Hereva Momokani Ibounai Oi Abia!

FRANCISCO ia gwau: “Guna, unai ladana be lauegu Bible lalonai lau itaia lasi.” Ia be Iehova ena Witness taudia ida idia kiki hebou bona ladana Iehova idia herevalaia. Momokani, iena Bible lalonai Dirava ena ladana ia itaia diba lasi. Iena Bible be Portuguese gadona gauna, Almeida Bible, lagani 1969 ai idia karaia gauna unai. Iehova ena ladana be unai Bible lalonai ia hedinarai lasi. Francisco be Katolik tauna, Brazil dekenai. Wiki iboudiai, Sunday dinadia ai, ia lao Mass dekenai bona ia moale iena Bible be iena ruma dekenai ia duahia neganai. To Iehova ena ladana dainai ia hoa.

Dirava be Daika?

Unai wiki murinai, Witness tauna ese ma Almeida Bible ta ia mailaia. Unai Bible rua idia hahegeregerea Salamo 83:18 dekenai. Bona dahaka idia davaria? Lagani 1966 ai idia karaia Almeida Bible lalonai, Salamo 83:18 ia gwau: “Oi sibona emu ladana be IEHOVA, oi be Atai Momokani tanobada ibounai ataiai!” To, lagani 1969 ai idia karaia gauna lalonai, “IEHOVA” idia kokia bona ena gabu ai “LOHIABADA” idia torea. Witness tauna ia gwau: “Oi itaia, hereva ta idia haidaua.” Bena ia henanadai ia gwau: “ ‘Lohiabada’ be ladana ta lasi, ani?” Francisco ia gwau: “Momokani.” Bena mai ena badu sisina ia be ma ia gwau: “Edena bamona unai kara idia karaia diba?”

Unai bamona ia henanadai dainai dala ia kehoa Dirava ena ladana dekenai iena diba ia tahua totona. Hegeregere, Francisco ia davaria, The Catholic Encyclopedia (1910) lalonai ia gwau Iehova be “Dirava ena ladana korikorina Taravatu Gunana lalonai.” Danu, ia davaria, “Taravatu Gunana” ena hereva kahirakahira ibounai be Heberu gado ai idia torea, bona unuseniai Iehova ena ladana be nega kahirakahira 7,000 ia hedinarai. Bema gado ia hahanaia tauna ta ese Iehova ena ladana ena gabu ai dagi ta ladana, Lohiabada, ia torea, unai be maoro lasi. Francisco ia ura hereva momokani ibounai Iehova ena ladana dekenai ia diba, bona unai diba be Bible ena amo bona diba tahua namonamo karana amo ia abia, bona iena tahua karana idia hakaua namonamo neganai.

Iesu ena Dagi be Dahaka?

Inai magasin ena hereva ginigunana ia hahedinaraia, inai tanobada tomadihodia ese hereva momokanidia momo idia hamiroa. Iehova ena Witness taudia be ruma ta ruma ta dekenai idia haroro neganai, idia be mai edia dala taunimanima edia lalohadai idia diba totona. Momokani, gabu idauidau ai taunimanima edia lalohadai be idauidau, to taunimanima momo ese gau haida idia abia dae. Hegeregere, bema haida idia nanadaidia, ‘Dirava be daika?’ ruma taudia haida idia gwau, ‘Iesu.’ Unai haere ena anina be Iesu be Siahu Ibounai Diravana. To unai lalohadai be momokani, a?

Inai oi laloa: Iesu be ena Tamana dekenai ia guriguri, ia gwau: “Mauri hanaihanai be inai, idia ese oi Dirava momokani tamona do idia diba, bona Iesu Keriso danu, oi ese oi siaia tauna.” (Ioane 17:3) Iesu ese sibona ia gwauraia lasi, to iena guba Tamana, ia gwauraia “Dirava momokani tamona.” Unai dainai, Iesu murinai idia raka taudia ginigunadia ese Iesu idia hereva henia neganai edia hereva be maoro, idia gwau: “Momokani, oi be Dirava ena Natuna.” Iesu danu ia gwau: “Lau be Dirava ena Natuna.” Unai dainai hereva momokani be inai: Iesu be Siahu Ibounai Diravana lasi, to ia be Iehova Dirava ena Natuna.​—Mataio 14:33; Ioane 10:36.

