Matamata Taudia E—Emui Tama Sina Edia Lalona Umui Hamoalea Eiava Hahisia Diba
APOSETOLO tauna burukana Ioane, ia gwau: “Bema lau kamonai, egu natuna Keristani taudia ese Dirava ena hereva momokani ena dala dekenai idia raka noho, vadaeni lau moale bada herea. Moale ta ese unai moale ia hereaia diba lasi.” (3 Ioane 4) Ena be unai siri ese Keristani hahediba taudia ia herevalaia, to Dirava idia gari henia tama sina be Ioane ena hereva idia abia dae. Tama sina ese edia natudia edia mauri lalonai edia natudia idia durua be mai anina bada, unai hegeregerena natudia ese edia tama sina idia durua be namo.
Israela ena King Solomona ia hahedinaraia natudia ese edia tama sina idia hamoalea eiava hahisia diba. Ia gwau: “Aonega merona ese iena tamana ia hamoalea noho, to kavakava merona ese, iena sinana ena lalona ia hisihisi henia noho.” (Aonega Herevadia 10:1) Unai dainai natudia ibounai—idia bada vadaeni natudia danu—idia laloa namonamo be namo, edia kara ese edia tama sina do ia hamoalea eiava lasi. Dahaka dainai unai idia laloa be maoro?
Mani oi laloa, emu Keristani tama sina idia hekwarahi bada oi idia naria totona! Emu sinana ena bogana lalonai oi noho neganai, oi idia laloa bona oi totona idia guriguri. Oi vara murinai emu tama sina idia moale bada, bona Dirava idia tanikiu henia unai hahenamo bona maduna dainai. Oi be beibi ta bona sibona oi naria diba lasi dainai, emu tama sina—Iehova idia tomadiho henia taudia unai—ese oi idia naria karana dekenai edia maduna idia laloa bada.
Emu tama sina be Keristani taudia momokanidia dainai, Baibel bona Baibel idia herevalaia bukadia amo hakaua herevadia idia tahua, bona edia natudia idia bada vadaeni taudia amo sisiba idia noia. Danu, idia laloa momo gaudia be Dirava dekenai idia gurigurilaia. (Gunalaia Taudia 13:8) Oi tubu daekau neganai, emu tama sina ese emu kara namodia bona oi manokalaia gaudia idia itaia. (Iobu 1:5) Emu mauri lagani be 13-19 neganai, hekwakwanai oi davaria. Reana nega haida oi gwau-edeede, to emu tama sina idia laloa momo, idia ura oi idia durua emu guba Tamana Iehova oi hesiai henia noho, unai dainai edia guriguri bona duahiduahi karana idia habadaia.
Tama sina be oi idia naria ena maduna idia rakatania lasi. Ena be oi bada, to idia ese emu namo tauanina bona lauma dalanai idia laloa, bona emu hemami idia laloa danu. To tama sina idia diba oi be mai emu ura kwalimu dainai sibona emu abia hidi do oi karaia, bona emu mauri lalonai dahaka abia hidi do oi karaia be idia diba lasi. Oi sibona do oi abia hidi edena dala do oi badinaia.
Bema tama sina idia kamonai edia natudia be “hereva momokani ena dala dekenai idia noho,” do idia “moale bada.” To bema natudia idia kamonai lasi, be edena bamona? Oibe, idia gwau-edeede natudia ese edia tama sina edia lalona idia hahisia. Solomona ia gwau: “Kavakava merona ese, iena tamana ena lalona ia hisihisi henia noho, bona ia ese ia havaraia hahine, ena lalona ia hadikaia noho.” (Aonega Herevadia 17:25) Bema natuna ta ese Dirava momokani tomadiho henia karana ia rakatania, unai ese tama sina edia lalona ia hahisia bada!
Unai ese ia hahedinaraia goevagoeva, emu kara be mai anina bada emu ruma bese taudia bona ma haida dekenai. Emu kara ese edia lalona do ia hamoalea eiava hahisia. Bema Dirava bona ena hakaua herevadia oi dadaraia, emu tama sina do oi hahisidia bada. To bema oi kamonai henidia, do idia moale bada. Danu, bema Iehova oi kamonai henia bona badinaia, emu tama sina do idia moale bada. Namona be emu lalona oi hadaia emu tama sina edia kudouna oi hamoalea totona! Unai be idia dekenai oi henia harihari gauna hereadaena, badina idia ese oi idia ubua, naria bona lalokau henia.