“Mauri Ranuna” Ia Lohilohidae Gabuna—Cape Verde
“IEHOVA ENA WITNESS TAUDIA edia tomadiho karana be mai anina bada 1958 amo ema bona hari.” Republic of Cape Verde gavamani ena kota gaukara naria minista ese unai hereva ia gwauraia. Ena opesi dekenai ia boiridia mai Witness taudia rua dekenai unai bamona ia hereva. Ma ia gwau: “Ai sori bada herea badina nega daudau Iehova ena Witness taudia edia orea ai rejista lasi.”
Cape Verde dekenai idia noho Iehova ena Witness taudia ese unai hebouhebou, November 30, 1990 lalonai do idia laloaboio lasi. Ia hahedinaraia unai tano ena taravatu henunai edia tomadiho oreana idia rejista dainai, gavamani ese edia gaukara ia koua lasi. Unai Witness taudia rua dekenai unai hereva dainai idia moale bada, badina idia ta, Luis Andrade, be lagani 1958 lalonai Watch Tower Society ese idia printaia Bible buka haida ia davaridia. Buka edia matamana amo ia duahia ela bona edia dokona, bena murinai ia diba hereva momokani ia davaria unai. Mai moale bada ida, ia ese ia davaria gaudia be ena turana namona, Francisco Tavares, dekenai ia herevalaia. Murina lagani haida lalodiai, idia ruaosi be Gima Kohorona bona Noga! magasin sabskripsen amo hereva momokanina ranu bamona idia abia. Lagani 10 murinai, lagani 1968 dekenai, distrik naria tauna ta ese Cape Verde ia vadivadi henia nega ginigunana neganai, idia ruaosi idia bapatiso.
Tadikaka Andrade bona Tavares idia lalo-parara edia maduna be taunimanima idia boiridia, hegeregere idia gwau: “Oi mai . . . mauri ranuna do umui abia dae, ia be davana lasi.” (Apokalupo 22:17) Edia teritori be daudau bona auka to idia laloa lasi. Cape Verde ena motumotu badadia be 10 bona ma motumotu maragidia Atlantic Davara dekenai danu, ia be hegeregere 560 kilomita diho ena kahana, Dakar, Senegal amo. Cape Verde ena anina be “Green Cape,” (“Cape Gadokagadokana,” tubutubu gaudia edia raurau ena kala bamona), bona guna unai ladana idia atoa Africa ena kone ta dekenai. To, unai motumotudia be hanaihanai idia gadokagadoka lasi, badina medu bada ia diho lasi dainai, bona unuseniai idia noho taudia 350,000 be idia hekwarahi bada tano kaukauna amo edia aniani idia hatubua totona.
Idia ore lagani 30 lalodiai, misinari bona special pioneer taudia be nega ibounai idia gaukara goadagoada mauri ranuna be unai motumotudia lalonai idia noho taudia dekenai idia abia lao totona. Edia hekwarahi ena davana be dahaka? Vanegai, distrik naria tauna ese Portugal amo ia hanaia lao Cape Verde ena kongregesen ia vadivadi henidia totona. Namona be ia ese ita ia hamaoroa dahaka gaudia ia davaria Cape Verde dekenai.
São Vicente Motumotu ese “Gado Goevadaena” Ia Kamonai
Cape Verde dekenai ai vadivadi henia gabuna ginigunana be Porto Grande ena taoni, São Vicente Motumotuna dekenai. Peleini ia diho gabuna amo motuka amo taoni dekenai ai heau lao neganai, ai itaia nadi momo ororodia be miri ese ia koua. Tano kaukau ia bada ia lao karana North Africa dekenai be Cape Verde dekenai ia vara danu! December ia lao February lalonai, mai siahu bada lai, ladana harmattan, be Sahara tano kaukauna amo ia mai bona davara ia hanaia neganai kahu bona miri bada unai motumotudia dekenai ia negea. Nega haida kahu be ori badadia bamona dainai peleini idia roho diba lasi. Tubutubu gaudia bema idia mauri noho, harmattan ia mai neganai idia marai bona idia ore.
To lauma dalanai, ranu abia gabudia be momo. Porto Grande lalonai Iehova ena Witness taudia ese kongregesen rua idia haginidia bona Basileia pablisa 167 ese nega ibounai mauri ranudia bamona hereva momokanina be São Vicente Motumotuna idia noholaia taunimanima 47,000 dekenai idia abia lao. Saturday bona Sunday dekenai taunimanima 400 bamona be Kingdom Hall dekenai idia mai Bible heboudia totona.
