Basileia Haroro Ripoti

Lagani 5 Merona ta ese Ia Veridia Idia Kamonai Totona

VENEZUELA dekenai Iehova ena Witness taudia be 40,000 bona ma haida. Idia ta be lagani 5 merona ta bona iena sivarai be namo herea. Pablik tok haida idia henia buka ta ladana Life​—How Did It Get Here?​—By Evolution or by Creation? ena hereva amo, bona unai hereva ia kamonai namonamo. Gabeai danu ruma bese lalonai unai buka idia herevalaia hebou. Unai lagani 5 merona ena ruma bese taudia be tiokratik dala dekenai idia raka. Ia diba evolusen ia gwau taunimanima be “vasiahu” bamona gauna amo idia vara. Unai buka ena kahana ta ese evolusen ena hadibaia hereva ia gwauraia, evolusen ia gwau mauri vasiahu bamona gauna amo ia vara.

Lagani 14 lalodiai, idia badinai idia noho ruma besena (tau, hahine, uhau rua, bona lagani 7 kekenina ta) idia kamonai lasi unai Witness taudia ese idia boiridia Bible idia tahua totona eiava Kingdom Hall dekenai idia lao totona.

Dina ta, Witness hahine be mereki ia huria neganai, ia kamonai iena natuna mero bona dekena taudia edia kekeni maragi be edia ruma huanai ia noho magu dekenai idia herevahereva. Mero maragi ia gwau: “Oi diba lasi! Tanobada taudia idia gwau taunimanima be vasiahu bamona gauna amo idia vara!” Kekeni maragi ia haere, hanaihanai ia haere hegeregererena: “Oi kava, a?” Mero maragi ia gwau: “Lasi, lau kava lasi. Tanobada taudia idia gwau taunimanima be vasiahu bamona gauna amo idia vara; to Iehova ese taunimanima ia havaradia.” Mero maragi ese unai lalohadai dekenai ia hevaseha badina ia laloa unai be vasiahu korikori, bona ia ese vasiahu ia ura lasi. Bena kekeni maragi ia hamaoroa: “Namona be lauegu tamana ese oiemu tamana dekenai Creation bukana ia henia bona do ia diba Dirava ese taunimanima ia havaradia.” To, kekeni maragi ia gwau idia be Katolik taudia bona edia herevahereva idia hadokoa.

Unai taihu ena tau be elda tauna, bona gaukara amo ruma dekenai ia giroa neganai, taihu ese maragidia edia herevahereva ia hadibaia. Ena be natudia edia herevahereva dainai idia kiri, to tadikaka ia laloa reana Iehova ia ura ia be ena dekena tauna ia haroro henia lou. Unai dainai, dina haida murinai, natudia edia herevahereva be iena dekena tauna ai ia hadibaia. Ia gwau iena natuna ena ura dainai, ia ese Creation buka ta do ia henia. Witness tauna ese iena dekena tauna ia noia mani ia duahia bona ena lalona ia koua lasi, badina buka ese mauri ena badina ia hahedinaraia.

Tadikaka ia hoa badina dina haida murinai, ena dekena tauna bona ena hahine, nega daudau lalonai hereva momokani idia ura lasi taudia unai, be tadikaka ena ruma dekenai idia mai bona idia lalohisihisi badina lagani momo lalodiai idia laloa kerere. Idia gwau Creation buka ena namo dekenai idia hoa bada herea.

Gabeai, unai ruma bese dekenai Bible stadi idia hamatamaia. Idia be hebouhebou dekenai idia mai hanaihanai bona nega sisina murinai sivarai namona harorolaia taudia ai idia lao. Distrik hebouhebou dekenai unai tau, iena hahine, bona uhau rua idia bapatiso, bona kekeni maragi be Basileia pablisa ai ia lao. Hahine be ia bapatiso murinai pura iboudiai heduru pioneer gaukara ia karaia.

Iesu Keriso ia diba daika daika edia kudou ia namo, bona ia ese maragidia ia gaukaralaia unai kudou-namo taudia ia veridia totona.​—Ioane 10:14.