Keristen Kara Maoromaoro Karaia Tuari Tanonai—Liberia

Itaia tauna ta ese sivarai ia gwauraia

“ELEPHANT be ava latanai idia heatu neganai, ava danu ese hisihisi ia ania.” Unai West Africa herevana ese Liberia dekenai ia vara tuarina ia gwauraia hedinarai namonamo! Taunimanima 20,000 bamona be edia mauri idia haboioa, bona unai tano ena taunimanima 2.6 milion amo 1.3 milion bamona be edia noho gabuna idia rakatania. Taunimanima momo be hisihisi idia davaria, to idia momo be ami taudia lasi; idia be “ava”​—kerere lasi tataudia, hahinedia bona natu maragidia.

Tuari be December 1989 lalonai ia vara neganai, Iehova ena Witness taudia 2,000 bamona be Liberia dekenai idia moale badina edia namba be ia bada daekau noho dainai, bona idia ese mai goada danu vaira negana idia laloa noho. To madi, idia danu be ‘ava bamona hisihisi idia ania.’

Tuari Ia Hanaia Lao Gabu Haida Dekenai

Unai tuari be Liberia bona Côte d’Ivoire tanodia edia hetoana dekenai ia matamaia bona unuseniai tuari amo eiava politikol karadia amo idia heau mauri taudia be idia heau lao Monrovia dekenai taunimanima 500,000 bona ma haida be unai siti dekenai idia noho. Lagani 1990 lalonai, March ia lao bona May huadia lalonai, heatu be idia karaia lao south kahana dekenai, bona Iehova ena Witness misinari taudia be Ganta hanua idia rakatania bona gabeai Gbarnga hanua idia rakatania danu. Idia bona ma haida be unai hanua idia rakatania taudia ginigabedia. July 2, 1990 lalonai, tuari taudia be Monrovia hanua dekenai idia raka vareai neganai, tuari idia habadaia momokani.

Taunimanima ta be ia diba lasi unai dika bada karana do ia vara. Ami idauidau toi be hanua ena dala dekenai idia heatu heheni mai ipidi badadia bona metaudia danu, bona roket, bona bomu negea masini amo idia heatu ela bona tuari ia doko. Idia mase lasi taudia be idia hadikadia bona hahisihisidia hanaihanai, bona hanaihanai idia tahudia noho badina edia iduhu taudia be idia ura henidia lasi dainai. August ena hanuaboi ta lalonai, tatau, hahine bona natu maragidia 600 bona ma haida be St. Peter’s Lutheran Dubu lalonai idia komu noho lalonai tuari taudia ese idia hamasedia ore, unai tuari taudia edia ura be taunimanima idia alaia mase sibona.

Taunimanima sinahu sinahu be edia kohu ibounai idia rakatania bona unai heatu amo idia heau mauri; idia karaia dabua sibona idia rakatania lasi. Ruma bese taudia momo idia hapararadia bona hua momo lalonai idia hedavari heheni lou lasi bona idia noho hebou diba lasi. Toana be Monrovia dekenai idia noho taudia ibounai be unai gabu idia rakatania bona ami taudia bona unai siti ena gabu idaudia amo idia heau mai taudia be unai ruma dekenai idia vareai. Monrovia ena taunimanima rua rua iboudiai amo ta ta bona ma haida ese edia noho gabuna korikorina idia rakatania bona gabu idauna ta dekenai idia lao. Momo be edia kohu ibounai idia haboioa bona edia varavara ta danu be ia mase. Ma haida edia varavara taudia momo idia mase.

Unai tuari be ia bada momokani dainai West Africa tanodia 5 be edia ami idia siaia lao maino havaraia lou dalana idia tahua totona. Lagani 1990, October ena hua dokonai, unai heatu momo be idia ore. To aniani ta be lasi dainai, hitolo bada ia vara unai hanua dekenai. Taunimanima durua oreadia idia gwau, lagani 5 idia do abia lasi Monrovia natudia maragidia toi toi iboudiai amo tamona tamona bamona idia gorere badina aniani namona idia ania lasi dainai bona dina ta ta iboudiai lalonai taunimanima sinahu ta bona ma haida idia mase. Mauri be ia auka bada badina haida idia kara dika taunimanima edia moni idia veria totona; momo ese taunimanima durua oreadia amo ia mai raisi idia henaoa bona haida dekenai idia hoihoilaia. Idia hoihoilaia raisi kapusi tamona ena davana be K20.00 eiava unai davana ia hanaia. Nega ibounai, gorere idauidau idia noho to cholera gorerena be bada herea momokani, badina siti ena ranu, bona mei rumadia, bona paua havaraia ensini ibounai idia hadikaia ore.

