Dirava Ia Henia Mauri Namona Ena Badina Reaia Lasi
“Iehova ena lauma ia noho gabudia dekenai mauri namona danu ia noho.”—2 KORINTO 3:17, NW.
IEHOVA be mauri namona henia Diravana. Bona Dirava ia henia mauri namona be hahenamo bada gauna ta! Iena gwauhamata hesiai taudia be unai mauri namona idia abia dainai, inai hereva Pavapava Lohia Iehova dekena amo be mai anina idia dekenai, ia gwau: “Itaia! Lau sibona egu hesiai taudia be do idia aniani, to do umui hitolo. Itaia! Lau sibona egu hesiai taudia do idia inuinu, to do umui ranu mase. Itaia! Lau sibona egu hesiai taudia do idia moale, . . . do idia boiboi mai edia moale bada danu, badina edia kudouna be namo herea. Itaia! Lau sibona egu hesiai taudia be moale dekenai do idia boiboi edia kudouna ia namo dainai, to umui do umui taitai badina emui kudouna ia hisihisi dainai, bona do umui taitai badina umui lalohisihisi bada herea dainai.”—Isaia 65:13, 14.
2. Dahaka dainai Iehova ena taunimanima be lauma dalanai idia goada?
2 Dirava ena taunimanima be lauma dalanai idia goada badina Dirava ena lauma, eiava ena gaukara siahuna ese idia ia hakaua dainai. Aposetolo Paulo, ia gwau: “Iehova be Lauma. Bona Iehova ena Lauma ia noho gabudia dekenai mauri namona danu ia noho.” (2 Korinto 3:17, NW) Vadaeni, Dirava ese ita ia henia mauri namona ena badina be dahaka? Bona edena bamona do ita gaukaralaia namonamo diba?
Dirava Ena Mauri Namona
3. Dirava ese ia abia mauri namona be edena bamona, bona dahaka dainai?
3 Ena mauri namona dekenai ta ese Iehova ena ura ia koua diba lasi. Ia be Siahu Ibounai Diravana bona Guba bona Tanobada Edia Lohia Badana, bona ia mo sibona ese ena mauri namona ia gaukaralaia neganai ena hetoana be lasi, unai dainai ia havaraia mauri taudia ta be hegeregere lasi iena ura ia koua totona. Abidadama tauna Iobu ia gwau: “Daika do ia koua diba? Daika do ia nanadaia, do ia gwau: ‘Dahaka oi karaia?’ ” (Iobu 9:12) Unai hegeregerena, Babulono ena pavapava Nebukadnesara ia gwau: “Tanobada dekenai idia noho taudia iboudiai amo ta ese [Dirava] ena imana kara ia koua diba lasi bona ta ia nanadaia diba lasi, ia gwau, ‘Dahaka oi karaia?’ ”—Daniel 4:35.
4. Iehova ese edena dala ai ena mauri namona ia gaukaralaia neganai ia ese hetoana ia atoa?
4 Ena be ta ese Iehova ia hahemaoro henia diba lasi, to ia sibona ia gwauraia mauri taravatudia ia badinadia. Unai ia hedinarai Abraham ese Sodom taudia ia laloa momo neganai; ia henanadai, ia gwau: “Tanobada ibounai ena kota naria tauna be kara maoromaoro do ia karaia lasi, a?” Abraham ia hereva henia neganai Iehova ese ia hahedinaraia ia be mai ena maduna kara maoromaoro ia karaia totona. Bema Sodom hanua dekenai kara maoromaoro taudia haida idia noho, ia ese unai hanua ia hadikaia diba lasi. (Genese 18:23-33) Ma danu, ia be mai ena lalokau bona mai ena aonega dainai, Iehova be ia badu haraga lasi bona boga-auka karana ia hahedinaraia.—Isaia 42:14.
