Elda Taudia—Mai Manau danu Ma Haida Umui Hamaoromaorodia

LAUMA dalanai, Keristen momokanina ena kudou be huahua namona ia havaraia umana bamona. Lalokau, moale, maino, haheauka, hebogahisi, kara namo, abidadama, manau, bona boga-auka be unai gabu dekenai idia bada. Bona unai bamona be namo, ani? Unai be Iehova Dirava ese ia henia lauma helaga ena huahuadia iena gwauhamata hesiai taudia dekediai. (Galatia 5:​22, 23) To uma bamona, bema idia ura edia guba Tamana ese edia kudou Ia moalelaia noho, namona be Keristen taudia iboudiai do idia hekwarahi noho ava ginigini, edia tama sina amo idia abia kara dikana unai, idia koua dadaraia.​—Roma 5:​5, 12.

Nega haida, idia dika gaudia be Dirava ia badinaia tauna ena goevadae lasi kudouna lalonai ia tubu hamatamaia. Reana iena kara gunadia be namo herea. To hekwakwanai ta ia vara badina iena hebamo be namo lasi dainai eiava aonega lasi dalana ta ia abia hidi dainai. Kongregesen elda taudia be edena bamona lauma dalana ai unai tauna idia durua diba?

Aposetolo Tauna Ia Henia Sisibana

Ia kara kerere Keristen tauna idia durua neganai, namona be elda taudia be aposetolo Paulo ena sisiba idia badinaia, ia gwau: “Lauegu varavara taudia e, bema tau ta ia kerere neganai, umui Lauma kamonai henia taudia ese unai tau do umui hakaua lou, mai manau danu. To oi naria namonamo, hedibagani ese oi danu do ia koia garina.” (Galatia 6:1) Abidadama tadikakana ta ia “[diba lasi to] ia kerere neganai,” elda taudia edia maduna be haraga herea idia durua.

Paulo ia gwau “tau ta” ia kerere. To unai Greek herevana (anʹthro·pos) ena anina be tau ta dekenai eiava hahine ta dekenai. Bona unai tau idia “hakaua lou” ena anina be dahaka? Unai Greek herevana (ka·tar·tiʹzo) ena anina be “dala maorona dekenai oi atoa lou.” Unai hereva idia gaukaralaia idia darea reke idia turia neganai. (Mataio 4:21) Idia gaukaralaia danu taunimanima ta ena aena eiava imana ia kwaidu bona idia hamaoromaoroa lou neganai. Doketa ese unai ia karaia neganai ia karaia namonamo badina ia ura lasi gorere tauna ia hisihisi bada. Unai hegeregerena, lauma dalana ai tadikaka ta eiava taihu ta hamaoromaoroa totona, namona be idia hereva namonamo, idia hereva mai manada danu, bona idia hebogahisi.

Elda taudia be dala namona amo mai manau danu tau ta idia hamaoromaoroa toho neganai, sibodia edia goada lauma dalana dekenai idia hahedinaraia. Iesu be manau tauna dainai unai bamona karadia dekenai manau ia hahedinaraia. (Mataio 11:29) Iehova ena hesiai tauna ta ia raka kerere neganai, namona be elda taudia be manau idia hahedinaraia, badina ena be sibodia edia kudou dekenai unai idia itaia lasi, to idia danu be kara dika dekenai idia moru diba.

Unai taudia be lauma dalanai idia goada bona namona be lalokau dekenai edia tadikaka ‘edia metau idia huaia.’ Momokani, elda taudia be edia kudou dekenai idia ura tadikaka ta eiava taihu ta idia durua Satana ia tuari henia totona, hedibagani, tauanina ena manoka, bona kara dika ena hisihisi ese idia abia garina. Unai be dala ta Keristen naria taudia be “Keriso ena taravatu do [idia] badinaia.”​—Galatia 6:2.

Lauma dalanai idia goada momokani tataudia idia manau, idia diba “bema tau ta sibona inai bamona ia laloa, ‘Lau be namo,’ to momokani ia be namo lasi neganai, ia be sibona ia koia.” (Galatia 6:3) Herevana edena bamona elda taudia idia hekwarahi bada kara maorona bona heduru gauna idia karaia totona, to ia goevadae bona lalokau dekenai ia hebogahisi tauna Iesu Keriso, Dirava ena Natuna, ida idia do hegeregere lasi. To namo lasi idia laloa do idia hekwarahi bada be anina lasi.

