Middle East Dekenai mai Moale Danu Idia Haheauka

Lebanon amo Iehova ena Witness taudia be henunai ai torea hagoadaia sivaraina idia siaia

BEIRUT dekenai, lagani 1990 ena hesiai laganina be ipidi edia regerege dikana lalonai idia hamatamaia. Bena September 1989 ena dokona amo ia lao January 1990 huanai regerege idia koua.

Unai hua lalonai, pablisa edia namba be nega ginigunana ai 2,659 dekenai (November lalonai) ia daekau; 1989 hesiai laganina lalonai edia namba be 2,467. Taunimanima 44 idia bapatiso, bona hua ta ta iboudiai heduru pioneer taudia edia namba ena averes be 65. Nega ginigunana ai, Bible stadi 2,000 bona ma haida idia ripotilaia, bona ai be gabeai negana ena gaukara ai laloa hegaegae.

To East Beirut dekenai, tuari ia matamaia lou; unuseniai be kongregesen momo, bona iseda tadikaka momo be unai tano ena gabu ma haida dekenai idia heau siri. Dina momo lalonai, unai gabu edia kongregesen edia sivarai ai diba lasi, bona haroro ripoti iboudiai ai abia lasi. To herevana, idia heau siri tadikaka be idia heau henia kongregesen danu idia gaukara hebou, bona unai tano dekenai ruma ta ruma ta gaukara idia karaia noho bona namo idia havaraia. Iseda tadikaka momo edia ruma be lahi amo eiava bomu amo idia hadikaia ore. Taihu ta ia mase.

Mai abidadama danu Iehova dekenai heduru bona hahekau dalana ai tahua. Gari lasi pioneer taudia idia volantia lauma aniani, tauanina aniani bona ranu be tuari gabudia dekenai idia noho tadikakadia dekenai idia laohaia totona. Iehova bona tadikaka idia lalokau henia dainai, idia be dala haida idia hanaia​—unai dala henunai be bomu idia noho. Taunimanima idia itaia iseda tadikaka edia ruma bese be heduru idia abia. Unai idia itaia neganai, unai be haroro namona. Taunimanima be Iehova Dirava ena tomadiho momokanina lalonai idia lalo-tamona neganai, lalokau korikori be dahaka ia karaia diba idia itaia.​—Ioane 13:​34, 35; 15:13.

Unai hesiai laganina lalonai, tadikaka be iseda magasin iboudiai idia abia. Gima Kohorona dekenai idia karaia hegeregerena, Arabic gadona dekenai, Noga! magasin be English gado ena magasin ida idia printaia nega tamona. Unai idia hamatamaia January 8, 1990 gauna dekenai. Witness taudia bona kamonai taudia idia moale bada herea. Namo herea gauna danu be Arabic gadona dekenai, Toi Tamona Oi Abia Dae be Namo, Eiava? buklet bona The Bible​—God’s Word or Man’s buka bona Lau Egu Bible Sivarai Buka idia halasia matamata.

Ena be Beirut dekenai, faktori idia koua bona ma orea haida be gaukara gabudia idia koua, to lauma aniani idia siaia noho. Unai tano dekenai, moni gaukara dalana ia dika. Gabu momo dekenai, paua, ranu, bona telefon be lasi. Namona be iseda tadikaka haida edia sivarai idia gwauraia, edena dala ai, lagani 15 lalonai, tuari ena dika idia haheaukalaia to idia do moale noho.

“Gau Namodia”

Beirut tadikaka ta ia torea, ia gwau: “Gau ginigunana be, Iehova lau tanikiu henia bada badina ia be iena tomadiho goevadae oreana lalonai ita ia naria noho, herevana aiemai noho be mai hekwarahi bada herea. Idia vara karadia lalonai, lau dekenai moale idia havaraia ekspiriens lau davaria, bona lau laloa idia be hari tuari ena gau namodia.

“Bomu idia negea momo negana lalonai, ai be ruma ena vadavada dekenai emai dekena taudia danu ai helai hebou, badina bomu idia negea neganai, unai gabu be dika momokani lasi. Idia dekenai Dirava ena Basileia ai harorolaia momo, ia be taunimanima edia hekwakwanai hanaia dalana tamona; bona nega momo iseda Dirava, Iehova, ai guriguri henia. Taunimanima ibounai be unai idia diba.