Monrovia dekenai idia noho Iehova ena Witness taudia tausen tamona mai kahana be dika bada idia davaria danu. Idia momo be siti amo idia heau mauri bona idia lao gunika hanuadia dekenai, bona haida be bouti amo idia lao Ghana bona Nigeria eiava dala amo idia lao Côte d’Ivoire eiava Sierra Leone dekenai. Lagani 1990 lalonai, July ia lao December dekenai, Witness 30 bona ma haida idia mase. Haida be ipidi amo idia pididia mase, bona haida be gorere bona hitolo amo idia mase. Hesiai Gaukara Hadibaia Sikulina ena kosi idia haorea tadikakadia rua, Alan Battey bona Arthur Lawson, America misinari taudia, be unai taudia danu idia mase hebou. Bema iseda varavara bona turadia be unai nega dika hereana lalonai idia boio, Bible ese toreisi lou helarona ia hahedinaraia dainai, iseda lalona ia hagoadaia bada!​—Kara 24:15.

Keristen Tadikaka be Lalo-Tamona Ida Idia Gaukara Hebou

Tuari ia vara noho lalonai, edia noho gabudia idia haboioa Witness taudia momo be Iehova ena Witness taudia edia branch opesi dekenai bona taoni ena kahana daudauna ai, misinari taudia edia ruma dekenai, idia heau mauri, unuseniai idia noho totona. Haida be heduru idia tahua do idia komu badina unai gabu dekenai ami taudia ese edia iduhu taudia idia alaia mase noho, bona idia danu do idia alaia garina dainai idia komu. Branch dekenai momo be gaukara idauidau idia abia, bona heduru bada idia henia nadunadu bona hagoevaia gaukara lalonai. Idia haida, bema dala ia noho neganai, kopukopu gabuna dekenai au raurau anianidia idia gogoa.

Taunimanima be gabu ibounai dekenai idia mahuta, haida be misinari taudia edia mahuta daiutu dekenai idia mahuta, haida be taunimanima idia raka lao raka mai gabudia dekenai idia mahuta, haida be Buka Siaia Department ena gabu dekenai idia mahuta, bona haida be opesi lalonai idia mahuta. Tano ai geidia mei gabudia ai karaia totona bona unai gabu ai naria danu. Hahine taudia be gorere taudia idia naria, bona idia ese malaria bona fiva gorere idia abia taudia idia naria namonamo. Momo ese ranu kukuri gorerena idia abia.

Aiemai mauri bona gaukara idia heau namonamo totona, taravatu haida ai karaia, bona ai hegaegae, bena ai diba bomu idia moru neganai dahaka do ai karaia be namo dika ta do ai davaria garina. Unai dainai, ami taudia ese ipidi badadia idia gaukaralaia neganai, branch rumana dekenai aiemai komu gabudia ai diba. Ena be aiemai magu be 3 mita bamona ia daekau bona ia durua sisina, to ipidi badadia idia gaukaralaia neganai, ia hegeregere lasi. Daudau lasi murinai iseda guhi ena toana be ia dika momokani badina matu momo idia noho dainai!

Witness taudia momo ese edia witness tadikaka idia durudia dainai kahirakahira idia mase; idia durudia tadikakadia edia iduhu be ami taudia ese idia inai henidia dainai, edia ura be unai iduhu taudia ibounai do idia hamasedia ore. Dina ta dekenai, ia taitai bada Keristen taihuna ta be iena mauri noho natudia ida, ta be wiki rua sibona beibi, branch opesi dekenai ia ginidae. Unai taihu ena adavana bona ena natuna mero matamata be ia ena vairana ai idia pididia mase. Unai ala-ala taudia idia giroa mai unai taihu bona ena natudia ma haida idia tahua neganai, Witness tauna ta ese ia hunidia namonamo dainai idia davaridia lasi.

