Iehova Lalokau Henia Karana ese Tomadiho Momokanina Ia Hagoadaia
“Dirava ita lalokau henia ena anina be inai: Dirava ena taravatu do ita badinaia.”—1 IOANE 5:3.
1, 2. Namona be dahaka dainai ita ura Iehova ena hesiai gaukara ita karaia?
JAPAN amo idia mai vadivadi taudia 80 be Iehova ena Witness taudia edia Assembly Hall ta, California, U.S.A. dekenai idia raka loaloa. Edia Havaraia Tauna Badana, Iehova Dirava, kahirakahira dekenai idia noho ena mamina idia abia, badina unai gabu ia hairai herea, bona blue jay, pune, bona hummingbird manudia idia noho. Ia hakaudia loaloa tauna be nega sisina murinai ia davaria, unai loaloa taudia kahirakahira iboudiai be pioneer gaukara idia karaia. Unai dainai taunimanima ese idia gwauraia momo henanadaina ia henidia, ia gwau: “Dahaka dainai Japan lalonai pioneer taudia be momo herea?” Nega sisina lalonai ta be ia hereva lasi. Bena hahine matamatana ta ia haere, ia gwau: “Badina Iehova ai lalokau henia dainai.”
2 Iehova lalokau henia karana—unai ese ita ia hagoadaia iena hesiai gaukara ita goadalaia totona! Momokani, haida ese pioneer gaukara idia karaia diba lasi. Oibe, Basileia idia harorolaia taudia milion hani bona ma haida amo momo ese dala idia davaria lasi unai hahenamo idia moalelaia totona. To idia hegeregere idia karaia taudia momo ese idia karaia. Ita ibounai ese “Iehova ita tabekau henia bona namo ita karaia” diba, bona iseda lalokau ita hahedinaraia diba ita be hadibaia taudia karaia gaukarana lalonai ita vareai neganai. (Salamo 37:3, 4) Bona Iehova idia tomadiho henia gwauhamata taudia iboudiai ese pioneer gaukarana idia durua diba, bona mai edia lalokau ida pioneer taudia idia durua diba.—Mataio 24:14; 28:19.
3. Dahaka gau dekenai Iehova ena Witness taudia be sibodia idia gwauraia Keristen taudia momo amo idia idau?
3 Iehova ena Witness taudia be sibodia idia gwauraia Keristen taudia momo amo idia idau, unai taudia ese tomadiho idia laloa hegeregere ia be edia mauri ena kahana ta sibona; to Iehova ena Witness taudia idia hahedinaraia Dirava idia lalokau henia bada dainai, idia ura “Basileia bona iena kara maoromaoro do [idia] tahua guna.” Unai bamona do idia karaia totona edia ura haida idia dadaraia, to unai kara amo namo bada idia davaria vadaeni! (Mataio 6:33; 16:24) Unai be taravatu badana ginigunana hegeregerena, Mose ese ia gwauraia gauna bena gabeai Iesu Keriso ia gwauraia lou gauna, ia gwau: “[Iehova] iseda Dirava be [Iehova] tamona. [Iehova] oiemu Dirava oi ura henia, mai oiemu lalona ibounai, mai oiemu lauma ibounai, mai oiemu aonega ibounai, mai oiemu goada ibounai.”—Mareko 12:29, 30; Deuteronomi 6:4, 5.
4, 5. Daidia ita laloa gini goada taudia be maoro, bona edena dala ai ita ese gini goada karana ita hahedinaraia diba?
4 F. W. Franz, Watch Tower Society ena presiden, ena mauri laganidia be 98 bona lagani 70 bona ma haida ia be nega ibounai hesiai gaukara ia karaia. Nega daudau lasi gunanai, hedikwota dekenai ia gaukara tauna ta ese ia hereva henia, ia gwau: “Oi ese gini goada karana oi haheitalaia namonamo, Tadikaka Franz.” Bona Tadikaka Franz ia haere, ia gwau: “Oibe! Ita gini goada noho be gau badana.” Unai hereva be momokani. Herevana dahaka gaukara ita karaia Basileia ena gaukara lalonai, to ita gini goada noho diba.—1 Korinto 4:2; Galatia 3:9.
