Herevahereva Heheni Karana Ruma Bese bona Kongregesen Lalonai
“Nega ibounai mai laloa namona bona mai gado namo do umui hereva.”—KOLOSE 4:6.
1. Dirava ese Eva ia hakaua mai neganai, Adam be dahaka ia gwau?
“TAU TA be motumotu ta bamona ia gini lasi . . . Taunimanima ta ta iboudiai be tanobada badana ta ena kahana maragidia ta ta bamona.” Lagani handred haida gunanai, diba momo toretore tauna ta ese unai hereva ia torea. Unai hereva ia gwauraia neganai, ia ese Havaraia Tauna ena hereva Adam dekenai ia hamomokania, unai Havaraia Tauna ia gwau: “Tau sibona ia noho be ia namo lasi.” Adam be ia hereva diba bona ia be mai ena gado, badina ia ese animal iboudiai edia ladana ia henidia. To Adam bamona ta ia noho lasi idia herevahereva heheni totona. Unai dainai, Dirava ese Adam ena adavana Eva ia hakaua mai bona ia henia neganai, Adam ia gwau: “Ia be lauegu turia ena turia, bona lauegu hidio ena hidio”! Vadaeni ruma bese ginigunana ia vara neganai herevahereva heheni dalana ia matamaia unai.—Genese 2:18, 23.
2. Televisen raraia kava karana ese dahaka dika ia havaraia diba?
2 Ruma bese gabuna be gabu namona ita herevahereva heheni totona. Oibe, unai be gau badana ruma bese ia noho namo totona. To, ita herevahereva heheni namonamo totona nega ita halusia bona ita hekwarahi be gau badana. Hari inai nega lalonai, nega bada ia henaoa gauna be televisen. Unai masini ese dala rua amo ita ia hadikaia diba. Dala ta be inai: ia be lalona veria gauna dainai, ruma bese taudia idia ura raraia hanaihanai, bena unai neganai idia herevahereva heheni momo lasi. Ma dala ta be inai: hepapahuahu eiava lalohisihisi idia vara neganai, televisen idia raraia unai gaudia idia laloa lasi totona. Namona be headava taudia ese edia hekwakwanai hanaia dalana idia tahua, namo lasi herevahereva heheni dalana koua totona televisen idia raraia. Unai dainai, televisen masini be herevahereva heheni hadikaia gauna ta, bona taunimanima idia gwau herevahereva heheni lasi karana be headava hadikaia gauna badana ta. Bema televisen raraia hanaihanai karana idia koua diba lasi, taunimanima haida idia laloa namona be televisen idia negea.—Mataio 5:29; 18:9.
3. Televisen raraia ena nega idia hamaragia dainai, haida ese dahaka hahenamo idia davaria?
3 Oibe, ai davaria toretoredia idia hahedinaraia taunimanima idia moale bada herea edia televisen raraia karana idia hamaragia eiava idia negea neganai, badina hahenamo momo idia abia. Ruma bese ta be inai bamona idia torea: “Hari ai herevahereva heheni momo . . . , Bible ai stadilaia momo . . . Gadara ai karaia hebou . . . Aiemai hesiai gaukara ibounai ai habadaia.” Ruma bese ma ta ese edia televisen idia negea murinai idia gwau: “Hari moni ai negea lasi cable TV ai abia totona, to unai sibona lasi, hari aiemai ruma bese idia turana heheni momokani, bona dala idauidau dekenai unai nega ai gaukaralaia namonamo. Ai helai kava lasi to emai mauri ai moalelaia.”
Raraia, Herevahereva, bona Hakala
4. Tau mai adavana be edena bamona idia hemataurai heheni diba?
4 Ruma bese lalonai diba henia dalana be idauidau. Unai dala haida be uduna ena hereva amo lasi. Taunimanima rua idia raraia heheni neganai, unai be herevahereva heheni dalana ta. Idia noho hebou dainai ta ese ta ena namo ia tahua. Headava taudia be nega daudau idia parara anina bada lasi gauna dainai, be namo lasi. Headava taudia idia noho hebou dainai ta ese ta ena moale ia habadaia diba, unai neganai headava ena mamina do ia namo. Sibodia idia noho neganai eiava taunimanima vairanai idia noho neganai, bema mai edia lalokau bona mai edia hemataurai idia kara heheni, bema edia dabua be mai hemataurai danu idia karaia neganai, ena be idia hereva lasi, to unai ese edia hemataurai heheni karana ia hahedinaraia. Aonega tauna, Pavapava Solomon ese inai hereva amo unai ia hahedinaraia, ia gwau: “Emu ranu lohilohi gabuna do ia namo; oi matamata neganai oi adavaia hahinena do oi moalelaia noho.”—Hereva Lada-isidia 5:18.
