Harihari Gauna Namona, Mauri, Ita Laloa Bada

MAURI​—unai be ita abia gau namo hereana! Mauri be lasi neganai gau ta ita karaia diba lasi. Ita haboioa neganai, taunimanima ese idia havaraia lou diba lasi. Bema iseda mauri ita haboioa gwauraia, ita hekwarahi bada ita dogoatao noho totona. Idia mase gwauraia neganai haida be taunimanima ia hereaia siahuna ta ena heduru abia totona idia noinoi!

Bible ena sivarai ta ita laloa, lagatoi ta be davara ena lai bada hurehurena dekenai dika ia davaria. Ia mutu gwauraia neganai, “lagatoi taudia idia gari, bena idia ta ta be ena dirava ena dirava dekenai idia boiboi.” Gabeai, idia ibounai be nega tamona Dirava momokanina dekenai idia boiboi: “Iehova e, ai ese emu heduru ai noia, ai mase garina.” Danu, Bible ena sivarai ia gwau: “Lagatoi ena kohu be davara dekenai idia negea, lagatoi ia haraga totona.”​—Iona 1:​4-6, 14; Kara 27:​18, 19 itaia danu.

Unai lagatoi dekenai idia gaukara taudia idia laloa namona be edia kohu namodia idia negea edia mauri idia dogoatao noho totona. Ita be kohu matamata ita abia diba to ia boio maurina ita abia lou diba lasi. Bona iseda mauri ita laloa bada dainai, dika amo ita siri. Iseda tauanina dekenai aniani ita henia, ita hahedokilaia, bona ita ubua. Ita gorere neganai muramura ita tahua.

To, mauri Henia Tauna ia ura iseda mauri ita naria sibona lasi, to ia ura ma gau haida ita karaia danu. Mauri be davana bada harihari gauna, bona ia be tanobada bona guba ibounai ena Taubadana amo ia mai. Unai harihari gauna Ia Henia Tauna bona ia henia harihari gauna ita moalelaia bada dainai, mauri ita laloa bada be namo, ani? Bona unai ita karaia totona anina be ma haida edia mauri ita laloa bada danu, ani?

Unai dainai, namo lasi ita hoa Iehova Dirava be Israel besena dekenai ia henia taravatuna lalonai taravatu haida idia noho ma haida edia mauri bona edia tauanina ena goada naria totona. (Esodo 21:29; Deuteronomi 22:8) Hari inai negai Keristen taudia be unai hegeregerena mauri idia naria namonamo be namo. Hegeregere, bema oiemu ruma lalonai natudia maragidia idia noho, bema oi laloa namonamo lasi bena ageva, pini, eiava mai matana gaudia idia dogoatao diba, idia gadaralaia eiava idia hadonua neganai hisihisi idia davaria diba, ani? Poisini gaudia bona muramura dikadia be natudia idia abia diba lasi gabudia ai umui atoa, a? Bema ranu be foloa dekenai ia bubua, oi haraga oi hakaukaua totona bena aksiden dalana oi koua, a? Masini idia dika neganai oi haraga oi hamaoromaorodia totona, a? Hanaihanai emu motuka oi sekea ia heau kerere garina, a? Oi taria dalana be mauri naria dalana ai, a? Bema oi be mauri ena davana bada oi laloa bada, unai bamona daladia ai oi be gau ibounai oi karaia unai mauri oi haboioa lasi totona.

To madi, haida be sibodia edia mauri idia laloa bada lasi. Haheitalai be, taunimanima ibounai idia diba kuku ania karana be tauanina ia hadikaia, ani? To, unai kara ese taunimanima milion momo ia dogoatao, bona idia be unai kuku ania ena poisini kwalahu idia hadonoa neganai edia tauanina ena goada be sisina sisina ia ore ia lao. Ma haida be drag dikadia idia ania kava, bona ma haida be idia inuinu kekero momo, bona dika idia davaria. AIDS be taunimanima ia hamasea gorerena ta bona hanamoa dalana idia diba lasi. To bema matabodaga karadia idia karaia lasi, o drag dikadia haida idia ania kava lasi, bona rara idia abia dae lasi, idia momo be unai gorere idia abia lasi. To madi, unai be mauri laloa bada lasi momokani karana!​—Roma 1:​26, 27; 2 Korinto 7:1.

Idia Idau Diba!