Ma ruma bese ta be bapatiso lasi pablisa hahine ta danu idia ginidae branch dekenai, guna unai bapatiso lasi pablisa hahine ese ia hamauridia ena iduhu taudia edia amo. Bena, unai ruma bese edia iduhu taudia dainai bapatiso lasi pablisa ese hekwakwanai ia davaria neganai, idia ese ia be edia iduhu taudia amo ia hamauria.

Misinari taudia be nega momo tuari taudia mai edia pidipidi idia hereva henidia branch rumana dekenai do idia vareai lasi totona badina edia tahua karana amo branch rumana do idia hadikaia garina. Nega ta, haida mai edia badu dikadika danu ese ipidi ai dekenai idia duduia, bona ai idia hereva auka henia, idia gwau ai be idia tahua noho iduhu taudia haida ai hunia noho branch rumana dekenai. Idia hoa maragi lasi badina unai hanua Witness taudia be mai manau bona regerege lasi idia helai bona ai karaia noho Keristen hebouna dekenai idia kamonai namonamo. Ruma lalonai idia vareai bona idia tahua namonamo, to edia ura gauna idia davaria lasi. Nega ibounai ai be idia ura vareai taudia ai hamaorodia diba ai ese idia tahua ami taudia eiava edia inai taudia ai hunidia lasi. Ai be Keristen taudia dainai tuari ena orea ta orea ta lalonai ai vareai lasi, to ai gini siri sibona.

Heatu badadia haida idia karaia lalonai, Witness taudia haida be kansa gorere dikana ta ia abia tadikakana ta idia huaia mai branch rumana dekenai. Daudau lasi murinai ia mase. Branch rumana ena gabu dekenai mase gurina idia geia, bona ai ese mase herevana ena hebou mai lalohisihisi bada danu ai karaia! Unai tadikaka be aiemai Africa elda tadikaka namona ta, bona ia be lagani momo lalodiai hesiai gaukara ia karaia mai ena abidadama danu. Edia noho gabuna idia haboioa taunimanima sinahu ta bamona idia hebou branch ena vareai gabuna dekenai, mase hereva idia kamonaia totona, bona mase herevana idia karaia lalonai ipidi regeregena danu idia kamonai diba.

Aniani bona Ranu Ai Abia

Aniani be momo lasi. Tuari do ia vara lasi neganai, tano haida dekenai hoihoi taudia be peleini amo eiava bouti amo aniani idia siaia lao lasi Africa dekenai. Unai dainai siti dekenai aniani sisina sibona ia noho. Aiemai betele ruma bese taudia ibounai 12 be aniani dekenai idia hegeregere, unai aniani be hua momo lalonai ai gaukaralaia diba, to nega haida taunimanima 200 bamona be ai danu idia noho, idia haida be Witness lasi dekena taudia, to ai durudia badina heduru idia abia be gau badana. Ai ibounai be aniani sisina sisina ai ania dina tamona lalonai; unai aniani sisina ese ai ia hamauria hua haida lalonai. Ai ibounai ai hitolo. Beibi maragidia be turia kavakava ai idia lao, bona edia sinana bona tamana edia imana dekenai idia hekure kava sibona.

Aiemai aniani be kahirakahira ia ore ia lao noho. Edeseniai aniani ma haida do ai abia diba? Monrovia dekenai sitoa iboudiai idia koua vadaeni. Gabu iboudiai dekenai, hitolo taudia be hanua ena dala dekenai aniani idia tahua loaloa noho. Taunimanima be gau idauidau idia ania​—idia ania gaudia haida be sisia, pusikasi, bona bita. Branch dekenai misinari taudia rua idia ura lao Kakata dekenai, unai hanua dekenai heatu ia doko bona ena daudau be 60 kilomita bamona.

