Gima Kohorona Bona Noga! Magasin Gaukaralaidia Namonamo
1 Hari inai nega lalonai, tanobada magasin iboudiai amo Gima Kohorona bona Noga! magasin edia namo bona edia heduru be bada herea. Dahaka dainai? Badina lauma dalanai idia herevalaia hereva momokanidia amo taunimanima idia durudia namo idia abia hanaihanai diba totona. To, taunimanima momo be lauma gaudia idia abia dae be namo idia lalo-pararalaia lasi, eiava idia diba lasi lauma gaudia be edeseniai do idia abia. Iseda maduna namona be aposetolo Paulo ena kara ita tohotohoa, unai ita karaia dalana be taunimanima ita durudia lauma gaudia idia lalo-pararalaia totona.—Mat. 5:3; Kara 26:18.
2 Oi Goada Karaia Bona Oi Hegaegae Namonamo: Reana oiemu teritori lalonai mamoe bamona taudia idia noho bona hereva momokani do idia abia dae. Idia haida be mai hebogahisi danu oi hereva henidia neganai magasin do idia ura duahidia. Unai dainai, oi goada karaia bona edia lalona oi veria Gima Kohorona bona Noga! magasin oi hariharilaidia neganai. Ena be buka ita hariharilaia, to hanaihanai magasin ita dekenai idia noho bona dala ia kehoa neganai ita hariharilaidia diba.
3 Dahaka ese ita ia durua magasin hariharilaia gaukara ita hanamoa totona? Gau ginigunana be, unai magasin ita lalodia bada be gau badana. Ita hariharilaia magasin edia sivarai ita diba, badina unai neganai daradara lasi bona mai iseda moale ida ita hariharilaidia diba. Unai ita laloatao unai magasin ita duahidia hamatamaia neganai. Haroro gaukara dekenai do ita gaukaralaia hereva namodia ita tahua. Sibona ita henanadai henia inai bamona: ‘Daika ese inai sivarai do ia moalelaia? Ruma hahine, memero kekeni, eiava bisinesi tauna do ia moalelaia, a? Hereva ta be stiuden tauna, headava tauna, eiava tanobada ia dika ia lao karana ia lalohisihisilaia tauna ese do ia moalelaia, a?’ Gaukara do ita karaia namonamo totona, gau badana be ita hahedinaraia unai magasin ita duahidia vadaeni, bona iseda nega totona edia hereva be namo dainai ita hariharilaidia karana ita moalelaia.
4 Magasin Gunadia Gaukaralaidia: Laloaboio lasi, Gima Kohorona bona Noga! magasin edia namo idia boio lasi, idia halasia murinai hua tamona eiava rua dekenai edia namo idia do noho. Nega ia hanaia murinai edia sivarai be do mai anina bada, bona namo lasi ita gari magasin gunadia, edia toana idia do namo gaudia, ita hariharilaidia totona. Bema magasin gunadia ita haboudia bona ita gaukaralaidia lasi, ena anina be unai mai anina bada gaudia ita lalodia bada lasi. Magasin iboudiai dekenai hereva momokani idia noho, lauma dalanai taunimanima edia lalona veria bona ubudia totona. Namo lasi magasin gunadia ita atoa tabe bona ita lalodia boio, namona be ita goada karaia kamonai taudia ita henidia totona, eiava ruma dekenai taunimanima ita davaria lasi neganai, gabu namona ta dekenai ta ita rakatania, ani?
5 Noga! magasin ese taunimanima momo idia durudia lauma gaudia idia laloa bada totona, guna idia be lauma gaudia idia laloa bada lasi. Gima Kohorona magasin be gau badana lauma dalanai Iehova ena taunimanima ubudia totona. Unai magasin ruaosi be namo herea, bona idia be mai anina bada sivarai namona harorolaia gaukara dekenai.
6 Nega ibounai dala ita tahua neganai magasin ita hariharilaidia totona, ita diba idia be namo herea lauma dalanai mamoe bamona taudia durudia totona. Namona be ita goada karaia noho, ita hegaegae namonamo, bona pura iboudiai haroro gaukara ita karaia. Ita be sivarai namona harorolaia pablisa taudia dainai, namona be hanaihanai Gima Kohorona bona Noga! magasin ita gaukaralaidia namonamo.
[Questions]
1. Hari inai negai, tanobada magasin iboudiai amo, dahaka dainai Gima Kohorona bona Noga! magasin idia namo herea momokani taunimanima idia duahidia totona?
2. Magasin ita hariharilaidia neganai, dahaka dainai ita goada karaia bona taunimanima edia lalona ita veria toho be namo?
3. Dahaka ese ita ia durua magasin hariharilaia gaukara ita hanamoa totona?
4. (a) Dahaka dainai ita ura magasin gunadia be taunimanima dekenai ita hariharilaidia? (b) Edena bamona unai ita karaia diba?
5. (a) Noga! magasin ese dahaka namo idia havaraia? (b) Gima Kohorona magasin ese dahaka namo idia havaraia?
6. Magasin hariharilaidia karana dekenai namona be iseda lalohadai be dahaka?