Abidadama ese Gorere Taudia Ia Durua Dalana

BIBLE lalonai hoa dalanai gorere hanamoa kara edia sivarai ese idia hahedinaraia Dirava ese taunimanima ia laloa, bona ena siahu ia hegeregere gorere hanamoa totona. Hoa dalanai gorere hanamoa karadia ese Dirava idia hanamoa bona moale bada idia havaraia, unai dainai ia namo ita henanadai: Hari inai negai, lauma helaga ena siahu amo gorere hanamoa karana idia do karaia diba, eiava?

Unai henanadai ena haere be, lasi​—⁠bona unai hereva dainai reana taunimanima haida do idia hoa. Keristen ginigunadia edia nega lalonai gorere hanamoa karadia edia vara ena badina idia guguru vadaeni. The Illustrated Bible Dictionary ena hereva be maoro, ia gwau: “Hoa dalanai gorere hanamoa karadia be tomadiho dainai, unai be muramura henia ena kara dainai lasi.” Unai hoa karadia dekenai tomadiho kara ena badina be dahaka?

Gau ta be, Iesu ese hoa dalanai gorere ia hanamoa neganai ia hahedinaraia ia be Mesia. Bona ia mase murinai, idia hahedinaraia Dirava ena hahenamo be Keristen kongregesen matamatana dekenai. (Mataio 11:​2-6; Heberu 2:​3, 4) Bona ma idia hahedinaraia Dirava ese nega matamatana dekenai taunimanima do ia hanamoa gwauhamatana be do ia guguru. Idia ese iseda abidadama idia hamomokania, ita diba momokani nega ta do ia ginidae bona “unuseniai ia noho tauna ta do ia gwau lasi: ‘Lau gorere.’ Unai tano dekenai idia noho taudia edia dika Dirava ese ia gwauatao vadaeni.” (Isaia 33:24) Keristen ginigunadia edia negai idia vara gaudia edia badina idia guguru neganai, unai hoa karadia idia karaia be anina lasi.

Guna Iesu ena aposetolo taudia be mai edia gorere idauidau, to hoa dalanai idia namo lasi. Unai ese ia hahedinaraia danu Iesu bona ena aposetolo taudia ese hoa dalanai gorere idia hanamoa neganai, idia ese mai anina bada hereva momokani idia hadibaia, idia be muramura henia gaukarana idia karaia lasi. Timoteo be nega momo ia gorere bona ena gorere hanamoa totona Paulo ia gwau namona be uaina ia inua, ia gwau lasi abidadama amo gorere hanamoa karana idia tahua. Paulo be hoa dalanai haida edia gorere ia hanamoa karadia ia karaia, to Dirava ese ‘kopina ena ginigini ta’ ia dekenai ia henia, bona Paulo ia “gwadaia” noho bamona.​—⁠2 Korinto 12:7; 1 Timoteo 5:⁠23.

Aposetolo taudia iboudiai idia mase ore murinai, hoa dalanai gorere hanamoa kara ena siahu ia ore. Paulo danu ese ia hahedinaraia unai do ia vara. Paulo ese Keristen kongregesen be mero maragina ta bamona ia hahegeregerea, ia gwau: “Lau mero neganai mero bamona lau hereva, mero bamona lau laloa, bona mero bamona hereva ena anina lau tahua. To hari lau be tau dainai mero ena kara lau rakatania vadaeni.” Iena haheitalai ena anina be, lauma helaga ena hoa karadia be Keristen kongregesen ia vara ena kara. Idia be “mero maragi ena kara bamona.” Bona ia gwau: “Unai [hoa karadia] be do idia doko.”​—⁠1 Korinto 13:​8-11.

Ita Gorere Neganai Abidadama ese Ita Ia Durua Diba, A?

Ena be abidadama amo gorere hanamoa kara ita abidadama henia lasi, to ita gorere neganai Dirava ita guriguri henia be namo, ita ia durua totona. Bona haida be ita totona idia guriguri neganai unai be kerere lasi. To namona be unai guriguri be lalohadai namonamo bona Dirava ena ura hegeregerena ida ita gwauraia. (1 Ioane 5:​14, 15) Bible ibounai lalonai abidadama amo gorere hanamoa kara ita gurigurilaia herevana ia gwauraia lasi.a To, gorere ena hekwarahi neganai Iehova ena lalokau heduruna ita noia.