5, 6. Dahaka dainai tatau idia diba edia hahine danu idia herevahereva heheni karana be gau badana?
5 Diba abia totona taunimanima idia herevahereva heheni, ruaosi idia herevahereva hebou, idia kiki hebou, namo lasi ta ese ta ia oda henia sibona. Hahine momo ese edia lalona dekenai idia noho gaudia idia hahedinaraia diba, to reana tatau be unai bamona idia karaia be auka, to unai be ekskius lasi tatau be edia hahine danu idia herevahereva heheni lasi totona. Namona be Keristen tatau idia diba headava momo dekenai herevahereva heheni lasi karana be hekwakwanai badana ia havaraia diba, unai dainai namona be idia hekwarahi bada herevahereva heheni dalana ia kehoa noho totona. Oibe, unai bamona do ia vara bema aposetolo Paulo ena sisiba namona Efeso 5:25-33 dekenai idia badinaia. Bema tau ese ena adavana ia lalokau henia ia sibona ena tauanina ia lalokau henia hegeregerena, unai anina be ia noho namo bamona, ia ura ena adavana danu ia noho namo bona ia moale. Unai ia vara totona, idia herevahereva heheni be gau badana.
6 Tau ia laloa ena hahine ia diba ia moale henia sibona be hegeregere lasi. Hahine ia ura ena tau ese ena lalokau ia dekenai ia gwauraia hedinarai. Tau ese dala idauidau amo ena lalokau ia hahedinaraia diba—ena hereva amo bona harihari gaudia amo, bona ia dekenai mai anina gaudia ia hadibaia namonamo amo. Danu namona be ena hahine ena hekwarahi dainai ia hanamoa, hegeregere ena dabua bona iduari, ena gaukara ruma bese taudia totona, eiava mai ena kudouna ibounai lauma gaukara ia karaia dainai. Ma danu, aposetolo Petro ese 1 Petero 3:7 dekenai ia gwau namona be tau be ‘ena adavana danu do idia noho hebou ena dala do ia laloa namonamo.’ Bona unai sisiba ia badinaia totona, gau badana be tau ese hahine ena lalona ia diba, unai anina be ia dekenai danu mai anina bada gaudia do idia kikilaia hebou, bona ena hahine ia matauraia badina ia diba ia be uro manokana dainai.—Hereva Lada-isidia 31:28, 29.
7. Herevahereva heheni karana dekenai hahine ena maduna tau dekenai be dahaka?
7 Unai hegeregerena, hahine ese Efeso 5:22-24 ena sisiba ia badinaia totona, namona be ena tau ia kamonai henia, unai ia karaia totona namona be tau danu herevahereva heheni dalana ia kehoa noho. Gau badana be ena hereva bona kara amo ena tau ia “matauraia” bada. Namo lasi hahine be adavana ia laloa lasi bona sibona ena ura dainai kara ta ia karaia eiava tau ena hereva ia dadaraia. (Efeso 5:33) Nega ibounai, hahine bona ena tau idia herevahereva heheni neganai, hahine ese ena lalohadai ia gwauraia hedinarai be namo.—Hereva Lada-isidia 15:22 oi itaia.
8. Herevahereva heheni dalana ia kehoa noho totona, hahine be dahaka do idia karaia be namo?
8 Danu, namo lasi hahine ia hereva lasi, to ena lalona dekenai ia hisihisi noho sibona ia hebogahisi henia karana hahedinaraia totona. Bema hekwakwanai ia vara, namona be ia naria ela bona nega namona bona ena tau danu idia kikilaia. Oibe, Pavapava Hahine Eseta ena kara oi laloatao. Taunimanima do idia mase garina ia ura ena tau ia hadibaia. Kara haraga ia be mai aonega bona mai hemataurai danu ia kara dainai Iuda taudia ese hahemauri idia davaria. Bema tatau eiava hahine be guna idia lalohisihisi eiava hari idia lalohisihisi noho, namona be adavana danu idia herevahereva heheni, idia hadibaia totona. Ita herevahereva heheni namonamo totona gau badana be mai hemataurai danu ita herevahereva bona iseda turana karana Dirava dekenai ita laloatao, unai amo kara iboudiai be moale dekenai do ita karaia diba.—Eseta 4:15–5:8.
