‘Bapatiso Lau Abia be Namo, A?’

ISEDA mauri ibounai lalonai, ita abia hidi daladia dekenai henanadai badana be inai: ‘Bapatiso lau abia be namo, a?’ Dahaka dainai unai be gau badana? Badina iseda haere be mai anina hari iseda mauri dekenai bona gabeai iseda mauri hanaihanai dekenai.

Unai henanadai be hari oi laloa, a? Reana nega sisina daudau lalonai Iehova ena Witness taudia ida Bible stadi oi abia. Eiava reana oi beibi negana amo emu tama sina be Bible amo oi idia hadibaia. Hari oi be emu lalona oi hadaia be namo. Dala maorona oi abia hidi totona, namona be oi lalo-parara bapatiso be dahaka bona daidia be bapatiso idia abia be namo.

Bapatiso Ena Anina

Headava aria bamona, bapatiso ese kara heheni dalana ta ia hahelagaia. Headava aria dekenai, tau bona hahine be idia tura heheni vadaeni. Headava aria be taunimanima iboudiai vairadiai ia hahedinaraia idia ruaosi idia gwauhamata bona headava momokani ai idia vareai. Bona dala ia kehoa unai headava taudia rua be edia mauri lalonai kara haida idia moalelaia bona idia huaia maduna haida ia henidia.

Bapatiso dekenai unai bamona ia vara danu. Bible ita stadilaia neganai, Iehova be ita dainai ia karaia lalokau karadia dekenai diba ita abia. Iseda mauri bona ita ia durua gaudia ia henia sibona lasi, to Ia sibona ia havaraia Natuna ia henia kara dika taudia be Ia ida idia turana karaia totona, bona paradaiso tanobadana dekenai mauri hanaihanai do idia abia totona. Unai ibounai ita laloa neganai, ita ura kara ta ita karaia, ani?

Dahaka ita karaia diba? Dirava ena Natuna, Iesu Keriso, ese ita ia hamaoroa, ia gwau: “Tau ta bema ia ura lauegu murina dekenai do ia raka, ia sibona ena ura do ia laloa lasi, iena satauro do ia huaia, lauegu murina dekenai do ia raka.” (Mataio 16:24) Oibe, ita be Iesu Keriso ena hahediba taudia ai ita lao diba, bona iena Tamana, Iehova, ena ura ia karaia ena haheitalai ita tohotohoa diba. To, unai ita karaia totona, namona be ‘iseda ura ita laloa lasi,’ anina be ita ura Dirava ena ura ita atoa guna bona iseda ura ita atoa gabeai; unai ita karaia totona iseda mauri ita henia eiava ita gwauhamatalaia iena ura do ita karaia totona. Iseda ura ita hahedinaraia totona, taunimanima iboudiai vairadiai kara ta ita karaia. Unai kara be taunimanima vairadiai ranu bapatiso ita abia iseda gwauhamata Dirava dekenai ita hahedinaraia totona.

Daidia be Bapatiso Idia Abia be Namo?

Iesu Keriso be ia murinai idia raka taudia ia hamaorodia idia ‘lao, bese ibounai be diba tahua taudia do idia halaoa, bona Tamana, Natuna, Lauma Helaga ena ladanai do idia bapatiso henidia. Bona idia dekenai do idia hadibaia, idia dekenai ia henia hereva ibounai be do idia badinaia.’ (Mataio 28:​19, 20) Ia hedinarai momokani, bapatiso idia abia gwauraia taudia be darana bona kudouna dekenai diba idia abia vadaeni be namo. Dirava ena Hereva idia stadilaia dainai, idia diba namona be edia mauri dalana gunana amo ‘edia lalona idia giroa.’ (Kara 3:19) Bena, idia diba namona be Iesu Keriso ese ia henia haroro gaukarana idia karaia bona iena hahediba taudia ai idia lao. Unai ibounai idia karaia guna bena gabeai idia bapatiso diba.

Oiemu tubu lauma dalana dekenai be ia hegeregere vadaeni, a? Oi ura Dirava do oi hesiai henia, a? Bema oibe, mai guriguri danu Etiopia eunuko tauna ena sivarai Bible lalonai oi laloa, Kara karoa 8 ese ia sivarailaia hegeregerena. Unai tau dekenai ta ese Iesu Mesia idia perovetalaia herevadia edia anina ia gwauraia neganai, sibona ena darana bona kudouna ia tahua bena ia henanadai, ia gwau: “Dahaka ese egu bapatiso ia koua?” Ia hedinarai gau ta ese ia koua lasi; unai dainai bapatiso ia abia.​—Kara 8:​26-38.

