Mauri—Dirava amo Harihari Gauna Ta

DINA ta ta iboudiai, hora 24 lalonai, iseda kudou be iseda tauanina ena rara ia haheaua. Ita mahuta, bona iseda baragi idia gaukara noho. Aniani ita ania, bona iseda bogana ese aniani ia abia dae. Unai ibounai be dina ta ta iboudiai ia vara, bona nega momo ita laloa lasi. Unai mai hoa gaukara daladia iboudiai be harihari gauna, bona idia be iseda mauri; nega momo unai gaudia ita laloa lasi. Sedira unai harihari gauna be hoa gauna ita gwauraia diba.

Namona be beibi hamatamaia bona havaraia dalana ita laloa. Ena be nega momo tauanina ese gau idauna ta do ia dadaraia, to hahine bogana lalonai beibi pusena be idau, gatoi ia mauri neganai ia abia dae. Hahine ena bogana lalonai ia bada noho beibi ia dadaraia lasi idau gauna ta bamona, to ia ese ia ubua bona ia naria ela bona ia vara negana. Bema hahine bogana lalonai beibi pusena ese unai gau idauna ia abia dae lasi, beibi be do idia vara diba lasi.

Bogana lalonai beibi be hua hani sibona neganai gau ta ia vara, bona unai gau dainai beibi be do ia vara neganai ia mauri noho diba. Bogana lalonai beibi be hua hani neganai, imana sinabadana ia topoa hamatamaia, bona unai ese iena tauanina ia hegaegaelaia do ia vara murinai sinana ena rata ia topoa totona. Beibi ia do vara lasi neganai unai gau bona ma gau momo ese beibi ia durua ia vara neganai do ia mase lasi totona.

Beibi be sinana bogana lalonai beibi pusena dekenai ia do noho neganai, ena kudouna ena kopina dekenai matu ta ia noho. To beibi ia vara neganai unai matu be sibona ia koua. Ma danu, bogana lalonai beibi pusena dekenai ia do noho neganai beibi ena rara baege badana ta be baragi ena murimuri ai ia noho, to ia vara neganai unai baege ia maragi ia lao; rara be baragi lalonai ia heau, bona unuseniai oxygen ia abia dae beibi be ia hahodi diba totona.

Unai ibounai be hamatamaia gaudia sibona. Ena mauri ibounai lalonai, tauanina gaukara daladia namo hereadia (hegeregere hahodi dalana, rara heau dalana, tauanina mamina dalana, bona tauanina ena momoru negea dalana) do idia gaukara namonamo bona taunimanima ese unai idia hoalaia bada​—unai ibounai ia vara mauri ia lao noho totona. Ita hoa lasi idau negai toretore tauna be Dirava ia herevalaia inai bamona: “Oi lau hanamoa, badina be gari bona hoa havaraia dalana dekenai lau oi karaia. Oiemu gaukara be namo herea.”​—Salamo 139:14.

Ia hedinarai namonamo, unai hereva namodia ia torea tauna ia laloa lasi mauri be sibona ia vara kava, evolusen dalanai eiava aksiden dalanai. Bema ita vara kava, iseda mauri gaukaralaia dalana dekenai ita be maduna lasi eiava ta dekenai iseda kara dainai do ita hereva lasi. To, mauri ia vara bona ia gaukara daladia ese idia hahedinaraia ta ese ia hegaegaelaia, bona hegaegaelaia totona ta ese ia havaraia. Bible be inai taravatu ia gwauraia, ia gwau: “Momokani, ruma ibounai be mai edia karaia tauna, to gau ibounai ia karaia tauna be Dirava sibona.” (Heberu 3:4) Unai dainai gau badana be ita “diba Iehova be Dirava. Ia ese ita ia karaia, ita sibona ita karaia lasi.” (Salamo 100:3) Oibe, mauri be aksiden amo ia vara lasi; ia be Dirava amo harihari gauna ta.​—Salamo 36:9.

Unai ia momokani dainai, iseda maduna mauri Henia Tauna dekenai be dahaka? Ia ura edena dala ai iseda mauri ita gaukaralaia? Unai henanadai bona ma haida be sivarai gabena dekenai do ita laloa.