Dirava Idia Kamonai Henia Taudia Edia Hahemauri Negana Ia Kahirakahira!
“Bema hisihisi bona metau Dirava badinaia taudia dekenai idia noho neganai, Lohiabada ese inai hisihisi dekena amo idia ia hamauria diba. Dirava ese danu kara dika taudia ia guia diba, ela bona Kota Bada Dinana ia ginidae.”—2 PETERO 2:9.
1. (a) Hari inai negai, dahaka hekwarahi ese taunimanima ia hadikadia? (b) Unai dainai, dahaka henanadai do ita laloa?
TAUNIMANIMA iboudiai dekenai, mauri ena hekwarahi idia bada idia lao. Herevana ita noho kohu bada tanona dekenai eiava ogogami tanona dekenai, to unai be momokani. Taunimanima iboudiai idia gari. Moni hekwarahi sibona lasi, to tanobada ena tano, ranu bona hodahoda idia dika momokani bona mauri gaudia iboudiai do idia mase diba. Gorere be momo. Dai-hanai goreredia, kudou goreredia, bona kensa be taunimanima momo idia hadikaia. Sihari kava karadia momo dainai taunimanima idia lalo-hisihisi bona ruma bese momo idia hadikaia. Unai sibona lasi, tanobada ibounai dekenai dagedage ia bada ia lao. Taunimanima ese inai hekwakwanai iboudiai idia davaria dainai, ita henanadai diba: Ita hereva maoro diba tanobada ena hahemauri negana ia mai kahirakahira, eiava? Bema oibe, edena dala amo ia mai? Bona daika ese do ia havaraia?—Habakuku 1:2; 2:1-3 danu hahegeregerea.
2, 3. (a) Badina be dahaka hari inai negai 2 Petero 2:9 ena hereva ese ita ia hagoadaia? (b) Bible ese dahaka hahemauri kara badadia amo ita ia hagoadaia?
2 Guna idia vara gaudia be hari inai negai idia vara gaudia bamona. Aposetolo Petro be Dirava ese gunaguna ia karaia hahemauri karadia ia gwauraidia, bona ena hagoadaia hereva dokona be inai: “Bema hisihisi bona metau Dirava badinaia taudia dekenai idia noho neganai, Lohiabada ese inai hisihisi dekena amo idia ia hamauria diba.” (2 Petero 2:9) Namona be unai hereva 2 Petero 2:4-10 dekenai oi laloa:
3 “Gunaguna aneru haida ese kara dika idia karaia, to Dirava ia bogahisihisi henidia lasi. Ia ese hel bona dibura masemase gabuna dekenai idia ia negea diho. Unuseni idia ia guia. Bona unai gabu do idia noho ela bona Kota Bada Dinanai. Gunaguna, taunimanima momo ese Dirava idia kamonai henia lasi neganai, ia ese idia ia bogahisihisi henia lasi. To abata bada herea ia havaraia, vadaeni ibounai idia mase. Noa, kara maoromaoro ia harorolaia tauna, mai taunimanima 7 sibona idia mauri. Dirava ese Sodoma bona Gomora danu ia kota henia. Lahi dekena amo unai hanua ruaosi ia araia ore. Unai kara dekena amo Dirava ese ia idia gari henia lasi taudia ia hagaridia. Badina be do idia diba, edia kerere davana be dohore unai lahi hegeregere. Dirava ese unai kara maoromaoro tauna Lota ia hamauria. Lota be unai lebulebu taudia edia kara dainai iena lalona be ia metau. Lota be kara maoromaoro tauna, to edia huanai ia noho dainai, dina ibounai edia dika ia itaia bona ia kamonai. Unai dainai iena lalona be ia hisihisi bada. Bema hisihisi bona metau Dirava badinaia taudia dekenai idia noho neganai, Lohiabada ese inai hisihisi dekena amo idia ia hamauria diba. Dirava ese danu kara dika taudia ia guia diba, ela bona Kota Bada Dinana ia ginidae. To taunimanima haida ese edia kerere davana dika herea do idia davaria. Idia ese edia tauanina ena ura dikadia, mata-bodaga karadia idia karaia noho, bona Dirava ena siahu idia laloa be anina lasi. Inai hadibaia koikoi taudia be mai edia hekokoroku, bona idia sibona edia ura idia karaia noho. Unai dainai idia ese guba noho taudia idia hereva dika henia, idia gari henidia lasi momokani.” Unai siri ia hahedinaraia hegeregerena, Noa ena negai idia vara gaudia be mai anina bada ita dekenai.