9. Herevahereva heheni lalonai dahaka dainai hakala karana be gau badana?
9 Herevahereva heheni dalana ia kehoa noho totona gau badana be ta ia hereva neganai ita hakala henia—bona ena lalona dekenai ia noho dobu gauna, ia herevalaia lasi gauna unai, ita tahua danu. Unai anina be ia hereva tauna oi hakala henia namonamo. Ia gwauraia herevana sibona mo oi laloa lasi, to ena kudou ena mamina oi tahua danu, ia herevalaia dalana oi laloa. Nega momo tatau be unai bamona idia karaia lasi. Tatau ese edia hahine edia hereva idia hakala henia namonamo lasi dainai, reana edia hahine ese hisihisi idia ania. Bona hahine ese edia tau edia hereva idia hakala namonamo henia, hereva idia abia kerere garina. “Aonega tauna ia hakala bona hahediba hereva momo ia kamonai henia.”—Hereva Lada-isidia 1:5.
Tama Sina bona Natudia Idia Herevahereva Heheni Karana
10. Tama sina ese edia natudia danu idia herevahereva heheni namonamo totona, dahaka do idia karaia be gau badana?
10 Danu, tama sina bona natudia be nega momo idia herevahereva heheni namonamo lasi. Bema “mero oi hadibaia ena raka dalana ia diba totona,” gau badana be dala oi kehoa umui herevahereva heheni namonamo totona. Bema unai bamona oi karaia “ia buruka neganai, do ia rakatania lasi.” (Hereva Lada-isidia 22:6) Tama sina haida ese edia natudia tanobada dekenai idia haboioa bamona, bona nega haida unai bamona ia vara badina edia natudia idia tubu daekau lalonai idia bona natudia idia herevahereva heheni namonamo lasi dainai. Tama sina edia maduna be hanaihanai natudia ida idia herevahereva, Deuteronomi 6:6, 7 ese unai ia hahedinaraia, ia gwau: “Oi dekenai lau hadibaia herevadia be emu kudouna dekenai idia noho be namo; bona oiemu natuna dekenai oi hadibaia namonamo, ruma lalonai oi helai negadia ai, bona dala dekenai oi raka negadia ai, bona oi hekure negadia ai, bona oi toreisi negadia ai, oi herevalaia.” Oibe, tama sina ese nega idia atoa edia natudia idia bamoa totona be gau badana! Namona be sibodia edia ura haida idia reaia edia natudia idia bamoa namonamo totona.
11. Tama sina ese edia natudia do idia hadibaia gaudia haida be dahaka?
11 Tama sina e, emui natudia umui hadibaia bena do idia diba Iehova ese idia ia lalokau henidia bona umui danu umui lalokau henidia. (Hereva Lada-isidia 4:1-4) Namona be idia diba gau haida oi reaia badina oi ura idia tubu daekau lalonai, edia lalohadai, edia lalona ena goada, edia tauanina, bona edia goada lauma dalanai ia namo totona. Tama sina ese hebogahisi idia hahedinaraia be gau badana, unai be, natudia edia lalohadai idia diba. Tama sina e, bema lalokau momokani umui hahedinaraia, umui bona emui natudia padanai lalo-tamona karana umui habadaia diba, bona idia umui hagoadaia idia lalohisihisi neganai umui dekenai do idia mai, edia lagani hegeregerena memero bona kekeni dekenai idia lao lasi, unai gau idia herevalaia totona.—Kolose 3:14.
12. Dahaka dainai memero kekeni be hanaihanai edia tama sina danu idia herevahereva heheni be namo?
12 Umui memero kekeni e, emui maduna be tama sina danu umui herevahereva heheni. Tama sina ese gau momo umui idia henia, bema unai oi moalelaia oi ese emu lalohadai ibounai idia dekenai oi hahedinaraia diba. Tama sina ese oi idia durua bona hagoadaia be gau badana, bona idia danu umui herevahereva heheni karana ese dala ia kehoa unai idia karaia diba totona. Emu lagani hegeregerena taudia dekena amo heduru hereva oi tahua momo ena namo be dahaka? Unai memero kekeni ese oi idia durua ena bada be emu tama sina ese oi idia durua ena bada ia hanaia lasi. Oi hegeregerena, idia be mauri ena kara idia do diba namonamo lasi, danu bema idia be kongregesen taudia lasi, idia ese oiemu mauri hanaihanai dalana do idia laloa bada lasi.