Bible ese ia hahedinaraia abidadama taudia idia gorere neganai be inai bamona idia guriguri diba, ia gwau: “Gorere dainai ena geda dekenai ia hekure neganai, Iehova ese do ia hagoadaia; iena gorere neganai ena hekure gabuna do oi haidaua.” (Salamo 41:⁠3) Dirava ena Hereva idia laloa dobu neganai, idia lalohadai momo dainai mamina idia dika taudia do ia durudia. Salamo torea tauna ese ia torea, ia gwau: “Lauegu aena idia dedi neganai, Iehova e, oiemu hebogahisi ese lau ia dogoatao. Lau lalo-hekwarahi momo neganai, oiemu heduru hereva ese lau ia hamoalea.”​—⁠Salamo 94:​18, 19; 63⁠:​6-8 itaia danu.

Ma danu, ita sibona iseda tauanina ena goada ita naria namonamo, bona Bible ese unai bamona ita ia sisiba henia. Namona be Bible ena taravatu hegeregerenai ita noho, to namo lasi drag ita ania kava, kuku ita ania, ita inuinu kekero, eiava ita aniani momo bena ita gorere, bena abidadama amo gorere hanamoa karadia ita tahudia. Hoa dalanai iseda gorere hanamoa totona ita guriguri be maoro lasi, hegeregere, aniani maorodia ita ania iseda gorere ia durua totona, eiava dala ia noho neganai doketa taudia edia heduru ita tahua.

Dirava ena Hereva ese ita ia hagoadaia lalohadai namona ita abia bona unai ese iseda tauanina ia durua diba. Hereva Lada-isidia bukana ese ita ia sisiba henia, ia gwau: “Lalo-manau ese tauanina ia hamauria, to mama be bodaga gauna bamona turia dekenai.” “Lalo-moale be muramura namona, to lalo-metau ese turia ia hamanokaia.” (Hereva Lada-isidia 14:30; 17:22) Lauma helaga totona ita guriguri lalo-namo bona moale ita lalonai ia havaraia totona, bona unai ese iseda tauanina ia durua diba.​—⁠Filipi 4:​6, 7.

Abidadama amo Gorere Hanamoa Kara be Edena Bamona?

Ena be ta ena tauanina ia goada dainai ena mauri ia namo, to gorere ia davaria diba. Unai neganai, edena bamona do ia karaia? Bema ta ia lao abidadama amo gorere ia hanamoa tauna ta ia itaia ena gorere ia hanamoa totona, unai be dika, eiava? Oibe, unai be dika. Hari inai nega lalonai, abidadama amo gorere hanamoa kara idia karaia taudia be unai gaukara idia karaia kava lasi. Bona abidadama amo gorere idia hanamoa taudia dekenai moni ita negea kava neganai reana moni bada ita halusia, to namona be unai moni ita negea doketa taudia dekenai. Dahaka dainai koikoi karana amo taunimanima edia lalona idia veria taudia dekenai moni ita negea kava?

Reana haida idia gwau: Abidadama amo gorere hanamoa kara be sisina ia namo badina ‘gorere hanamoa taudia haida ese haida idia hanamoa.’ To ita gwau diba lasi abidadama amo gorere idia hanamoa taudia be gorere idia hanamoa nega daudau idia namo totona. Encyclopædia Britannica ia gwau: “Abidadama amo gorere hanamoa karadia momo dekenai idia do tahua lasi, bona kara haida edia anina idia do hedinarai namonamo lasi.”

Ena be taunimanima haida edia gorere idia hanamoa, to unai ese ia hamomokania lasi lauma helaga ese unai ia karaia. Iesu be ororo dekenai ia haroro neganai, ia gwau: “Unai dina ia ginidae neganai taunimanima momo do idia hereva lau dekenai, do idia gwau, ‘Lohiabada e, Lohiabada e, oiemu ladana dekenai guna ai haroro, ani? Oiemu ladana dekenai lauma dikadia ai lulua bona oiemu ladana dekenai hoa karadia momo ai karaia, ani?’ Vadaeni lau ese do lau haere idia dekenai, do lau gwau, ‘Umui be lau diba lasi momokani. Idau gabuna dekenai umui lao, umui dika karaia taudia.’ ” (Mataio 7:​22, 23) Iesu ia gwau danu, Dirava ese ia abia dae lasi taudia be toa amo taunimanima do idia veria, ia gwau: “Badina be Keriso koikoi taudia bona peroveta koikoi taudia do idia toreisi, toa bona hoa gaudia do idia hedinaraia. Inai bamona do idia karaia, Dirava ia abia hidi taudia do idia hakaua kerere totona, bema mai dalana.” (Mataio 24:24) Oibe, hari inai nega lalonai abidadama amo gorere idia hanamoa taudia be unai siri ese ia herevalaidia, heagi kara idauidau idia karaia taunimanima idia veria totona, moni momo idia noia, bona idia gwau hoa kara dekenai gorere idia hanamoa.