Bema elda taudia be hekokoroku dalanai edia tadikaka ta idia samania bona idia kara henia idia sibodia be helaga to ia be helaga lasi bamona, idia diba unai be kerere! Iesu be unai bamona ia karaia lasi. Sibona ena mauri ia henia iena turadia sibona lasi totona to iena inai taudia totona danu! Tadikaka eiava taihu ta be hekwarahi ta dekena amo idia durua toho neganai, elda taudia be unai bamona lalokau idia hahedinaraia bona idia durudia edia guba Tamana kahirakahira dekenai idia lao totona bona iena taravatu maoromaorodia idia badinaia totona. Elda taudia be dahaka idia karaia diba edia tadikaka idia hakaudia lou totona?

Heduru Daladia Haida

Guriguri amo Iehova oi tabekau henia bona manau dalana dekenai oi hereva bona oi karaia noho. Iesu ia manau, iena guba Tamana dekenai ia guriguri momo iena hakaua dalana ia abia totona, bona nega ibounai Ia hamoalea gaudia ia karaia. (Mataio 21:5; Ioane 8:29) Ta ia kerere neganai bona elda taudia idia durua toho idia hakaua lou totona, namona be unai bamona idia karaia danu. Ia be mamoe naria gaukara dekenai heduru ia henia manau tauna dainai, elda tauna be iena hereva amo haida do ia hagoadadia bona ia durudia, do ia hagaridia lasi. Idia herevahereva neganai, ia karaia dalana ese heduru ia abia Keristen tauna ia hagoadaia gari lasi dekenai iena lalohadai ia gwauraia hedinarai totona. Unai ia vara totona, elda ta be hebou idia kehoa neganai kudou amo ia guriguri be heduru badana. Manau amo sisiba ia henia bona sisiba ia abia tauna be iena kudou ena lalohadai do ia gwauraia badina ia diba, Iesu bamona, sisiba ia henia tauna ia ura Dirava hamoalea gaudia ia karaia. Hebou hadokoa guriguri amo unai tauna ia diba namona be lalokau bona manau amo ia abia sisibana do ia badinaia.

Guriguri murinai, oi hanamoa momokani. Reana unai tauna ena kara namodia dainai oi hanamoa, reana unai be iena hebogahisi, hanaihanai ia abia gaukarana ia karaia loulou eiava ia gaukara goadagoada. Reana oi hereva diba ia be nega daudau lalonai Iehova ia hesiai henia mai abidadama ida, sedira lagani momo lalodiai. Unai dala amo, ita hahedinaraia unai tau ita laloa bada bona Keriso bamona unai tau ita ura henia. Iesu be Tuatira kongregesen dekenai inai hanamoa hereva amo ia hamatamaia, ia gwau: “Oiemu kara, oiemu lalokau, oiemu abidadama, oiemu hesiai gaukara, bona oiemu haheauka, ibounai lau diba. Lau diba danu oiemu kara be namo, guna bamona lasi.” (Apokalupo 2:19) Unai herevadia ese kongregesen taudia ia hagoadaia badina idia diba Iesu be edia gaukara namona ia laloa. Ena be unai kongregesen lalonai kerere idia vara​—“Iesebel” karana idia koua lasi​—to kara ma haida dekenai ia namo, bona Iesu ia ura unai tadikaka bona taihu idia diba edia gaukara goadagoada ia laloaboio lasi. (Apokalupo 2:20) Unai hegeregerena, bema mai dalana, namona be elda taudia be taunimanima edia kara namo dainai do idia hanamoa.

Namo lasi kerere ta ena dika oi habadaia. Namona be elda taudia ese Dirava ena mamoe serina bona iena orea ena goeva idia naria. To, elda ta eiava rua be lauma dalana ai kerere haida dekenai sisiba auka idia henia sibona, bona hahemaoro komiti do idia karaia lasi. Nega momo, Keristen taudia be kara dika idia ura lasi karaia, to idia manoka dainai idia raka kerere. Namona be mai hebogahisi danu elda taudia ese seri taudia idia kara henidia, bona inai idia laloatao be namo: “Hebogahisi ia henia lasi tauna ese Dirava dekena amo bogahisihisi do ia davaria lasi. To bogahisihisi ia henia tauna ese Kota Biaguna ena bogahisihisi do ia davaria.” (Iakobo 2:13; Kara 20:​28-30) Namo lasi unai kara kerere idia gwauraia momo, to namona be elda taudia be mai edia manau danu idia helalo-kerehai tadikakadia idia kara henidia, iseda heduru bona hebogahisi Diravana, Iehova, ia karaia hegeregerena.​—Efeso 4:32.