5 Momokani, momo idia ura Iehova ena hesiai gaukara lalonai edia gaukara idia habadaia, to Bible ese ia gwauraia maduna eiava gorere ese ia koudia sisina. To, pioneer gaukara idia karaia diba lasi taudia bema idia laloa idia be abidadama goada lasi taudia unai be maoro lasi. Idia haida idia gini goada hetoho dikadika lalonai, bona momo be lagani momo herea lalonai unai bamona idia karaia. Oibe, edia abidadama dekenai idia gini goada! Idia hahedinaraia Iehova idia lalokau henia bona mai edia kudou ibounai ida idia gaukara goadagoada iena orea ena kara idia durua totona. Idia ese mai edia moale danu pioneer taudia edia gaukara idia laloa bona pioneer gaukara idia karaia diba taudia—nega momo unai taudia be idia sibona edia natudia—idia hagoadaia dala idia tahua pioneer gaukara be edia mauri ena gaukara badana ai idia halaoa totona, unai gaukara ese ma gaukara iboudiai ia hereaia.—Deuteronomi 30:19, 20 itaia danu.
6, 7. Hari inai negai, 1 Samuel 30:16-25 ena hereva ena anina be edena bamona ita badinaia?
6 Dirava ena orea taudia iboudiai be mai edia lalokau ida idia lalo-tamona, bona 1 Samuel 30:16-25 ena sivarai ese unai kara ia haheitalaia. David ese Amalek taudia ia tuari henidia neganai, “dina ena diho ai, David ese ia ala-ala henidia ela bona dina ma ia diho” bona kohu bada herea ia abia. Ia be iena kampa dekenai ia giroa mai neganai, David ena tuari taudia haida idia noia, tuari lalonai idia vareai lasi taudia dekenai unai kohu ta do ia henia lasi. To David ia haere henidia, ia gwau: “Daika ese emui hereva do ia abia dae diba? Badina tuari dekenai idia lao taudia edia ahuna bona kohu badibadinai idia helai taudia edia ahuna be do idia hegeregere. Edia ahuna do ia tamona.”
7 Hari inai negai danu unai hereva ita badinaia be namo. Pioneer taudia be iseda lauma tuarina ena vaira kahana dekenai idia noho. To kongregesen taudia iboudiai be mai edia kudou ibounai bona mai edia abidadama danu pioneer taudia idia durua. Bona 1991 lalonai edia gaukara hebou karana ese anina bada ia havaraia bona murina rau dekenai unai gaukara be lista dekenai ai hahedinaraia.
Ripoti Namo Herea Ta
8. (a) Tanobada ibounai haroro ripotina ese ia hahedinaraia pablisa iboudiai edia namba bona Iehova ena hesiai gaukara lalonai idia haorea horadia edia namba be edena bamona? (b) Nega ginigunana inai ripoti lalonai idia hedinarai tanodia be edena bamona?
8 Oibe, inai magasin ena rau 10 ia lao 13 dekenai ia hahedinaraia Iehova idia tomadiho henia goadagoada taudia iboudiai be lagani 1991 lalonai tanobada ibounai dekenai gaukara idia habadaia. Pablisa taudia edia namba be nega ginigunana ai ia daekau ia lao 4,278,820—6.5 percent amo lagani gunana ena namba ia hanaia. Unai pablisa ese hora 951,870,021 idia halusia haroro gaukara lalonai. (Unai namba be kahirakahira bilion tamona!) Bona danu oi itaia, guna iseda gaukara idia taravatulaia tanodia edia ripoti be hari tanobada ibounai haroro ripotina ai idia hedinarai. Unai tanodia idia noholaia tadikakadia ese gaukara bada herea idia karaia—unai tanodia be Bulgaria, Cameroon, Czechoslovakia, Ethiopia, Mozambique, Nicaragua, Rwanda, bona U.S.S.R.
9, 10. (a) Ena be hekwakwanai idia davaria, to pioneer taudia ese dahaka idia karaia? (b) Dahaka hereva amo tadikaka bona taihu ai hagoadaia pioneer gaukara do idia hamatamaia?
9 Idia hanai laganidia lalonai tanobada ibounai lalonai momo ese pioneer gaukara idia karaia. Tano haida lalonai vanegai sibona gwaumaoro idia henia tomadiho idia karaia totona, to unai tanodia dekenai danu pioneer taudia edia namba ia bada daekau. Ena be edia moni be momo lasi, to unai lalo-goada Witness taudia ese edia mauri ibounai idia henia Iehova idia tomadiho henia totona. (Korinto Iharuana 11:23, 27 itaia danu.) Hua ta ta iboudiai, Basileia pablisa 100 100 iboudiai amo pioneer gaukara idia karaia taudia edia averes be 14 14. Pioneer taudia edia namba ia bada daekau ia lao 780,202, anina be pablisa iboudiai 100 100 amo 18 18 ese pioneer gaukara idia karaia. Unai be namo herea.
