‘Lauma Helaga Ena Ladana Lalonai’

“Unai dainai do umui lao, bese ibounai be diba tahua taudia do umui halaoa, bona Tamana, Natuna, Lauma Helaga ena ladanai do umui bapatiso henia idia dekenai.”​—MATAIO 28:19.

1. Ioane Bapatiso be lauma helaga ia herevalaia neganai dahaka hereva matamatana ta ia gwauraia?

LAGANI 29 C.E. lalonai, Ioane Bapatiso be Israel dekenai ia gaukara Mesia ena dala ia hegaegaelaia totona, bona iena hesiai gaukara lalonai, ia be lauma helaga dekenai gau matamatana ta ia gwauraia hedinarai. Momokani, Iuda taudia be Heberu Revarevadia ese ia herevalaia gaudia lauma helaga dekenai idia diba vadaeni. To, reana idia hoa Ioane be inai bamona ia hereva neganai, ia gwau: “Lau be ranu dekenai lau bapatisoa umui, lalona giroa ena toana. To lauegu murina dekenai do ia mai tauna . . . ese Lauma Helaga . . . dekenai do ia bapatisoa umui.” (Mataio 3:11) Idia dekenai ‘bapatiso lauma helaga amo’ be lauma helaga ena gaukara gwauraia dalana matamatana ta.

2. Iesu be lauma helaga ia herevalaia neganai dahaka hereva matamatana ta ia gwauraia?

² Gabeai ia mai tauna be Iesu. Ena be nega momo lauma helaga ia herevalaia, to tanobada dekenai ia mauri neganai Iesu be lauma helaga amo ta ia habapatisoa lasi. Ma danu, ia toreisi lou murinai, ia be ma dala ta dekenai lauma helaga ia herevalaia. Iena hahediba taudia ia hamaorodia, ia gwau: “Unai dainai do umui lao, bese ibounai be diba tahua taudia do umui halaoa, bona Tamana, Natuna, Lauma Helaga ena ladanai do umui bapatiso henia idia dekenai.” (Mataio 28:19) Unai hereva “ena ladanai” ena anina be “ena dagi hamomokania.” Bema ta be Tamana, Natuna, bona lauma helaga edia dagi ia hamomokania dainai ranu dekenai bapatiso ia abia, unai be lauma helaga dekenai bapatiso karana amo ia idau. Unai danu be lauma helaga ena gaukara gwauraia dalana matamatana ta.

Lauma Helaga Dekenai Idia Bapatiso

3, 4. (a) Lauma helaga amo bapatiso ginigunadia be edena negai idia vara? (b) Ia bapatisodia sibona lasi, to lauma helaga be Pentekoste 33 C.E. ai dahaka ia karaia Iesu ena hahediba taudia dekenai?

³ Nega sisina Iesu be guba dekenai ia do daekau lasi neganai, ia ese lauma helaga dekenai bapatiso karana ia herevalaia bona iena hahediba taudia ia gwauhamata henidia, ia gwau: “Dina momo do ia ore lasi neganai, Lauma Helaga dekenai bapatiso do umui abia.” (Kara 1:​5, 8) Nega sisina murinai, unai gwauhamata ia guguru. Ierusalem lalonai, atai daiutuna ta dekenai idia hebou neganai lauma helaga be hahediba taudia 120 latanai ia diho mai, bona unai negai Iesu be nega ginigunana ai guba amo lauma helaga dekenai taunimanima ia bapatiso henidia. (Kara 2:​1-4, 33) Unai amo dahaka ia vara? Hahediba taudia be Keriso ena lauma tauanina oreana ena kahana ai idia lao. Aposetolo Paulo ia hereva bamona, ‘Lauma tamona lalonai idia bapatisodia, vadaeni tauanina tamona idia lao vadaeni.” (1 Korinto 12:13) Unai negana ai danu, lauma helaga amo idia vara, horoa idia abia gabeai Dirava ena guba Basileiana lalonai king bona hahelaga taudia ai idia lao totona. (Efeso 1:​13, 14; 2 Timoteo 2:12; Apokalupo 20:6) Lauma helaga be hamomokania toana ginigunana idia be unai ahuna hairaina do idia abia totona, to unai sibona lasi.​—2 Korinto 1:​21, 22.

