Dahaka Dainai Dirava Ia Naria Noho?

HITOLO mero maragina ta ena lalohisihisi toana oi itaia. Iena turia kava tauanina bona iena bogana bada hereana oi itaia. Iena hitolo dikadika oi laloa, bona oi itaia, ia huaia merekina lalonai aniani ta be lasi. Reana iena sinana ese unai mero ia raraia. Sinana ena matana idia kohua, bona iena vairana ia huaia badina ia dekenai helaro namona ta be lasi. Unai sivarai dainai emu lalohisihisi oi koua diba lasi​—oibe, oiemu taitai oi koua diba lasi.

Sahel gabuna ena bada be 6 milion square kilomita, bona unuseniai taunimanima momo idia hitolo bada herea. Unai gabu lalonai ataiai ai gwauraia sivaraina be nega milion milion ai ia vara. Sahel gabuna be Sahara Desert ena diho kahana dekenai ia noho, ia be Senegal tanona, Atlantic Coast amo ia lao kilomita 4,800 ela bona Ethiopia tanona Davara Kakakakana dekenai. Momokani, tano ma haida lalonai danu, hitolo ese taunimanima momo herea edia mauri ia hadikaia. World Health Organization ia gwau taunimanima 1.1 tausen milion bamona tanobada ibounai lalonai idia gorere bada eiava edia aniani ia hegeregere lasi.

To momokani, taunimanima edia hisihisi gaudia be hitolo sibona lasi. Taunimanima ese tanobada idia hamiroa, bona unai kara ese ita ibounai eda mauri ia hadikaia. Politikol gavamanidia ese kara gagevagageva bona tuari idia dadaraia lasi, unai karadia ese taunimanima momo idia hahisia bona idia hamasea. Dahaka dainai Dirava ese unai dika ia koudia lasi? Ita ia laloa, eiava lasi?

Dirava ese Ita Ia Laloa!

Ita ia Havaraia Tauna ese ita ia laloa. Gau momo idia hamomokania unai hereva be maoro bona Dirava ese dala ia karaia diba gau iboudiai idia gaukara hebou namonamo totona, bena unai gau amo namo ita davaria bona ena karaia gaudia iboudiai idia noho hebou namonamo. Haheitalai ta be inai: Laulau oi itaia; bee manumanuna ta be huahua auna ta ena palaoapalaoa dekenai ia mai. Bee ese unai palaoapalaoa ena nectar [ranu gaihona gauna] ia abia be gau badana, iena tauanina hagoadaia totona. Unai hegeregerena, au dekenai, bee be ena tauanina dekenai ia huaia paudana, pollen, be gau badana. Bee ese pollen be ma au ta amo ia abia, unai au be au ginigunana hegeregerena. Unai dala amo pollen be palaoapalaoa dekenai ia atoa bena unai amo huahua do ia havaraia diba. Au momo dekenai, huahua idia havaraia dalana be unai bamona lasi, to momokani Dirava ese unai au bona bee idia gaukara hebou dalana ia hegaegaelaia, ani? Bona iena kara namo dainai au huahua idia vara, bona ita ania neganai ita moale bona namo ita davaria diba.

Unai bee ena bese lalonai bee 30,000 bona ma haida idia noho bona idia gaukara hebou namonamo. Unai bee momo amo, haida ese ruma idia gimaia, ma haida ese ruma idia hagoevaia, bona ma haida ese hodahoda namona idia veria mai unai ruma lalonai. Ma haida ese palaoapalaoa edia nectar bona pollen idia haboua, haida ese bee edia natudia, gaigai maragimaragidia unai, idia ubudia bona ma bee haida ese nectar gabudia idaudia idia tahua. Dirava ese gau idauidau ia hegaegaelaia dainai, bee idia gaukara goadagoada bena honey idia karaia neganai, namo ita davaria, badina honey ena mamina be suga bamona bona iseda tauanina ia hagoadaia, bona ita mamia neganai ita moale.

Bee bona tubutubu gaudia idia gaukara hebou karana bona bee idia gaukara hebou karana, bona ma kara momo danu, ese idia hamomokania Gau Iboudiai Ia Havaraia Tauna ese dala ia kehoa diba mauri gaudia iboudiai idia gaukara hebou namonamo totona. Unai hegeregerena, “Dirava be ia ura lasi hereva kava bona heai, ia be maino Diravana.” (1 Korinto 14:33) Vadaeni, taunimanima idia noho hebou namonamo lasi bona unai dainai taunimanima momo idia lalohisihisi neganai, dahaka dainai Dirava ese unai dika ia koua lasi? Bema Dirava ese ita ia laloa, dahaka dainai nega daudau ia naria vadaeni, bona unai kerere ia do hamaoromaoroa lasi? Dahaka dainai Dirava ia naria noho?

Dirava ena Hereva, Bible, ese unai henanadai iboudiai edia haere ia henia. Unai buka namo hereana ese ita ia hadibaia Iehova Dirava ia naria noho be mai ena badina maorona. Unai badina be dahaka? Bona do ia naria ela bona edena negai?

[Picture Credit Line on page 2]

Cover photo: Frilet/Sipa