“Umui Ta Ta Totona Do Umui Guriguri”

IEHOVA be “guriguri Kamonai Henia Diravana.” (Salamo 65:2) Mai edia kudouna ibounai ida Dirava idia abidadama henia taudia edia guriguri be nega ibounai ia kamonai henidia, bona ita diba tadikaka totona do idia guriguri neganai ia kamonai danu.

To dahaka dainai tadikaka totona do ita guriguri? Dahaka gaudia ita gurigurilaia diba? Bona tadikaka totona ita guriguri neganai, dahaka karadia Dirava ena amo edia anina ita habadaia diba?

Dahaka Dainai Tadikaka Totona Ita Guriguri?

Buka Helaga ese Iehova ena taunimanima ia hagoadaia idia ese tadikaka totona do idia guriguri. Paulo ese Dirava ia guriguri henia neganai, ia ese ma haida totona ia guriguri danu. (Kolose 1:3; 2 Tesalonika 1:11) Danu, hahediba tauna Iakobo, ia torea, ia gwau: “Umui ta ta totona do umui guriguri.”​—Iakobo 5:16.

Dirava ena hesiai taudia totona ita guriguri neganai namo ia havaraia diba. Unai ia hedinarai Iakobo 5:​13-18 dekenai, unuseniai ia gwau namona be lauma dalanai ia gorere Keristen tauna be kongregesen elda taudia dekenai ia lao, “idia ese ia dainai do idia guriguri, bona ia dekenai dehoro do idia atoa, [Iehova] ena ladanai.” Unai lalohisihisi tauna ese elda edia guriguri herevana ia kamonai henia neganai, reana goada do ia abia, bona do ia lalo-parara Dirava ese iena guriguri danu do ia haere henia diba. (Salamo 23:5; 34:18) Unai lalohisihisi tauna ida do idia guriguri, to unai sibona lasi, elda taudia idia durua toho lauma dalanai do ia goada lou totona. Idia be Buka Helaga ena hereva ia dekenai idia kikilaia, bona unai be dehoro namona ia dekenai idia bubua bamona.

Danu, Iakobo ia gwau: “Inai guriguri mai abidadama danu ese gorere tauna do ia hanamoa. [Iehova] ese iena mauri do ia hanamoa.” Oibe, elda taudia edia “guriguri mai abidadama” karana amo, lauma dalana dekenai ia gorere tauna ese heduru ia abia diba. Ma danu, bema unai tau ia ura Buka Helaga ena hereva amo heduru do ia abia, Dirava ese lauma dalanai “iena mauri do ia hanamoa.” To bema kara dika badana ia karaia dainai, lauma dalanai ia gorere, be edena bamona? Bema unai tau be ia helalo-kerehai, Iehova ese iena kerere do ia gwauatao.

“Unai dainai” Iakobo ia gwau, “umui ta ta dekenai emui kara dikadia do umui gwauraia hedinarai, bona umui ta ta totona do umui guriguri. Vadaeni unai neganai Dirava ese emui mauri do ia hanamoa. Kara maoromaoro tauna ena guriguri be mai ena siahu. Inai bamona guriguri ese taunimanima ia durua diba. Elia . . . ia guriguri goadagoada, medu do ia diho lasi. Vadaeni lagani toi bona hua 6 lalonai medu ia diho lasi. Ma Elia ia guriguri lou, vadaeni medu guba dekena amo ia diho, bona tano ese iena anina ia havaraia.” (1 Hanua Pavapavadia 17:​1-7; 18:​1, 42-45) Kara maoromaoro tauna ena guriguri be mai ena siahu bema Dirava ena ura hegeregerena ia guriguri.​—1 Ioane 5:​14, 15.

Dahaka Gaudia Do Ita Gurigurilaia Diba?

Ita bamoa abidadama tauna totona ita guriguri neganai, gau momo ita gurigurilaia diba. Hegeregere, Paulo ese taunimanima ia noidia ia totona do idia guriguri ia ese sivarai namona do ia hahedinaraia namonamo totona. (Efeso 6:​17-20) Bema ita diba tau ta be hedibagani ia abia, dahaka do ita karaia? Namona be ia totona do ita guriguri, ‘kara kerere do ia karaia lasi totona’ bona Dirava do ia durua hedibagani ia hanaia totona, bona Satana Diabolo ena imana dekena amo do ia hamauria totona. (2 Korinto 13:7; Mataio 6:13) Danu, bema tauanina dalanai tau ta ia gorere neganai, iseda guriguri dekena amo Iehova ita noia diba unai tau ia hagoadaia ena gorere ia haheaukalaia totona.​—Salamo 41:​1-3.

