“Dokona Negana” Lalonai Oi Gima Noho
“Umui naria namonamo, umui noga noho, badina be inai gaudia idia mai nega umui diba lasi.”—MAREKO 13:33.
1. Hari “nega dokona” ai anina bada gaudia idia vara noho neganai dahaka do ita karaia be namo?
KERISTEN taudia be hari “nega dokona” lalonai anina bada gaudia idia vara neganai dahaka idia karaia be namo? (Daniel 12:4) Idia daradara lasi. Iesu Keriso ese ia perovetalaia herevana be 1914 murinai idia vara gaudia edia guguru toana. Ia perovetalaia herevadia idia hahedinaraia 1914 murinai idia vara gaudia dainai hari negana be idau. Daniel ena peroveta hereva “nega dokona” dekenai ia diba dainai, Iesu be peroveta hereva badana ia gwauraia bena iena hahediba taudia ia hagoadaia idia “noga noho” totona.—Luka 21:36.
2. Badina be dahaka lauma dalana dekenai ita gima noho be gau badana?
2 Badina be dahaka ita gima noho be namo? Badina taunimanima edia sivarai ibounai dekenai hari be nega dikana momokani. Keristen taudia bema hari idia mahuta lauma dalana dekenai dika do idia davaria. Bema ita laloa ita hegeregere vadaeni eiava mauri ena lalo-hekwarahi amo iseda kudou ita hametaua, dika do ita davaria diba. Luka 21:34, 35 dekenai, Iesu Keriso be ita dekenai ia sisiba, ia gwau: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona do idia guia garina, vadaeni Lohiabada ena dina do ia mai haraga, umui hegaegae lasi garina. Badina be unai dina be tanobadai idia noho taunimanima ibounai dekenai do ia ginidae.”
3, 4. (a) Iesu ia hereva Dirava ena badu dinana be taunimanima do ia abia “idoa” bamona neganai ena hereva ena anina be dahaka? (b) Dirava ese idoa ia karaia lasi dainai, badina be dahaka unai dina ese idia ia abia neganai taunimanima momo do idia hoa?
3 Mai badina namona dainai Iesu ia gwau Iehova ena dina be ita dekenai do ia ginidae ‘haraga herea idoa bamona.’ Nega momo idoa be mai ena kwatua varona, bona idia gaukaralaia manu bona animal maragidia idia abia totona. Unai idoa be mai ena dogoatao gauna, bona ta ia raka vareai neganai unai dogoatao gauna ia gaukara. Idoa ena iduara ia koua bona lalonai ia raka vareai gauna ia dogoatao. Unai ia vara haraga momokani. Unai hegeregerena, Iesu ia gwau, lauma dalana dekenai idia mahuta taudia be Dirava ena “badu dinana” ai do idia hoa bona unai dina ese idia do ia abia.—Hereva Lada-isidia 11:4.
4 Iehova Dirava be taunimanima abia totona idoa ta ia karaia, a? Lasi, ia ura lasi taunimanima idia naria namonamo lasi neganai ia abidia bona ia hadikadia ore. To unai dina ai taunimanima momo do ia abia badina idia be Dirava ena Basileia idia laloa guna lasi. Idia be mauri gaudia tahua karana dekenai sibodia edia dala dekenai idia lao, idia vara gaudia edia anina idia laloa lasi. To unai ese Dirava ena sediual ia haidaua lasi. Ia be gau iboudiai ia hamaoromaorodia totona nega ia makaia vadaeni. Bona, ena hebogahisi amo, do ia mailaia hahemaoro karana dekenai taunimanima ia hadibaia vadaeni.—Mareko 13:10.
5, 6. (a) Do ia mai hahemaoro negana dainai, Havaraia Tauna ese dahaka lalokau karana do ia karaia taunimanima dekenai, to dahaka ia vara? (b) Ita gima noho totona, dahaka do ita laloa?
5 Taunimanima ia hadibaia guna be Havaraia Tauna badana ena lalokau karana dainai, ia be iniseniai iena laulau aena atoa gabunai idia noho taudia edia namo ia laloa. (Isaia 66:1) Iena aena idia noho gabuna dekenai idia noho taudia ia lalodia bada. Unai dainai tanobada dekenai iena hereva idia loalaia taudia bona ia siaia taudia amo ia be vaira negana ai do idia vara gaudia ia hadibaia. (2 Korinto 5:20) Ena be sisiba momo ia henia, to taunimanima dekenai unai gaudia do idia vara haraga, hegeregere idia be idoa ta lalonai idia vareai bamona. Badina be dahaka? Badina taunimanima momo be lauma dalana dekenai idia mahuta. (1 Tesalonika 5:6) Taunimanima haida sibona be sisiba do idia kamonai bona Dirava ena tanobada matamatana lalonai do idia roho mauri.—Mataio 7:13, 14.
