Taunimanima Edia Diba Idia Habadaia Namibia Ai

SENE dabua bona doana rua kwara gauna ia rioa Herero hahine, ia gwau “Hi nokuzuva.” Kwanyama kekeni be mai ena kiri danu ia gwau “Nghi udite ko.” Ndonga hanua tauna ena daradara hahedinaraia totona ena pagana ia abia isi ia gwau “Kandi uvite ko.” Goti orea naria Kwangali tauna ia gwau “Kapi na kuzuvha.” Gado hida ai inai hereva “Lau diba lasi” oi kamonai vadaeni?

Unai taunimanima iboudiai be edia gado dekenai idia gwau, “Lau diba lasi.” Namibia tano ena bada be sikoea kilamita 824,000 bamona, bona unuseniai idia noho gado idauidau taudia 1,370,000 idia davaridia totona, Iehova ena Witness taudia be idia hekwarahi bada!

Idia hekwarahi bada be mai ena badina! Namibia dekenai Herero bona Nama taudia sibona lasi edia gado idia noho, to Ovambo, Kavango, Tswana, Caprivian, Himba, Bushman, bona Damara taudia danu edia gado idia noho. To Witness taudia dekenai English bona Afrikaans gado Bible bukadia sibona idia noho. Ia hedinarai goevagoeva, taunimanima momo ese hereva momokani do idia diba totona, gau badana be sibodia edia gado dekenai buka do idia hahanaia. Guna laganidiai unai gaukara sisina be Windhoek dekenai idia hamatamaia, unai neganai unai gabu be South-West Africa ena siti badana.

Dick Waldron be unai nega ia laloatao, ia gwau: “Windhoek dekenai, ai haroro dainai dubu taudia bona polisi taudia ese ai idia dagedage henia bada.” Ia bona iena hahine, Coralie, be lagani 1953 ai, Gilead ena Watchtower Bible School kosi idia haorea murinai, unai tano dekenai idia ginidae. Ia gwau: “Kopi korema taudia idia noho gabudiai ai mai be idia taravatua, bona nega haida kopi korema taudia ai hereva henidia neganai taunimanima haida ese ai idia gwau henia. Gabeai, noho gabuna ta ai davaria bona taunimanima ese ai idia badu henia lasi​—ai be Gammans Sinavai ia kaukau tanona dekenai ai noho! Unai be taoni murimurinai. Acacia tubutubu gaudia henunai ai idia itaia lasi gabunai, Bible stadi ai karaia.”

Unuseniai danu, Watch Tower orea ena buka be unai gabu ena gado haida dekenai idia hahanaia hamatamaia. Kwanyama gado ai pepapepa haida idia hahanaia bona Nama gado ai “Basileia Ena Sivarai Namona” buklet idia hahanaia. Tadikaka Waldron be sivarai ta ia laloatao, unai buklet idia hahanaia neganai kamonai tauna ta ese ia durudia bona kiri havaraia gauna ia vara. Nama gado dekenai, “Adam be tau goevadaena” idia ura hahanaia neganai, edia gado ai hereva be lasi. Unai dainai unai kamonai tauna ia gwau: “Oi torea Adam be peach magena ta bamona. Nama taudia idia diba unai ena anina be ia goevadae.” Vadaeni, Namibia tano dekenai, Bible ena diba be taunimanima dekenai idia hadibaia hamatamaia.​—Daniel 11:33 itaia danu.

Anina Bada Karana Ta Ia Vara

Lagani 1970 ia matamaia neganai, Mauri Ia Lao Henia Hereva Momokanina bukana be Ndonga bona Kwanyama gadodia dekenai idia hahanaia neganai, gau badana ta idia davaria. Kilomita 700 Windhoek ena mirigini kahanai, Ovamboland dekenai idia noho Namibia taudia edia gado badadia be rua. Pioneer rumana idia abia Ondangwa hanua dekenai, unai be Ovamboland lalonai. Unai tano dekenai kamonai taudia idia durudia bona pura ta ta iboudiai Gima Kohorona amo Bible ena hereva idia lalo-pararalaia totona, Ovamboland dekenai haroro gaukara idia karaia special pioneer taudia dekenai gaukara idia henia Nao gado stadi karoadia be Ndonga bona Kwanyama gadodia ai idia hahanaia totona.

Gado hahanaia “opesi” be motuka atoa rumana ena kahana ta idia koua, unuseniai Gima Kohorona magasin idia hahanaia bona masini gunana ta dekenai kopi haida idia karaia. Gado hahanaia idia laloa namonamo be ia auka momokani, badina edia gaukara gabuna be ia namo lasi bona siahu be ia bada herea, siahu negana lalonai, siahu ena bada be celsius 38-44 bamona. To, unuseniai buklet matamatadia bona Mauri Hanaihanai Paradaiso Lalonai bukana idia hahanaidia.

Ovamboland bona Namibia ena gabu ma haida dekenai kongregesen idia haginidia neganai, kamonai taudia be momo herea dainai hebou gabudia badadia bona namodia idia abia be gau badana. Ma danu, idia ura taunimanima idia noho gabu kahirakahira dekenai hebou rumana idia abia, badina unai neganai unai tano ena gabu ma haida dekenai idia lao haroro diba. Unai nega lalonai, Basileia haroro gaukarana idia dagedage henia karana ia maragi ia lao. Windhoek ena Iehova ena Witness tauna ta be davana lasi dekenai tano badana ta ai ia henia, bona gavamani ese gwaumaoro ai ia henia ruma ta ai haginia hamatamaia totona. Daudau lasi murinai, ruma haginia gabuna dekenai volantia gaukara taudia idia noho, bona December 1990 ai, gado hahanaia opesi idia haoredia.

Harihari, unai ruma ena opesi namodia bona daiutudia namodia ai, taunimanima momo dekenai diba henia gaukarana be ia bada ia lao. Herero bona Kwangali gadodia dekenai buka, buklet bona magasin matamatadia idia hahanaia noho. Hua ta ta iboudiai Gima Kohorona magasin lalonai Ndonga bona Kwanyama gadodia nega tamona idia hahanaia bona kala dekenai idia karaia danu. Stadi karoadia iboudiai idia torea bona ma hereva haida danu. Gunaguna unai gaukara be ia kaukau sinavai dekenai idia hamatamaia, to hari ruma namona dekenai idia karaia.

Harihari, momo ese unai hereva “Lau diba lasi” idia gwauraia lasi. Oibe, Namibia dekenai Iehova ena Witness taudia 600 bona ma haida idia moale bada herea edia guba Tamana dekenai, bona harihari idia gwau diba: “Oiemu hereva gwauraia hedinarai karana ese diari ia havaraia, unai amo aonega lasi taudia idia lalo-parara.”​—Salamo 119:130.

[Pictures on page 25]

Herero taudia dekenai sivarai namona idia harorolaia

Keristen buka, buklet bona magasin idia hahanaidia Namibia taudia idia durudia totona

Gado hahanaia rumana Namibia dekenai