⁴ Unai nega ena lagani haida gunanai, Iesu be Nikodemo ia hamaoroa, ia gwau: “Bema taunimanima ta be ia vara lou lasi, ia be Dirava ena Basileia do ia itaia diba lasi. . . . Taunimanima be ranu dekena amo bona Lauma Helaga dekena amo bema ia vara lasi, ia be Dirava ena Basileia lalonai do ia vareai diba lasi.” (Ioane 3:​3, 5) Unai negai taunimanima 120 idia vara lou vadaeni. Lauma helaga ena dala amo, idia be Dirava ena lauma natudia, Keriso ena tadikaka ai idia lao. (Ioane 1:​11-13; Roma 8:​14, 15) Unai lauma helaga karadia iboudiai be hoa karadia edia namo idia hereaia. Ma danu, idia be hoa karadia gunadia bamona lasi, badina aposetolo taudia idia mase murinai lauma helaga ena kara momo be idia ore lasi, to lauma helaga be ia gaukara noho ela bona hari iseda nega lalonai. Iehova ena Witness taudia idia moale badina Keriso ena tauanina ena memba taudia, lauma helaga amo bapatiso idia abia taudia ginigabedia, be idia dekenai idia noho, bona unai taudia be “hesiai tauna mai ena kamonai bona mai ena kara maoromaoro” oreana bona nega korikori ai lauma aniani henia gaukarana idia karaia.​—Mataio 24:​45-47.

Bapatiso Idia Abia “Lauma Helaga Ena Ladanai”

5, 6. Lauma helaga dekenai idia karaia bapatiso ginigunadia haida be ranu dekenai idia karaia bapatisodia edena bamona idia havaraia?

⁵ To ia gwauhamatalaia ranu bapatisona Tamana, Natuna, bona lauma helaga edia ladana dekenai be edena bamona? Lauma helaga amo idia bapatiso hahediba taudia ginigunadia be unai ranu bapatisona idia abia lasi. Idia be Ioane amo ranu bapatiso idia abia vadaeni, bona unai negana ai Iehova ese unai bapatiso ia abia dae dainai, bapatiso idia abia lou lasi. To Pentekoste 33 C.E. ai, taunimanima hutuma bada be ranu bapatiso matamatana idia abia. Edena dala ai unai ia vara?

⁶ Lauma helaga amo unai taudia 120 be bapatiso idia abia neganai, rege bada hereana ta ia vara dainai taunimanima hutuma momo idia mai. Idia hoa badina idia kamonai hahediba taudia be gado idauidau ai idia herevahereva, anina be idia noho taudia idia diba gadodia idaudia dekenai idia herevahereva. Aposetolo Petro ia gwau unai hoa karana ese ia hamomokania Iesu be mase amo ia toreisi lou vadaeni bona guba dekenai Dirava ena idiba kahanai ia helai noho bona ia ese Dirava ena lauma helaga ia bubua diho. Petro be ia idia kamonai henia taudia ia hagoadaia, ia gwau: “Inai dekenai Israela bese taudia ibounai idia diba momokani be namo, inai Iesu, satauro dekenai umui hamasea tauna, Dirava ese Lohiabada bona Keriso ia halaoa vadaeni.” Iena hereva ia hadokoa inai hereva amo, ia gwau: “Umui ibounai emui lalona umui giroa bona bapatiso umui abia, Iesu Keriso ena ladana dekenai, umui emui kara dika do idia gwauatao totona, bona Lauma Helaga do umui abia, Dirava ena harihari gauna.” Taunimanima 3,000 bamona be unai idia karaia.​—Kara 2:​36, 38, 41.

7. Pentekoste 33 C.E. ai, edena dala ai idia bapatiso taudia 3,000 be Tamana, Natuna, bona lauma helaga edia ladana dekenai bapatiso idia abia?

⁷ Ita gwau diba idia be Tamana, Natuna, bona lauma helaga edia ladana dekenai unai ladadia edia dagi idia hamomokania dainai bapatiso idia abia, a? Oibe. Ena be Petro ese ia hamaorodia lasi Tamana ena ladana dekenai bapatiso do idia abia, to idia diba vadaeni Iehova be Atai Herea Momokani Lohiabadana badina idia be Iuda taudia, Ia dekenai idia gwauhamata vadaeni besena. Petro ia gwau: ‘Natuna ena ladanai bapatiso umui abia.’ Unai dainai edia bapatiso ese ia hahedinaraia idia diba Iesu be edia Lohiabada bona edia Keriso. Hari idia be iena hahediba taudia bona idia abia dae unai nega amo edia kara dika gwauatao dalana be Iesu ena amo. Danu, unai bapatiso ena anina be lauma helaga ena dagi idia hamomokania bona taunimanima ese unai bapatiso idia abia badina gwauhamata be lauma helaga ena harihari gauna bamona do idia abia.