Taunimanima Edia Mauri Namona be Mai Ena Hetoana
5. Dahaka gaudia dainai taunimanima be edia ura haida idia karaia diba lasi?
5 Iehova mo sibona be dahaka ia ura karaia ia karaia diba, to mauri gaudia bona taunimanima iboudiai edia mauri gaukaralaia dalana be mai ena hetoana, edia toana, edia diba, bona edia noho gabuna hegeregerena, bona hari inai negai taunimanima be mai edia kara dika dainai idia mauri daudau lasi. Oibe, Dirava ese taunimanima ia karaia bona dala ia henidia, ia atoa hetoana lalonai edia ura idia karaia totona. To ma badina haida dainai danu taunimanina ese edia ura haida idia karaia diba lasi. Dahaka dainai?
6. Dirava ese iseda kara ena davana ita ia henia dainai, unai ena anina be dahaka ita ia henia mauri namona dekenai?
6 Gau ginigunana be inai: Taunimanima ese edia ura haida idia karaia diba lasi, badina Dirava ese idia ia havaraia Iena ura do idia karaia totona. Iehova dekenai ‘taunimanima ibounai ese hairai bona mataurai do idia henia, bona iena siahu henunai do idia noho. Badina be gau ibounai be ia ese ia havaraia. Iena ura dainai ia karadia, bona iena ura dainai idia noho.’ (Apokalupo 4:11) Vadaeni, ia be taunimanima Havaraia Diravana dainai ia ese taunimanima edia kara hegeregerena davana do ia henidia bona Havaraia Diravana ese taravatu ia karaia ia lohiadia totona be maoro. Idau negai Israel besena lalonai, Mose ena Taravatu henunai, bema taunimanima ese Dirava ena ladana idia hadikaia eiava Sabati taravatuna idia utua neganai, Dirava ia gwau do idia hamasedia. (Esodo 20:7; 31:14, 15; Levitiko 24:13-16; Numera 15:32-36) Ena be ita Keristen taudia be Taravatu henunai ita noho lasi, to iseda mauri namona ita gaukaralaia dalana be mai ena hetoana, badina Iehova be iseda Hahemaoro Tauna, Taravatu Henia Tauna, bona Pavapava dainai, nega ibounai iseda kara ena davana ita ia henia.—Isaia 33:22; Roma 14:12.
7, 8. (a) Dirava ia atoa mauri naria taravatudia ese taunimanima edena bamona idia koua bona gau haida idia karaia diba lasi? (b) Dirava ese dahaka taravatu ma haida ia atoa dainai, taunimanima ese edia ura haida idia karaia diba lasi?
7 Gau iharuana be inai: Dirava ia atoa taravatudia dainai iseda ura haida ita karaia diba lasi. Hegeregere, gravity ena taravatu ia noho; unai dainai bema tau ta be ruma lata hereana amo ia roho diho, ena tauanina do ia dika eiava do ia mase. Oibe, Dirava ia karaia taravatudia dainai taunimanima ese edia ura haida idia karaia diba lasi.
8 Gau ihatoina be inai: Dirava ia atoa mauri naria taravatudia dainai iseda ura haida ita karaia diba lasi. Reana Paulo ena hereva oi hamomokania vadaeni, Galatia 6:7, 8 dekenai, ia gwau: “Umui laloa kerere lasi, Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia. Bema tauanina ena ura ia hadoa neganai ia be mase do ia abia. Bema Lauma ena gau ia hadoa neganai ia be mauri hanaihanai do ia abia.” Ia hedinarai goevagoeva, Iehova Dirava ia atoa mauri naria taravatudia dainai iseda ura haida ita karaia diba lasi, to unai taravatu ita badinaia neganai ita mauri noho diba.
