“Maino ena Nega”?

“MAINO ENA NEGA.” “Tanobada be maino ai ia honu.” “Maino sivaraina sibona ia dae.” Io, hanaia laganidia rua lalodiai unai bamona sivarai idauidau be niuspepa dekenai idia torea dainai taunimanima idia hoa bona idia daradara. Oibe, tanobada hegegemadai ena sivarai be tuari bona lalohisihisi amo ia giroa lao maino bona lalo-namo dekenai be hoa gauna momokani. To dahaka dainai unai bamona ia vara?

Hoa dalanai nega tamona idia vara hekwakwanai badadia haida be idia hanaidia nega sisina lalonai. Africa tanona dekenai maino idia havaraia Angola dekenai. Central Asia dekenai, Russia ese edia tuari taudia idia kokia Afghanistan tanona amo. Central America dekenai, Nicaragua gavamani bona gavamani idia ura henia lasi taudia edia tuari karana ia doko. Southeast Asia dekenai, Vietnam gavamani ese edia ami idia kokia Kampuchea tanona amo. Io, unai “Maino ena nega” be ia lao Middle East dekenai danu, badina Iran bona Iraq padadiai rara bada idia bubua tuarina idia hadokoa.

Bona hoa gauna badana be tanobada ena siahu badadia rua edia hebamo dalana matamatana. Hanaia lagani 40 lalonai, Russia bona America idia hepapahuahu, to hari idia herohemaino bona edia heduru heheni toana idia hahedinaraia bona maino korikori dalana idia tahua. Danu, The Economist magasin ia gwau unai be nega ginigunana Europe lalonai tuari be murina murina ia vara lasi. Momokani, maino ena sivarai be idia kikilaia momo.

Ena anina be dahaka? Ena anina be gavamani gunalaia taudia be kahirakahira “maino do idia mailaia ita eda nega lalonai, a”? Lagani 51 ia hanaia vadaeni lalonai, England ena prai minista Neville Chamberlain, ese unai hereva ia gwauraia. Unai hereva ena anina be ia vara lasi badina nega sisina murinai tuari iharuana ia vara. Unai dainai unai hereva be do ia momokani hari inai nega lalonai, a?