8. (a) Ranu bapatiso sibona lasi, to horoa Keristen taudia be ma dahaka bapatiso idia abia danu? (b) Lauma helaga ena ladana dekenai ranu bapatiso idia abia taudia 144,000 sibona lasi, to daidia danu be unai bapatiso idia abia?

⁸ Pentekoste 33 C.E. dinana ai ranu lalonai idia bapatiso taudia be lauma helaga amo bapatiso idia abia danu, bona idia be horoa idia abia guba Basileiana lalonai king bona hahelaga taudia ai do idia lao totona. Apokalupo bukana ena hereva hegeregerena, idia be taunimanima 144,000 sibona. Unai dainai lauma helaga dekenai bapatiso idia abia taudia, bona Basileia do idia abia dainai “maka” idia abia taudia, be 144,000 sibona. (Apokalupo 7:4; 14:1) To, hahediba taudia matamatadia iboudiai​—herevana edia helaro be do idia lao guba ai eiava tanobada ai​—be ranu lalonai bapatiso idia abia, Tamana, Natuna, bona lauma helaga edia ladana dekenai. (Mataio 28:​19, 20) Ena be idia be “orea maragi” taudia eiava “mamoe idaudia haida,” to lauma helaga ena ladana dekenai bapatiso idia abia ena anina be dahaka Keristen taudia iboudiai dekenai? (Luka 12:32; Ioane 10:16) Unai ita do haerelaia lasi neganai, namona be Keristen taudia ginigunadia edia nega ai lauma helaga ena kara haida ita laloa guna.

Lauma Helaga Ena Huahua

9. Keristen taudia iboudiai dekenai dahaka lauma helaga gaukarana ta be mai anina bada?

⁹ Lauma helaga ena gaukara badana ta be ita ia durua Keristen ena kara bona lalohadai ita hahedinaraia totona. Momokani, ita goevadae lasi dainai ita kara dika noho. (Roma 7:​21-23) To ita helalo-kerehai momokani neganai, Iehova be Keriso ena boubou karana dainai iseda kerere ia gwauatao. (Mataio 12:​31, 32; Roma 7:​24, 25; 1 Ioane 2:​1, 2) Danu, Iehova ia ura iseda kara dika dalana ita koua toho, bona lauma helaga ese ita ia durua unai ita karaia totona. Paulo ia gwau: “Lauma Helaga ese emui mauri dala ia hakaua be namo, vadaeni tauanina ena ura dikadia do umui karaia lasi.” (Galatia 5:16) Paulo ia hahedinaraia lauma helaga be ita ia durua kara namo hereadia ita karaia totona. Ia torea, ia gwau: “Lauma Helaga ese inai bamona karadia ia havaraia: Lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana.”​—Galatia 5:​22, 23.

10. Edena dala ai Keristen tauna lalonai lauma helaga ena huahua ia vara diba?

¹⁰ Edena dala ai lauma helaga ese Keristen tauna ia durua unai huahua ia havaraia totona? Ita gwau lasi ita be gwauhamata bona bapatiso Keristen taudia dainai unai kara namo idia vara kava. Lasi, to ita hekwarahilaidia noho be namo. To bema unai karadia idia hahedinaraia Keristen taudia ma haida ita bamodia, bona bema Dirava ita guriguri henia iena lauma helaga ese ita ia durua unai karadia ita habadaia totona, bona danu bema ita be hebamo dikadia ita dadaraia bona Bible ita stadilaia sisiba bona haheitalai namodia ita davaria totona, vadaeni, lauma helaga ena huahua be ita lalonai do idia tubu.​—Hereva Lada-isidia 13:20; 1 Korinto 15:33; Galatia 5:​24-26; Heberu 10:​24, 25.