Herevahereva Heheni Karana Kongregesen Lalonai
13, 14. Keristen taudia idia herevahereva heheni namonamo totona, Bible ena sisiba be dahaka?
13 Oi tahua gauna ma ta be kongregesen lalonai emu tadikaka danu herevahereva heheni dalana oi kehoa noho. Sisiba momo ita abia ‘guriguri hebou kara do ita hadokoa lasi’ totona. Dahaka dainai ita hebou? “Lalokau dekena amo kara namodia do [ita] karaia” totona. Unai ita karaia totona ita herevahereva heheni be gau badana. (Heberu 10:24, 25) Bema tau ta ena hereva dainai oi lalohisihisi, namo lasi hebou do oi reaia. Herevahereva heheni dalana ia kehoa noho totona, namona be Iesu ia henia sisibana Mataio 18:15-17 dekenai oi badinaia. Bema oi laloa ta ese oi ia hahisihisia, namona be oi lao bona oi hereva henia.
14 Bema oi bona tadikaka ta huanai hekwakwanai ia vara, namona be Bible ena sisiba Kolose 3:13 ena hereva hegeregerena oi badinaia, ia gwau: “Bema tau ta ese ena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu.” Unai anina be idia herevahereva heheni, bona herevahereva dalana idia koua lasi. Bona bema oi itaia ta ia moale lasi oi dekenai, namona be Mataio 5:23, 24 ena sisiba herevana oi badinaia. Oi hereva henia, bona dala oi tahua oi bona emu tadikaka huanai maino ia noho totona. Unai oi karaia totona namona be lalokau bona manau karadia oi hahedinaraia, bona Iesu ena sisiba oi badinaia neganai, oi bona emu tadikaka ese heduru bada umui davaria.
Sisiba bona Hagoadaia Hereva
15. Bema mai dalana, dahaka dainai Keristen taudia ese ma tadikaka haida idia sisiba henia be maoro?
15 Paulo ena sisiba hereva Galatia 6:1 dekenai ese iseda herevahereva heheni ena badina ta ia herevalaia, ia gwau: “Lauegu varavara taudia e, bema tau ta ia kerere neganai, umui Lauma kamonai henia taudia ese unai tau do umui hakaua lou, mai manau danu. To oi naria namonamo, hedibagani ese oi danu do ia koia garina.” Ita hekokoroku lasi neganai, bema tau ta ese ita dekenai iseda hereva eiava kara kerere ia hahedinaraia, do ita moale diba. Oibe, namona be ita ibounai be salamo torea tauna David ena lalohadai ita abia, ia gwau: “Kara maoromaoro tauna ese lau do ia kwadia, unai be hebogahisi karana; bona lau do ia gwau henia unai be namo, ia be dehoro bamona egu kwarana dekenai, bona lauegu kwarana ese unai kara do ia dadaraia lasi.” (Salamo 141:5) Haheitalai namodia hahedinaraia totona elda taudia idia manau be namo, taunimanima idia doria edia lalohadai mo sibona idia abia totona be namo lasi, to namona be edia kara hamaoromaoroa herevana idia abia dae haraga, bona idia laloatao “ta ena turana korikori ese ia henia berodia be mai ena momokani ida ia henia.”—Hereva Lada-isidia 27:6.
16. Memero kekeni ese hereva idia henia neganai daidia edia heduru do idia tahua be namo?
16 Memero kekeni be lo Keristen taudia amo sisiba bona hakaua herevadia idia tahua be aonega dalana bona hekokoroku lasi karana, badina unai kara ese ia durudia diba. Elda taudia danu be unai dala amo heduru idia abia diba. Hegeregere, elda ta ese hereva ia henia neganai, ia gwau, Apokalupo 7:16, 17 ena anina be mamoe idaudia do idia hitolo lou lasi bona do idia ranu mase lou lasi tanobada matamata lalonai do idia vareai neganai. To, ita idia hadibaia vadaeni unai siri be mai anina hari inai nega lalonai. (Revelation—Its Grand Climax At Hand!, rau 126-8 oi itaia.) Ena hereva ia kamonai henia elda tauna ta ia laloa namona be ia dekenai ia lao ena hereva kerere ia gwauraia hedinarai totona, to ia do lao henia lasi neganai, hereva henia tauna be telefon amo ia rini henia bona heduru hereva ia tahua ena hereva do ia hanamoa totona. Oibe, ita idia durua taudia edia dala ita ha-aukaia lasi, ita hamaorodia ita ura sisiba ita abia. Namo lasi ita badu eiava ita lalohisihisi haraga.