Noa ena Negai Ia Goada Laumana
4. Noa ena nega lalonai, badina be dahaka Dirava ia laloa tanobada ia dika vadaeni? (Salamo 11:5)
4 Genese karoa 6 ena sivarai ia gwau tanobada be Dirava momokani ena matana dekenai ia dika vadaeni. Badina be dahaka? Dagedage dainai. To unai be dagedage karadia haida sibona lasi. Genese 6:11 ia gwau “edia dika be gabu ibounai dekenai.”
5. (a) Taunimanima be dahaka lalohadai dainai Noa ena nega lalonai dagedage idia habadaia? (b) Dirava laloa lasi karana dainai Enoka be dahaka hereva ia gwauraia?
5 Badina be dahaka? Petero Iharuana ena siri ia gwau Dirava idia gari henia lasi taudia idia noho dainai. Oibe, Dirava idia laloa lasi taudia be tanobada ena kara idia gunalaia. Idia be Dirava ena taravatu sibona lasi idia dadaraia to Dirava danu idia dadaraia.a Bona taunimanima be Dirava idia gwau-edeede henia neganai, umui laloa edia dekena taudia do idia hebogahisi henidia, a? Noa ia do vara lasi neganai, Dirava be Enoka ia veria unai kara ena dokona ia perovetalaia totona. (Iuda 14, 15) Dirava idia laloa lasi karadia dainai, ia ese unai taudia do ia kota henidia.
6, 7. Aneru be dahaka idia karaia dainai Abata ia do mai lasi neganai, dika bada idia havaraia?
6 Unai neganai, ma gau ta dainai danu dagedage ia vara. Genese 6:1, 2 ese unai ia herevalaia, ia gwau: “Nega ia mai vadaeni, taunimanima be momo tanobada dekenai, bona natuna kekeni idia vara noho. Bona Dirava ena natuna haida ese idia itaia, inai [kekeni] be mai edia hairai. Vadaeni, idia ura henia kekeni idia abia, idia adavaia.” Unai Dirava natudia be daidia? Idia be tanobada taudia lasi. Lagani daha momo lalodiai tatau be hahine hairaidia idia adavaia. Unai Dirava natudia be aneru bona taunimanima edia toana idia atoa. Iuda siri 6 dekenai, ia gwauraidia, unai aneru be “edia dagi korikori ena maka dekenai idia noho lasi, bona edia gabu korikori idia rakatania.”—1 Petero 3:19, 20 danu hahegeregerea.
7 Unai siahu herea anerudia be taunimanima edia toana idia atoa bona tanobada kekeni idia adavadia neganai, dahaka ia vara? “Unai dinadia dekenai bona gabeai danu taunimanima badadia badadia tanobada dekenai idia noho. Gabeai Dirava ena natuna taudia ese taunimanima hahine idia adavaia bona natudia idia havaraia. Idia be gunaguna neganai goada taudia mai ladana, edia sivarai danu be bada.” Oibe, idia havaraia natudia be Nefilim, edia goada bada idia gaukaralaia taunimanima idia dagedage henidia totona.—Genese 6:4.
8. Iehova be dahaka ia laloa tanobada ena kara dika dekenai?
8 Edia dika be edena bamona? Ia dika ia lao ela bona “Iehova ese taunimanima ia itaia, edia kara dika be bada herea gabu ibounai dekenai, bona edia laloa be nega ibounai ia dika sibona mo.” Dirava be dahaka ia karaia? “Iehova ena lalona be ia hisihisi taunimanima tanobada dekenai ia havaraia dainai, bona ena lalohisihisi be ia bada momokani.” Ita gwau lasi Dirava ia laloa ia kerere taunimanima ia havaraia dainai. Lasi, ia lalohisihisi badina taunimanima ia havaraia murinai, edia dika be bada dainai ia hamasedia ore be maoro.—Genese 6:5-7.
Hahemauri Dekenai Ia Lao Dalana
9. (a) Badina be dahaka Dirava be Noa dekenai ia moale? (b) Dirava ese dahaka ia hadibaia guna Noa dekenai?