Lauma Helaga ese Haida Ia Abia Hidi

11. Edena dala ai lauma helaga ese elda taudia ia abia hidi?

¹¹ Paulo be Efeso elda taudia ia hereva henidia neganai, lauma helaga ena gaukara ma ta ia gwauraia, ia gwau: “Umui sibona umui naria namonamo, bona mamoe orea ibounai danu. Inai orea naria taudia Lauma Helaga ese umui ia halaoa vadaeni. Dirava ena ekalesia, iena lalokau Natuna ena rarana amo ia hoia gauna, umui ubua.” (Kara 20:28) Oibe, kongregesen naria taudia, eiava elda taudia, be lauma helaga ese ia abidia hidi. Edena dala ai? Namona be idia abia hidi elda taudia be Bible ena taravatu idia badinaia unai. (1 Timoteo 3:​1-13; Tito 1:​5-9) Unai taravatu idia badinaia dalana tamona be lauma helaga ena heduru amo. Ma danu, elda edia orea be elda matamatana ta ena ladana idia siaia neganai, idia guriguri guna lauma helaga ese ia durudia totona, bena idia diba namonamo unai tauna ese unai taravatu ia badinaia dainai ia hegeregere eiava lasi. Bona lauma helaga ese ia horoa hesiai tauna mai ena kamonai bona mai ena abidadama oreana ese unai tau dekenai dagi idia henia.

Lauma Helaga ese Oi Ia Hakaua

12. Edena dala ai lauma helaga be Bible amo ita ia hakaua diba?

¹² Keristen taudia idia diba lauma helaga ena siahu dainai Revareva Helagadia idia torea. Unai dainai, unai revareva idia tahua lauma helaga ese ia havaraia aonegana idia abia totona, Keristen negana ia do mai lasi neganai Iehova ena witness taudia ese idia karaia hegeregerena. (Hereva Lada-isidia 2:​1-9) Revareva Helagadia idia duahia, idia lalodia momo, bona edia mauri lalonai idia badinaia. (Salamo 1:​1-3; 2 Timoteo 3:16) Unai dainai lauma helaga ese ia durudia ‘Dirava ena laloa dobu gaudia idia tahua’ totona. (1 Korinto 2:​10, 13; 3:19) Hari inai nega lalonai Dirava ena lauma helaga ena gaukara badana be unai dala dekenai Dirava ena hesiai taudia ia hakaudia.

13, 14. Iesu be kongregesen ena hekwakwanai dekenai dahaka ia gaukaralaia, bona hari inai nega lalonai edena dala ai unai bamona ia karaia?

¹³ Ma danu, Apokalupo bukana lalonai, ia toreisi lou tauna Iesu be Asia Minor ena kongregesen 7 dekenai hereva ia siaia. (Apokalupo, karoa 2 bona 3) Unai hereva lalodiai ia hahedinaraia ia ese kongregesen edia kara ia tahudia bona edia noho lauma dalana dekenai ia dibaia. Ia davaria, idia haida be haheitalai namona idia karaia abidadama dekenai. To, ma haida edia elda taudia be orea hapararaia karadia, heudahanai karadia, bona manoka karadia idia koua lasi dainai mamoe serina idia hadikaia. Sadi kongregesen dekenai, abidadama taudia haida sibona idia noho, to kongregesen taudia oredia be lauma dalana dekenai idia mase. (Apokalupo 3:​1, 4) Iesu be edena dala ai unai hekwakwanai ia hanamodia? Lauma helaga amo. Kongregesen 7 dekenai sisiba ia henia neganai, Iesu be idia ta ta iboudiai ia henia herevadia edia dokona be inai: “Mai ena taiana tauna, namona be Lauma Helaga ena hereva ekalesia oreadia dekenai do ia kamonai.”​—Apokalupo 2:​7, 11, 17, 29; 3:​6, 13, 22.

¹⁴ Hari inai negai danu, Iesu ese kongregesen edia kara ia tahudia. Bona hekwakwanai ia davaria neganai, ia hanaidia totona lauma helaga ia gaukaralaia. Bible ita duahia neganai, lauma helaga ese ita ia durua diba unai hekwakwanai ita diba bona ita hanaia totona. Lauma helaga ese ia horoa hesiai tauna mai ena kamonai bona mai ena kara maoromaoro oreana ese idia printaia Bible bukadia be ita idia durua diba. Eiava kongregesen lalonai lauma helaga ese ia horoa elda taudia be ita idia durua diba. Herevana unai sisiba be taunimanima ta totona eiava kongregesen taudia ibounai totona, to ita be Iesu ena hereva ita badinaia, a? Ia gwau: “Mai ena taiana tauna, namona be Lauma Helaga ena hereva . . . do ia kamonai.”