Tanobada Dekenai Dahaka Do Ia Vara?

Hari inai negai idia noho taudia dekenai bona tanobada dekenai dahaka do ia vara? United Nations General Assembly dekenai ia hereva neganai, John F. Kennedy, United States ena president gunana ta, ia gwau: “Ita be mai iseda siahu hari ia noho uruna be uru namo hereana ai ita halaoa, uru iboudiai ia hereaia uruna ai ita halaoa​—eiava uru dokona ai ita halaoa.” Toana be, hari inai negai, tanobada lohiadia danu ese unai lalohadai idia abia. Nega momo Iehova ena Witness taudia ese edia haroro gaukara idia karaia neganai, taunimanima idia hamaorodia tanobada ena dokona ai inai Tanobada planeti be lahi lalonai eiava niuklia tuarina lalonai do ia ore. Unai lalohadai do idia hamomokania toho totona, Apokalupo 21:​1 ena hereva idia gwauraia, ia gwau: “Vadaeni guba matamatana bona tanobada matamatana lau itaia. Badina be guba gunana bona tanobada gunana be idia lao ore vadaeni. Davara danu be ia ore vadaeni.”

Bible lalonai nega momo “tanobada” ia gwauraia neganai, anina be tanobada korikorina lasi, to tanobada taudia. Haheitalai ta be Salamo 96:1 dekenai ia noho, ia gwau: “Ane matamata umui abia, Iehova ena. Tanobada ibounai, ane umui abia, Iehova ena.” (Hanua Pavapavadia Ginigunana 2:​1, 2 itaia danu.) Apokalupo 21:​1 dekenai, “tanobada gunana” ena anina be inai planeti lasi, to kara dika taudia tanobada dekenai, do idia ore taudia unai. Unai dala amo, Paradaiso be tanobada dekenai do ia vara lou. (Luka 23:43; 2 Tesalonika 1:​6-9; Apokalupo 21:4) Unai hereva be Bible ena hereva ma haida hegeregerena. Bible ia gwau tanobada korikorina do idia hadikaia ore lasi. Hegeregere, Salamo 104:5 ia gwau: “Tanobada be ena badina latanai ia haginia; do ia mareremarere lasi ela bona hanaihanai.” (Kohelete 1:4 itaia danu.) Momokani, Iehova ese “tanobada ia karaia . . . taunimanima ese idia noholaia” ela bona hanaihanai totona.​—Isaia 45:18.

Dahaka Dainai Hereva Momokani Ibounai Oi Abia be Namo?

Hari inai negai, taunimanima ese hereva koikoi idauidau idia abia dae. Unai hereva haida be ataiai ai gwauraia vadaeni. To, bema ruma tauna ia ura momokani diba ia tahua namonamo, Francisco ia ura hegeregerena, Iehova ena Witness taudia idia moale, badina dala ia noho Bible ena hereva momokanidia be unai taunimanima ida do idia kikilaia hebou totona.

Bema hereva momokani ibounai ita abia lasi, reana dika do ita davaria. Haheitalai ta be inai: Iesu be tanobada dekenai ia noho neganai, taunimanima momo idia laloa ia be Maria bona Iosef edia natudia amo natuna ta sibona, Nasareta amo ia mai kapenta tauna ta sibona. Unai dainai, Iesu ena hereva idia kamonai henia lasi. Edia lalohadai ia momokani sisina. Iesu be Maria ena natuna, lauma helaga ese Maria ia harogorogoa dainai ia vara tauna. Ia be Iosef ena heubu natuna, bona ia ese kapenta gaukarana ia karaia. (Mareko 6:3) To Iesu ena sivarai be unai sibona, a? Lasi! Ia be Mesia bona gabeai “king ibounai edia King” ai do ia lao! (Apokalupo 17:14; Luka 1:​32-35; Kara 2:36) Iesu ena sivarai ena kahana ta sibona idia abia diba dainai, taunimanima momo ese hahenamo badana bona idauna ta idia reaia​—tanobada dekenai Iesu ida idia hebamo lasi.