“Nega haida, dina momo lalonai, bomu idia negea, bona ai be hebou ai lao henia diba lasi. Unai dainai, Gima Kohorona lau mailaia bona vadavada dekenai lau helai neganai, lau stadilaia. Unai ese iseda dekena taudia ia veria. Ai be Iehova ena Witness taudia dainai idia haida be ai dekenai idia hereva lasi. To aiemai ruma be bomu ese ia botaia neganai, aiemai tadikaka be lalokau idia hahedinaraia dainai idia hoa bada herea. Idia ura ai danu idia hereva hebou. Unai dala amo ai be Noga! sabskripsen ai henia diba.

“Unai ekspiriens dainai, aiemai lalona ia hagoadaia hereva momokani ai herevalaia noho totona. Iehova ita tomadiho henia bona ita matauraia bona ita hanamoa be maoro.”

“Iehova ena Ladana ese Lau Ia Hamauria”

Ras Beirut Kongregesen ena tadikaka ta ia gwau: “Lauegu hahine, aiemai memero maragi rua, bona lau be Beirut ena west kahana dekenai ruma ta ruma ta gaukara ai hamatamaia. Adorahi lalonai, lauegu ruma dekenai, English gado hebou ta ai karaia. Hanuaboi 6:30 ai, ia dibura vadaeni. Dala dekenai idia loaloa taudia be ipidi idia dogoatao tataudia sibona. Bomu momo idia negea. Aiemai ruma idia noholaia taudia momo idia heau oho vadaeni. Ranu bona paua be lasi. Bena iduara dekenai pidipidi ta ai kamonai.

“Lauegu hahine ia laloa aiemai dekena tauna ta be ranu eiava paraoa ia ura bena ia ese iduara ia kehoa. Ipidi idia dogoatao tatau 4 idia gini. Idia be ipidi lauegu hahine dekenai idia poinia bona lau totona idia henanadai. Unai wiki lalonai, tatau 9 be unai dala amo edia ruma amo idia abia oho bona maoromaoro idia hamasedia. Ipidi idia dogoatao tatau be lau idia itaia neganai, edia ipidi be lauegu kwarana dekenai idia poinia bona lau idia hamaoroa idia danu lau lao. Lau hamaorodia: ‘Lau be umui danu do lau lao, to dabua lau hahedokilaia guna.’ Lau be mai kudou ibounai ida Iehova lau guriguri henia, iena heduru lau noia. Lau guriguri murinai, lauegu mamina ia namo bona unai ipidi idia dogoatao bona hagaria toana idia karaia tataudia be taunimanima iboudiai bamona lau lalodia. Gari lasi dekenai lau hereva henidia diba.

“Lau nanadaidia: ‘Oi ura dahaka lau karaia? Namona be ruma lalonai ita herevahereva sisina bena ita lao.’ Daiutu badana lalonai ai vareai murinai edia gunalaia tauna ese lau ia henanadai henia: ‘Taunimanima edia ruma lalonai oi vareai bona oi haroro henidia totona gwaumaoro be edeseni oi abia?’ Lau haere henia: ‘Oiemu ura oi karaia totona, ipidi oi dogoatao, bona tau ta ese oi ia koua lasi. Lau be Iesu ese ai ia hadibaia ai harorolaia maino sivarai namona lau abia lao.’ Bena lau be Iehova ena Witness taudia edia hahediba hereva bona gaukara lau herevalaia. Lau be Iehova ena ladana lau gwauraia neganai, idia gwau: ‘Iniseniai oi ai henanadai henia sibona be hegeregere vadaeni. Ai danu oi lao be anina lasi.’ Sedira, idia ta be tadikaka ta ia diba. Ia gwau: ‘Hari tau be Jarjoura bamona.’

“Hora tamona bona mai kahana lalonai unai ipidi idia dogoatao taudia ai haroro henidia bona edia henanadai ai haerelaidia. Bena, edia motuka dekenai lau idia atoa lasi, ma haida dekenai idia karaia bamona, to idia gwau idia sori, lau idia rosia, idia gwau bema lau ura neganai, lau do idia durua bena idia lao. Unai ibounai lalonai, Iehova ese lau ia naria ena mamina lau abia. Dabai, ruma ta ruma ta gaukara lau karaia dainai bona adorahi lalonai, hebou dekenai lau lao dainai unai ese lau ia hagoadaia lau gini goada totona. Momokani, Iehova ena ladana ese lau ia hamauria.”​—Hereva Lada-isidia 18:10.

“Iehova ese Ai Ia Naria”

Ma tadikaka ta be Beirut amo ia torea, ia gwau: “Ia be Wednesday, January 31, 1990. Lau be lauegu tadikaka ida lau gaukara hebou taihu ta ena ruma dekenai, bena tuari idia hamatamaia lou. Bomu be gabu ibounai dekenai idia hapoua. Tuari ia dika dainai, ruma dekenai ai giroa diba lasi. Ena be unai taihu ena paraoa haida sibona idia noho, iena heabidae karana be bada.