Namona be oi tahua kara kererena ia havaraia gauna be dahaka oi laloa. Edia tadikaka ta be iena kudouna lalonai ia noho gauna ia herevalaia neganai namona be elda taudia idia kamonai namonamo. Dirava ese ‘iena lalona ia manau bona ena dika amo ia helalo-kerehai tauna’ do ia dadaraia lasi, unai dainai namona be elda taudia danu ese idia dadaraia lasi. (Salamo 51:17) Reana hekwakwanai gauna be unai tau eiava hahine ena adavana ese ia durua lasi iena lalona hagoadaia totona. Reana nega daudau lalonai ia lalo-metau eiava ia lalohisihisi dainai unai tau eiava hahine ena lalona ena goada ia manoka ia lao, eiava unai badina dainai ia goada lasi aonega dalana ia abia hidi totona. Lalokau elda taudia be unai gaudia do idia laloa badina, ena be Paulo ese iena tadikaka ia sisiba henidia, ia gwau: “Gaukara dekenai idia lahedo taudia umui sisiba henidia,” to danu ia hagoadadia, ia gwau: “Gari taudia umui hagoadaia, bona manoka taudia umui durua. Bona taunimanima ibounai dekenai do umui lalo namo henidia.” (1 Tesalonika 5:14) Ena be elda taudia be Dirava ena taravatu maoromaorodia idia gwauraia maragi be namo lasi, to Dirava ese ia karaia bamona, namona be do idia laloa dahaka gaudia idia vara dainai unai tau o hahine ia kerere bona ena kerere idia gwauatao diba.​—Salamo 103:​10-14; 130:3.

Namo lasi oiemu kara dainai emu Keristen tadikaka ia laloa ia hegeregere lasi. Ita ura lasi tadikaka ta eiava taihu ta ita hahemaraia, eiava ita kara henia dalana amo ia laloa ia be gau ta ia diba lasi. To namona be ita hamaoroa ita diba ia be mai ena Keristen karadia bona mai ena lalokau Dirava dekenai, bona unai ese do ia hagoadaia iena kerere ia hanaia totona. Unai hegeregerena, Paulo be Korinto taudia ia hagoadaia ma haida idia durudia totona, ia gwau ma haida dekenai edia “ura bada” bona edia “goada” ia heagilaia.​—2 Korinto 9:​1-3.

Oi hahedinaraia Iehova ia tabekau henia neganai unai hekwakwanai ia hanaia diba. Oibe, unai tauna oi durua momokani bena do ia itaia bema Dirava ia tabekau henia bona Iena Hereva ena sisiba ia badinaia neganai, ena kara do ia hamaoromaoroa diba. Unai tauna hakaua lou totona, namona be iseda hereva iboudiai be Bible bona Bible ia gwauraia bukadia amo ita abia. Ita tahua gaudia be rua: (1) ita ura heduru ia abia tauna ita durua ia diba bona ia lalo-parara Iehova ena lalohadai be dahaka bona (2) ita ura unai tauna dekenai ita hahedinaraia edena dala ai Dirava ena hakaua herevadia ia laloaboio eiava ia badinaia lasi.

Bible amo sisiba oi henia neganai henanadai oi henia to ena kudou oi tahua mai hebogahisi danu. Unai ese kudou ia hamarerea diba. Iena peroveta tauna Malaki amo Iehova be henanadai ia henia bena Iena bese taudia be edena dala ai idia raka kerere idia lalo-pararalaia. Ia gwau: “Tanobada tauna be Dirava ena gau ta ia henaoa, a?” bona ma ia hereva, ia gwau: “To umui be lauegu kohu umui henaoa noho.” (Malaki 3:8) Mose ena Taravatu ia gwau edia tubutubu gaudia edia kahana ten amo kahana tamona be Iehova dekenai idia henia, to unai idia karaia lasi dainai unai be hegeregere Iehova ena amo idia henaoa. Unai kara idia hanamoa totona, namona be Israel taudia ese edia maduna tomadiho momokani dekenai idia huaia, bona namona be do idia abidadama Dirava be hahenamo momo do ia henidia. Lalohadai hamarerea bona hereva manau henanadaidia amo, elda taudia be do idia hahedinaraia bada, hari inai nega ai, kara maorona karaia totona namona be iseda guba Tamana ita tabekau henia bona ita badinaia. (Malaki 3:10) Ena kudouna dekenai unai ita hadibaia neganai, iseda tadikaka do ia durua ‘iena aena ena raka dalana do ia hamaoromaoroa totona.’​—Heberu 12:13.