10 Pioneer taudia edia moale idia itaia neganai, ma haida danu ese pioneer gaukara idia karaia. Bema pioneer gaukara oi do karaia lasi, oi ese Iehova oi lalokau henia dainai Isaia 6:8 ia hereva hegeregerena do oi gwau: “Lau inai! Lau oi siaia,” a? Eiava oi ese Bible oi stadilaia namonamo dainai, reana Dirava ena Hereva ese emu kudouna do ia hamarerea, bona pioneer gaukara do oi hamatamaia, a? Hekwakwanai negana ai danu, Iehova ena hereva ese Ieremia ia hagoadaia, bona unai dainai ena gaukara ia hadokoa diba lasi.—Ieremia 20:9.
Taunimanima Ia Durua Lalokau Gaukarana
11. Bible stadi gaukarana be edena bamona ia kwalimu?
11 Lagani 1991 ena ripoti lalonai mai anina bada herea gauna ta be inai: Tanobada ibounai lalonai hua ta ta iboudiai dekenai idia karaia Bible stadi edia namba ia bada daekau ia lao 3,947,261. Unai gaukara be lalokau karana ta, unai amo Iehova ena Witness taudia ese ruma ta ruma ta gaukara lalonai idia davaria kamonai taudia idia lou henidia idia durudia totona. Ita ura bese iboudiai bona kopi iboudiai taudia ita Bible stadi henidia, bona aposetolo Paulo bamona ita gaukara goadagoada. Momokani, ‘Iuda taudia bona Helene taudia danu dekenai ia sisiba henia goada’ totona, hora momo lalonai hereva momokani be taunimanima dekenai ia hadibaia. (Kara 20:20, 21) Hari inai negai danu unai ia vara. Iehova ena Witness taudia ese “taunimanima ibounai” idia durudia “mauri do idia davaria, bona hereva momokani do idia diba” totona.—1 Timoteo 2:4.
12-14. Europe amo dahaka ripoti namo hereadia idia siaia?
12 Ita moale bada badina East Europe tanodia dekenai Bible stadi edia namba ia bada daekau! Guna, lagani momo lalonai, iseda tadikaka unuseniai be orea grup maragidia dekenai idia hebou, bona reana grup taudia iboudiai ese idia printaia kava Gima Kohorona magasin tamona, gunana bona toana dikana gauna, be idia gaukaralaia. To hari Bible bona Bible gwauraia bukadia momo herea be unai tano lalodiai idia abia vareai. Unai be Solomon ena Ane 2:4 hegeregerena, King James Version Bible lalonai ia gwau: “Ia [Keriso Iesu] ese lau ia hakaua mai [Lauma] aniani rumana dekenai, bona lau ataiai iena pepe ia noho, ia be lalokau.” Idia ta ta ibounai be mai sibona edia magasin dainai, momo ese ‘hereva momokani idia hadibaia maoromaoro’ diba.—2 Timoteo 2:15.
13 St. Petersburg, Russia ena kongregesen ta ena pablisa iboudiai be 103, bona vanegai ena ripoti lalonai Bible stadi 300 bona ma haida idia torea. Unai Bible stadi gaukarana idia goadalaia dainai, hua 8 sibona lalonai kamonai matamata Witness taudia 53 idia bapatiso. Unai kongregesen taudia rua rua iboudiai amo tamona tamona be hereva momokani lalonai idia noho negana be hua 8 ia hanaia lasi! Bona unai kongregesen lalonai elda tauna ta be lasi—hesiai tauna tamona sibona ese edia goada lauma dalana ai ia naria.
14 Estonia lalonai Bible stadi ia abia hahinena ta ese Basileia pablisa ta ia noia iena turadia haida be stadi dekenai do ia boiria mai. Murinai purana ai Witness tauna be iena ruma dekenai ia ginidae neganai, ia davaria taunimanima 50 bona ma haida idia hebou hegaegae! Gabeai, dala idia hegaegaelaia unai kamonai taudia momo do idia durua noho totona.
