Basileia Haroro Ripoti

Edia Kara Idia Haidaua ena Badina Idia Davaria

DAGEDAGE taudia bona raskol edia orea taudia ese edia kara idia haidaua diba, a? Dahaka ese do ia durudia diba unai bamona idia karaia totona? Ena kara ia haidaua momokani tauna be Saulo, Taso amo ia mai tauna ena sivarai amo ita itaia diba. Guna ia be Keristen taudia dagedage henidia tauna to gabeai ia be Keristen tauna ai ia lao. Unai murinai iena ladana idia hatoa aposetolo Paulo. (Galatia 1:​13, 14; 1 Timoteo 1:13) Kenya dekenai unai bamona kara haidaua karana edia sivarai ita kamonai danu.

◻ Nairobi dekenai, tauhau ta be raskol edia orea tauna ta. Idia siaia Kenya ena west kahana dekenai, unuseniai bank haida edia moni henaoa dalana ia tahua totona. Ia be tau buruka ta ida ia noho bona unai ruma dekenai Awake! magasin gunadia ia davaria. Unai magasin ia duahia momo dainai ia laloaboio iena gaukara be bank moni henaoa. Ibounai ia duahia murinai, ia be ma haida ia tahua noho, bona tau buruka ese ia hadibaia post box dekenai ta do ia mai wiki rua murinai. Unai negana amo, tauhau ese tau burukana ia noia dina iboudiai ia lao post box dekenai ma magasin haida ia tahua totona. Unai negana lalonai, sibona ena lalona ia hadaia iena kara dikadia gunadia do ia rakatania. Ia ura magasin dekenai ia duahia gaudia ia badinaia bona Iehova ena Witness tauna ta ai do ia lao. Ia be dekena taudia ia hadibaia hamatamaia ia be Iehova ena Witness tauna ta. Gabeai, special pioneer ta be unai gabu dekenai ia haroro bona ia hoa badina unai tauhau ia gwau ia be Witness tauna. Bible stadi ia hamatamaia ia dekenai, bona gabeai ia be lo tauna ai ia lao. Hari ia be regular pioneer. Bible ena diba maoromaoro ese ia durua iena mauri dalana ia haidaua totona.

◻ Argentina tauna ese badina ia davaria iena dagedage mauri dalana ia haidaua totona. Lagani 20 lalodiai, ia ese iena hahine, Witness hahinena unai, ia dagedage henia bada. Haida idia gwau iena tano dekenai guri ia geia bona korosi auna ia atoa hegaegae. Ia gwau iena kokoroku ia henaodia tauna ia davaria neganai do ia hamasea bona unai guri dekenai do ia atoa gwauraia. Iena kara be dagedage dainai, iena dekena taudia ese idia dadaraia.

Sekit naria tauna be iena ruma dekenai ia haroro. Sekit naria tauna ese Bible stadi dalana ia hamaoroa bona ia hoa badina unai tau ia gwau do ia moale Bible ia stadilaia totona. Unai tadikaka ese Mauri Hanaihanai Tanobada Dekenai Oi Abia! ena buklet be ia dekenai ia stadilaia. Unai tau ena diba bona lalo-parara Bible dekenai ia bada ia lao. Hari ia be hebou ibounai dekenai ia mai. Hebou ia ura bada bona tadikaka ida hebamo karana ia ura, bona ia gwau: “Lau ura iniseniai lau noho.”

Unai tau ena kara ia haidaua momokani dainai, iena dekena taudia be iena hahine idia nanadaia ia be edena doketa tauna dekenai ia lao. Hahine ia gwau iena kara ia haidaua badina ia be Iehova ena Witness taudia ida ia stadi dainai. Dekena hahine ta ia hoa bada herea dainai, ia be Bible ta ia abia totona ia noinoi. Ma dekena tauna ta be magasin sabskripsen ia abia.

Bible ena diba maoromaoro dainai, hari tau rua ese edia mauri dalana idia haidaua. Hari, bema ta ia ura mauri mai anina bada ia abia bona gabeai Dirava ena moale tanobada matamatana dekenai mauri hanaihanai do ia ura ia abia, Bible ese idia ia durua diba danu.​—Ioane 17:​3.