Basileia Haroro Ripoti
Iehova ese mai Ena Abidadama Mero Matamata ta be Hahenamo Ia Henia
ABIDADAMA matamata taudia Iehova ena matana dekenai be dava bada gauna ta bamona. Inai sivarai lalonai mai ena abidadama mero matamata ta ena ekspiriens ese matamata taudia do ia durudia diba kara maoromaoro do idia badinaia Iehova ena hesiai gaukara idia karaia neganai.
Argentina dekenai ena mauri lagani 11 merona ta bona ena tadina be edia tubuna hahine danu Mauri Ia Lao Henia Hereva Momokanina bukana idia stadilaia hebou. Unai memero edia tamana bona sinana be maoromaoro dagedage karana idia hahedinaraia, bona unai memero rua idia koudia, hebou totona Kingdom Hall dekenai do idia lao lasi. Nega haida hebou dekenai idia lao totona, unai memero be hehuni dalana amo digu rumana ena uindo dekena amo idia diho dehe dekenai bona unai amo edia ruma badina dekenai idia noho taudia edia haba amo idia hanaia bona edia dehe dekenai idia lao bona unai amo idia lao Kingdom Hall dekenai. Tau ta ese edia sinana ia hamaoroa unai memero be Iehova ena Witness taudia edia hebou dekenai idia lao. Edia sinana ese ia hamaorodia bema hebou dekenai idia lao neganai, do ia botadia dikadika, unai dainai mero maragina be ia gari bona ena stadi karana ia hadokoa. To mero badana be ia gari lasi, iena stadi karana ia hadokoa lasi. Lagani 5 lalodiai hebou dekenai ia lao, to ena tamana bona sinana be idia diba lasi ia be unai hebou dekenai ia lao.
Ena mauri lagani be 16 neganai, ia ura haisikuli dekenai kosi ta do ia abia, to unai kosi be ia noho taoni dekenai idia karaia lasi. Taoni ta dekenai do ia lao ena kosi do ia karaia neganai, unai amo hereva momokani do ia tahua goadagoada diba. Iena tamana bona sinana ese gwaumaoro ia idia henia do ia lao taoni ta dekenai unai kosi do ia karaia totona, bona hua toi lalonai gau iboudiai be idia heau namo herea. To, sikuli ena biaguna ese ena tamana bona sinana ia hadibadia edia natuna be pepe ia hanamoa lasi bona bese abia isi anena ia anelaia lasi. Vadaeni, ia ese sikuli biaguna, ena tamana bona sinana, loia bona profesa taudia 10 edia vairanai ia gini bona ia haroro henidia bona ia hadibadia dahaka dainai ia ese unai kara ia karaia lasi. (Esodo 20:4, 5) Iena tamana bona sinana idia badu dikadika. Ena sinana ese ipidi ta ia abia bona ia ura unai mero ena tubuna do ia pidia mase, badina ia laloa iena tubuna ena amo unai mero be unai bamona diba ia abia. To unai hahine buruka be hanaihanai haida danu ia noho dainai ia alaia diba lasi.
Unai murinai, unai mero ena ruma bese edia turana ta ena hereva dainai bona sikuli biaguna ese gwaumaoro ia henia dainai, unai mero ena tamana bona sinana ese edia natuna be kwarana ia dika gorerena idia abia taudia edia hospital dekenai idia atoa, idia laloa kava taudia edia doketa ese ena abidadama do idia hamanokaia. Unai hospital ena gaukara tauna ta ese ena motuka amo ia abia lao gabu ta ena daudau be 100 kilomita bamona bona unuseniai ia ese insulin bona drag haida amo ia idia kodoa ela bona unai mero be ia mase rea. Ena mahuta amo ia noga lou neganai, ia daradara bada herea, tau ta ia diba lasi momokani bona gau ta ia laloatao diba lasi. Doketa ese kwarana dika gorerena idia tahua namonamo ia dekenai, to gau ta idia davaria lasi. Ena be ia dekenai kwarana dika gorerena ta idia davaria lasi, to muramura amo idia kodoa noho. Unai mero ia noga bona ena lalona ia maoro neganai, Iehova dekenai ia guriguri loulou, do ia rakatania lasi totona bona Iehova dekenai ia noinoi goada do ia abia bona do ia haheauka noho totona. Momokani Iehova ese unai mero ia naria, bona daudau lasi murinai ia be unai hospital amo ia raka lasi.
Nega ta ai sikuli ena biaguna ese ia nanadaia, ena abidadama ia ura ia negea eiava. Ia haere, ia gwau, lasi, neganai, sikuli biaguna ia laloa ia kavakava momokani dainai ena tamana bona sinana ia hamaorodia ma idia abia giroa lao unai kwarana idia dika taudia edia hospital dekenai. Ena tamana bona sinana ese idia abia lao taunimanima idia rentaia rumana ta dekenai bona unai gabu ia naria hahinena idia hamaoroa namona be unai mero do ia naria namonamo ia lao lasi Iehova ena Witness taudia edia hebou dekenai. Ena tamana bona sinana idia lao murinai, unai mero ia hoa bada! Unai ruma ena biaguna taudia be Iehova ena Witness taudia! Daudau lasi murinai ena tamana bona sinana ese doketa taudia amo ia idia kokia, badina hari idia diba maoro doketa taudia ese idia koidia. Unai nega lalonai Argentina ena Kota Badana taudia ese taravatu idia atoa, idia gwau, Iehova ena Witness taudia edia natuna be sikuli amo do idia hadokodia lasi badina pepe idia hanamoa lasi dainai.
Unai hetoho iboudiai ese hahenamo ia henia mai ena abidadama merona dekenai, eiava? Oibe. Ia gwau: “Unai neganai lau be mai egu dala doketa taudia, profesa taudia, lauegu sikuli turadia, lauegu tamana bona sinana, lauegu varavara taudia bona unai siti dekenai idia noho taudia ibounai lau haroro henidia diba. Hari lauegu tamana bona sinana edia lalohadai Iehova ena Witness taudia dekenai be namo. Hari lauegu mero maragi negana lau laloa lou neganai, Dirava ena hahenamo bona ia naria namonamo karana ia idia kamonai henia taudia dekenai lau itaia diba. Unai kara be Salamo 27:10 ena hereva hegeregerena, ia gwau: ‘Bema lauegu tamana bona lauegu sinana ese lau idia rakatania, Iehova sibona ese lau ia abia dae diba.’ ”
Hari unai tau matamatana ena mauri lagani be 23 bona ia headava vadaeni, bona ia be Iehova ena hesiai gaukara dekenai ia goada momo. Momokani, Iehova ena siahu be ta ese ia hanaia diba lasi.—Salamo 55:22.