Emu Haroro Gaukara Lalonai Magasin Hariharilaia
1 “Edia hereva be mai anina hari inai negai, bona egu lalona idia hagoadaia.” “Inai magasin ese lau duahia magasin ibounai idia hereaia.” Unai hereva be tanobada hegegemadai duahiduahi taudia ese Gima Kohorona bona Awake! idia laloa dalana ia hahedinaraia namo herea. Momokani, eda magasin be tulu namodia “taunimanima ibounai” dekenai sivarai namona ita harorolaia totona.—1 Tim. 2:4.
2 Bisinesi tauna ta be ia ura henia herevana ia kikilaia Awake! magasin ta ia abia. Gabeai, ia ese Gima Kohorona ia duahia bona ena hereva ta ese ia doria ena mauri lalonai ia abia dae Toi Tamona herevana ia tahua namonamo totona. Unai ese ena lalona ia hamarerea. Hua siks murinai, ia be bapatiso ia abia. Ma tau ta be hanaihanai magasin ia abia to ia duahia lasi. Ma danu, iena hahine be Witnes taudia ia dadaraia to ena tau ia abia magasin ia duahia. Unai hahine be Baibel ena gwauhamata, tanobada paradaisona be kara maoromaoro taudia amo do ia honu herevana ese ena lalona ia hamarerea. Gabeai, unai hahine, ena natuna mero, bona hahine ena tadina kekenina be Iehova ena hesiai taudia ai idia lao.
3 Gima Kohorona Bona Awake! Henia Nega Tamona: Ataiai idia noho haheitalai ese ia hahedinaraia bamona, ita diba lasi daika be iseda magasin do ia duahia eiava dahaka hereva ese ena lalona do ia veria. (Had. 11:6) Unai dainai, Gima Kohorona bona Awake! ita henia nega tamona be mai ena namo, herevana magasin tamona sibona ita herevalaia. Nega haida, iseda vadivadi ta lalonai, reana magasin idauidau ita hahedinaraia be namo.
4 Namona be pura ta ta lalonai, dina ta ita makaia magasin gaukara ita karaia totona. Lagani 2005 Calendar of Jehovah’s Witnesses dekenai, Saturday ibounai be magasin dinana idia torea. To, iseda gabu bona noho daladia be idauidau dainai, haida be dina ma ta idia makaia iseda magasin idia hariharilaia totona. Unai be emu wiki ena sediual dekenai oi torea, a?
5 Tahua Gauna Atoa: Hua ta ta lalonai magasin hida do oi henia be tahua gauna ai oi halaoa neganai, unai ese oi ia durua diba magasin gaukara oi laloa bada totona. Oi be mai emu magasin rut, a? Haroro ai oi davaria taudia dekenai magasin oi henia, a? Dala, bisinesi teritori, bona taunimanima momo idia noho gabudia dekenai magasin oi henia diba, a? Oi loaloa, sitoa ai oi hoihoi, bona ta itaia totona oi lao neganai, magasin haida oi abia lao danu, a? Namona be nega bona gabu idauidau dekenai ma haida ita durua, Gima Kohorona bona Awake! amo namo idia abia totona.
6 Danu, eda tahua gauna be ita ura idia noho magasin gunadia ita hariharilaia. Ena be ita do hariharilaia lasi magasin haida edia deit be hua ta eiava rua ia hanaia vadaeni, to edia hereva ena anina be do mai anina bada. Kamonai taudia dekenai ita hariharilaia. Taunimanima milioni momo dekenai, Gima Kohorona bona Awake! magasin be “nega korikori ai idia gwauraia herevana.” (Aon. 25:11) Namona be unai magasin ita gaukaralaidia, taunimanima milioni momo ita durua Iehova idia diba bona hesiai henia totona.
[Study Questions]
1, 2. Edena dala ai Gima Kohorona bona Awake! be taunimanima edia mauri ia haidaua?
3. Dahaka dainai Gima Kohorona bona Awake! ita henia nega tamona be mai ena namo?
4. Edena negai magasin gaukara ita karaia diba?
5. Edena magasin hariharilaia daladia ita laloa bada be namo, bona dahaka ese ita ia durua diba unai bamona ita karaia totona?
6. Magasin gunadia be edena bamona ita hariharilaia namonamo diba?