Idia ese Gima Kohorona magasin haida bona toa haida be edia motuka ena uindo dekenai idia kapaia kau, idia ura hahedinaraia idia be Iehova ena Witness taudia. Gabu haida dekenai idia sekedia murinai, mai ena tauanina bada tauna ta ese ia koudia bona henanadai ia henidia. Unai tau badana ena kemena dekenai grenade bomu idia noho, ena aiona dekenai ia atoa ageva bamona, bona ipidi ta be ena tauanina kahana dekenai. Iseda tadikaka idia hahedinaraia idia be Iehova ena Witness taudia bona idia ura lao Kakata dekenai aniani haida idia abia totona.

Ia gwau: “Lauegu murina dekenai umui mai. Lau be inai gabu ena tuari biaguna.” Ia ese unai tadikaka rua ia abidia lao iena hedikwota dekenai. Ai ese edia ruma bona edia noho gabuna idia haboioa taudia ai naridia sivaraina ia kamonaia murinai, ia ese ena tatau ia oda henidia raisi pusedia 20 be branch dekenai do idia abia lao, bona unai raisi puse ta ta edia metau be 45 kilogram! Bona ia ese gwaumaoro pepa ta ia henia iseda tadikaka rua dekenai Kakata dekenai do idia lao totona, bona iena ami tauna ta mai ena pidipidi ia siaia iseda tadikaka ia naria totona unai sekea gabudia dekenai.

Kakata dekenai idia ginidae neganai, idia ese iseda Keristen tadikaka Abraham idia davaria, bona ia be mai ena sitoa ta. Ia ese aniani momo maua haida lalonai ia haboua vadaeni ai totona, unai aniani haida be miliki pauda, suga, uma aniani tini dekenai, bona ai gaukaralaia diba gaudia ma haida. Iseda tadikaka edia laolao lalonai haida ese idia naria karana be moale gauna momokani. Iehova be reana ia moale bada badina aiemai aniani be aiemai turadia bona dekena taudia dekenai ai hariharilaia bona hari aiemai aniani be ia bada lou.​—Hereva Lada-isidia 11:25.

Monrovia ena gabu kahana dekenai, misinari taudia be misinari rumana ta lalonai edia ruma idia haboioa taudia idia durudia. Unai misinari taudia danu ese heduru idauidau idia davaria taunimanima haida dekenai. Haheitalai ta be inai, misinari tadikaka ta ese raisi puse toi ia abia ami tauna ta dekenai, bona unai ami tauna ese iseda misinari tadikaka ia laloatao badina lagani 16 gunanai iena gabu dekenai misinari gaukara ia karaia. Bona ma misinari ta be raisi puse 4 ia abia ia be idia tuari heheni oreana ta ena biaguna ida idia kiki hebou murinai.

Nega ta ai laloa branch rumana amo do ai siri badina ranu be sisina sibona. Unai gabu dekenai idia noho taudia momo be aiemai ranu guri sibona dekenai ranu idia abia diba. To aiemai paua generator ena bensini be ia ore noho dainai, ranu ena pamua gauna danu be do ia gaukara lasi. Ai ese branch rumana dekenai ai naria tauna ta, ia be Witness lasi tauna, be unai sivarai ia kamonai neganai, ia ese bensini haida ia davaria bona ia henia ai dekenai. Unai bamona ia karaia badina heatu idia karaia hamatamaia neganai ai ese ia ai naria dainai. Unai dainai aiemai ranu be ia ore lasi.

Lauma Dalanai Ai Goada Noho Dalana

October 1990 lalonai, ai misinari ginigabedia idia hamaoroa Liberia do ai rakatania neganai ai laloa momo gauna be inai: Aiemai tadikaka bona taihu unai gabu dekenai idia noho be edena bamona do idia karaia unai hekwakwanai dekenai? Unai nega murinai, sivarai ai kamonai, idia be haroro gaukara dekenai idia gaukara goada noho.

Tuari ia do vara lasi neganai, Witness taudia ta ta edia haroro hora ena averes hua ta ta iboudiai dekenai be 17 bamona. To tuari negana lalonai, ena be aniani be uda dekenai idia tahua noho, to kongregesen haida dekenai Witness taudia ta ta iboudiai idia haroro horadia edia averes be hora 20 mai kahana! Danu, Gima Kohorona magasin be idia momo lasi stadi totona, unai dainai, iseda taihu momo be edia imana amo stadi herevana idia torea hanaia, Sunday ena stadi dekenai idia henia totona.

