Sivarai Gwauhamata Tanona Amo

Unai Tano bona Mamoe Oi Vadivadi Henidia!

KERISTEN taudia tausen momo be Gwauhamata Tanona idia vadivadi henia, idia laloa Bible ese ia herevalaia gaudia edia gabu idia itaia neganai Bible ena hereva do idia lalo-pararalaia diba, bona ena anina do idia diba. Bona unai bamona ia vara.

Herevana oi vadivadi unai tano dekenai eiava oiemu lalohadai dekenai unai tano idia herevalaia buka bona sivarai oi stadilaia sibona, unai tano ena mamoe vadivadi henia karana be edena bamona? Reana oi ura diba ‘Mamoe Edia Noho bona Gwauhamata Tanona be edena bamona?’ Bible ena nega lalonai mamoe be gau badadia, unai dainai bema Gwauhamata Tanona oi vadivadi henia bona mamoe oi laloa lasi unai be vadivadi momokani lasi bamona.

Iniseniai oi itaia foto be oiemu vadivadi ena kahana bamona, badina hari inai nega lalonai unai gabu dekenai oi itaia mamoedia be Bible ena nega lalonai idia noho mamoe momo bamona.a Edia iuna be bada bona digara bada amo idia metau. (Levitiko 7:3; 9:19) Edia huina be bada bona nega momo ia kurokuro. To oi laloatao Iakobo ena mamoe seri badana dekenai mamoe haida be “mai toutoudia bona mai revarevadia, bona mamoe koremadia.”​—Genese 30:32.

Unai sivarai ese ia haheitalaia bema tau ta be mai ena seri badana taunimanima idia laloa ia be taga tauna. (Genese 30:43) Iobu ena sivarai dekenai idia gwauraia inai bamona: “Ena mamoe be 7,000, ena kamelo be 3,000 bona ena boromakau be 500 bona doniki be 500 . . . Mairiveina kahana taudia iboudiai bogaragidiai ia be tau bada hereana.” (Iobu 1:3; 42:12) Danu oi laloatao Nabal ena mamoe be 3,000 bona ena nanigosi be 1,000. David ena nega lalonai oi laloa iena dagi bona siahu be edena bamona? (1 Samuel 25:2) To badina be dahaka seri badana ese ia hahedinaraia unai tau be taga tauna?

Badina unai mamoe edia amo mamoe naria tauna eiava biaguna be davana bada gaudia ia abia diba. Mamoe huina be nega ibounai ia tubu gauna. Hereva Lada-isidia 31:​13, 21, 22 ese ita ia hadibaia ia aonega bona ia gaukara momo hahine be unai huina ia gaukaralaia badina unai huina amo iena ruma bese edia dabua ia karaia diba eiava do ia hoihoilaia diba dabuadia ia karaia diba. (Iobu 31:20) Mamoe huina be hoihoi kohu badana ta. Unai ia hedinarai inai hereva dekenai; Moab king ta be “mamoe naria tauna ai ia lao, bona Israel ena king dekenai mamoe natudia 100,000 bona edia huina idia utua lasi mamoe tau 100,000 ia henia davana bamona.” (2 Hanua Pavapavadia 3:4) Oibe, unai mamoe edia “huina idia utua lasi”; edia huina be bada dainai edia davana ia habadaia.

Mamoe tau, ram, edia doana idia bada diba, idibana foto dekenai oi itaia hegeregerena. Oi laloatao mamoe tau ena doana idia hiriria Iubile negana idia boiboilaia totona, ani? (Levitiko 25:​8-10) Unai bamona doana idia hiriria dika ia mai neganai, eiava idia hiriria tuari kara ena heau dalana idia taria totona.​—Hahemaoro Taudia 6:34; 7:​18, 19; Ioel 2:1.

Unai dainai, bema oi be mai emu mamoe serina ta, oi diba aniani do oi abia diba badina mamoe be Israel taudia ese idia ania diba animal goevadia. (Deuteronomi 14:4) Unai vamu (mamoe badana ena eiava mamoe natuna ena) idia nadua eiava idia gabua diba. Lagani ta ta iboudiai idia karaia Paseka dekenai aniani badana be mamoe, bona idia gabua. (Esodo 12:​3-9) Nega momo mamoe edia amo rata idia abia diba. Idia inua sibona lasi, to rata bona sisi idia karaia diba.​—1 Samuel 17:​17, 18; Iobu 10:10; Isaia 7:​21, 22.

Mamoe dekenai oi lao neganai, mamoe seri bona edia naria tauna edia turana karana oi itaia diba. Mamoe naria tauna namona ese iena mamoe ia naridia. Iesu ia hereva bamona, idia be mamoe naria tauna ena gadona idia diba bona edia ladana ia boiria neganai do idia mai. (Ioane 10:​3, 4) Bema ta ia boio, mamoe naria tauna namona ese do ia tahua. Ia boio mamoe ia davaria neganai, reana iena pagana dekenai ia atoa bona mamoe serina dekenai ia abia giroa.​—Luka 15:​4, 5.

David be guna mamoe serina ia naria bona haheitalai dekenai ia gwau ia be mamoe bamona bona Iehova be Mamoe Naria Tauna. Ia ese David ia naria, hegeregere mamoe naria tauna be mamoe ia naridia dagedage animal idia abidia garina. Mamoe be idia ia naridia namonamo tauna murinai idia lao diba. Bema bero idia abia ia ese edia toto ia hanamoa, reana dehoro muramurana amo. Unai be sibodia edia ura idia laloa guna Israel besena ena gunalaia taudia edia kara bamona lasi edia kara be Esekiel 34:​3-8 dekenai ia gwauraia!

Bible lalonai nega momo mamoe be peroveta hereva dalana ai bona laulau hereva dalana ai idia gwauraia. Unai dainai Gwauhamata Tanona ena mamoe oi vadivadi henia, bona idia oi diba namonamo neganai, unai hereva “seri maragi”, “Dirava ena Mamoe Natuna,” bona “mamoe idaudia haida” edia hereva dekenai oi lalo-parara diba.​—Luka 12:​32, NW; Ioane 1:36; 10:16.

[Footnotes]

[Picture Credit Line on page 24]

Pictorial Archive (Near Eastern History) Est.

[Picture Credit Line on page 25]

Garo Nalbandian