Lauma Helaga bona Haroro Gaukara

15. Edena dala ai lauma helaga be Iesu dekenai ia gaukara haroro gaukara dekenai?

¹⁵ Nega ta Iesu be Nasareta ena dubu ta lalonai ia haroro neganai, ia be lauma helaga ena gaukara ma ta ia hahedinaraia. Unai sivarai ia gwau: “Buka . . . ia kehoa, inai bamona ia torea gabuna dekena amo ia duahia, ia gwau, ‘[Iehova] ena Lauma ese lau ia hahonua, ia [Iehova] ese lau ia abia hidi vadaeni Sivarai Namo ogogami taudia dekenai do lau haroro henia. Lau ia siaia vadaeni, idia guia taudia do lau ruhaia totona, bona matakepulu taudia edia matana kehoa herevana do lau gwauraia, bona mai edia bero taudia dekenai mauri do lau henia.’ Ia ese ia haroro hamatamaia, ia gwau, ‘Inai umui kamonaia herevana be hari dina ia momokani vadaeni.’ ” (Luka 4:​17, 18, 21; Isaia 61:​1, 2) Oibe, lauma helaga ese Iesu ia horoa sivarai namona ia harorolaia totona.

16. Keristen ginigunadia edia nega lalonai, edena dala ai lauma helaga ese gaukara bada ia karaia sivarai namona harorolaia gaukarana dekenai?

¹⁶ Ia do mase lasi neganai, Iesu be ia murinai idia raka taudia do idia karaia haroro gaukara badana ia perovetalaia. Ia gwau: “Sivarai Namo bese ibounai dekenai be do idia haroro henia guna.” (Mareko 13:10) Keristen ginigunadia edia nega ai unai hereva be nega ginigunana idia guguru, bona lauma helaga ese ia karaia gaukarana be bada. Lauma helaga ese Filipo ia hakaua Etiopia eunuko tauna dekenai ia haroro henia totona. Lauma helaga ese Petro ia hakaua Korenelio dekenai, bona lauma helaga ena siahu dainai Paulo bona Banaba be aposetolo gaukara idia karaia totona Antioka amo idia siaidia lao. Gabeai, Paulo ia ura Asia bona Bitunia dekenai ia haroro neganai, lauma helaga be dala ta amo ena dala ia koua. Dirava ia ura haroro gaukara be Europe dekenai idia karaia.​—Kara 8:29; 10:19; 13:2; 16:​6, 7.

17. Hari inai negai, haroro gaukara dekenai lauma helaga be dahaka gaukara ia karaia?

¹⁷ Hari inai nega lalonai, lauma helaga be haroro gaukara dekenai gaukara bada ia karaia lou. Isaia 61:​1, 2 ma ia hagugurua noho totona, Iehova ena lauma helaga ese Iesu ena tadikaka ia horodia idia haroro totona. Mareko 13:10 be dala dokona dekenai ia guguru totona, unai horoa taudia be “bese idauidau” dekenai sivarai namona idia harorolaia, bona hutuma bada taudia ese idia durudia. (Apokalupo 7:9) Bona unai kara dekenai lauma helaga ese idia iboudiai ia durudia. Keristen ginigunadia edia nega lalonai hegeregerena, haroro gaukara ia hamatamaia teritori matamatadia dekenai bona gaukara dalana ia hakaua. Ia be taunimanima ia hagoadaia, bona ia durudia edia gari idia hanaia bona hadibaia gaukarana dekenai edia diba idia habadaia totona. Ma danu, Iesu be iena hahediba taudia ia hamaorodia, ia gwau: “Lohia bona king edia vairana dekenai do idia hakaua umui, lau dainai. Inai dala dekenai umui ese lau do umui gwauraia hedinarai idia dekenai bona bese idauidau ibounai dekenai. Umui idia kota henia neganai umui emui lalona do idia hekwarahi lasi, do umui gwauraia herevadia totona. . . . Badina be gwauraia tauna be umui lasi, to umui emui Tamana ena Lauma umui emui lalona dekenai do ia hereva.”​—Mataio 10:​18-20.

18, 19. Edena dala ai lauma be headava hahine matamatana ida ia gaukara bena manau taudia idia boiria ‘mauri ranuna do idia abia davana lasi’ totona?