9 To Noa dekenai, “Iehova ia moale. . . . Noa be kara namo tauna, ia tamona sibona dekenai Dirava ia moale. Ia be Dirava danu ia noho, turana hegeregere.” (Genese 6:8, 9) Unai dainai, Iehova ese Noa ia hadibaia Ia ese abata do ia mailaia tanobada dekenai bona Noa ia hamaoroa lagatoi do ia karaia. Taunimanima iboudiai be tanobada amo do idia mase ore. Noa bona ena ruma bese sibona do idia noho. Animal iboudiai danu do idia mase ore. Noa be lagatoi dekenai animal edia bese ta ta iboudiai amo haida ia abia hidi bona idia sibona do idia mauri.—Genese 6:13, 14, 17.
10. (a) Idia roho mauri totona, edena bamona idia hegaegae, bona unai gaukara be edena bamona? (b) Noa ese iena maduna ia huaia dalana dekenai dahaka ita laloa?
10 Unai ia diba dainai, Noa be maduna bada herea ia abia. Lagatoi do ia karaia. Ena toana be maua badana bamona, ena bada be 40,000 cubic mita. Noa ese aniani do ia atoa bona animal, manu, “mauri gaudia ibounai” ia gogodia idia mauri totona. Unai gaukara be lagani momo do ia abia. Noa be edena bamona ia laloa? Ia be “inai bamona ia karaia, Dirava ena hereva ibounai hegeregere.”—Genese 6:14-16, 19-22; Heberu 11:7.
11. Noa ena maduna badana iena ruma bese dekenai be dahaka?
11 Unai gaukara ia karaia noho lalonai, Noa be iena ruma bese lauma dalana dekenai ia hagoadaia. Namona be ia ese ia hadibadia idia be idia dekenai idia noho taudia edia dagedage karadia bona gwau-edeede lalohadai idia karaia garina. Gau badana be idia be unai nega ena mauri dalana idia laloa momo lasi. Dirava be mai ena gaukara idia karaia totona, bona edia mauri lalonai unai idia laloa bada. Ita diba Noa ena ruma bese be iena hereva idia kamonai bona iena abidadama bamona idia abidadama, badina Noa, iena adavana, edia natudia toi, bona natudia edia adavadia—iboudiai be 8—Bible lalonai idia gwauraidia namo.—Genese 6:18; 1 Petero 3:20.
12. Petero Iharuana 2:5 ia hahedinaraia hegeregerena, Noa be mai abidadama danu dahaka maduna ia huaia?
12 Noa be mai ena maduna ma ta—Abata do ia harorolaia bona ia mai ena badina danu do ia hadibaia. Ita hamomokania diba ia be mai abidadama danu unai maduna ia huaia, badina Dirava ena Hereva dekenai idia gwau ia be “kara maoromaoro ia harorolaia tauna.”—2 Petero 2:5.
13. Dirava ena amo ia abia gaukara ia naria neganai, Noa ena noho be edena bamona?
13 Umui laloa be namo, Noa be unai bamona gaukara ia karaia neganai ia be edena bamona! Iena noho dalana umui laloa. Bema oi be Noa, eiava iena ruma bese tauna ta, Nefilim bona Dirava idia laloa lasi taudia ese idia havaraia dagedage karadia dekenai do oi noho. Gwau-edeede anerudia ese oi do idia heai henia toho. Lagatoi dekenai oi gaukara neganai, oi do idia hevasehalaia. Bona lagani ta ta iboudiai, Abata oi harorolaia neganai, do oi davaria taunimanima be unai nega ena mauri dalana sibona idia laloa dainai idia “laloa lasi dahaka do ia vara”—ela bona “abata ranu ese ibounai ia abia lao.”—Mataio 24:39; Luka 17:26, 27.
Noa ena Sivarai ena Anina be Dahaka Oi Dekenai?
14. Badina be dahaka hari inai negai Noa ena noho toana ita diba be auka lasi?
14 Iseda magasin idia duahia taudia momo be unai bamona noho dalana idia laloa be auka lasi. Badina be dahaka? Badina hari ita noho dalana be guna Noa ena negai idia noho dalana hegeregerena. Iesu Keriso ia gwau unai bamona do ia vara. Iena noho iharuana nega dokonai ia perovetalaia neganai, Iesu ia gwau: “Noa ena nega bamona, Taunimanima ena Natuna do ia mai neganai unai bamona gaudia do idia vara.”—Mataio 24:37.
15, 16. (a) Edena bamona ia momokani bema ita gwau, Noa ena nega hegeregerena, hari inai negai tanobadana be dagedage amo ia honu? (b) Iehova ena hesiai taudia be dahaka dagedage karadia idia mamia?
