Paulo bona Plato Edia Hereva Idaudia Toreisi Lou Dekenai
APOSETOLO Paulo be 1 Korinto 15:35-38 bona 2 Korinto 5:1-10 dekenai toreisi lou herevana ia torelaia. Unai ia karaia neganai, ia be Plato bona Greek aonega taudia edia souli ia mase diba lasi lalohadai bamona ia torea, eiava ia be Iesu ena hadibaia herevadia bona ma Bible siri edia hereva bamona ia torea?
Buklet ta, Immortality of the Soul or Resurrection of the Individual: St. Paul’s View with Special Reference to Plato, ese haere ia hahedinaraia; lagani 1974 ai unai buklet ia torea bona North bona South America ena Greek Otodox Dubuna ena bisop badana ese ia abia dae. Atai ai torea siridia lalonai toreisi lou bona unai nega ena Greek taudia edia lalohadai ia herevalaia murinai, buklet ia torea tauna ena lalohadai ia gwauraia hedinarai bona henuai ai torea, ia gwau:
“Plato ia hadibaia souli ia mase diba lasi to ia mauri ela bona hanaihanai, tauanina ia rakatania murinai. Plato ia laloa souli be ia mase diba lasi siahuna ta . . . Saint Paul be unai lalohadai ia hadibaia lasi bona ia hadibaia toho lasi . . .
“Aposetolo Paulo ia laloa lasi tauanina kahana ta ia idau eiava tauanina ena lauma be idau gauna, to ia laloa Keriso ena toreisi lou dainai taunimanima ena souli-lauma tauanina ibounai do ia toreisi lou. Ita gwau diba lasi Paulo ena lalohadai tauanina ena toreisi lou dekenai be guri amo idia mase tauanidia hamauridia lou lalohadai bamona.
“Iena lalohadai tauanina ena toreisi lou dekenai ita gwauraia dala namona ta be inai: Dirava ena siahu dainai taunimanima ta, ena kara, ena lalona, ena tauanina mai ena darana, bona ena tauanina kahana ibounai, ia haidaua, ia havaraia lou, bona ia hamauria lou. Nega gabeai iseda toreisi lou do ia vara lasi ita lalonai ia noho siahuna ta dainai, to ia be Dirava ena amo king ena harihari gauna ta dainai do ia vara.”
Oibe, mase diba lasi maurina be taunimanima lalonai ia noho siahuna ta lasi. To, ia be iseda Lohiabada Iesu Keriso dainai Iehova ena amo ita laloa bada harihari gauna bona davana bada gauna namona ta, horoa Keristen kongregesen taudia dekenai.—1 Korinto 15:20, 57; Filipi 3:14.
[Picture on page 9]
Greek aonega tauna Plato
[Credit Line]
Vatican Museum photograph