Iehova idia abidadama henia taudia ese dagedage idia davaria neganai, idia totona do ita guriguri be maoro. Paulo bona idia bamoa taudia ese dagedage bada idia davaria, bona ia ese Korinto Keristen taudia dekenai ia gwau: “Umui ese ai do umui durua noho emui guriguri dekena amo. Vadaeni emui guriguri momo be Dirava ese do ia kamonai, bona ia ese ai do ia hanamoa. Unai neganai taunimanima hutuma be ai do idia laloa, bona Dirava do idia hanamoa bada.” (2 Korinto 1:​8-11; 11:​23-27) Ena be dibura rumana dekenai ita idia atoa, to ma tadikaka haida totona ita do guriguri diba idia ese dagedage idia davaria neganai, bona laloaboio lasi, Iehova ese “kara maoromaoro taudia edia guriguri ia kamonai henia.”​—Hereva Lada-isidia 15:29.

Iehova ena orea dekenai maduna bada idia huaia tadikakadia totona ita guriguri be gau badana. Hegeregere, iseda orea idia hakaua taudia bona “hesiai tauna mai ena kamonai bona mai ena kara maoromaoro” oreana dekena amo lauma aniani idia hegaegaelaia taudia. (Mataio 24:​45-47) Hegeregere, Iehova ena Witness taudia edia Hakaua Oreana ena memba taudia totona ita guriguri be namo, bona Dirava ita noia “Lauma Helaga ese aonega [idia] do ia henia” totona.​—Efeso 1:​16, 17.

Keristen ena Kara Ia Habadaia

Abidadama tamona taudia totona ita guriguri neganai, ita hahedinaraia ita be mai iseda hebogahisi, ita sibona eda ura ita tahua lasi, bona ita be mai iseda lalokau. Ita sibona eda ura ita tahua lasi, to mai iseda lalokau danu iseda tadikaka bona taihu ita hebogahisi henidia neganai, unai be Paulo ena hereva ia hamomokania, ia gwau lalokau be “sibona ena gau ia tahua lasi.” (1 Korinto 13:​4, 5) Ita ta ta totona ita guriguri noho karana be dala namona “haida edia namo do [ita] tahua, to [iseda] namo sibona do [ita] tahua lasi.” (Filipi 2:4) Lauma dalanai taunimanima do idia goada totona ita guriguri neganai, idia kahirakahira dekenai ita mai bona Iesu ena diba tahua taudia idia hahedinaraia lalokau karana ita hahedinaraia.​—Ioane 13:​34, 35.

Haida totona ita guriguri neganai, unai ese lalo-tamona karana ia habadaia. (1 Petero 3:8) Ita hebogahisi henidia, idia laloa bada gaudia bona edia hekwakwanai mamina ita abia. Tauanina ta dekenai, bema imana ta ese bero ia davaria, ena imana ma ta ese ia durua bero ena hisihisi mamina ia koua toho totona. (1 Korinto 12:​12, 26 oi itaia.) Unai hegeregerena, hisihisi idia ania tadikaka bona taihu totona ita guriguri neganai, unai ese iseda hebogahisi karana idia dekenai ia habadaia bona ita ia durua ita lalodia noho totona. Bema iseda guriguri dekenai abidadama tamona Keristen taudia ita laloaboio, ita ese gau namona ita reaia, badina Dirava bona Keriso ese idia do idia laloaboio lasi.​—1 Petero 5:​6, 7.

Ita ta ta totona ita guriguri neganai, Dirava ia hahedinaraia kara idauidau ita habadaia. Ita ia durua idia dekenai lalo-parara bona haheauka karana ita habadaia totona. Reana idia dekenai iseda badu karana ia kokia, bona dala ia kehoa hagoadaia karadia ita laloa totona, bona unai neganai lalokau bona moale taudia ai do ita lao diba. Danu, ita ta ta totona ita guriguri neganai, maino bona lalo-tamona karana Iehova ena taunimanima dekenai ia habadaia.​—2 Korinto 9:​13, 14.

Ita Ta Ta Totona Ita Guriguri Noho

Paulo bamona, ita ese haida ita noia diba idia guriguri ita totona. Iseda turadia be ita danu idia guriguri diba, to unai sibona lasi, sibodia idia guriguri neganai ita totona idia guriguri diba, bona guriguri lalonai iseda ladana idia gwauraia, iseda hekwakwanai idia gwauraia, bona idia noinoi Dirava ese ita ia durua totona. Bona heduru do ia ginidae, badina “hisihisi bona metau [Iehova] badinaia taudia dekenai idia noho neganai, [Iehova] ese inai hisihisi dekena amo idia ia hamauria diba.”​—2 Petero 2:9.

Ita totona idia guriguri Iehova ena Witness taudia be hahetoho idia abia danu​—reana idia abia hahetoho be bada to ita abia hahetoho be ia maragi. To, ita totona idia ese Pavapava Hanaihanaina dekenai idia guriguri, reana iseda hekwarahi dainai idia tai. (2 Korinto 2:4; 2 Timoteo 1:​3, 4 itaia danu.) Namona be edia hebogahisi karana dainai ita moale! Vadaeni, ita moale dainai bona ita kikilaia vadaeni herevadia dainai, namona be ita ta ta totona do ita guriguri.