Basileia Haroro Ripoti

Sivarai Namona be “Tanobada ena Kahana Ibounai” Dekenai Idia Harorolaia

“BASILEIA ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” Iesu ena mase negana ia kahirakahira neganai, ia ese ena hahediba taudia dekenai unai hereva ia gwauraia. Ia toreisi lou murinai, ma ia gwau: “Lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.” (Mataio 24:14; Kara 1:8) Hari inai negai, tano 200 ma haida lalodiai, Peru, South America ena tano dekenai danu, unai peroveta herevadia idia guguru noho.

Unai gabu hairaina dekenai, Witness taudia 32,000 bona ma haida ese sivarai namona idia harorolaia, bona edia teritori be tanobada ena kahana daudau gabuna momokani: Andes ororodia edia lata be mita 4,200 bona 4,500 huanai, bona Amazon ena uda gabuna be siahu herea, unuseniai vanagi mo sibona amo taunimanima idia haroro henidia diba. Peru ena branch amo inai sivarai idia torea:

◻ “Uda gabudia dekenai, special pioneer taudia 8 ese haroro gaukara idia karaia, bona idia ese vanagi rua idia gaukaralaidia, unai gabu dekenai idia gwauraidia lanchas. Unai vanagi be idia maragi, ranu lalonai 30 sentimita sibona idia diho, unai dainai, dobu lasi sinavai maragidia dekenai idia heau diba gabu matamatadia dekenai sivarai namona idia harorolaia totona. Ia mai hari, Peru ena Amazon Valley dekenai unai vanagi idia gaukaralaia tadikakadia ese magasin, buka, bona Bible tausen momo idia hariharilaidia. Unai gaukara dainai, kongregesen matamatadia 4 idia haginia, bona ma gabu daudau 5 dekena amo ripoti idia siaia bona hebou idia karaia hanaihanai. Ai laloa gabeai unai gabu daudau dekenai idia gaukara grup 5 be kongregesen 5 ai do idia lao.”

◻ Uda ena gabu ta dekenai Trans-Andean oiela paipa bona pamua siteisini ia noho dainai, taoni ta ia tubu ia lao. Unai gabu amo paipa dekenai oiela idia siaia bona Andes ororo ia hanaia bona ia lao dina diho kahana ena kone dekenai. Unai oiela paipa dainai gaukara taudia momo idia noho, unai dainai unai taoni dekenai inuinu gabudia eiava pub idauidau be 20, bona taunimanima idia gwau unai be inuinu kekero bona moale davaria hanuana. To, special pioneer taudia ese haroro gaukara idia karaia loulou murinai, taunimanima momo ese Basileia ena sivarai idia abia dae, bona hari, unai taoni dekenai pub 4 sibona idia noho! Vanegai, sekit naria tauna ia vadivadi neganai, taunimanima 189 idia mai iena pablik haroro idia kamonai henia totona. Hari, unai taoni dekenai pablisa taudia be 7 bona hebou iboudiai dekenai idia mai taudia be 45 ia hanaia. Nega daudau lasi, Iehova ena hahenamo dainai, kongregesen ta ai do ia lao diba.

◻ Peru ena siti badana, Lima, dekenai kongregesen iboudiai be 221, bona idia ta lalonai, lagani 29 tauna ta ia noho, ia ese hereva momokani ia kamonai henia dalana ena sivarai ia gwauraia hedinarai. Ena lagani be 13 neganai, sikuli ia rakatania, bona ia ese raskol taudia ia bamodia bona ia heatu, drag ia ania, bona ia sihari kava. Lagani rua lalonai ami ena gaukara ia karaia murinai, lalona gorere ia abia matamaia. Bena, lagani 1983 ai, mai ena manau taihuna ta ese ruma ta ruma ta haroro gaukara ia karaia neganai, unai tau ia davaria. Unai neganai, unai tau ese tanobada matamatana lalonai lalokau bona maino sivaraina ia kamonai henia matamaia. Ia dekenai Bible stadi ia hamatamaia, bona lalokau heduru karana kongregesen dekena amo ia abia dainai, bona Iehova dekena amo goada ia abia dainai, ia ese ena kara dika karadia ia rakatania diba. Lagani 1986 dekenai, ia ese bapatiso ia abia bona hari ia be hesiai tauna ena gaukara kongregesen dekenai ia karaia.

Momokani, Iesu ena hereva be maoro, ia gwau Basileia be “tanobada ena kahana ibounai” dekenai do idia harorolaia, bona Peru dekenai iena hereva ia guguru noho. Unai tano dekenai haroro gaukara dainai, hereva momokani totona idia hitolo bona idia ranu mase taudia momo herea ese namo bada idia davaria.