15 Unai bamona ia vara, a? Hari tanobada be ‘dika amo ia honu,’ a? Oibe! Lagani 1900 ema bona hari taunimanima 100,000,000 be tuari amo idia mase. Iseda magasin idia duahia taudia haida be unai dika idia mamia vadaeni. Bona raskol taudia dainai idia momo ese hisihisi idia davaria, idia be edia moni eiava kohu idia henaoa gwauraia dainai. Bona sikuli dekenai, matamata taudia be dagedage idia davaria.
16 To, Iehova ena hesiai taudia be tuari bona raskol edia dagedage sibona lasi to ma gau haida danu idia hisihisilaia. Idia be dagedage idia davaria badina idia be tanobada ena lasi bona idia be Dirava kamonai henia taudia dainai. (2 Timoteo 3:10-12) Nega haida unai dagedage be sisina sibona, hegeregere idia doria eiava vairana idia pataia; nega haida kohu idia hadikaia, idia dadabaia, bona nega haida idia hamasea.—Mataio 24:9.
17. Hari inai negai, Dirava laloa lasi karadia be momo, eiava? Oi herevalaia.
17 Unai dagedage idia karaia neganai, Dirava idia laloa lasi taudia be nega haida, Dirava idia dadaraia herevadia idia gwauraia. Africa ena tano ta dekenai, polisi taudia idia gwau: “Gavamani be aiemai. Umui lao Dirava dekenai, bema ta ia noho, bona umui noia ia mai umui ia durua totona.” Dibura rumadia bona dagedage kamepa dekenai, Iehova ena Witness taudia be Baranowsky bamona taudia idia davaria. Sachsenhausen, Germany dekenai unai tauna ia hereva dika, ia gwau: “Lau be Iehova do lau tuari henia. Do ita itaia, daika ia goada, lau eiava Iehova.” Nega sisina murinai, Baranowsky ia gorere bona ia mase; to ma haida be unai bamona lalohadai idia karaia noho. Dagedage gavamani taudia sibodia lasi to ma haida danu be Dirava idia gwau-edeede henia. Tanobada hegegemadai, Dirava ena hesiai taudia be haida idia itaia edia kudou dekenai Dirava idia gari henia lasi.
18. Edena daladia ai lauma dikadia be taunimanima edia noho ena dika idia habadaia?
18 Hari inai negai, Noa ena nega hegeregerena, lauma dikadia edia gaukara danu ita itaia. (Apokalupo 12:7-9) Unai demoni be guna, Noa ena negai, idia mai tanobada dekenai bona tanobada kekeni haida idia adavaia. Abata ia mai neganai, edia hahine bona natudia idia mase, to unai gwau-edeede anerudia idia giroa lauma taudia idia noho gabuna dekenai. Iehova ena helaga oreana dekenai idia noho diba lasi, to Tartarus dekenai idia lao idia be dibura dekenai idia noho, Dirava ena diari idia abia lasi. (2 Petero 2:4, 5) Satana ese ia hakaudia, idia be taunimanima idia hereva henidia noho bona idia gunalaidia noho. Nega haida idia be puripuri amo idia karaia. Bona taunimanima idia veria idia be ma taunimanima haida dala idau momokani dekenai idia hamasedia totona. To unai sibona lasi.
19. (a) Demoni be daidia idia inai henia bada? (b) Demoni be ita idia doria dahaka ita karaia totona?
19 Bible ia hahedinaraia demoni be ‘Dirava ena taravatu bona Iesu ena hereva momokani idia gwauraia taudia’ idia tuari henidia. (Apokalupo 12:12, 17) Unai lauma dikadia be Iehova ena hesiai taudia dekenai dagedage henidia karadia momo idia havaraia. (Efeso 6:10-13) Dala iboudiai amo abidadama taudia idia hagaridia eiava idia veridia toho edia abidadama Iehova dekenai idia hadikaia totona bona Iehova ena Basileia, Mesia Pavapavana, Iesu ena amo harorolaia gaukara idia koua totona.