6 Unai dainai, edena dala ai hari nega dokona lalonai ita gima noho diba, ita be roho mauri taudia ai do ita lao totona? Iehova ese heduru ia henia. Namona be ita karaia diba gaudia 7 ita laloa.
Lalona Veria Gaudia Dadaraia
7. Iesu be iseda lalona idia veria karadia dainai dahaka sisiba ia henia?
7 Gau ginigunana be, iseda lalona idia veria gaudia ita dadaraia. Mataio 24:42, 44 dekenai, Iesu ia gwau: “Unai dainai do umui naria, badina be umui emui Lohiabada do ia mai negana be umui diba lasi. Unai dainai, do umui hegaegae, badina be Taunimanima ena Natuna do ia mai ena hora be umui diba lasi.” Iesu ese ia gaukaralaia herevadia idia hahedinaraia hari nega dikana ai, lalona idia veria gaudia momo do idia vara, bona lalona veria gaudia be mase idia havaraia diba. Noa ena nega lalonai gau momo idia vara taunimanima edia lalona idia veria totona. Unai dainai, ma gau haida idia laloa taudia be idia vara gaudia idia “laloa lasi,” bona Abata ia mai bona idia iboudiai ia abidia oho. Unai dainai, Iesu ena sisiba be: “Taunimanima ena Natuna do ia mai neganai unai bamona gaudia do idia vara.”—Mataio 24:37-39.
8, 9. (a) Edena dala ai dina ibounai lalonai idia vara gaudia be iseda lalona idia veria oho diba? (b) Paulo bona Iesu be ita dekenai dahaka sisiba idia henia?
8 Namona be oi laloa danu Luka 21:34, 35 dekenai sisiba ia henia neganai, Iesu be dina iboudiai lalonai idia vara gaudia ia herevalaia, hegeregere aniani, inuinu, bona mauri gaudia abia totona lalo-hekwarahina. Idia be taunimanima iboudiai ese idia lalodia gaudia, Lohiabada Iesu ena hahediba taudia ese idia lalodia danu. (Mareko 6:31 itaia danu.) Reana unai gaudia idia dika lasi, to bema ita naria namonamo lasi, idia be iseda lalona idia veria diba, do ita laloa momo, bona unai amo dika ia havaraia, lauma dalanai do ita mahuta diba.
9 Unai dainai, namo lasi ita be anina bada gauna ita laloaboio—Dirava hamoalea karana. Namo lasi dina iboudiai idia vara gaudia sibona ita laloa, to namona be iseda mauri durua gaudia haida sibona ita abia bona ita gaukaralaidia. (Filipi 3:8) Namo lasi unai gaudia dainai Basileia gaudia ita laloaboio. Roma 14:17 ia hereva bamona, ia gwau: “Dirava ena Basileia be aniani gauna lasi o inuinu gauna lasi, to kara maoromaoro bona maino bona moale, Lauma Helaga ese ia henia gaudia.” Iesu ena hereva oi laloatao, ia gwau: “Basileia bona iena kara maoromaoro do umui tahua guna, vadaeni unai gau ibounai danu umui dohore ia henia.” (Mataio 6:33) Ma danu, Luka 9:62 dekenai, Iesu ia gwau: “Tau ta ese tano makohia gauna ena imana dekenai do ia dogoatao, vadaeni ena matana do ia negea murina kahana dekenai, ia be Dirava ena Basileia do ia abia diba lasi.”
10. Bema iseda matana be ita tahua gauna idia raraia lasi, dahaka dika do ia vara diba?
10 Laulau dalana dekenai, tano ita geia hamatamaia neganai, namona be ita geia maoromaoro. Ena murina dekenai ia itaia tano geia tauna be do ia geia maoromaoro lasi. Gau ta ese iena matana do ia veria bona ena lalona do ia veria diba eiava hekwakwanai ese iena lao dalana ia koua diba. Namo lasi ita be Lota ena adavana bamona, ia be ena murina dekenai ia itaia bona namo ia davaria lasi. Namona be iseda matana be ita tahua gauna idia raraia hanaihanai. Unai ita karaia totona namona be iseda lalona idia veria gaudia ita dadaraia.—Genese 19:17, 26; Luka 17:32.
