Do Ia Vara Diba Lasi Gauna!

“KAMELO be nila ena matuna dekenai do ia vareai haraga, to kohu momo tauna be Dirava ena Basileia do ia vareai be mai hekwarahi danu.” (Mataio 19:24) Iesu Keriso ese unai haheitalai ia gaukaralaia ena diba tahua taudia hadibadia totona. Iesu ese taga tauna ta ia boiria iena murinai do ia raka bena lauma dalanai hahenamo momo do ia davaria. To unai tau ese ena kohu momo ia laloa bada dainai ia ese Mesia ena boiboi herevana ia dadaraia.

Iesu ia gwau lasi taga tauna be Basileia lalonai mauri hanaihanai do ia abia lasi, badina ia murinai idia raka taudia haida be taga taudia danu. (Mataio 27:57; Luka 19:​2, 9) To ena hereva ena anina be bema ta be taga tauna bona ia ese lauma gaudia ia laloa bada lasi, to ena taga ia laloa bada, vadaeni do ia hekwakwanai. Bema ta ese sibona ena goada lauma dalanai ia tahua namonamo bona atai amo ia mai heduru ia tahua neganai, ia ese Dirava ena amo ia mai mauri hanaihanai do ia davaria diba.—Mataio 5:3; 19:​16-26.

Kamelo korikori ta be nila ena matu amo ia hanaia diba lasi. To Iesu ese unai haheitalai ia gaukaralaia badina taga taudia ese Dirava idia hanamoa bona kohu momo ura henia karadia nega tamona do idia karaia be auka.​—1 Timoteo 6:​17-19.

Haida idia gwau unai nila ena matuna be magu badana ai iduara maragina ta bona ena be kamelo ia huaia maduna ibounai idia kokia to do ia hekwarahi unai iduara dekenai vareai totona. To Helena gado herevana rha·phisʹ, be Mataio 19:24 bona Mareko 10:​25 dekenai idia hahanaia “nila” bona unai nila be “turituri” ena nila. Luka 18:25 lalonai idia hahanaia herevana be be·loʹne bona unai siri ese turituri nila ia herevalaia danu. New World Translation Bible ia gwau: “Kamelo be nila ena matuna dekenai do ia vareai haraga, to taga tauna be mai ena hekwarahi bada danu Dirava ena Basileia ai do ia vareai.” Toretore taudia momo ese unai hereva hahanaia dalana idia abia dae. W. E . Vine ia gwau: “ ‘Nila ena matuna’ be magu ta ai iduara maragi ta be harihari idia halasia lalohadaina; guna toretoredia lalonai unai hahediba ia noho lasi.”​—An Expository Dictionary of New Testament Words.

Toretore ta lalonai ia gwau kamelo badana be nila matuna ai do ia hanaia toho be “Asia taudia edia haheitalai hereana.” Bona ia gwau unai bamona hahegeregere herevadia lalonai idia vara diba lasi gaudia idia karaia, hegeregere The Babylonian Talmud ia gwau: “Elephant be nila ena matuna amo idia veria hanai.” Iesu ese unai bamona parabole ia gaukaralaia badina ia ura do ia vara diba lasi karana ena haheitalai amo lalo-parara do ia vara. Io, kamelo eiava elephant be nila ena matuna amo do ia hanaia diba lasi. To atai amo ia mai heduruna ese taga tauna do ia durua kohu ura henia momo lalohadai do ia dadaraia bona mauri hanaihanai davaria dalana do ia tahua. Oibe, mai edia kudouna ibounai danu Atai Herea Mikamika Dirava, Iehova ena ura idia tahua taudia ese unai hahenamo idia davaria diba.