Edia Havaraia Tauna Badana, Iehova, idia moalelaia taudia be mai edia badina badana ta mauri idia laloa bada totona. Mauri be idia dekenai ia henia harihari gauna helagana. Unai dainai idia ura edia mauri idia haidaua badina mauri idia laloa bada ia be Dirava ese ia henia harihari gauna ta dainai. Kwaku, Ghana dekenai tisa tauna ta, ena sivarai ita laloa. Ia be inuinu kekero momo tauna, bona iena mauri ia hadikaia kava.

Kwaku be unai ia laloatao, ia gwau: “Lauegu hahine lau doria toho lau ia matauraia totona, bona nega momo ai hepapahuahu bona ai heai, unai be lau inuinu kekero neganai ia vara. Lau inuinu momo dainai, nega momo lau be moni lasi, bona nega momo lau be ruma bese naria totona moni lau henidia lasi. Unai kara dainai, lauegu hahine ia badu. Lauegu moni ia ore neganai (bona unai be nega momo ia vara), lau be gau momo lau karaia lauegu inuinu kara lau karaia noho totona. Nega ta exam idia rejista totona lauegu stiuden taudia amo lau gogoa monina lau gaukaralaia. Lau inuinu bada bona lauegu turadia totona inuinu gaudia lau hoia danu. Bena nega ia ginidae lauegu kara ena davana lau abia totona. Bema lauegu hedimasta ese lau ia durua lasi lauegu gaukara amo lau idia hadokoa.

“Lauegu mauri ia dika momokani. Lau hemarai bada, to lauegu hemarai ia ore haraga. Bena lau be sibona lau hamasea totona lalohadai lau abia badina lau laloa lau hegeregere lasi lau mauri totona. To, lau be inuinu kekero karana lau rakatania diba lasi. To, dina ta inuinu rumana dekenai lau be inuinu taudia edia heai dekenai lau vareai, bona kaia ese lau ia gwadaia, bona lau hisihisi dainai lau lalo-parara dina ta do ia mai lau be inuinu momo dainai do lau mase diba.

“Unai negadia lalonai, Iehova ena Witness taudia be aiemai ruma idia vadivadi henia, ai idia veria Bible ai laloa totona. Idia mai neganai lauegu hahine bona lau be nega ibounai ai hehuni badina ai laloa idia mai be anina lasi. To, nega ta, lau hebogahisi henidia dainai lau kamonai henidia. Bible lau stadilaia neganai lau lalo-parara gabeai Dirava ena nega matamatana lalonai lau mauri hanaihanai diba. Iehova ena Witness taudia edia heduru amo Bible lau stadilaia noho neganai, Iehova be Mauri Henia Tauna bona harihari gauna, mauri, ia henia dainai Ia lau moalelaia karana ia bada ia lao; bona Bible ena sisiba namona dekenai lau moalelaia karana ia bada ia lao danu. Unai ese lau ia hagoadaia lauegu mauri lau hagoevaia totona. Unai be ia auka sisina, badina lau be hanaihanai inuinu karana, bona lauegu bamodia gunadia danu, lau dadaraia toho. Guriguri Ia Kamonai Henia Tauna, Iehova, ese lauegu kudouna ena lalohadai goadana ia itaia bona lau ia kamonai henia.a

“Ena be lauegu hahine be Iehova ena Witness ta lasi, to hari ia be lau bona lauegu tomadiho ia matauraia bada badina ia itaia lauegu mauri lalonai bona aiemai headava dekenai kara momo lau haidaua. Guna aiemai dekena taudia be lauegu hahine bona lau huanai heai idia koua, to hari be lasi. Hari lau moalelaia lalo-mainona lau laloa bada. Momokani, Iehova Dirava be iseda Mauri Henia Tauna dainai lau laloa bada, iena lalohadai mauri ena davana namo dekenai lau abia, bona iena hahegani mauri dalana dekenai lau badinaia be mauri dalana namo hereana.”

Dirava Ena Gwauhamata Mauri Hanaihanai Henia Totona

Iehova ena Witness taudia be taunimanima tausen momo, Kwaku bamona, idia durudia ‘mauri matamata idia atoa, unai be Dirava ena ura hegeregerena, kara maoromaoro bona momokani dekenai ia karaia.’ (Efeso 4:24) Hari maurina sibona lasi to tanobada paradaisona dekenai mauri hanaihanai ena helaro idia moalelaia. Bible ia gwauhamata Dirava ese do ia havaraia Paradaisona dekenai, taunimanima ta be hitolo ena hisihisi do ia mamia lasi, badina “tuari oreadia edia Dirava, Iehova, ese aria namo herea do ia karaia, bese iboudiai edia; . . . aniani mai digarana.”​—Isaia 25:6.