Ita Guriguri Mai Momokani Ida
11. Iseda lalona veria gauna ena dika ia herevalaia murinai, Iesu be dahaka hereva ia gwauraia bada?
11 To ita be ma gau haida ita karaia diba ita gima noho totona. Gau badana iharuana be inai: Ita guriguri mai momokani ida. Dina iboudiai idia vara gaudia be iseda lalona idia veria oho garina ena sisiba ia henia murinai, Iesu be inai sisiba ia henia, ia gwau: “Unai dainai, do umui naria, bona nega ibounai do umui guriguri, vadaeni inai dika ibounai dekena amo do umui roho mauri, vadaeni Taunimanima ena Natuna ena vairana dekenai do umui gini.”—Luka 21:36.
12. Edena bamona ita guriguri be namo, bona dahaka do ia vara?
12 Unai dainai, namona be hanaihanai iseda noho ia dika garina bona ita gima noho totona ita gurigurilaia. Unai dainai namona be guriguri amo Dirava dekenai ita lao bona ita noinoi henia mai momokani ida. Paulo be Roma 12:12 dekenai ia gwau: “Guriguri do umui goadalaia nega ibounai.” Bona Efeso 6:18 dekenai ia gwau: “Nega ibounai Lauma Helaga ena siahu dekena amo guriguri bona noinoi do umui gwauraia . . . nega ibounai guriguri totona do umui noho hegaegae.” Namo lasi ita guriguri neganai ia be anina bada lasi gauna ta bamona. Iseda mauri ia boio diba. Unai dainai namona be mai momokani ida Dirava ita noia ena heduru ita abia totona. (Heberu 5:7 itaia danu.) Unai dala dekenai ita be Iehova ena kahana dekenai do ita gini noho diba. Unai ita karaia totona ita ia durua bada gauna be ‘nega ibounai ita guriguri.’ Iehova be ita do ia durua ita gima noho bona ita naria noho totona. Unai dainai guriguri ita goadalaia noho be gau badana!
Dirava Ena Orea bona Ena Gaukara Kahirakahira Dekenai Ita Noho
13. Ita gima noho totona edena bamona hebamo ita abia be namo?
13 Ita ura tanobada dekenai do idia vara gaudia iboudiai amo do ita roho mauri. Ita ura Taunimanima ena Natuna vairanai ita gini, bona do ia moale ita dekenai. Unai ia vara totona ita karaia diba gau ihatoina be inai: Iehova ena tiokratik oreana kahirakahira dekenai ita noho. Namona be mai iseda ura ibounai ida unai orea ita bamoa bona ena gaukara dekenai ita vareai. Unai dala dekenai taunimanima do idia diba ita be momokani gima noho Keristen taudia.
14, 15. (a) Dahaka gaukara ese ita do ia durua ita gima noho totona? (b) Daika ese haroro gaukara haorea negana ia makaia, bona edena bamona ita laloa be namo? (c) Hisihisi bada herea murinai, ita be ia karaia ore vadaeni Basileia harorolaia gaukarana ita laloa neganai, dahaka do ita diba?
14 Ita gima noho totona gau ta, namba 4 gauna, ia noho. Namona be taunimanima ita haroro henidia hari tanobada ena dokona be do ia mai dainai. Hari tanobada ena dokona momokani do ia vara lasi ela bona “Basileia ena Sivarai Namona” be Siahu Ibounai Diravana ena ura hegeregerena idia harorolaia ore. (Mataio 24:14) Iehova ena Witness taudia be haroro gaukara do ia ore negana idia makaia lasi. Iehova sibona be unai do ia karaia diba. (Mareko 13:32, 33) To ita ura ita gaukara bada taunimanima ese idia abia diba gavamani namo hereana, Dirava ena Basileia, ita harorolaia ela bona unai gaukara ia ore. “Hisihisi bada herea” do ia vara unai gaukara ita karaia noho lalonai. (Mataio 24:21) Gabeai negana ai, do idia roho mauri taudia be inai nega idia laloatao neganai mai edia kudou ibounai ida do idia hamomokania diba Iesu Keriso be peroveta koikoi tauna ta lasi. (Apokalupo 19:11) Haroro gaukara ena bada do idia karaia vaitani bona hari inai nega lalonai idia karaia taudia be unai gaukara ena bada idia diba lasi.