Monrovia kahirakahira dekenai idia noho kongregesen hani lalonai Witness taudia momo idia noho badina Monrovia siti lalonai heatu ia vara dainai, idia heau siri. Inai tadikaka be edia kohu ibounai idia haboioa, badina edia ruma dekenai idia giroa lao diba lasi edia kohu ta idia abia totona. Hua haida lalonai haida edia natudia eiava edia tama sina be tuari kahana ta ai idia noho, to idia be ma tuari kahana dekenai idia noho dainai, idia amo idia parara! Iesu ena mase laloatao dinana ai, March 30 dekenai, inai kongregesen hani dekenai idia mai taudia iboudiai edia namba be 1,473 bamona.

Monrovia dekenai Witness taudia 300 bamona be idia goada karaia Memorial ena hua dekenai heduru pioneer gaukara idia karaia totona, ena be pura haida gunanai edia tauanina be idia manoka momokani badina idia hitolo bona unai dainai idia raka namonamo diba lasi. Haroro gaukara idia karaia noho, edia gaukara goada dainai, taunimanima 1,116 be Memorial ena hebou totona idia mai.

Monrovia dekenai Keristen elda tauna ta ia gwau: “Lagani 1990 ai December ia hamatamaia neganai, Kingdom Hall dekenai aiemai hebou ai hamatamaia lou. Hebou ginigunana dekenai taunimanima 17 be idia mai. Gabeai namba ia daekau lao 40 dekenai, bona nega daudau lalonai hebou idia mai taudia be 40 bamona. Bena, February 24 dekenai, hebou dekenai idia mai taudia edia namba ia bada daekau ia lao 65 bona pura ta murinai ia daekau ia lao 85. Danu, March huanai kongregesen taudia kahirakahira ibounai be heduru pioneer gaukara idia karaia.”

Ma Haida Durudia

Witness tauna ta ena varavara ta, ia be Witness lasi tauna, ia gwau: “Aiemai dubu tadikaka be tuari lalonai idia alaia heheni noho, bona idia be nega lasi edia tadikaka idia durudia.” To Iehova ena taunimanima edia kara be idau momokani!

Lagani 1991 February lalonai, unai gabu kahirakahira dekenai ia noho taunimanima durua orea ena seamani ese revareva ta ia torea iseda branch idia naria tadikakadia dekenai, bona inai bamona ia torea: “Inai revareva ena badina be umui ai tanikiu henia bona ai hanamoa bada badina aiemai taunimanima dekenai aniani ai henia negana lalonai, emui gabu lalonai aniani ai atoa hegaegae diba. Emui kara ese ia hahedinaraia taunimanima umui ura durua mai emui lalona ibounai danu, bona unai ese maino bona lalo-namo ia havaraia inai tano dekenai. Mani emui kara emui gaukara namona umui karaia noho.”

Iehova ena Witness taudia ma tano haida dekenai be haraga herea edia Liberia tadikaka idia durudia. Heduru idia abia West Africa tanodia Sierra Leone bona Côte d’Ivoire amo, Europe tanodia Netherlands bona Italy amo, bona United States amo.

Kekeni maragi ta ena sinana be idia alaia mase badina ena iduhu taudia be ami taudia ese idia inai henia dainai. Unai kekeni ese ena hanamoa herevana ia gwauraia badina tadikaka ese ia durua dainai. Ia torea, ia gwau: “Lau dekenai umui siaia mai gaudia iboudiai dainai, umui lau tanikiu henia. Umui emui kara namona dainai egu mamina be hegeregere lauegu sinana be lau kahirakahira dekenai ia noho. Ia bona lauegu tadina mero lau haboiodia tuari dekenai. Iehova lau noia umui ibounai do ia hanamoa. Lauegu mauri lagani be 11 sibona.”