15. Memorial dekenai idia mai taudia bona bapatiso idia abia taudia edia sivarai be dahaka?
15 Bible stadi taudia momo idia lao henia Keristen hebouna ginigunana be Iesu ena mase laloa lou hebouna, eiava Memorial. Lagani gunanai, Memorial dekenai idia mai taudia edia namba be nega ginigunana 10,000,000 ia hanaia; tanobada ibounai lalonai taunimanima 10,650,158 idia hebou kongregesen 66,207 lalonai unai moale hebouna dekenai. Latin-America, Africa bona East Europe tanodia momo lalonai, Memorial dekenai idia mai taudia edia namba be nega toi o hani amo Basileia pablisa taudia edia namba ia hanaia. Namona be hari lagani ena Memorial totona ita hegaegae hamatamaia; Friday, April 17 ai do ita karaia. Aiemai ura be Memorial dekenai idia mai kamonai matamata Bible stadi taudia momo do idia goada idia lao bena bapatiso do idia abia. Lagani 1991 ai danu, taunimanima 300,000 bona ma haida ese edia gwauhamata Iehova Dirava dekenai idia hahedinaraia totona, ranu lalonai idia bapatiso.
Dirava ese Ia Henia Mauri Namona Idia Ura Henia Taudia
16. “Mauri Namona Idia Ura Henia Taudia” Distrik Hebouheboudia amo dahaka sivarai namo hereadia idia mai?
16 Lagani 1991 ena hesiai laganina ena gau badana be “Mauri Namona Idia Ura Henia Taudia” Distrik Hebouheboudia; tanobada ena north kahana dekenai unai hebouhebou idia karaia vadaeni, to tanobada ena south kahana dekenai unai hebou do idia karaia ia lao lagani 1992. East Europe tanodia haida dekenai unai be nega ginigunana distrik hebouhebou ena program ibounai idia karaia. Unuseniai, daudau lasi gunanai gavamani ese dala idia kehoa iseda tadikaka ese edia ura gaudia idia karaia diba totona, bona iseda tadikaka idia moale noho badina unai nega namona idia gaukaralaia Iehova idia hanamoa totona. Ema bona October 1991, unai distrik hebouhebouna 705 idia karaia tano 54 dekenai, bona idia mai taudia iboudiai edia namba be 4,774,937.
17, 18. (a) Iehova idia tomadiho henia taudia ese dahaka ruhaia gaudia idia moalelaia bona dahaka idia naridia? (b) Dirava ena amo ia mai mauri namona be edena bamona inai tanobada ena ruhaia gaudia amo ia idau?
17 Iesu ese iena hahediba taudia ia hamaoroa, ia gwau: “Hereva momokani ese umui do ia ruhaia.” (Ioane 8:32) Hari, Bible ena hereva momokani ese taunimanima milion milion be Kerisendom ena hahediba herevadia amo ia ruhaia vadaeni. Unai taunimanima milion milion idia davaria Iehova ese Iesu ena boubou be mauri davana bamona ia henia dainai, unai ese dala ia kehoa taunimanima “be do ia ruhaidia dika ena bodaga dekena amo, vadaeni Dirava ena natuna edia hairai do idia abia, ma Dirava ese edia dala do ia kehoa, vadaeni kwalimu momokani do idia abia.” (Roma 8:19-22) Unai mauri namona do ia namo herea momokani—mauri hanaihanai paradaiso lalonai bona Iehova be lalokau dalanai ia henia taravatudia henunai!—Isaia 25:6-8; Kara 17:24-26 itaia danu.
18 Iehova ena Witness taudia be hari idia moalelaia ruhaia gaudia, bona idia ura Dirava ena nega matamatana lalonai do idia moalelaia bada herea gaudia, be iseda Dirava, Iehova, ena amo idia mai. (2 Korinto 3:17) Politikol karana ta o gavamani dadaraia karana ta ese ia havaradia lasi. (Iakobo 1:17) Taunimanima ese unai hereva do idia lalohadailaia kerere garina, East Europe tanodia haida lalonai Iehova ena Witness taudia edia 1991 distrik hebouhebou lapel kadi dekenai, “Mauri Namona Idia Ura Henia Taudia” herevana sibona ia noho lasi, to inai hereva ia noho: “Dirava ese Ia Henia Mauri Namona Idia Ura Henia Taudia.”