15 Unai hegeregerena, Dirava ena ura hegeregerena, unai anina bada gaukarana do ia ore neganai, reana unai gaukara idia karaia taudia be momo herea, guna idia karaia taudia edia namba do ia hanaia. Ita moale bada badina unai gaukara badana ena kahana ita karaia diba! Aposetolo Petro ese ita dekenai ia hamomokania, ia gwau Iehova “ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:9) Unai dainai, Siahu Ibounai Diravana ena gaukara siahuna be hari ia gaukara bada, bona Iehova ena Witness taudia idia ura unai lauma dainai idia karaia gaukarana do idia karaia noho. Unai dainai Iehova ena orea kahirakahira ai oi noho, bona ena haroro gaukara dekenai oi gaukara momo. Unai ese oi do ia durua oi gima noho totona.
Oi Sibona Emu Mauri Oi Tahua
16. Badina be dahaka iseda noho toana lauma dalana dekenai ita tahua be namo?
16 Gau namba 5 ita karaia diba ita gima noho totona. Ita ta ta ibounai be ita sibona iseda mauri ita tahua diba. Hari be nega namona ita karaia totona. Namona be ita hamomokania ita be daika ena kahana dekenai ita gini goada. Galatia 6:4 dekenai Paulo ia gwau: “Ibounai ta ta ena kara ena kara ia diba be namo.” Paulo ena hereva 1 Tesalonika 5:6-8 dekenai ena hereva hegeregerena ita sibona eda kara ita tahua, ia gwau: “Namo ita mahuta lasi, haida idia mahuta bamona. To namo ita noga noho, ita laloa goada noho. Mahuta taudia be hanuaboi lalonai idia mahuta, bona inua kekero taudia be hanuaboi lalonai idia kekero. To ita be dina ena taudia, namo ita laloa goada. To gau badana be ita ese abidadama bona lalokau ita atoa, iseda kemena ena dabua aukana bamona.”
17. Ita sibona eda kara ita tahua neganai, ita be dahaka henanadai ita sibona ita henia be namo?
17 To ita be edena bamona? Bible ena diba amo ita sibona eda kara ita tahua neganai ia hahedinaraia ita gima noho, iseda kwarana gauna be roho mauri ena helarona, a? Ita be tanobada gunana ena amo ita gini siri vadaeni bona ena lalohadai ita rakatania vadaeni taudia, a? Momokani ita be Dirava ena tanobada matamatana ena lauma ita abia, eiava? Ita lalo-parara vadaeni hari tanobada be edeseniai ia lao, a? Bema unai be momokani, Iehova ena dina be ita do ia abia lasi henao taudia do ia abidia bamona.—1 Tesalonika 5:4.
18. Namona be ita sibona dekenai ma dahaka henanadai ita henia be namo, bona dahaka do ia vara be namo?
18 To edena bamona, bema ita sibona eda kara ita tahua karana ese ia hahedinaraia ita ura mauri dalana namona, mai hekwarahi lasi bona lalo-metau lasi mamina ita tahua? Edena bamona bema ita davaria lauma dalana dekenai iseda matana kahirakahira idia koua bona ita mahuta? Ita be nihi lalonai bamona ita noho, bona tanobada ena koikoi moale gauna ta ita tahua, a? Bema unai bamona, namona be ita noga!—1 Korinto 15:34.
Idia Guguru Peroveta Herevadia Ita Lalodia Momo
19. Ita itaia dahaka peroveta herevadia haida idia guguru?
19 Hari ita be namba 6 gauna ita laloa ita gima noho totona: Hari inai nega dokona idia perovetalaia herevadia edia guguru karana ita laloa momo. Idau bese taudia edia nega be 1914 ai idia ore negana amo ema bona hari, lagani 77 idia hanai vadaeni. Ita be unai lagani gunana ita laloa neganai, ita itaia diba edena dala ai peroveta herevadia idia guguru—tomadiho momokani haginia lou karana; horoa orena taudia bona edia bamodia lauma paradaisona dekenai hamauridia karana; tanobada ibounai dekenai Basileia sivarai namona harorolaia karana; hutuma bada herea taudia idia hedinarai. (Isaia 2:2, 3; karoa 35; Sekaria 8:23; Mataio 24:14; Apokalupo 7:9) Iehova ena ladana bada bona gau ibounai ia lohiaia karana idia gwauraia bada, bona maragina be tausen dekenai ia bada ia lao bona bese maragina be bese goadana ai ia lao, bona Iehova be nega korikori ai ia haharagaia. (Isaia 60:22; Esekiel 38:23) Bona aposetolo Ioane ena matahanai Apokalupo sivaraina lalonai be kahirakahira do idia guguru.