Kongregesen ta ta be wiki tamona wiki tamona lalonai ai vadivadi henia neganai, “Gado Goevadaena” Distrik Hebouhebouna totona idia hegaegae noho, unai taoni ena piksa rumana namona lalonai do idia abia totona. (Sefania 3:9) Unai hanua taudia bona Santo Antão bona São Nicolau motumotudia amo idia mai taudia be hebouhebou dekenai idia mai bona idia ibounai edia namba be 756. Taunimanima 24 be bapatiso idia abia. Hebouhebou ena program lalonai Witness taudia ese Bible drama ta idia karaia danu. Muvini piksa idia karaia tauna ta ese unai Bible drama ia itaia murinai, ia gwau: “Ena be lagani tamona lalonai ai hegaegae to hekwarahi momo danu idia vara. To emui drama idia karaia taudia be hua rua sibona lalonai idia hegaegae bona idia karaia namo herea.” Hebouhebou ia heau namo herea bona unai murinai ai lao Praia siti dekenai, ia be Cape Verde ena siti badana São Tiago ena motumotu dekenai.
Idia Goeva Taudia
Idia ore lagani momo lalodiai, motumotu taudia momo be edia hanua idia rakatania bona unai siti badana dekenai idia mai moni gaukara tahua totona. Unai dainai, ruma dikadia tausen momo be siti ena murimuri kahana dekenai idia haginidia, unai amo ranu be hegeregere lasi bona momoru negea gabuna be lasi danu. Moni ma haida idia abia totona, bese momo be nanigosi, boroma bona kokoroku idia ubudia. Idia ubua gaudia be dala dekenai idia loaloa kava be hoa gauna lasi. Unai kara dainai gorere momo ia havaraia.
Ena be unai hekwakwanai idia noho, to hari kongregesen rua idia noho Praia siti dekenai, bona edia Basileia pablisa ibounai be 130. Unai Witness taudia be idia moale bada badina ‘sibodia idia hanamodia’ Bible ena hereva badinaia karana amo. Idia hekwarahi bada idia goeva bona helaga totona, unai dainai iseda tadikaka bona edia natudia be hari idia gorere momo lasi, lauma dalanai bona tauanina dalanai danu. Ena be edia mauri ia auka, to lauma dalanai idia taga.—Isaia 48:17; 1 Petero 1:15, 16.
Ai ginidae neganai, tadikaka be idia bisi bada herea edia distrik hebouhebou totona. Witness tadikaka bona hereva momokani idia ura henia taudia São Tiago bona Sal Rei bona Fogo motumotudia amo idia mai hebouhebou dekenai, Iehova ese idia ia hanamoa dainai, idia ibounai be 472 hebouhebou dekenai. Idia ibounai idia moale bada, maragidia mai edia vairadia diaridiari danu! Idia kamonai namonamo hutuma bada taudia huanai ai helai neganai, ia hedinarai “gau maragidia edia dina” ita gwauraia dika be namo lasi. (Sekaria 4:10) Unai ibounai ia vara, badina lagani 30 idia ore vadaeni, tatau rua ese hereva momokani idia davaria dainai!
Unai motumotu ai do rakatania lasi neganai, ai lao aiemai orea maragidia rua Vila Assomada bona Tarrafal hanuadia dekenai ai vadivadi henidia totona, idia be siti ena murimuri kahana dekenai. Unai motumotu dekenai ororo be momo herea bona tano be ia kaukau bona tubutubu gaudia be momo lasi. To gabu ta ta dekenai, tubutubu gaudia bona au ai itadia—niu, biku, roku, vaivai bona ma tubutubu gaudia haida edia uma badadia ai itaia. Unai ai itaia neganai Isaia ena peroveta hereva ai laloa, ia gwau tano gagaena danu be huahua do ia havaraia. (Isaia 35:1) Hegeregere, ranu lasi gabuna dekenai ranu guri tamona bamona, unai Witness orea maragidia rua ese lauma dalanai aniani bona ranu be idia dabu taudia 1,000 bamona dekenai idia henia noho.
Ura Bada Fogo Motumotu dekenai
Motumotu ma ta ai vadivadi henia be Fogo, ena ladana ena anina be “lahi.” Gunaguna ia be lahi ororona (volcano) dainai unai ladana idia henia. Cano Peak be unai motumotu ena ororo ta bona ena dorina amo lahi ia daekau bona hari unai ia do vara noho. Unai ororo be davara amo ia daekau ela bona ena dorina ena lata be 2,800 mita. Vanegai medu bada ia diho, lagani momo lalodiai medu sisina sibona ia diho. Taunimanima ibounai idia moale bada, bona edia uma dekenai idia gaukara goadagoada Cape Verde taudia edia aniani korikori, bini bona maniota, idia hadodia totona.
Ena be idia bisi bada, to edia gaukara idia rakatania badina idia ura Bible amo hereva momokanina idia abia, ranu bamona. Ena be ai hekwarahi bada bona motuka be momo lasi bona nega haida idia heau namonamo lasi, to ai ese orea maragidia toi danu ai hedavari. Ai moale bada taunimanima 162 be hebouhebou dekenai idia mai neganai, badina Basileia pablisa be 42 sibona unai motumotu dekenai. Unai ese tadikaka bona taihu edia ura bada ia hahedinaraia, edia averes be hora 15 hua ibounai lalonai idia gaukara goada, Fogo motumotu dekenai idia noho taunimanima 32,000 dekenai mauri ranuna bona hereva momokanina idia abia lao totona.