9. Ita be taunimanima danu ita noho hebou dainai, dahaka dainai iseda ura haida ita karaia diba lasi?
9 Gau namba 4 be inai: Taunimanima be hanua dekenai idia noho hebou dainai, ta ta iboudiai be edia ura haida idia karaia diba lasi idau taunimanima ma haida edia ura idia hadikaia garina. Namona be Keristen taudia be “gavamani” ena taravatu idia badinaia bema unai taravatu ese Dirava ena taravatu idia hadikaia lasi neganai. (Roma 13:1; Kara 5:29) Hegeregere, taravatu ia gwau takisi ita henia, bona motuka ia heau ena sipidi ia gwauraia bona ma gau haida danu; namona be unai taravatu ita badinadia. Dirava ia gwau “Kaisara” ena taravatu do ita badinaia bona unai ese ia hahedinaraia Dirava ia henia mauri namona gaukaralaia dalana be mai ena hetoana.—Mareko 12:17; Roma 13:7.
Dahaka Dainai Mai Ena Hetoana?
10, 11. Dahaka dainai Iehova ese taunimanima dekenai siahu ia henidia sibodia edia mauri daladia haida idia abia hidi totona?
10 Vadaeni, Dirava ese taunimanima ia havaraia neganai, dahaka dainai siahu ia henidia ia ena taravatu henunai sibodia edia dala haida idia abia hidi totona? Badina ta be inai: Gau Ibounai Havaraia Diravana ia ura tanobada dekenai idia mauri taudia be sibodia edia ura dainai, edia Havaraia Diravana do idia hanamoa bona edia kara amo do idia hamoalea. Taunimanima be unai bamona idia karaia diba, to animal idia karaia diba lasi. Animal iboudiai be mauri ena kara goeva taravatudia idia diba lasi, to edia tauanina lalonai ia noho siahuna ese ia doridia hegeregerena kara idia karaia. Sisia ta oi hadibaia diba gau ta do ia abia lasi totona, to gau ta ia henaoa lasi ena maoro oi hadibaia diba lasi. Animal iboudiai be Iehova Dirava idia hanamoa diba lasi, badina edia kara be tauanina lalonai ia noho siahuna ese ia doridia hegeregerena idia karaia sibona; to taunimanima be idau, edia Havaraia Diravana ese idia dekenai hahenamo momo ia henidia dainai, mai edia lalokau bona mai edia ura ida dala idia abia hidi diba Iehova ena hesiai gaukara idia karaia totona.
11 Danu, Dirava ia diba taunimanima be sibodia edia dala haida idia abia hidi diba neganai, namo ia vara bona idia moale. Dala idauidau momo amo taunimanima be sibodia edia ura karana idia abia hidi diba, hegeregere sibodia edia lalohadai bona kara amo gau idauidau momo idia havaraia diba. Taunimanima be sibodia edia gaukara, bona edena bamona ruma do idia noholaia idia abia hidi diba. Hari inai nega lalonai, bisinesi bona politikol karadia dainai nega haida iseda ura hegeregerena mauri dalana ita abia hidi diba lasi, to reana unai be taunimanima edia mataganigani karadia dainai, Dirava ese taunimanima ia havaraia dalana dainai lasi.
