Tadi Gohuna Ena Toretore Ginigabedia Idia Halasia
LAGANI momo lalonai diba taudia be idia hepapahuahulaia hereva idauidau ena hereva ibounai idia karaia ore September 1991 lalonai. Toana be Tadi Gohuna Toretoredia dainai idia hepapahuahu karana ia ore to hepapahuahu matamatana ta ia hamatamaia reana.
Tadi Gohuna Toretoredia be 1947 ai bona unai murina laganidia dekenai Tadi Gohuna ena kohua lalonai idia davaria. Idia be mai anina bada herea Heberu Revarevadia edia torea maoromaoro karana idia hahedinaraia totona bona Palestine ena tomadiho kara Iesu be tanobada ai ia noho neganai ia hahedinaraia totona. (Isaia 40:8) Ena be unai toretore haida idia halasia haraga, 1991 lalonai, toretore gaudia kahirakahira 400 bamona idia do printaia lasi bona diba taudia ese idia itaia diba lasi. Unai ese daradara hereva idauidau ia havaraia toretore edia hereva bona unai toretore do idia printaia taudia edia lalohadai dekenai. Diba taudia momo be Profesa Ben Zion Wacholder bamona idia laloa. Ia “badu badina ia laloa bema hari idia karaia bamona printaia gaukara idia karaia metairametaira, ita ibounai do ita mase ore guna bena taunimanima be Tadi Gohuna Toretoredia edia buka momo do idia itaia diba.”
To September gunanai unai bamona kara idia haidaua. Profesa Wacholder bona ia danu ia gaukara tauna ta, Martin Abegg, idia gwau diba bada amo kompiuta ta idia gaukaralaia unai toretoredia ena hereva, idia naria namonamo bukadia, idia printaia totona. Bena, Huntington Library, San Marino, California, U.S.A. dekenai, idia gwau idia dekenai be toretore ginigunadia edia foto idia noho bona dagi bada diba taudia ese idia itaia diba. Ia hedinarai toretore edia kopi haida be foto amo idia karaia bona unai amo unai hereva be nega daudau lalonai do idia noho diba. Unai toretore edia foto bukadia momo be gabu idauidau ai idia atoa, bona gabeai ta be Huntington Library dekenai ia hedinarai.
Diba tauna ta ia gwau unai kara be ‘diba tahua gaukarana dekenai Berlin Wall ia makohi karana bamona.’ Unai toretoredia idia hamaoromaoroa gaukarana idia naria taudia idia gwau kompiuta amo unai toretoredia idia printaia bona foto hahedinaraia karana be ‘henao’ karana. Reana lagani momo lalonai unai kara ena maoro do idia hepapahuahulaia. To idia karaia noho lalonai, ia hedinarai ma diba taudia momo be Tadi Gohuna Ena Toretoredia edia buka ibounai do idia itaia diba.
[Picture on page 32]
Habakuku herevalaia buka ta ena laulau, Tadi Gohuna Ena Toretore ta