“Lauegu hahine totona lau laloa momo badina ia be Philippine hahine bona tuari ena dagedage kara dekenai ia manada lasi. To unai dina murinai, lauegu ruma dekenai lau giroa diba. Ruma edia kohu ese dala ia koua, to Iehova lau tanikiu henia badina lauegu ruma bese taudia idia namo. Idia laga-ani sisina bena bomu negea karana idia hamatamaia lou. Aiemai ruma kahirakahira ai ia noho tadikaka ta ena ruma dekenai sibona ai hunia. Ai ibounai be 5​—lauegu hahine, lauegu lagani rua natuna merona, lau, lauegu tadikaka bona iena hahine. Bomu, cartridge, bona roketi be ai kahirakahira dekenai idia moru, to Iehova ese ai ia naria. Dina rua lalonai, bomu momo idia negea; ai be tano dekenai ai hekure bona bomu ena kwalahu ai bonaia noho.

“Bomu idia pou ena rege ai kamonai neganai, ai be David ena hereva Salamo 18:​1-9, 16-22, 29, 30 dekenai ai laloa noho. Ena be unai neganai ai hekwarahi bada, bona ena be gau dikadia momo idia vara, to ai moale bona aiemai vairana toana be ai kiri diba. Iehova ai guriguri henia, bema ai mase neganai, ai mase haraga bona hisihisi dekenai ai mase lasi be namo. Toreisi lou dekenai aiemai helaro ia goada.

“Dina gabenai ia vara gauna be hoa bada herea gauna. Ai noho hehuni rumana kahirakahira dekenai bomu 25 idia moru, to ai ta be hisihisi ia davaria lasi. Oi laloa diba aiemai mamina be edena bamona ai diba Iehova ese ai ia naria neganai, a? Dabai neganai, ai laloa do ai heau oho be namo. Dala dekenai, lauegu motuka sibona be lahi amo idia araia lasi. Lau taria bomu gabudia ihuanai bona Iehova ena heduru dainai, ai be ia dika momokani lasi gabuna dekenai ai heau oho diba. Unuseniai, aiemai tadikaka be lalokau dekenai, dabua, aniani bona moni idia henia.

“Ena be hekwarahi momo ai davaria, ai moale badina Iehova be ai danu ia noho. Ia be hegeregere iena aneru ia siaia bomu ese ai idia abia lasi totona. (Salamo 34:7) Oibe, aiemai moale ia bada. To Aramagedono amo ai roho mauri neganai do ai moale bada momokani.”

Hekwakwanai Negana Ai Kara Haraga Heduru Idia Henia Karana!

Beirut ena gabu haida edia toana be hegeregere tano mareremarere ia vara bamona. Iseda tadikaka momo edia ruma idia dika eiava idia hadikaia ore. Vanegai idia vara gau dikadia dainai, Branch ena Komiti be tadikaka edia dabu gaudia haboua totona heduru haraga totona komitina ta idia karaia. Ia be February 16, 1990 ai ena gaukara ia hamatamaia. Unai be gabu dikadia vareai lou diba negana. Unai komiti ena gaukara be toi: lauma dalana dekenai tadikaka idia hagoadaia; edia dabu gaudia moni, aniani, bona ranu totona idia durudia; bona edia ruma hanamoa eiava haginia lou totona idia durudia.

Volantia totona idia boiboi be anina lasi badina dina ta ta iboudiai, momo idia mai daba momokani dekenai tadikaka idia durua totona. Heduru idia abia taudia edia hereva haida be inai:

Taihu ta, iena ruma idia hagoevaia bona idia haginia lou neganai, ia gwau: “Lau kamonai tadikaka be dika idia davaria neganai heduru idia abia. Hari lau itaia bona lau mamia.” Ena dekena hahine, Muslim hahine ta, be unai taihu ia hamaoroa: “Umui lalokau heheni momokani. Oiemu tomadiho be tomadiho momokanina. Lauegu hanua dekenai do lau heau oho bona unuseniai iboudiai lau hamaorodia iniseniai dahaka umui karaia.” Unai dekena hahine be volantia gaukara taudia dekenai aniani ia mailaia.

Buruka taihu ta ia gwau: “Lau laloa lau do umui vadivadi henia, to lau diba lasi Society be ta do ia siaia lauegu ranu ia mailaia totona.” Ia taitai bona ia mai ia durua totona tadikakana ia rosia.