12. Dahaka dainai kahirakahira taunimanima iboudiai be igui hesiai dekenai idia noho?
12 Ena be Iehova Dirava ese taunimanima ia havaraia neganai ia koudia momo lasi to sibodia edia dala momo idia abia hidi diba, to hari inai nega lalonai kahirakahira taunimanima iboudiai be idia hekwarahi bada idia be igui hesiai dekenai idia noho dainai. Dahaka ia vara? Taunimanima ginigunadia rua, Adam bona Eva, ese Dirava ia henia mauri namona ena badina idia reaia. Edia mauri namona gaukaralaia dalana ena hetoana idia hanaia bona idia gaukaralaia lasi Dirava ena ura hegeregerena bona Pavapava Lohiana, Iehova, ena dagi siahuna dekenai idia gwau-edeede. (Genese 3:1-7; Ieremia 10:10; 50:31) Edia mauri namona idia gaukaralaia lasi Iehova Dirava idia hanamoa totona, to idia be sibodia edia ura idia tahua, idia ura dahaka be maoro bona dahaka be dika idia sibodia idia abia hidi. Bona unai amo idia be Satana idia bamoa Iehova gwau-edeede henia karana dekenai. Idia laloa unai kara amo edia mauri do idia hanamoa bada diba. To, unai kara ese mauri namona ia havaraia lasi, bona unai kara dika taudia, Adam bona Eva, ese hahemaoro idia abia bona igui hesiai dekenai idia vareai, bona murinai idia mase. Unai hahemaoro bona igui hesiai mamina be ia hanai edia natudia ibounai dekenai danu. Bible ia gwau: “Ita ibounai ita kara dika vadaeni, bona Dirava ena hairaina ita abia be hegeregere lasi.” “Kara dika ena davana be mase.”—Roma 3:23; 5:12; 6:23.
13. Edena dala amo Satana ese taunimanima ia guidia diba?
13 Eden lalonai ia vara gwau-edeede karana dainai, Satana Diabolo ese Adam bona ena natudia iboudiai danu ia guidia. Ioane ia gwau: “Satani ese tanobada taudia ibounai ia gunalaia noho”! (1 Ioane 5:19) Satana ena siahu bona ena aonega be bada dainai, Iehova Dirava idia dadaraia taudia iboudiai ia koidia bona ia guidia diba. Bona danu, idia hanaia lagani momo lalodiai, taunimanima ese hisihisi idia ania badina sibodia edia ura idia tahua taudia ese ma taunimanima haida idia biagudia. (Kohelete 8:9) Unai dainai, hari inai nega lalonai, kara dika bona mase ese taunimanima iboudiai idia guidia; Satana bona ena demoni edia siahu henunai idia noho; bona mai edia siahu bada politikol, bisinesi, bona tomadiho gunalaia taudia ese taunimanima idia guidia.
Mauri Namona Abia Dalana Ia Kehoa
14. Taunimanima be igui hesiai amo do idia siri momokani diba dainai unai ese dahaka ia hahedinaraia?
14 Kara dika, mase, Diabolo bona ena tanobada dekedia amo ita siri dalana ese Dirava ena ura, iena ladana do ia hanamoa bona ena lohia dalana ena maoro hamomokania dalana ena ura unai, ia hahedinaraia. Satana ese Iehova Dirava ia samania badina ia gwau ena lohia dalana be maoro lasi, bona unai samani hereva dainai, Iehova ese Satana ia do hamasea lasi, to Farao dekenai Ia karaia hegeregerena nega Ia henia. Unai bamona ia karaia badina ia ura iena siahu taunimanima ese idia itaia, bona tanobada ibounai lalonai iena ladana do idia harorolaia. (Esodo 9:15, 16) Ena nega korikori dekenai, Iehova Dirava ese kara ta do ia karaia ia be Guba bona Tanobada Edia Lohia Badana do ia hamomokania totona bona iena ladana do ia hanamoa totona, bena Satana, Adam, bona Eva edia gwau-edeede karana amo iena ladana idia hadikaia hemarai karana do ia haorea. Unai neganai Dirava ese ia idia gari henia taudia iboudiai be kara dika bona mase amo do ia ruhadia, bona tanobada matamatana dekenai do idia vareai mauri namona momokani do idia abia totona.— Roma 8:19-23.