¹⁸ Apokalupo bukana lalonai, Bible be haroro gaukara lalonai lauma helaga ena gaukara bada ia gwauraia lou. Unai buka lalonai, aposetolo Ioane ia gwau: “Lauma Helaga bona Headava Matamata Hahine idia gwau, ‘Oi mai.’ Bona inai hereva idia kamonai taudia danu, namona be idia gwau, ‘Oi mai.’ Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.” (Apokalupo 22:17) Headava matamata hahine ese 144,000 taudia ia laulaulaia bona idia haida be tanobada dekenai idia do noho, bona taunimanima iboudiai idia boiria mauri ranuna idia abia davana lasi totona. To, itaia, lauma helaga danu ia gwau ‘Oi mai.” Edena dala ai?

¹⁹ Headava matamata hahine oreana​—hari inai nega ai mamoe idaudia hutuma bada ese idia durua​—idia harorolaia sivaraina be Bible amo ia mai, bona lauma helaga ese taunimanima ia hakaudia Bible idia torea totona. Bona unai lauma helaga ese headava matamata hahine oreana taudia edia kudouna bona edia darana ia kehoa, Dirava ena amo ia mai Herevana dekenai idia lalo-parara totona, bona ma haida dekenai ena anina idia gwauraia totona. Iesu Keriso ena hahediba taudia matamatadia idia bapatiso neganai idia be mai edia moale danu davana lasi mauri ranuna idia abia. Bona idia moale bada herea lauma bona headava matamata hahine ida unai hereva “Oi mai” be ma haida dekenai idia gwauraia dainai. Hari inai nega lalonai, taunimanima 4 milion bona ma haida be lauma helaga ida unai gaukara idia karaia hebou.

Iseda Bapatiso Ita Hamomokania

20, 21. Edena dala ai ita be lauma helaga ena ladana dekenai ita abia bapatiso ita hamomokania diba, bona namona be unai bapatiso edena bamona ita laloa?

²⁰ Lauma helaga ena ladana dekenai bapatiso ita abia neganai, anina be taunimanima vairanai ita hahedinaraia lauma helaga ena siahu bona ena gaukara bada Iehova ena ura hagugurua karana dekenai ita abia dae. Unai hereva amo ia hedinarai ita hahedinaraia ita be lauma helaga ida do ita gaukara hebou, bona Iehova ena taunimanima edia orea lalonai ena gaukara dalana do ita koua lasi. Unai dainai, ita be hesiai tauna mai ena kamonai bona mai ena kara maoromaoro oreana ita abia dae bona ia ida ita gaukara hebou. Kongregesen lalonai elda taudia edia hereva ita badinaia. (Heberu 13:​7, 17; 1 Petero 5:​1-4) Iseda mauri lalonai ita ese tanobada aonegana lasi, to lauma helaga ese ia henia aonegana ita badinaia, bona lauma helaga ese ita ia durua iseda kara ita hanamoa totona, Keriso bamona ita lao totona. (Roma 13:14) Bona ita be mai eda kudou ibounai ida lauma helaga bona headava hahine matamatana ida ita gaukara hebou, bona reana do idia kamonai taudia milion milion dekenai ita gwau “Oi mai.”

²¹ ‘Lauma helaga ena ladana dekenai’ bapatiso ita abia be mai anina bada gauna! To, hahenamo momo ia havaraia diba! Namona be unai bapatiso do idia abia taudia edia namba ia bada ia lao. Bona namona be ita ibounai be unai bapatiso ena anina ita hamomokania iseda mauri lalonai, ita be Iehova ita hesiai henia neganai bona ‘gaukara do ita karaia mai iseda lalona ibounai.’​—Roma 12:11.

Lauma Helaga Dekenai Dahaka Oi Laloatao?

◻ Pentekoste 33 C.E. ai lauma helaga be edena dala ai ia gaukara?

◻ Edena dala ai lauma helaga ena huahua ita havaraia diba?

◻ Edena dala ai lauma helaga ese elda taudia ia abia hidi?

◻ Iesu be edena dala ai kongregesen ena hekwakwanai hanaia totona lauma helaga ia gaukaralaia?

◻ Haroro gaukara dekenai lauma helaga be dahaka gaukara badana ia karaia?

[Picture on page 15]

Petro ese ia harorolaia bapatisona danu be Tamana bona lauma helaga edia ladana dekenai

[Picture on page 17]

Sivarai namona harorolaia gaukarana dekenai lauma helaga ese gaukara badana ia karaia