Hari inai negai, momo be unai henanadai idia henia danu: “Dahaka ese egu bapatiso ia koua?” Unai dainai, lagani 1991 lalonai, gwauhamata idia karaia matamata taudia 300,945 ese bapatiso idia abia. Unai ese Iehova ena taunimanima iboudiai dekenai moale bada ia havaraia, bona kongregesen elda taudia idia moale ma kudou-maoro taudia haida idia durudia edia diba idia habadaia bona do idia hegeregere bapatiso idia abia totona.

To, reana oiemu kongregesen elda taudia idia gwau oi naria be namo. Bema oi be mero eiava kekeni, oiemu tama sina ese reana oi idia hamaoroa oi naria totona. Vadaeni, unai neganai edena bamona? Oi lalo-manoka lasi. Namona be oi laloa Atai Herea Tauna ida turana karana oi karaia neganai unai be kara mai anina bada. Namona be taravatu hereadia ita badinaia. Unai dainai edia hereva oi kamonai henia bona mai emu goada ibounai ida oi badinaia. Bema edia hereva ibounai dekenai oi lalo-parara namonamo lasi, oi hemarai lasi, to henanadai oi henia ela bona oi lalo-parara namonamo dahaka oi karaia hegaegae be namo.

To, taunimanima haida idia gari sisina, idia gwau unai be kara badana idia karaia totona. Oi be unai bamona, a? Momokani, sedira gau haida dainai gwauhamata bona bapatiso oi karaia haraga lasi. To bema oi hegeregere to oi gari noho, oi sibona dekenai oi henanadai: “Dahaka ese egu bapatiso ia koua?” Mai guriguri danu emu mauri oi tahua bona oi laloa namonamo bena do oi diba Iehova ena boiboi, ia ida oi turana karaia totona, oi kamonai henia haraga lasi be mai ena badina eiava lasi.

‘Lau Do Matamata’

Bema oi be mero eiava kekeni ta, reana oi laloa, ‘Lau do matamata.’ Momokani, bema matamata taudia be edia Keristen tama sina idia kamonai henidia bona edia hereva idia badinaia, bona edia diba hegeregerena Bible idia badinaia neganai, Iehova ese do ia laloa idia “helaga.” Bible ese ita ia hadibaia Dirava ese kara maoromaoro tama bona sina ia moale henidia neganai, idia ubudia natudia danu be unai bamona ia lalodia. (1 Korinto 7:14) To, Bible ia gwau lasi edena lagani idia abia neganai unai bamona ia lalodia kara ia doko. Unai dainai, gau badana be Keristen memero kekeni ese inai henanadai idia laloa bada: ‘Bapatiso lau abia be namo, a?’

Bible ese memero kekeni ia hagoadadia ‘idia ia havaraia Diravana be edia tauhau negana lalonai idia laloatao.’ (Kohelete 12:1) Unai dekenai, mero maragi Samuel ena haheitalai ita laloa, ia be “Iehova vairanai ia hesiai karaia, ia be mero maragi [neganai].” Timoteo ena haheitalai ia noho danu, ia be beibi negana amo iena sinana bona iena tubuna ese idia hadibaia hereva momokani be iena kudou dekenai ia abia dae totona.​—1 Samuel 2:18; 2 Timoteo 1:5; 3:​14, 15.

Hari inai negai danu, matamata taudia momo be edia mauri idia gwauhamatalaia Iehova idia hesiai henia totona. Lagani 15 merona, Akifusa, ia gwau Hesiai Hebou dekenai hereva ta ese ia durua iena lalona ia hadaia bapatiso ia abia totona. Ayumi be lagani 10 ia abia neganai, bapatiso ia abia. Iehova ia lalokau henia bada dainai ia ura ia hesiai henia. Hari, iena lagani be 13, bona iena Bible stadi ese Iehova ia lalokau henia dainai, ia danu lagani 12 ia abia neganai, bapatiso ia abia! Ayumi ena taihuna maragina, Hikaru, be lagani 10 ia abia neganai, bapatiso ia abia danu. Ia gwau: “Haida idia gwau lau do matamata, to Iehova be lauegu mamina ia diba. Lau gwauhamata, mai goada ibounai ida do lau hesiai henia, unai dainai lau ura bada bapatiso do lau abia.”