Harihari, ena be mauri be harihari gauna namo hereana, to ita mauri daudau lasi. Taunimanima iboudiai idia mase diba, bona mase be lalohisihisi bada gauna! Iseda lalokau tauna be mauri taudia amo ia boio bona rege lasi mase gurina ai ia lao be lalohisihisi bada gauna. To Dirava ena Basileia henunai, Keriso ena lohia karana henunai, Iehova ena gwauhamata do ia guguru: “Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—Apokalupo 21:4.

Unai neganai, mauri ena harihari gauna be dala namo hereana ai do ia hadaudaua. Hari tanobadana dekenai hisihisi bada herea amo do idia roho mauri taudia dekenai dala do ia kehoa mauri ena namo momokani do idia abia. Bona toreisi lou amo, mauri havaraia lou karana amo, Iehova Dirava be mase dekenai idia mahuta taudia dekenai iena harihari gauna namona do ia henidia lou. (Ioane 5:​24, 28, 29) Anina be iseda lalokau mase taudia bona idau negai Dirava idia gari henia taudia danu do idia mauri lou!

Unai ibounai be gau namona lalohadailaia kava karana sibona, a? Lasi, badina “Dirava ese gau ibounai ia karaia diba.”​—Luka 1:37; Iobu 42:2 itaia danu.

Ma danu, Iehova Dirava sibona be taunimanima dekenai gwauhamata ia henia unai ibounai do ia vara. Edena dala ai? Ia lalokau henia bada tauna, iena lalokau Natuna, Iesu Keriso, ia henia mauri davana ia karaia totona bona ita ibounai be kara dika bona mase amo ita ia ruhaia totona. Roma 8:32 be ita ia hagoadaia, ia gwau: “[Iehova] Dirava ese iena Natuna tamona sibona ia vara ia dogoatao lasi, to ita ibounai totona ia henia boubou gauna bamona. Oibe, iena Natuna ita dekenai ia henia vadaeni. Unai dainai gau ibounai do ia henia davana lasi ita dekenai, ani?” Bible ese ita ia hadibaia unai ia vara totona, taunimanima ibounai be mauri ena kara namo hadikaia karadia amo do ia hagoevaia, bona hahemaoro kereredia, taravatu utua karadia, bona dagedage ibounai do ia kokia. (Isaia 11:9) Gabeai, nega ta lasi mauri idia laloa maragi.

Harihari danu, goevadae lasi negana lalonai, mauri ita do moalelaia diba. Taunimanima iboudiai be aniani ena bonana namona, dina siahu neganai lai namona, ororo badana ena hairai, dina ia diho ena hairai, ia aru namo sinavaina, mai edia kala momo herahera gaudia edia hairai, miusik regena namona, eiava manu edia hioga, idia moalelaia, ani? Nega sisina oi laloa. Bema unai gaudia oi moalelaia diba ela bona hanaihanai be edena bamona, a?

Unai dainai, nega sisina lalonai, anina lasi karadia, sibona emu ura laloa momo mauri dalana oi moalelaia totona, mauri hanaihanai gauna ena harihari namona oi negea be kavakava karana, ani? (Heberu 11:25 itaia danu.) Aonega dalanai, Bible ese ita ia hagoadaia “tauanina ena ura dikadia do umui karaia lasi, to Dirava ena ura sibona do umui badinaia.” (1 Petero 4:2) Ai be oi ai hagoadaia bada, oibe, oi ai hamaoroa, unai oi karaia totona, Bible, Dirava ena Hereva, oi stadilaia, bona oi diba gaudia oi karaia. (Ioane 13:17) Unai amo oi be Iehova ena turana namona ai do oi lao, ia be kara namo bona hebogahisi bada Diravana, ia be oi dekenai mauri hanaihanai ena davana do ia henia!

[Footnotes]

[Picture on page 5]

Oiemu mauri dalana ese mauri oi laloa bada karana ia hahedinaraia, a?

[Picture on page 7]

Dirava ena tanobada matamatana lalonai mauri ena namo gaudia do ita moalelaia diba ela bona hanaihanai!