20. Iehova ena Witness taudia be idia diba dahaka lalo-parara idia abia vadaeni, bona idia be dahaka ai idia lao momokani?
20 Unai dainai, guna bamona lasi, to hari Iehova ena Witness taudia idia diba momokani 1914 murinai tanobada dekenai idia vara gaudia edia anina dekenai idia lalo-parara namonamo. Unai bamona idia laloa dainai, idia be Atai Herea Diravana ena imana dekenai idia noho bona ia gaukaralaidia. Idia be hari inai anina bada negana lalonai Dirava ena sivarai idia harorolaia taudia. (Roma 10:15, 18) Oibe, Iehova ena hereva nega dokona totona idia guguru. (Isaia 55:11) Namona be unai ese ita ia hamarerea ita gaukara noho ela bona Iesu Keriso ena amo Dirava ena gwauhamata iboudiai idia guguru.
Abidadama Taudia Ai Ita Lao Negana Murinai Hahemauri Ia Mai Kahirakahira
21. Lauma dalana dekenai ita gima noho totona heduru gauna namba 7 be dahaka?
21 Gau ginigabena, namba 7 gauna, ita ia durua ita gima noho totona be inai: Oi laloa noho iseda hahemauri ia kahirakahira momokani, abidadama taudia ai ita lao neganai ia kahirakahira sisina sibona. Ma gau badana be, Iehova ese gau ibounai ia lohiaia karana hamomokania bona iena ladana hahelagaia negana be ia mai kahirakahira. Unai dainai hari ita gima noho be gau badana momokani. Aposetolo Paulo ia torea, ia gwau: “Mahuta dekena amo ita toreisi negana be ia ginidae vadaeni. Badina be Lohiabada ena mai dinana be kahirakahira. Badina be ita kamonai hamatamaia nega dekenai iseda hahemauri be ia daudau, to harihari iseda hahemauri be ia kahirakahira vadaeni. Hanuaboi ia ore vadaeni, daba ia kahirakahira vadaeni, unai dainai dibura ena kara do ita negea, diari do ita abia, unai be iseda kesi do ita halaoa.”—Roma 13:11, 12.
22. Iseda hahemauri be kahirakahira ia mai dainai edena bamona ita laloa be namo?
22 Iseda hahemauri be ia mai kahirakahira noho dainai, ita gima noho be namo! Namo lasi iseda mauri lalonai gau ta eiava tanobada gauna ta ese ita ia hametaua bona ita be hari inai nega lalonai iena taunimanima totona Iehova ese ia karaia gaudia edia namo ita laloa lasi. (Daniel 12:3) Namona be ita haheauka noho ita be Dirava ena Hereva lalonai ia gwauraia namonamo raka dalana amo ita raka siri lasi totona. (Mataio 13:22) Ia hedinarai momokani hari tanobadana be ena dina gabedia ai ia noho. Nega kahirakahira ia be do ia ore momokani kara maoromaoro tanobada matamatana ta do ia vara totona.—2 Petero 3:13.
23. Iehova be edena dala ai ita do ia durua, bona dahaka hahenamo do idia vara?
23 Unai dainai, namona be ita gima noho. Guna ita karaia bamona lasi, to hari ita gima namonamo noho bona idia vara gaudia edia anina ita diba. Oi laloa, Iehova be inai nega ena kara ia raraia noho. To ita do ia durua hanaihanai hari inai nega dokona lalonai ita gima noho totona. Hanuaboi ia lao noho. Dina be kahirakahira ia mai. Unai dainai oi gima noho! Mesia ena Basileia be Iehova ena ura tanobada dekenai do ia hagugurua neganai, nega kahirakahira ita be dina hairai namo hereana ta do ita itaia!—Apokalupo 21:4, 5.
Emu Haere be Dahaka?
◻ Iesu ia gwau Dirava ena badu dinana be taunimanima do ia abia “idoa bamona.” Ena hereva ena anina be dahaka?
◻ Badina be dahaka iseda lalona idia veria gaudia ita dadaraia be namo, bona edena dala ai ita karaia diba?
◻ Ita gima noho totona edena bamona ita guriguri be namo?
◻ Edena bamona hebamo karana be gau badana?
◻ Badina be dahaka iseda noho toana lauma dalana dekenai ita tahua be namo?
◻ Ita gima noho totona peroveta herevadia be mai edia anina, a?