15. Taunimanima be mauri namona momokanina do idia abia totona Iesu be dahaka ia karaia?
15 Taunimanima dekenai mauri namona henia lou totona, Iehova ese iena Natuna ia siaia tanobada dekenai, taunimanima ta bamona ia vara totona. Mai ena ura danu Iesu Keriso ese ena mauri goevadaena ia henia neganai, taunimanima edia ruhaia dalana ia kehoa. (Mataio 20:28) Danu ia ese mauri namona do ia vara ena sivarai ia harorolaia. Ena haroro gaukara ia hamatamaia neganai, ia ese inai hereva ia gwauraia bona ia gwau ia dekenai ia guguru: “Pavapava Badana Lohiabada Iehova ena lauma be lau latanai ia noho, badina be Iehova ese lau ia horoa, sivarai namona manau taudia dekenai lau gwauraia totona. Lau ia siaia lalohisihisi taudia hagoadaia totona, idia guia taudia ruhaia nege bona dibura rumadia ai idia koudia taudia edia matadia hapapadia totona.”—Isaia 61:1; Luka 4:16-21.
16. Mauri namona momokanina do idia abia totona, idau negai Iuda taudia be dahaka dahaka idia karaia?
16 Taunimanima be edena bamona unai ruhaia dalana do idia davaria diba? Iesu ia gwau: “Bema lauegu hadibaia hereva umui badinaia neganai umui be lauegu diba tahua taudia momokani. Hereva momokani be do umui diba, bona hereva momokani ese umui do ia ruhaia.” Unai dainai, Iesu ena hahediba taudia be lauma dalanai mauri namona idia abia. (Ioane 8:31, 32, 36) Danu, Iesu ese Roma gavana Pontio Pilato dekenai ia gwau: “Hereva momokani gwauraia hedinarai totona lau vara bona lau mai inai tanobada dekenai. Hereva momokani idia badinaia taudia ibounai ese lauegu hereva idia kamonai henia.” (Ioane 18:37) Iesu ese ia harorolaia bona ia hahedinaraia hereva momokanina idia abia dae Iuda taudia be edia kara dika amo idia helalo-kerehai, edia kara kererena idia hamaoromaoroa, Iehova vairanai idia gini, bona, Iesu ia karaia bamona, bapatiso idia abia. (Mataio 3:13-17; Kara 3:19) Unai dala amo idia ese Dirava ena taravatu ia badinaia mauri namona Iena amo idia abia.
17. Dahaka dainai Iehova ese iena taunimanima ia ruhaia bona mauri namona ia henidia?
17 Iehova ese ena abidadama hesiai taudia ia ruhaia bona mauri namona ia henidia ena badina badana be ia ura iena lohia siahuna ena maoro ia hamomokania, to danu ia ura idia be namo bona hahenamo idia abia. Ia ese Israel taudia be Aigupito ena igui hesiai dekena amo ia ruhadia badina ia ura hahelaga taudia edia basileiana bona iena witness taudia ai do idia lao, bona unai amo iena ladana do idia hahairaia diba. (Esodo 19:5, 6; Isaia 43:10-12) Unai hegeregerena, Iehova ese iena taunimanima be Babulono ena igui hesiai amo ia ruhadia ena badina badana be ia ura iena dubu bona tomadiho momokanina idia haginia lou totona. (Esera 1:2-4) Bona igui hesiai amo ia ruhaia ena badina idia laloaboio bona tauanina gaudia mo sibona idia tahua neganai, Iehova ese ena peroveta taudia Hagai bona Sekaria ia siaia idia dekenai, bena idia ese unai bese idia hamaorodia namona be edia maduna Dirava dekenai idia laloatao. Dirava ese ia henia mauri namona ena badina idia laloa namonamo neganai, dubu haginia gaukarana idia haorea bona unai ese Dirava ena ladana ia hahairaia; to unai sibona lasi, iena taunimanima be noho namo idia davaria danu.
Dirava Ia Henia Mauri Namona Ena Badina Oi Reaia Lasi
18. Dahaka dainai ita gwau diba, hari inai negai Iehova ena hesiai taudia be Dirava ese idia ia henia mauri namona ena badina idia reaia lasi?
