Duahia Taudia Edia Henanadai

Heberu 11:​26 ai, Mose be idia gwauraia, “Keriso,” anina be ia be Keriso ta eiava ia be Iesu Keriso bamona sibona?

Aposetolo Paulo ese Mose ena abidadama ia herevalaia neganai, ia torea ia gwau, Mose be “Keriso dainai hemarai bona hisihisi do ia abia be namo. To Aigupito ena kohu momo ia abia be dika. Badina be Dirava do ia henia davana namona ia laloa.” (Heberu 11:26) Paulo ese Mose ia gwauraia “Keriso,” eiava ia be horoa tauna ta bamona.

Momokani, dala haida ai Mose ese Mesia ena mai dalana ia hahedinaraia. Ena be Mose be peroveta tauna ta, to ia ese ‘ia bamona’ do ia mai peroveta tauna badana ia perovetalaia. Iuda taudia momo idia lalo-parara Iesu be unai “Peroveta Tauna,” bona iena murinai idia raka taudia ese idia hamomokania danu. (Deuteronomi 18:​15-19; Ioane 1:21; 5:46; 6:14; 7:40; Kara 3:​22, 23; 7:37) Mose be Taravatu gunana ena gwaukau tauna, to, Iesu ese “boubou helaga karaia gaukara ia abia,” ia be ‘taravatu namona ena gwaukau tauna,’ unai be taravatu matamata hereadaena.’ (Heberu 8:6; 9:15; 12:24; Galatia 3:19; 1 Timoteo 2:5) Unai dainai ita gwau diba Mose be do ia mai Mesiana bamona.

To, unai be Heberu 11:26 ena anina ena badina lasi. Mose be do ia mai Mesiana ena kara ia diba lasi, Aigupito ai ia dekenai idia vara gaudia be mai anina Mesia dekenai, eiava Ia ia laulaulaia ia diba lasi.

Haida idia gwau, Paulo ena hereva Heberu 11:26 ena anina be ena be hereva ma ta bamona, ia gwau Keristen taudia be ‘Keriso dainai hisihisi idia abia.’ (2 Korinto 1:5) Horoa Keristen taudia idia diba Iesu Keriso be hisihisi ia abia, bona idia diba ‘Keriso danu do idia hisihisi nega tamona, be ia danu guba ena hairai do idia abia nega tamona.’ Mose ia diba lasi Mesia ese hisihisi do ia abia, bona Mose be guba helarona ia abia lasi.​—Roma 8:17; Kolose 1:24.

To Mose be “Keriso dainai hemarai bona hisihisi do ia abia be namo. To . . . kohu momo ia abia be dika” ena anina ita abia diba.

Paulo ese Heberu 11:​26, ai “Keriso” ia torea neganai ia ese Greek hereva Khri·stouʹ ia gaukaralaia bona Heberu gado ai unai hereva be Ma·shiʹach, eiava Mesia. “Mesia” bona “Keriso” edia anina be “horoa tauna.” Unai dainai Paulo ia gwau Mose be ‘horoa tauna dainai hemarai bona hisihisi do ia abia.’ Mose be “horoa tauna” idia gwauraia be maoro, a?

Oibe. Bible negadia lalonai tau ta be dagi ia abia totona dehoro be ena kwarana ai idia bubua. “Bena Samuel ese kavabu ta mai ena dehoro ia abia bona [Saulo] kwarana ai ia bubua.” “Samuel ese doa mai ena dehoro ia abia, [David] ena kakana bogaragidiai ia [ese David ia] horoa. Bena Iehova ena lauma be David dekenai ia gaukara matamaia, unai dina amo.” (1 Samuel 10:1; 16:13; bona Esodo 30:​25, 30; Levitiko 8:12; 2 Samuel 22:51; Salamo 133:2 itaia danu.) To danu, haida, hegeregere peroveta tauna Elisaia bona Suria ena pavapava Hasaele, ena be dehoro amo idia horodia lasi, to idia gwauraidia “horoa taudia.” (1 Hanua Pavapavadia 19:​15, 16; Salamo 105:​14, 15; Isaia 45:1) Unai dainai, tau ta be idia abia hidi eiava gaukara ta idia henia dainai, ia be “horoa tauna” ai ia lao diba.

Unai dala amo Mose be Dirava ese ia horoa tauna, bona Bible haida lalonai unai siri Heberu 11:26 ia gwau ia be “Dirava ena Horoa Tauna” eiava “Horoa Tauna” idia torea. Mose be Dirava ena gwaukau tauna bona ia hagania Israel taudia be Aigupito amo do ia hakaudia totona. (Esodo 3:​2-12, 15-17) Ena be Mose be Aigupito ena taga bada bona kohu momo gabuna ai ia tubu daekau, to Dirava ena hahegani herevana ia laloa bada, bona unai hahegani herevana ia abia dae bona ia hagugurua. Unai dainai, Paulo ia torea diba Mose be “Keriso dainai hemarai bona hisihisi do ia abia be namo. To Aigupito ena kohu momo ia abia be dika.”