Katolik Tanona ai Huahua Idia Havaraia
Santo Antão bona São Nicolau motumotudia ai do vadivadi henidia lasi. Unai ladadia ese idia hahedinaraia bamona, Katolik Dubu ena siahu be unai motumotu rua dekenai ia noho lagani handred haida lalodiai. Ena be Katolik tomadiho be Cape Verde dekenai taunimanima idia badinaia momo, to kudou-namo taudia momo be Bible dekenai hereva momokani ranuna idia tahua.
Santo Antão motumotuna ena kahana kahana amo kongregesen maragidia rua edia Basileia pablisa 49 be idia hekwarahi bada lauma aniani be taunimanima 44,000 dekenai idia abia lao totona. Taunimanima 512 be pablik tok, Porto Novo Kongregesen dekenai idia mai neganai, Basileia pablisa taudia 32 idia diba mamoe bamona taudia be momo Santo Antão dekenai bona idia ura hereva momokanina ena ranu idia inua.
São Nicolau Motumotuna dekenai, haroro gaukara be lagani haida gunanai ia matamaia, taihu ta ese revareva amo ruma bese ta ia stadi henia neganai. Bena, lagani 1978 lalonai, pioneer ma ta, Portugal amo ia giroa lao ena hanua São Nicolau dekenai, ia ura Bible ena hereva momokanina be unuseniai idia noho taunimanima 15,000 dekenai ia hadibaia totona. Unai motumotu dekenai hebouhebou ginigunana ia karaia neganai, idia mai taudia be tamona sibona—ia mo sibona! To unai hebou dekenai ia ese Iehova ia guriguri henia goadagoada, bona Iehova ese ia haere henia. Ai vadivadi neganai, unai kongregesen toi edia pablisa 48 idia moale bada, badina taunimanima 335 be hebou dekenai idia mai dainai.
Unai motumotu ena sekit hebouhebou ginigunana be ai vadivadi negana lalonai idia abia, bona taoni ena piksa rumana be ai idia henia davana lasi. Taoni idia naria taudia ese maikrofon bona hereva halasia gaudia (speakers) amo bona motuka amo idia heduru, davana lasi. Hebouhebou ia naria kongregesen ena pablisa taudia 19 ese idia vadivadi tadikaka 100 edia noho gabudia idia hegaegaelaia, aniani idia hegaegaelaia danu hebouhebou dekenai idia mai taudia 208 idia ubudia totona. Ena be tadikaka edia mauri dinadia ibounai dekenai idia hekwarahi bada, to Society ena Kingdom Hall Fund dekenai kontribusen idia henia danu.
Unai gabu dekenai, Iehova ena Witness taudia edia kara maoromaoro be taunimanima momo idia diba, bona gaukara taudia idia ura neganai gaukara biagudia momo ese tadikaka idia tahudia. Haheitalai ta be inai: Unuseniai bensini abia gabuna tamona sibona ia noho bona ena biaguna ese Witness tauna ta ia noia ia totona do ia gaukara, badina ia ura henaohenao lasi tauna ta. To tadikaka be mai ena gaukara dainai ia gwau ma tau ta do ia tahua ia totona. Bensini abia gabuna ena biaguna ia gwau: “Bapatiso Witness tauna sibona lau ura!” Hua rua murinai, iseda tadikaka dekenai inai bamona ia hereva: “Iehova ena Witness taudia sibodia ese moni danu idia gaukara be namo!”
Vadivadi Ginigabena be Sal Motumotuna
Emai vadivadi ginigabena be Sal motumotuna dekenai. Ena ladana ena anina be “damena,” bona unai idia hereva badina unai motumotu dekenai damena bisinesi bada idia karaia. Unuseniai kongregesen maragina lalonai pablisa ibounai be 22, bona idia gaukara bada Basileia sivaraina be taunimanima 6,500 dekenai idia harorolaia totona. Moale bada ai davaria unai motumotu taudia dekenai sivarai namona ai kikilaia neganai, badina ruma iboudiai dekenai ai idia abia dae bona ruma bese taudia danu ai herevahereva hebou.
Aiemai vadivadi be Sal motumotuna dekenai ai hadokoa. Hahenamo bada ai davaria Iehova ena abidadama hesiai taudia danu Cape Verde dekenai ai gaukara hebou dainai! Hari, Basileia pablisa ibounai 531 be unai motumotudia dekenai, bona unai namba be do ia daekau badina lagani 1991 ai taunimanima 2,567 be Keriso ena Anibou heboudia dekenai idia mai bona lauma aniani idia abia noho. Ena be Iehova ena Witness taudia momo unuseniai be taga taudia lasi, to lauma dalanai idia goada bona idia taga. Bona idia moale bada badina Iehova ena heduru amo mauri ranuna be unai motumotudia dekenai ia lohilohidae noho, ena hairai bona ena ladana hanamoa totona!
[Map on page 24]
(For fully formatted text, see publication.)
CAPE VERDE
SANTO ANTÃO
SÃO VICENTE
SÃO NICOLAU
SANTA LUZIA
SAL
BOA VISTA
MAIO
SÃO TIAGO
FOGO
BRAVA
Praia
Atlantic Ocean