18 Iehova ena hesiai taudia hari inai nega lalonai be edena bamona? Unai orea taudia be Dirava ia henia mauri namona ena badina idia reaia lasi. Lagani 1870 ena nega amo, Iehova ena taunimanima be sisina sisina Babulono ena kara koikoi amo idia ia ruhaia hamatamaia bona Keristen ena mauri namona idia moalelaia. Unai be Hereva Lada-isidia 4:18 ena hereva ia gwauraia hegeregerena, ia gwau: “Kara maoromaoro taudia edia dala be daba matana bamona; ena diari ia bada ia lao ela bona dina ia hedinarai momokani.” Idau negai, Dirava ena taunimanima be Babulono lalonai igui hesiai dekenai idia noho bona unai hegeregerena, lagani 1918 dekenai Babulono Badana ena kara haida ese Iehova ena hesiai taudia idia guia. (Apokalupo 17:1, 2, 5) Tomadiho koikoi ibounai oreana ena memba taudia idia moale dikadika Iehova ena horoa “witness taudia rua” be lauma dalanai dala dekenai idia mase neganai. To Iehova ena hebogahisi karana dainai, lagani 1919 dekenai iena horoa hesiai taudia idia mauri lou bona lauma dalana dekenai idia ia ruhaia. (Apokalupo 11:3, 7-11) Dirava ese ia henia mauri namona idia gaukaralaia namonamo, bona mai edia goada danu Atai Herea Diravana ena sivarai idia harorolaia. Unai dainai, lagani 1931 dekenai mai edia moale danu Iehova ena Witness taudia ladana idia abia be maoro! (Isaia 43:10-12) Bona, lagani 1935 amo, taunimanima “hutuma bada herea” ese horoa Witness taudia idia bamodia, bona edia helaro be mauri hanaihanai tanobada dekenai do idia abia. Idia danu be Dirava ia henia mauri namona ena badina idia reaia lasi.—Apokalupo 7:9-17.
19, 20. (a) Iehova ena taunimanima be Dirava ese idia ia henia mauri namona idia gaukaralaia dala namona ta be dahaka? (b) Iehova ena Witness taudia ese Dirava ia henidia mauri namona idia gaukaralaia dala namona ma ta be dahaka?
19 Dala rua amo Iehova ena taunimanima ese Dirava ia henia mauri namona idia gaukaralaia namonamo. Dala ta be, Dirava ese idia ia henia mauri namona idia gaukaralaia kara maoromaoro dalana idia badinaia totona. (1 Petero 2:16) Taunimanima idia diba Iehova ena taunimanima be kara namodia idia karaia! Haheitalai ta be inai: Zurich, Switzerland dekenai, tau ta be Kingdom Hall dekenai ia vareai, ia gwau ia ura Iehova ena Witness tauna ta ai do ia lao. Dahaka dainai unai bamona ia ura idia henanadai henia neganai, ia gwau ena taihuna be Witness kekenina ta, to ia sihari kava dainai orea murimurinai idia atoa. Ia gwau, ‘Unai bamona idia karaia oreana dekenai lau ura vareai—idia be kara dika idia dadaraia dainai.’ Unai dainai, New Catholic Encyclopedia bukana dekenai idia gwau ia hedinarai goevagoeva “tanobada ibounai lalonai idia noho orea iboudiai amo kara namo idia karaia bada oreana” be Iehova ena Witness taudia edia orea.
20 Iehova ena Witness taudia be Dirava ese ia ruhadia dainai edia mauri namona idia gaukaralaia namonamo; Iesu ia karaia hegeregerena, idia ese Basileia ena sivarai namona harorolaia gaukarana idia karaia. (Mataio 4:17) Edia uduna amo bona buka amo, nega bona gabu idauidau ai Iehova ena Basileia idia harorolaia. Unai idia karaia neganai, hahenamo idia abia badina edia abidadama bona edia helaro ia hagoadaia. Ma danu, unai gaukara ese idia bona idia kamonai henia taudia iboudiai danu do ia hamauridia diba. (1 Timoteo 4:16) Unai gaukara ia gwauraia bukana, Dynamic Religious Movements lalonai, ia gwau: “Ma orea kahirakahira iboudiai edia memba taudia be edia tomadiho lalonai idia gaukara ena bada be Witness taudia edia tomadiho dekenai idia gaukara ena bada ia hanaia lasi.”