Tadikaka ta ena ruma bese taudia ibounai be 6. Ena adavana be hua momo lalodiai ia komu badina ena iduhu dainai. Heduru ia abia dainai, tadikaka ia tanikiu henia. Inai bamona ia torea, ia gwau: “Ai be haida edia ruma ai makohia kava lasi edia kohu ai henaoa bona ai hoihoilaia totona, ai be aiemai dekena taudia hegeregerena ai noho lasi, to ai be dina ibounai aniani sisina sisina ai ania badina ai diba ena be aniani be sisina sibona ia noho to ai gaukaralaia namonamo dainai. Inai kara be Iehova ena amo ai diba.”

Haheitalai namona ta be tadikaka ta, ia bona ena adavana bona ena natuna rua be idia heau mauri bona idia lao Côte d’Ivoire dekenai. Ia ese ena ruma namona ia rakatania bona unai ruma be lahi amo idia gabua ore. To ia gwau, ena kudouna ia hahisia gauna badana be ena ruma ia haboioa dainai lasi, to iena Bible bona stadi bukadia idauidau ia haboioa dainai ia lalohisihisi bada!

Anina Bada Gaudia Ai Hadibaia

Hari lau laloa lou neganai, lau moale badina Iehova ese matahakani namodia ai dekenai ia hadibaia dainai. Momo lau diba idia kara maoromaoro noho bona idia roho mauri, bona haida be idia kara maoromaoro noho to idia mase. Unai dainai lau lalo-parara, aposetolo Paulo ena lalohadai ita abia be gau badana, ia gwau: “Bema ita mauri be Lohiabada dekenai ita mauri, bona bema ita mase, be Lohiabada dekenai do ita mase. Unai dainai ita mauri noho o do ita mase, ita be Lohiabada ena.”​—Roma 14:8.

Nega daudau lalonai misinari gaukara ia karaia tadikakana ta, ia gwau: “Inai gaudia ibounai dekenai ai diba Iehova be Heduru Tauna hereadaena, ia be ma ta danu ita hahegeregerea diba lasi. Paulo ia hereva bamona, ia gwau: ‘Oibe, aiemai laloa be kota karaia tauna ta ese aiemai mase ia gwauraia vadaeni bamona. To inai ia vara be do ai diba aiemai goada be ia hegeregere lasi totona. Vadaeni inai bamona ai diba neganai, mase taudia ia hatorea isi Diravana sibona ai abidadama henia.’ ” (2 Korinto 1:9; Salamo 30:10) Bona ma ia gwau: “Unai tuari ese ita dekenai ia hahedinaraia goevagoeva Iehova ena taunimanima be tadikaka momokanidia, bona Iesu ena hereva hegeregerena, sibona ena ura dadaraia lalokauna idia hahedinaraia.”​—Ioane 13:35.

Liberia taihu ta ese revareva ta ia torea ai misinari taudia haida dekenai, ai ese unai tano ai rakatania October 1990 lalonai idia heatu neganai. Unai revareva ese ia hahedinaraia Keristen tadikaka bamona ai lalo-tamona momokani. Inai bamona ia torea, ia gwau: “Lauegu guriguri herevana be inai: umui ibounai be do umui giroa mai Liberia dekenai bona hebouhebou badana ta do ita abia,” bona ma ia gwau: “O! Unai dina badana lau naria noho, lau ura do ia mai haraga. Unai lau laloa neganai lau moale bada herea.”

Oibe, do ai moale bada herea, bema Keristen hesiai gaukara idauidau be Liberia dekenai do idia karaia lou neganai. Iseda taihu ena hereva be maoro; misinari taudia bona tuari dainai edia gabu idia rakatania taudia do idia giroa lou bona hebouhebou badana ginigunana do idia karaia neganai, moale bada do ai davaria. Unai kara be do ia vara momokani!

[Map on page 27]

(For fully formatted text, see publication.)

LIBERIA

Monrovia

Kakata

Gbarnga

Ganta

SIERRA LEONE

GUINEA

CÔTE D’IVOIRE

Atlantic Ocean

[Picture on page 28]

Tuari lalonai edia noho gabuna idia haboioa Witness taudia edia natudia branch opesi dekenai

[Picture on page 31]

Liberia amo idia heau mai taudia be Côte d’Ivoire Witness taudia ese idia henia dabuadia idia hapararaia