‘Dirava bona Iesu Dekenai Diba Oi Abia’

“MAURI hanaihanai be inai, idia ese oi Dirava momokani tamona do idia diba, bona Iesu Keriso danu, oi ese oi siaia tauna.” (Ioane 17:3) Iesu be guriguri lalonai iena guba Tamana dekenai unai bamona ia hereva, bona unai dala dekenai ia hahedinaraia dahaka be gau badana mauri hanaihanai abia totona. To badina be dahaka New World Translation Bible lalonai unai siri idia hahanaia “Dirava . . . dekenai diba oi abia noho” to ma Bible momo ese idia hahanaia “Dirava . . . oi diba”?

Unuseniai idia hahanaia Greek herevana ‘diba abia’ eiava “diba” be verb (kara gwauraia) herevana gi·noʹsko amo idia abia. Bona New World Translation Bible lalonai idia hahanaia dalana ese unai hereva ena anina ibounai ia gwauraia hedinarai. Gi·noʹsko ena anina ena badina be “diba abia”, to unai Greek herevana ena anina be idauidau. Henuai be unai hereva ena anina haida:

“GINŌSKŌ (γινώσκω) ena anina be diba abia, gau ta dekenai oi ena anina be diba, ena toana oi diba, oi lalo-pararalaia, eiava oi diba namonamo.” (Expository Dictionary of New Testament Words, W. E. Vine) Unai dainai, unai hereva gi·noʹsko idia hahanaia ‘diba oi abia noho’ be ‘Bible haidaua’ karana lasi, New World Translation Bible idia samania taudia idia hereva bamona. Unai hereva ena anina idauidau ia gwauraia neganai, dikseneri karaia tauna James Hope Moulton ia gwau: “Unai hereva γινώσκειν anina be ‘diba abia noho.’ ”​—A Grammar of New Testament Greek.

A Grammatical Analysis of the Greek New Testament bukana ia gwau Ioane 17:3 dekenai gi·noʹsko ese ia hahedinaraia “unai kara ia karaia noho.” Word Studies in the New Testament bukana lalonai, Marvin R. Vincent be unai Greek hereva dekenai ma hereva ta ia karaia. Ia gwau: “Mauri hanaihanai dalana be diba, eiava diba tahua karana, badina idia torea dalana ia hahedinaraia unai kara ia vara noho, unai diba be ia habadaia noho.” (Leta torea idau dalana be iena.) Tau ta ladana A. T. Robertson ena Word Pictures in the New Testament bukana ese ia hahedinaraia namona be unai hereva idia hahanaia “diba ia abia noho be namo.”

Unai dainai, gunaguna Greek gado dekenai, Iesu ena hereva Ioane 17:3 dekenai ese ia hahedinaraia namona be idia hekwarahi Dirava momokanina bona iena Natuna, Iesu Keriso, dekenai diba idia abia noho totona, bona New World Translation Bible idia hahanaia dalana amo unai idia hahedinaraia namonamo. Dirava ena Hereva ita stadilaia namonamo neganai bona ena taravatu ita badinaia neganai unai diba ita abia. (Hosea 4:​1, 2; 8:2; 2 Timoteo 3:​16, 17 itaia danu.) Dirava bona ena Natuna edia kara dekenai diba idia abia taudia bona edia kara idia tohotohoa taudia be dahaka davana namona ta do idia abia? Mauri hanaihanai!