Hereva Momokani Ibounai Oi Tahua

Bible idia duahia taudia ese Berea hanuana (hari ena ladana be Véroia) Makedonia gunana dekenai idia diba namonamo, badina Keristen taudia ginigunadia edia nega ai unuseniai idia noho taudia edia kara be namo. Dahaka idia karaia? Bible ia gwau: “Hereva [aposetolo Paulo ese ia harorolaia herevana] idia kamonai bona idia ura henia danu. Dina ibounai Buka Helaga idia tahua, inai hereva ia momokani eiava lasi.” Unai dainai dahaka ia vara? “Idia momo ese abia dae taudia idia lao. Helene lohia taudia momo danu, tatau bona hahine, hereva idia abia dae.”​—Kara 17:​11, 12.

Idau negai, Dirava ena peroveta taudia danu idia kara namo. Mesia ena amo do ia mai hahemaurina “idia henanadailaia, bona idia tahua goadagoada.” (1 Petero 1:10) Dirava ese edia kara ia hanamoa. Vadaeni, ia hedinarai idia gaukara goadagoada be gau badana. Bible amo hereva momokani ibounai abia dalana be inai: Hanaihanai Bible ena hahediba herevadia ita tahua bona edia anina ita laloa namonamo!

Reana oi henanadai, ‘Edena bamona unai kara lau hamatamaia be namo?’ Hahine ta Brazil dekenai ese Keristen buka haida ia duahia murinai ia toretore ia gwau: “Ai [ia mai ena adavana] diba haraga namona be unai bamona diba gaudia ma haida ai abia, aiemai henanadai momo edia haere do ai diba totona . . . Mani emu kara, lau be Bible ta edena bamona lau abia, bona iseda guba Tamana dekenai egu diba do lau habadaia totona lau do idia durua bukadia ma haida, be edena bamona do lau abia diba?” Dala maorona ia badinaia unai: Gau badana be Bible, bona Bible ena hereva be mai momokani ida idia gwauraia bukadia, ia duahia. Bema oi danu oi ura hereva momokani ibounai do oi diba, Iehova Dirava dekenai emu kudouna oi kehoa bona oi noia oi do ia durua totona. Inai lalona hagoadaia herevadia oi laloa: “Bema unai ta be aonega lasi, namona be Dirava do ia noia, vadaeni Dirava ese ia dekenai do ia henia. Badina be Dirava ese taunimanima ibounai dekenai gau namodia ia henia noho. Bona tau ta bema ia be gau ta lasi, vadaeni Dirava do ia noia neganai Dirava ese do ia badu henia lasi. To unai tau ia noinoi neganai, namona be ia abidadama sibona, bona daradara lasi.”​—Iakobo 1:​5, 6.

Taunimanima milion milion be Iehova ena Witness taudia ida Bible idia kikilaia hebou. Unai dala amo, hereva momokani idia henanadailaia bona idia tahua goadagoada. Diba maorona Dirava momokanina dekenai bona Iesu Keriso dekenai idia abia bona idia badinaia neganai mauri hanaihanai do idia abia diba. (Ioane 17:3) Bema oi tahua goadagoada bona hereva momokani ibounai oi davaria, unai hahenamo badana do oi abia diba.

[Picture on page 7]

Hereva momokani ibounai Iesu dekenai be ia be Mesia, ia be kapenta tauna ta sibona lasi