Tama sina edia haheitalai namona be gau badana ta danu, taihu matamata ta ena sivarai ese ia hahedinaraia hegeregerena. Iena tamana ese iena sinana ia taravatua ia gwau ia bona ena taihuna bona tadina dekenai Bible ia stadi henidia lasi. Ia ese idia ia dadabaia bona edia buka ia araia. To sinana ena haheauka bona abidadama karadia dainai, natudia idia diba Iehova Dirava idia hesiai henia be gau badana. Unai kekeni matamata be lagani 13 neganai bapatiso ia abia, bona ena taihuna maragina bona tadina be iena haheitalai idia tohotohoa.

‘Lau Buruka Vadaeni’

Salamo torea tauna ia gwau: “Umui tatau burukadia bona umui memero e, Iehova ena ladana umui hanamoa be namo.” (Salamo 148:​12, 13) Oibe, namona be buruka taudia idia diba Iehova ena kahana dekenai idia gini be gau badana. To buruka taudia haida idia haraga lasi edia kara idia haidaua totona. Idia laloa “sisia burukana ta be dala matamatadia oi hadibaia diba lasi.” To, namona be inai oi laloa, abidadama tauna Abraham be lagani 75 neganai Iehova ese ia hamaoroa, ia gwau: “Oiemu tano bona oiemu varavara oi rakatania, bona tano dohore lau hadibaia oi, unai tano dekenai do oi lao.” (Kara 7:3; Genese 12:​1, 4) Mose be lagani 80 neganai Iehova be ia dekenai gaukara ia henia, ia gwau: “Lauegu bese taudia . . . be Aigupito dekena amo dohore oi hakaudia siri totona.” (Esodo 3:10) Unai tataudia bona ma haida be edia mauri dalana dekenai idia manada vadaeni bena Iehova ese ia hamaorodia edia lalokau bona gwauhamata be ia dekenai idia hamomokania totona. Kara haraga Iehova ena hereva idia badinaia.

Hari inai nega be edena bamona? Shizumu be lagani 78 lalonai Buddhist tomadiho ia karaia to murinai Bible ia stadilaia hamatamaia. Iena ruma bese taudia ese idia dagedage henia, bona idia koua sibona ena ruma lalonai stadi ia abia totona. Lagani tamona murinai sibona, ia diba namona be sibona ena mauri ia gwauhamatalaia Iehova dekenai, bona bapatiso ia abia. Dahaka dainai iena kara ia haidaua? Ia gwau: “Lagani momo lalodiai tomadiho koikoi ese lau ia koia, bona lau ura Iehova ena amo hereva momokani lau abia ela bona hanaihanai.”

‘Oi Ia Hamauria Noho’

Nega be ia lao ore noho. Oiemu mauri bona ma haida edia mauri idia boio diba. Namona be haraga oi laloa sibona oi gwauhamatalaia Iehova dekenai bona ranu bapatiso amo oi hamomokania. Aposetolo Paulo be unai ia gwauraia bada, ia gwau: “Bapatiso ese harihari umui ia hamauria noho.” Anina be ma ia gwauraia, ia gwau “tauanina ena miro be bapatiso ese ia huria lasi” (bapatiso ia do abia lasi neganai ta ese unai ia karaia vadaeni be namo) ‘to Dirava dekenai lalona goevana totona ita noinoi.’​—1 Petero 3:21.

Iehova ena taravatu ida ia hegeregere dainai, unai bapatiso hahediba tauna be lalona ena mamina goevana ia abia. Iehova hesiai henia karana dekenai ia gaukara namonamo noho dainai, ia ese lalo-maino bona moale ia davaria diba. (Iakobo 1:25) Bona gau badana be, mai goada ida ia naria diba gabeai ia mai nega matamatana dekenai Iehova ena amo idia doko lasi hahenamona do ia abia totona. Unai oi davaria diba bema inai henanadai oi haerelaia: ‘Bapatiso lau abia be namo, a?’

[Picture on page 21]

Samuel be mero maragi neganai, Iehova vairanai ia hesiai henia

[Picture on page 22]

Iehova ese gaukara ia henia neganai Mose be lagani 80

[Pictures on page 23]

Hari inai negai bapatiso idia abia matamata bona buruka taudia be Dirava ena nega matamata ai hahenamo do idia davaria diba