20. Edena daladia ai demoni be edia siahu amo idia raka oho gwauraia taudia idia koua? (Iakobo 4:7)
20 Demoni be edia dagedage siahuna amo idia siri gwauraia taudia idia koua. Brazil dekenai, meamea hahine gunana ta ia gwau Witness taudia be iena ruma dekenai idia mai neganai, demoni edia gado ese idia hamaoroa iduara ia kehoa lasi; to ia kehoa, bona hereva momokani ia abia. Gabu momo dekenai, demoni be meamea karadia amo Iehova ena Witness idia inai henidia taudia be meamea tauna ta dekenai idia lao. Hegeregere, Suriname dekenai, Iehova ena Witness idia inai henidia taudia be meamea tauna dekenai idia lao. Unai meamea tauna ena kara be iena puripuri auna taunimanima ta dekenai ia poinia neganai, idia mase. Ia mai bona ena mavaru taudia bona gaba idia botaia taudia danu idia mai. Meamea tauna lalonai be demoni ta ia noho. Iehova ena Witness taudia dekenai ia mai. Iena meamea hereva ia karaia bona idia dekenai iena au ia poinia. Hanua taudia idia laloa Witness taudia do idia mase, to meamea tauna ia mase rea bona iena durua taudia be hemarai dekenai iena tauanina idia abia oho haraga.
21. Noa ena negai hegeregerena, taunimanima momo be dahaka idia laloa iseda haroro gaukara dekenai, bona badina be dahaka?
21 Tano haida dekenai meamea bona puripuri karadia idia karaia hedinarai momo lasi, to Iehova ena Witness taudia iboudiai idia diba vadaeni, taunimanima momo be sibodia edia mauri dalana idia laloa momo dainai idia ura lasi edia haroro dekenai idia kamonai. Noa ena nega bamona, taunimanima momo idia ‘kamonai lasi.’ (Mataio 24:37-39) Reana haida ese iseda lalo-tamona bona iseda gaukara idia matauraia. To iseda gaukara lauma dalana dekenai—anina be hora momo ita atoa stadi dekenai, hebou ita lao dekenai, bona haroro dekenai—idia laloa be kavakava. Iseda abidadama Dirava ena Hereva dekenai idia hevasehalaia, badina edia mauri lalonai idia be kohu, bona harihari idia abia diba tauanina hamoalea karadia, idia laloa momo.
22, 23. Noa ena negai idia vara gaudia be edena bamona ia hamomokania Iehova be hisihisi bona metau amo Dirava idia badinaia taudia do ia hamauridia?
22 Dirava idia lalokau henia lasi taudia be Iehova ena abidadama hesiai taudia do idia hadikadia ela bona hanaihanai, a? Lasi momokani! Noa ena negai dahaka ia vara? Dirava ia hereva neganai, Noa be lagatoi ai ia vareai. Bena, nega korikori ai, ‘tanobada henunai ena ranu ia makohia bona ia daekau mai, bona guba ena abata koua iduaradia be idia kehoa.’ Abata ia daekau ela bona ororo iboudiai idia koudia. (Genese 7:11, 17-20) Edia dagi ena maka idia rakatania anerudia be edia tanobada tauanina idia rakatania bona lauma gabuna dekenai idia giroa. Nefilim bona Dirava idia laloa lasi taudia idia mase, Noa ena sisiba idia kamonai lasi taudia iboudiai danu idia mase. To, Noa, iena adavana, edia natudia toi bona edia adavadia iboudiai idia roho mauri. Unai dainai, Iehova ese Noa bona iena ruma bese be lagani momo idia haheaukalaia hahetohona amo ia hamauridia.
23 Hari inai negai danu, Dirava ese Ia idia kamonai henia taudia do ia hamauridia, a? Ita daradara lasi. Ia gwauhamata do ia karaia, bona ia koikoi diba lasi.—Tito 1:2; 2 Petero 3:5-7.
[Footnotes]
a “Anomia ena anina be Dirava ena taravatu idia laloa lasi eiava idia gwau-edeede henia karana; asebeia [‘Dirava laloa lasi taudia’ ena hereva gwauraia ena anina dalana ma ta] be unai bamona idia laloa Dirava dekenai.”—Vine’s Expository Dictionary of Old and New Testament Words, Volyum 4, rau 170.
Oi Laloatao, A?
◻ Edena dala ai Petro ia hahedinaraia Iehova be hisihisi bona metau amo Dirava idia badinaia taudia ia hamauridia diba?
◻ Dahaka kara ese Noa ena negai idia vara dagedage karadia idia havaraia?
◻ Tanobada ibounai Abata ia vara gwauraia dainai, Noa ena maduna be dahaka?
◻ Noa ena negai idia vara gaudia bona iseda negai idia vara gaudia be edena bamona idia tamona?
[Picture on page 12]
Lagatoi karaia gaukarana be lagani momo do ia abia bona ia be mai ena hekwarahi
[Picture on page 13]
Noa ese nega ia atoa iena ruma bese be lauma dalana dekenai ia hagoadaia totona