Sisiba abia dae karana ena namo oi gwauraia bada. Sisiba namona henia ena anina be do idia hahedinaraia dahaka do ia vara dala kererena ai do ia raka lao noho neganai, bona do idia hadibaia kara kerere ia hamaoromaoroa neganai dahaka hahenamo do ia abia diba. Sisiba be nega maorona ai ia henia murinai, Iesu ese lauma dalana ai ia lahedo Laodikea kongregesen ia hadibaia lou bema edia kara gunadia amo idia helalo-kerehai bona gaukara goadagoada hahediba taudia ai idia lao, idia be hahenamo momo do idia moalelaia diba, bona guba dekenai ia ida do idia lohia danu.​—Apokalupo 3:​14-21.

Oi itaia lou itaia lou unai sisiba ia badinaia noho eiava lasi. Doketa namona ese ia hamaoromaoroa turiana ta ia dika lou garina ia itaia lou itaia lou hegeregerena, elda taudia danu ese Bible sisibana idia henia tauna idia itaia lou itaia lou badina idia ura diba unai sisiba ia badinaia o lasi. Reana sibodia idia henanadai henia diba: Ma heduru haida ia abia be namo, a? Reana ma dala ta ai, sisiba idia henia lou be namo, a? Iesu be nega momo iena hahediba taudia ia sisiba henidia idia manau totona. Nega daudauna lalonai, mai haheauka danu edia lalohadai ia hamaoromaoroa noho, unai be sisiba amo, haheitalai amo, bona gau ta hadibaia totona sivaraidia amo. (Mataio 20:​20-28; Mareko 9:​33-37; Luka 22:​24-27; Ioane 13:​5-17) Unai hegeregerena, elda taudia be tadikaka ta eiava taihu ta idia durua ena kara hamaoromaoroa lou totona, namona be dala idia karaia hegaeage gabeai ta ese Bible ena amo durua herevadia haida ia henia lou, unai neganai unai tau o hahine be lauma dalana dekenai do ia goada lou momokani.

Namona be iena dala ia hamaoromaoroa neganai oi hanamoa. Bema ia raka kerere tauna be momokani Bible ena sisiba ia badinaia toho, oi hanamoa momokani. Unai ese sisiba gunana do ia durua bona do ia hagoadaia ia karaia noho totona. Iena revareva ginigunana lalonai Korinto taudia dekenai, Paulo be gau idauidau ia sisibalaia. Tito ese aposetolo tauna ia hadibaia iena revareva dainai gau namodia momo idia karaia, unai nega sisina murinai Paulo ese ia tore henidia ia hanamodia totona. Ia gwau: “Harihari lau moale noho, emui lalona idia hisihisi dainai lasi, to umui emui lalohisihisi ese lalona giroa ia havaraia dainai. Badina be emui lalohisihisi be Dirava dekena amo, unai dainai ai dekena amo dika umui davaria lasi.”​—2 Korinto 7:9.

Moale Ena Badina Ta

Oibe, Paulo ia moale badina ia kamonai iena sisiba ese Korinto taudia ia durudia. Unai hegeregerena, hari inai nega ai bema idia kamonai edia lalokau heduruna dainai tadikaka ta be ena dala kererena ia hamaoromaoroa, elda taudia idia moale bada. Do idia moale bada diba badina ia helalo-kerehai Keristen tauna idia durua iena kudou amo ava ginigini bamona kara dikana ia kokia, bena Dirava ese ia havaraia kara namodia be unuseniai ia tubu bada diba.

Bema elda taudia be raka kerere tauna idia durua diba ena kara ia hamaoromaoroa totona, lauma dalana ai dika do ia davaria dalana amo idia hakaua lou. (Iakobo 5:​19, 20 itaia danu.) Unai heduru ia abia dainai, namona be heduru ia abia tauna be Iehova Dirava ia tanikiu henia. Namona be elda taudia edia lalokau heduruna dainai, edia hebogahisi dainai, bona edia laloa namonamo karana dainai Dirava ia tanikiu henia be maoro. Bona lauma dalana ai ia goada lou momokani neganai, idia heduru taudia iboudiai idia moale diba manau karana dekenai idia hakaua lou dainai.