21. Dahaka ese ia hahedinaraia Iehova be iena taunimanima edia hesiai gaukara ia hanamoa?
21 Dirava ese ita ia ruhaia gaukara ta ita karaia totona, bona unai gaukara ita karaia neganai hahenamo momo ita davaria! Lagani gunana ena haroro ripotina ese unai ia hahedinaraia—tanobada ibounai lalonai Basileia pablisa edia namba be 4 milion ia hanaia, bona Memorial heboudia dekenai idia lao taudia be 10 milion ia hanaia. Ripoti ta ese ia hahedinaraia Ireland dekenai hua ta ta iboudiai 29 dekenai edia pablisa idia daekau lao daekau lao; Mexico dekenai hua 80 amo hua 78 lalonai edia pablisa edia namba ia daekau lao; Japan dekenai hua ta ta iboudiai 153 lalodiai edia pablisa edia namba ia daekau lao daekau lao!
Dirava Ia Henia Mauri Namona Oi Gaukaralaia Namonamo
22. Reana ita sibona dekenai ia henia henanadai badadia haida edia anina be dahaka?
22 Bema oi be Iehova ena gwauhamata Witness ta, Dirava ese oi ia henia mauri namona oi gaukaralaia namonamo, a? Namona be ita ibounai be sibona dekenai ita gwau: ‘Lau naria namonamo idau egu kara ia dika bona tau ta do lau hahekwakwanaia, a? Gavamani ena taravatu lau badinaia, bona egu mauri lalonai Dirava ena taravatu lau atoa guna, a? Kongregesen lalonai elda taudia edia hereva lau badinaia, a? Dirava ese lau ia henia mauri namona lau gaukaralaia namonamo haroro gaukara lau karaia goadagoada totona, a? ‘Nega ibounai Lohiabada ena gaukara lau karaia goadagoada,’ a? Moni gaukara lau tahua goadagoada, eiava egu mauri namona lau gaukaralaia egu haroro gaukara lau habadaia totona, kongregesen lalonai dagi ena gaukara lau tahua totona, eiava nega ibounai hesiai gaukara ma haida lau karaia totona, a?’—1 Korinto 15:58.
23. Dirava ia henia mauri namona ena badina ita reaia lasi totona, dahaka do ita karaia?
23 Namona be ita ibounai ‘ita mamia toho bena ita diba, Iehova be namo.’ (Salamo 34:8) Namona be ia dekenai ita tabekau, iena taravatu ita badinadia, bona Basileia ita harorolaia goadagoada gaukarana amo iena ladana helagana ita hahairaia. Laloaboio lasi, “uhe momo do ia hadoa tauna be anina momo do ia geia.” (2 Korinto 9:6) Unai dainai, iseda kudouna ibounai ida Iehova ena hesiai gaukara ita karaia goadagoada bona unai amo do ita hahedinaraia Dirava ia henia mauri namona ena badina ita reaia lasi.
Edena Bamona Do Oi Haere?
◻ Dirava ena mauri namona be edena bamona?
◻ Taunimanima edia mauri namona ena hetoana be dahaka?
◻ Mauri namona momokani abia dalana be edena bamona ia kehoa?
◻ Dirava ia henia mauri namona ena badina ita reaia lasi totona, dahaka do ita karaia?
1. Dahaka dainai Isaia 65:13, 14 ena hereva be Iehova ena Witness taudia dekenai ia guguru?
[Picture on page 9]
“Gravity” bona unai bamona taravatudia dainai taunimanima idia karaia diba karana be mai ena hetoana