Iehova Idia Lalokau Henia Bada
19. Guriguri amo Iehova kahirakahira dekenai ita noho neganai, unai ese ita edena bamona ia hagoadaia?
19 Iehova Dirava ita lalokau henia bona ita tabekau henia dainai, ia kahirakahira dekenai do ita noho iseda guriguri amo. Iehova ida unai bamona idia hetura namonamo dainai, iseda tadikaka be hekwakwanai bona dagedage momo lalonai idia haheauka diba. (Salamo 25:14, 15) Iesu idia tohoa bada herea negana lalonai, ia be guriguri karana amo iena Tamana kahirakahira dekenai ia noho. (Luka 22:39-46) Stefano idia alaia bona ia hisihisi bada negana lalonai, ia be guriguri amo Iehova kahirakahira dekenai ia noho dainai, unai ese ia hagoadaia. Nega sisina idia do hodoa mase lasi neganai, Stefano be guba dekenai ia itaia, ia gwau: “Inai, lau itaia guba ia kehoa, Taunimanima ena Natuna [Iesu] danu lau itaia, Dirava ena idiba kahanai ia gini noho.”—Kara 7:56.
20-22. Ekspiriens ta ese edena bamona ia haheitalaia Dirava ese guriguri ia kamonaia diba?
20 Iehova idia tomadiho henia taudia be nega momo idia davaria hegeregerena, Iehova ese guriguri ia kamonai, bona ia haerelaia, bema idia be iena ura hegeregerena. Haheitalai ta be inai: Africa tanona ta ai gavamani ese Iehova ena Witness taudia edia gaukara ia taravatua. Unuseniai special pioneer tauna ta be PMV dekenai ia guia bona north kahana dekenai ia lao. Puse badana ia dogoatao; haida dekenai do ia henia Basileia bukadia bona revareva kopina be unai puse lalonai idia noho. Attendant ta ese PMV dekenai kohu ia udaia, bona tadikaka ia nanadaia: “Unai puse lalonai dahaka ia noho?” Tadikaka ese ia laloa guna herevana sibona ia gwauraia, ia gwau: “Revareva.”
21 Idia laolao negana lalonai, PMV ia heau haraga bona motuka taria taudia idia sekea gabuna ia hanaia. Trafik polisi taudia ese PMV idia lulua, badina idia laloa gavamani ese ia taravatulaia kohudia be PMV dekenai idia hunia. Laolao taudia iboudiai idia oda henidia PMV amo idia diho, bona edia baege iboudiai idia sekea. Unai be dika herea! Tadikaka be idia maumau hutuma amo ia raka oho daudau lasi gabuna dekenai, bona ia tui diho bona Iehova ia guriguri henia. Ia be hutuma dekenai ia giroa lao neganai, laolao taudia ta ta iboudiai edia baege idia kehoa bona idia sekea namonamo. Unai tadikaka ena puse idia kehoa gwauraia neganai, iena kudouna lalonai Iehova dekenai ia guriguri do ia durua totona.
22 Polisi tauna ia boiboi, ia gwau: “Inai puse be daika ena, bona ena lalonai dahaka ia noho?” Tadikaka ese hereva ta ia do gwauraia diba lasi neganai, PMV ena attendant tauna ia haere, ia gwau: “Revareva haida —— pos ofis amo ia lao —— pos ofis dekenai.” Polisi ofisa ia gwau: “Namo.” Puse ia abia isi bona attendant tauna dekenai ia henia. Ia gwau: “Umui heau lao lalonai gabu namona dekenai oi atoa.” Unai special pioneer tauna be ma nega ta ia tui diho bona guriguri Ia Kamonai Tauna ia tanikiu henia.—Salamo 65:2; Hereva Lada-isidia 15:29.
23. Iehova ese dahaka ia hahedinaraia vadaeni, to dahaka dainai nega haida dagedage karana ia koua lasi?
23 To unai sivarai dainai ita gwau diba lasi Iehova idia tomadiho henia taudia dekenai gau dikana ta do ia vara diba lasi. Nega haida, Bible idia torea neganai bona hari inai negai danu, Iehova ia hahedinaraia vadaeni iena orea taudia ia hamauridia diba. To Iehova ia ura henanadai badana ta ia haerelaia; unai henanadai be: Taunimanima be ia dekenai do idia gini goada noho eiava lasi? Unai dainai nega haida toana be ia ese dagedage ia koua lasi, iena Natuna dekenai ia vara hegeregerena. Iesu ia guriguri, ia gwau: “Egu Tamana e, bema mai dala, inai kapusi lau dekena amo do oi kokia. To lauegu ura lasi, oiemu ura sibona.” (Mataio 26:39 itaia danu.) Ma danu, ena be Iehova be aksiden, taunimanima edia hepapahuahu, eiava taravatu utua karadia ia koudia lasi ita be dika ita davaria lasi totona, to Bible ena amo ita abia aonega namona be ita ia durua diba. (Hereva Lada-isidia 22:3; Kohelete 9:11) To ita diba, herevana ia be hekwakwanai amo ita ia hamauria eiava lasi, to bema iseda abidadama dekenai ita gini goada, davana namona do ita davaria, bona reana toreisi lou negana lalonai unai ita abia.—Mataio 10:21, 22; 24:13.