Unai bamona taudia be Iesu ena murinai idia raka lasi. Vadaeni, idia be daika murinai idia raka? Aposetolo Paulo ese ita dekenai ia hahedinaraia, ia gwau: “To unai be hoa gauna lasi. Badina be Satani sibona ese iena kara ia senisia diba, bona ia ese diari aneruna ena kopina ia atoa diba. Unai dainai Satani ena hesiai taudia, bema edia kara idia senisia, bona taunimanima vairanai idia be kara maoromaoro taudia bamona, inai be hoa gauna, a? To dokonai, edia kara hegeregerena davana do idia abia.” (2 Korinto 11:​14, 15) Bema abidadama amo gorere idia hanamoa taudia be unai idia karaia lasi, idia be koikoi taudia, idia be Satana ena dala dekenai idia raka, “tanobada taudia ibounai ia koia noho [tauna].” (Apokalupo 12:⁠9) To bema idia be taunimanima haida sibona idia hanamoa, unai be edena bamona? Edia “hoa kara momo” be Satana bona ena demoni edia siahu amo idia abia, eiava? Oibe edia siahu be unuseni amo ia mai!

Gorere Hanamoa Momokanina Negana

Dirava ena lauma helaga ese Iesu ia durua dainai hoa karana amo gorere idauidau ia hanamoa diba. Idia hahedinaraia Dirava ia ura taunimanima edia gorere idauidau do ia haorea. Iehova ia gwauhamata iena nega korikori dekenai ‘bese idauidau do idia hanamoa.’ (Apokalupo 22:⁠2) Bona ia ese gorere sibona do ia hanamoa lasi, to mase danu do ia haorea. Paulo ese ia hahedinaraia Iesu ia mai “do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Unai be ita ia ruhaia dala namo hereana! Bible lalonai idia torea sivarai bamona Iesu ese gorere ia hanamoa karadia do ia karaia lou, to dala badana dekenai do ia karaia. Idia mase taudia do ia hatoredia isi lou! (Ioane 5:​28, 29) Edena negai unai do ia vara?

Dirava ena tanobada matamatana dekenai inai nega dikana mai ena kara dika ibounai ida do idia ore momokani, bona hari toa ibounai ese ia hahedinaraia unai nega be ia kahirakahira vadaeni. Murinai, tanobada matamata do ia vara bona kudou-maoro taudia ese hahenamo bada do idia davaria. Unai tanobada dekenai hisihisi ta do ia noho lasi. “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:⁠4) Hari idia vara noho gaudia amo, unai be ia idau momokani!

Unai dainai, bema oi gorere neganai, Iehova dekenai oi guriguri oi ia durua totona. Bona ena be oi gorere eiava oi gorere lasi, namona be oi diba mauri hanaihanai bona gorere lasi karana be do ia vara momokani. Namona be Bible ena siri momo oi duahia, unai amo Dirava ena gwauhamata momokanina dekenai oiemu abidadama oi habadaia. Dirava ena nega korikori ai kahirakahira ena ura do ia hagugurua karana oi dibaia be namo. Oi daradara lasi, badina Dirava ena hereva ese ita dekenai ia hamomokania, ia gwau: “Ia ese mase do ia haorea ela bona hanaihanai, Lohia Badana Iehova ese matana ranuna edia vairadia amo do ia daua oho.”​—⁠Isaia 25:⁠8.

[Footnotes]

[Picture on page 7]

Iesu ese hoa dalanai gorere ia hanamoa bona edia badina ia guguru unai

[Picture on page 8]

Iesu ese hoa dalanai gorere hanamoa karadia do ia karaia lou bona do ia karaia badabada