17. Herevahereva heheni karana be edena bamona iseda tadikaka ia hagoadaia diba?
17 Pavapava Solomon ese ia gwauraia hereva namona ta be mai anina inai ita kikilaia herevana dekenai, ia gwau: “Ia maoro namo do idia abia taudia dekenai namo karana do oi koua lasi, bema mai emu dala neganai namo do oi henia.” (Hereva Lada-isidia 3:27) Iseda maduna be tadikaka ita lalokau henidia. Paulo ia gwau: “Tau ta dekena amo umui abitorehai lasi. To inai gau tamona umui laloa noho be namo: ta ta dekenai do umui lalokau henia noho, badina be lalokau henia tauna ese Mose ena taravatu ibounai ia badinaia vadaeni.” (Roma 13:8) Unai dainai hagoadaia hereva momo do oi gwauraia. Hesiai tauna matamatana ese ena pablik tok ginigunana ia henia, a? Oi hanamoa. Taihu ta ia hekwarahi bada dainai hereva namona ia henia Haroro School dekenai, a? Oi hamaoroa ena hereva oi moalelaia. Iseda tadikaka bona taihu momo idia hekwarahi hereva namodia idia henia totona, to bema iseda lalokau hereva amo ita hahedinaraia edia hereva ita moalelaia, idia ita hagoadaia diba.
18. Ta ese hekokoroku toana ia hahedinaraia neganai, ia dekenai hebogahisi idia hahedinaraia totona, dahaka do idia karaia?
18 Ma dala ta be inai, reana tauhau be hereva ia henia namonamo diba, to ia be tauhau dainai, reana nega haida iena hereva dalana be hegeregere lasi eiava ia henia dalana be hekokoroku dalana bamona. Edena bamona do idia hereva henia hamaoromaoroa totona? Hebogahisi dalana be lo elda tauna ta ese unai mero ena hereva namodia dainai do ia hanamoa, to mai manau danu dala idauidau amo ia durua bena unai mero ia diba gabeai edena bamona hekokoroku lasi dalanai do ia hereva. Unai bamona idia herevahereva heheni neganai, ia hedinarai tadikaka huanai lalokau ia noho, bona unai ese memero kekeni ia durua lalohadai kerere idia negea haraga totona, idia do manadalaia lasi neganai.
19. Dahaka dainai elda taudia bona ruma bese kwarana taudia be diba henia taudia ai idia lao?
19 Elda taudia idia herevahereva heheni bona kongregesen dekenai diba idia henia taunimanima durudia totona—to, hehuni hereva, hegeregere hahemaoro komiti ena hereva idia gwauraia hedinarai lasi. To, bema nega momo hehuni lasi gaudia be hehuni gaudia bamona idia gwauraia, tadikaka be elda taudia edia hereva idia hamomokania lasi, bona kongregesen lalonai eiava ruma bese lalonai taunimanima be idia lalohisihisi bona idia goada lasi danu. Hegeregere, taunimanima iboudiai idia ura hagoadaia sivaraina idia kamonai henia. Aposetolo Paulo ia ura taunimanima dekenai lauma helaga ena hanamoa gaudia ia henia, ia hegeregerena, namona be elda taudia idia ura taunimanima dekenai hagoadaia sivaraidia idia henia.—Hereva Lada-isidia 15:30; 25:25; Roma 1:11, 12.
20. Murina stadi ena sivarai dekenai herevahereva heheni karana ta do ita kikilaia, unai be dahaka?
20 Oibe, Keristen kongregesen bona Keristen ena ruma bese lalonai herevahereva heheni karana be mai anina bada. Danu, ia be mai anina bada ma gabu ta dekenai. Edeseniai? Keristen ena haroro gaukara dekenai. Murina stadi ena sivarai dekenai, mai anina bada haroro gaukarana dekenai herevahereva heheni hanamoa daladia do ita kikilaia.
Edena Bamona Do Oi Haere?
◻ Ruma bese lalonai herevahereva heheni namonamo ia koua gauna badana ta be edena bamona do ita kokia diba?
◻ Tau mai adavana be dahaka do idia karaia idia herevahereva heheni namonamo totona?
◻ Tama sina bona natudia idia parara garina dahaka idia karaia diba?
◻ Kongregesen bona ruma bese lalonai herevahereva heheni karana be edena bamona ita ia hagoadaia diba?
[Picture on page 23]
Herevahereva heheni namonamo karana ese ruma bese ena namo bona ena moale ia habadaia