24. Iehova ese mai lalokau danu dahaka harihari gaudia ia henia, bona iena lalokau dainai namona be dahaka ita karaia?
24 Iehova be mai lalokau danu ia henia harihari gaudia idia namo herea. Ia be taunimanima dekenai ia henia harihari gauna, inai tanobada bona ia latanai idia noho gaudia iboudiai, ese iena lalokau ia hahedinaraia. (Salamo 104:1, 13-16; 115:16) Bona Dirava be mai hebogahisi danu iena Natuna, Iesu Keriso, ia henia, iena mauri davana amo taunimanima be mase amo do ia hamauria totona. Unai harihari gauna be iena lalokau karana bada hereana. “Dirava ese iena lalokau ita dekenai be inai bamona ia hedinaraia: Ia ese iena Natuna tamona tanobada dekenai ia siaia, ia dekena amo mauri do ita abia totona. Lalokau ena anina be inai: ita ese Dirava ita lalokau henia lasi, to Dirava ese ita ia lalokau henia. Bona ia ese iena Natuna ia siaia, ia sibona be iseda dika gwauatao dalana totona.” (1 Ioane 4:9, 10) Unai lalokau dainai, namona be ita diba namonamo “gau ta ia goada lasi, mase o mauri, o aneru, o lohia herea taudia, o guba ena siahu gaudia, o harihari idia noho gaudia, o gabeai do idia vara gaudia, o ataiai gaudia, o dobu gabuna gaudia, o tanobada dekenai karaia gaudia, ta ese Dirava ena lalokau, Keriso Iesu iseda Lohiabada ese ia hahedinaraia vadaeni gauna, dekena amo ita do ia kokia diba lasi.”—Roma 8:38, 39.
Inai Sivarai Laloa Lou
◻ Gini goada ena anina be dahaka?
◻ Ita ese dahaka dahaka ita karaia neganai, iseda lalokau Iehova dekenai ita hahedinaraia diba?
◻ Hesiai laganina ena haroro ripoti lalonai, dahaka gaudia oi moalelaia bada?
◻ Edena dala ai ita hahedinaraia diba Iehova be mai lalokau danu ia henia harihari gaudia dainai ita tanikiu henia?
[Box on page 15]
BADINA BE DAHAKA PIONEER BE MOMO?
Taunimanima idia gwau lagani 2,600 lalodiai Japan taudia be edia king badadia idia tomadiho henia mai goada bada ida. Lagani 1900 murinai ema bona hari, Japan tuari taudia 3,000,000 bona ma haida be edia mauri idia henia, badina idia laloa dagi hereadaena do idia abia bema edia dirava king badana dainai do idia mase. To Tanobada Ibounai Tuarina Iharuana lalonai Buddhist-Shinto tuari karana be ia kwalimu lasi, bona unai murinai king badana ia gwau ia be dirava ta lasi. Unai tomadiho karana ia ore murinai dahaka idia karaia diba? Ita moale badina Iehova ena Witness edia misinari taudia, bona gabeai unai tano ena Witness taudia, be taunimanima edia ruma lalonai Bible stadi idia karaia dainai taunimanima momo be Dirava korikorina, Iehova, idia davaria, bona gabeai unai taudia be ia dekenai edia mauri idia gwauhamatalaia. Unai Japan Witness taudia dekenai unai gwauhamata karaia karana be anina bada herea gauna. Bema nega gunadia ai idia ura edia mauri be edia dirava king badana dainai do idia henia, hari idia be mauri Diravana bona gau ibounai Ia Havaraia Tauna—Atai Herea Momokani Lohiabadana Iehova—idia tomadiho henia dainai, idia be pioneer gaukara dekenai do idia gaukara goadagoada momokani!
[Chart on page 10-13]
IEHOVA ENA WITNESS TAUDIA EDIA LAGANI 1991 ENA HARORO GAUKARA RIPOTI
(For fully formatted text, see publication)
[Picture on page 16]
Dirava ese ia henia mauri namona Idia ura henia taudia—Iehova idia tomadiho henia taudia idia hebouhebou Prague dekenai, August 9-11, 1991