Ruma bese taudia toi​—idia do bapatiso lasi pablisa tauna ta, mai ena hahine bona edia mero maragina​—idia vadivadi henidia bona maua badana idia henia; unai maua lalonai be rata, paraoa, inua ranuna, bona moni. Idia hamaorodia Iehova ena Witness taudia ese unai kara idia havaraia, unai tau ia gwau: “Lau be lagani 11 lalonai, Evangelical Church lalonai lau gaukara goadagoada. To Lebanon dekenai, unai tuari lagani 15 lalonai, idia be unai bamona kara ta idia karaia lasi edia memba taudia dekenai.” Ia hereva noho: “Inai orea tamona sibona be Dirava ena orea.” Unai tau bona iena hahine be May 1990 ai hebouhebou ta dekenai idia bapatiso.

Elda ta ia gwau: “Aiemai hereva be hegeregere lasi umui ai tanikiu henia totona, emui lalokau karana hisihisi idia davaria tadikakadia dekenai umui karaia dainai. Lau hoa bada herea tadikaka matamata haida, volantia taudia unai, be lauegu tamana sinana edia ruma idia haginia lou neganai, unai dainai lau tai. Aiemai dekena taudia danu, Witness lasi taudia, be unai kara idia itaia bona idia moale. Ai be Iehova bona iena orea dekenai ai moale bada herea idia be heduru momokani idia henia dainai. Salamo ia torea tauna ena hereva Salamo 144:15 dekenai be momokani: ‘Edia Dirava be Iehova besena taudia idia moale.’ ”

“Umui be Edena Bamona Taudia?”

Mai ena ruma bese taihu ta ia torea, ia gwau: “Lau ura Iehova bona iena orea ena lalokau dainai lau tanikiu henia. Bomu momo ese lauegu ruma idia botaia bona lahi ese ia abia. Taunimanima momo idia gwau ai hanamoa diba lasi. To, idia hanamoa lou bona hari ia gini noho, gau ta ese ia hadikaia lasi bamona; aiemai dala dekenai ruma momo idia gini bona idia be lahi amo idia araia eiava idia hadikaia ore.

Aiemai dekena taudia danu, Iehova ena Witness lasi taudia, idia henanadai: ‘Unai lalokau be edeseni amo ia mai? Umui be edena bamona taudia? Idia gaukara goadagoada, idia lebulebu lasi bona hemataurai kara idia hahedinaraia taudia be daidia? Umui dekenai lalokau bona oi sibona emu ura oi dadaraia karana ia henia Diravana lau hanamoa.’ Salamo 84:​11, 12 ena hereva be maoro: ‘Badina Iehova Dirava be dina bona kesi; ia ese harihari bada bona hairai ia henia. Idia raka maoromaoro taudia dekenai Iehova ese gau namodia do ia henia. Tuari Orea Iboudiai edia Iehova e, oi ia abidadama henia tauna be namo.’ ”

Tau ta, iena hahine bona natudia be Iehova ena Witness taudia, ia torea, ia gwau: “Lauegu ruma umui hanamoa lou dainai lau ura umui lau tanikiu henia. Emui gaukara amo, hari inai negai ita itaia momo lasi Keristen lalokau korikorina ia hahedinaraia. Namona be Dirava ese emui gaukara ia hanamoa.”

Elda ta ena ruma idia hanamoa lou murinai, ia gwau: “Aiemai uduna ia hegeregere lasi aiemai kudou ena lalona ia gwauraia hedinarai totona. Aiemai hereva be hegeregere lasi Iehova bona iena orea ai tanikiu henia totona. Aiemai hekwakwanai badana lalonai, mamina ai abia Iehova be ia kahirakahira. Emui lalokau ese lauegu ruma bese taudia iboudiai ia durudia ma dabu taudia haida idia durudia totona.”

April lalonai, Lebanon dekenai, taunimanima 194 be heduru pioneer gaukara idia moalelaia. Anibou hanuaboina ai, regerege be bada lasi, bona Anibou idia mai taudia iboudiai edia namba be 5,034. Idia hegaegaelaia hebouhebou iboudiai idia karaia, bona idia bapatiso taudia iboudiai edia namba be 121. Kongregesen ena ruma bese taudia momo be unai tano idia rakatania momokani. To kamonai taudia momo idia gaukara do idia bapatiso abia totona, bona Basileia pablisa taudia 2,726 edia namba ma ia bada ia lao. Hesiai laganina 1990 lalonai, Iehova ena taunimanima iboudiai Lebanon dekenai, be Iehova ena abidadama karana idia mamia, badina ia ese ai ia naria bona hekwarahi negadia lalonai ai ia hakaua.​—Salamo 33:​4, 5; 34:​1-5.