ma iboudiai lalodiai Witness taudia edia haroro horadia iboudiai edia namba ia hanaia, United States lalonai idia haroro horadia iboudiai edia namba sibona ia hanaia lasi. Unai ia vara badina be Japan ena pablisa iboudiai rua rua amo ta ta bamona ese pioneer gaukara idia karaia. Emu mauri oi haidaua diba, unai hahenamo badana, pioneer gaukara, lalonai do oi vareai totona, a?
21 Witness taudia ma haida idia ura ‘kara namodia idia karaia.’ (Tito 2:14) Idia haida idia buruka, haida idia gorere, idia momo be mai edia maduna edia ruma bese dekenai, bona idia haida be sikuli idia do haorea lasi memerodia bona kekenidia. Reana idia be dala lasi regular pioneer gaukara do idia karaia totona. Idia danu ese pioneer lalohadaina idia hahedinaraia diba, pioneer taudia edia lalona idia hagoadadia neganai, bona edia diba hegeregerena, haroro gaukara lalonai idia bamodia neganai, bona sibodia edia haroro gaukara idia laloa bada neganai. Matamata taudia ese edia lalona idia hadaia diba, pioneer gaukara do idia karaia, bona, idia bapatiso murinai, heduru pioneer gaukarana be nega ta ta ai idia karaia diba. Tauhau Timoteo ese ia karaia hegeregerena, namona be unai gaukara idauidau idia lalodia namonamo, Dirava ena orea taudia iboudiai ida lauma dalana ai do idia goada idia lao hebou totona.—1 Timoteo 4:15, 16.
22 Herevana iseda mauri ena toana be dahaka, namona be Iehova ena lauma helaga ese ita ibounai ia hasiahua, iena hesiai gaukarana lalonai do ita gaukara goadagoada totona. Namona be “Lohiabada ena imana” be ita ta ta iboudiai dekenai do ia noho, bena mai edia manau ida ita karaia gaukarana idia herevalaidia neganai do idia gwau diba, “Lohiabada ena hereva ia bada daekau bona ia kwalimu.”—Kara 11:21; 19:20.
Henanadai Haida
◻ Keristen misinari gaukarana be edena bamona idia hamatamaia, bona do ia bada ia lao ela bona edeseniai do idia karaia?
◻ Aposetolo Paulo ese dahaka ia karaia, misinari gaukara ia durua do ia bada ia lao totona?
◻ Hari inai negai misinari gaukara be edena bamona idia hamatamaia lou?
◻ Misinari bona pioneer gaukara ese anina idia havaraia ena badina be dahaka dahaka?
◻ Pioneer lalohadaina be edena bamona ita abia diba hari inai nega lalonai?
[Study Questions]
1. (a) Aposetolo edia negai Keristen gaukara idia inai henidia taudia be edena bamona idia maumau? (b) Misinari tauna Paulo be Dirava ena Basileia ena sivarai namona ia harorolaia gabudia iboudiai dekenai dahaka ia vara, bona nega ibounai Keristen taudia ginigunadia ese dahaka idia davaria?
2. Daika ese Keristen misinari gaukarana ia hamatamaia, bona edena bamona unai ia karaia?
3. Iesu ese dahaka ia perovetalaia dainai ena Iuda hahediba taudia idia hoa, bona badina be dahaka idia hoa?
4. Ia toreisi lou murinai Iesu ese dahaka hahegani be ena hahediba taudia ia henidia?
5, 6. (a) Edena dala ai Dirava ena Basileia ena sivarai namona harorolaia gaukarana be Iuda lasi besedia dekenai ia mai, bona unai amo dahaka ia vara? (b) Petro ese Korenelio ena sivarai be Ierusalem kongregesen ena elda taudia dekenai ia gwauraia neganai, dahaka idia hereva?
7. Keristen misinari gaukara be edena dala amo idia karaia matamaia tano idaudia dekenai, bona Iehova ese unai kara edena bamona ia laloa?
8. Dirava ese dala edena bamona ia kehoa, misinari gaukarana do ia bada ia lao totona?
9. Ena misinari laolaodia lalodiai Paulo ese dahaka ia karaia?
10. Badina be dahaka Paulo ena misinari gaukara be namo herea?
11. Dahaka ese ia hahedinaraia Paulo bona iena bamodia ese edia misinari gaukara idia karaia namonamo?
12. Badina be dahaka lagani haida lalodiai misinari gaukara korikorina ia doko?
13. Misinari gaukara be edena dala ai idia hamatamaia hari inai negai, bona lagani 1916 ia do ore lasi neganai, dahaka idia karaia?
14. Joseph F. Rutherford ese dahaka ia karaia misinari gaukarana do ia bada ia lao totona?
15. Lagani 1940 murinai, misinari gaukara do ia bada ia lao momokani totona, dahaka ia vara?
16. (a) Lagani 1943 lalonai Witness taudia hida idia haroro, bona unai namba bona hari inai negai idia haroro taudia edia namba ita hahegeregeredia neganai, dahaka ita diba? (b) Misinari taudia edia gaukara be edena bamona unai ia durua? Mani oi kikilaia sisina.
17. Dahaka badina toi dainai gunanai bona hari inai negai idia karaia Keristen misinari gaukarana ese anina namona ia havaraia?
18. Gilead School ena kosi idia haorea taudia edia misinari lalohadaina be daidia danu ese idia hahedinaraia?
19. Mai edia pioneer lalohadaina Witness taudia momo, idia gwau idia ura dahaka do idia karaia, bona idia laloa edia davana namona be dahaka?
20. (a) Tano momo lalodiai haroro gaukara badana idia karaia noho taudia be daidia? (b) Japan dekenai lagani ta ta iboudiai haroro gaukara lalonai idia negedia horadia iboudiai edia namba ese kahirakahira tano ma iboudiai dekenai idia haroro horadia iboudiai edia namba ia hanaia. Badina be dahaka?
21. (a) Regular pioneer gaukara idia karaia diba lasi Witness taudia be edena bamona pioneer lalohadaina idia hahedinaraia diba? (b) Matamata taudia be edena bamona pioneer lalohadaina idia hahedinaraia diba?
22. Herevana iseda mauri ena toana be dahaka, namona be dahaka dekenai iseda lalona ita hadaia, bona unai ese dahaka namo do ia havaraia?
[Chart on page 11]
Basileia Gaukarana Tano 10 Lalodiai—1988
(Inai tano iboudiai edia pablisa ese 100,000 ia hanaia)
Tano Pablisa edia Pioneer Taudia Haroro Horadia Memorial dekenai
Namba Badana edia Namba Idia Mai Taudia
ena Averes
U.S.A. 797,104 96,947 161,478,732 1,822,607
Mexico 248,822 32,117 58,061,457 1,004,062
Brazil 245,610 22,725 44,218,022 718,414
Italy 160,584 25,477 43,354,687 330,461
Nigeria 134,543 14,022 27,800,623 398,555
Japan 128,817 52,183 60,626,840 297,171
Germany 125,068 8,416 22,020,942 215,385
Britain 113,412 11,927 22,103,713 211,060
Philippines 107,679 21,320 26,337,621 305,087
France 103,734 9,189 21,598,308 205,256
[Picture on page 10]
Paulo bona Banaba idia lao gwauraia misinari gaukara do idia hamatamaia totona