Edena Bamona Taudia Oi Lalodia Bada?

‘HAHINE TA AI TAHUA. Namona be kopina be taina ia diari, tauanina ia maragi, iunivesiti ai ia kwalimu vadaeni, bona ena famili be mai ladana bada bona mai edia tano. Aiemai iduhu hahinena ta be namo.’

INDIA ena niuspepa ai unai bamona hereva oi duahia diba. Tauhau ta ena tamana sinana be unai hereva be niuspepa ai idia atoa. Bema haneulato ta ia laloa ia hegeregere, revareva ta ida reana iena laulau ta do ia siaia. Unai laulau ai ena dabua ia kakakaka bona ena aiona, taiana, bona imana ai be herahera gaudia momo. Bema tauhau ena famili idia laloa ia hegeregere, haneulato ena famili ida do idia herevahereva, edia headava dalana lailaia totona.

Idia Laloa Bada Gaudia

India ai uhau momo ese edia kopina be taina ia diari ulatodia idia tahudia, badina be idia laloa kopi koremakorema taudia be Hindu oreana ena ladana lasi taudia. Vanegai, India ena TV ai, kekeni rua edia sivarai idia gwauraia. Ena kopina be taina ia diari kekenina ia dagedage bona ia hemataurai lasi; ena kopina ia koremakorema kekenina ia hebogahisi bona ia manau. Ena kopina be taina ia diari kekenina ena kopina be hoa dalanai ia koremakorema ia lao, ena dika davana unai, to kopi koremakorema kekenina ena kopina be taina ia diari ia lao. Unai sivarai amo idia hahedinaraia ena be kara namo ia kwalimu, to taunimanima ese idia tahua davana namona be taina ia diari kopina.

Idau bese taudia haidaudia karana be bada. Reana Asia tauna be Europe dekenai ia lao neganai ia maumau mai lalohisihisina ida, badina be unai tano taudia ese idia kara namo henia lasi, iena kopina ena kala bona ena matana edia toana be idau dainai. To, sibona ena tano ia lou lao neganai, reana sibona ena tano taudia be unai bamona do ia kara henidia, edia iduhu be idau dainai. Hari inai negai momo ese taunimanima edia kopina ena kala bona edia iduhu dainai idia lalodia bada o idia lalodia maragi.

King Solomon ia gwau: “Moni ese gau iboudiai ia havaradia.” (Kohelete 10:19) Taunimanima momo ese taga taudia idia lalodia bada. Edia moni idia davaria dalana, gaukara goadana amo eiava koikoi karadia amo, be idia laloa lasi. Taga taudia edia moni dainai taunimanima momo ese idia tura henidia toho.

Taunimanima momo ese ediukeisini bada idia laloa bada. Idia ese tama sina idia hagoadadia edia natudia idia vara negana amo moni momo be banika ai do idia atoa loulou, edia natudia edia ediukeisini totona. Edia natudia edia lagani be rua o toi neganai, pri-sikuli namona ta idia tahua, unuseniai do idia sikuli namonamo matamaia totona. Idia ura edia natudia be iunivesiti dekenai do idia lao, badina be idia laloa iunivesiti ena kwalimu pepana idia abia neganai taunimanima ese idia do idia lalodia bada bona do idia matauraidia.

Oibe, momo ese taunimanima edia kopina ena kala, edia ediukeisini, edia moni, bona edia iduhu dainai do idia lalodia bada o do idia lalodia maragi. Oi be edena bamona? Oi laloa bema ta be mai ena moni momo, o ena kopina be taina ia diari, o ediukeisini bada ia abia, unai dainai oi laloa bada be namo, a? Bema oibe, namona be emu lalohadai ena badina oi tahua namonamo.

Idia be Badina Maorodia A?

Buka ladana Hindu World ia gwau: “Anina lasi iduhudia tauna ta ese brāhmin iduhuna tauna ta bema ia alaia mase, do idia hahisia ela bona ia mase bona ena kohu do idia dadia, bona ena lauma do ia dika hanaihanai. To brāhmin iduhuna tauna ta ese ta bema ia alaia mase, do idia fainia mo sibona, do idia alaia mase lasi.” Hari buka ese idaunegai idia karaia karana ia gwauraia, to hari inai negai idau bese taudia inai henidia karana bona bese tamona ena orea idauidau idia inai heheni karana dainai, taunimanima momo herea idia mase, India ai bona idau tanodia ai danu. South Africa, United States, bona Baltic tanodia ai, haida idia laloa idia ese edia tano idia noholaia taudia haida idia hereadia, unai dainai idia inai henidia bona idia dagedage henidia. Taunimanima edia iduhu sibona o edia bese sibona dainai lalo-dika henidia karana ese namo bona maino ia havaraia lasi.

Taga be edena bamona? Momokani, taunimanima momo be mai edia momokani ida idia gaukara goada dainai idia taga. To, raskol, blak-maket karaia taudia, mariuana hoihoilaia taudia, bona ipidi hoihoilaidia hehuni taudia, bona ma taunimanima haida ese moni momo idia davaria. Momokani, idia haida ese orea idauidau moni idia henidia ogogami taudia durudia totona, to edia kara dikadia amo taunimanima momo idia hahisidia. Lalo-ani monina abia dae taudia bona bisinesi karadia gagevadia karaia taudia ese lalo-metau, o bero, o mase idia havaraia, idia hoihoilaidia kohudia idia gaukara kerere neganai eiava edia gwauhamata idia hamomokania lasi neganai. Momokani, taunimanima edia taga dainai ita lalodia bada be badina korikorina lasi.

Ediukeiseni be edena bamona? Bema ta ese ediukeisini ena setifiket momo bona dagi momo ia abidia, unai ese ia hamomokania ia be kara maoromaoro tauna a? Unai dainai taunimanima ese idia laloa bada be namo a? Momokani, ediukeisini ese taunimanima edia diba ia habadaia, bona taunimanima momo ese edia ediukeisini idia gaukaralaia haida durudia totona, unai dainai ita hanamodia bona ita matauraidia be namo. To gunaguna idia noho taudia edia sivarai ese ia hahedinaraia nega momo ediukeisini bada idia abia taudia ese taunimanima idia moidia bona idia dagedage henidia. Hari inai negai iunivesiti ai inai kerere idia vara: mariuana idia ania, bona pokese gorerena idia abia. Momo idia sikuli badina be moni, siahu, bona ladana bada idia tahua dainai. Ta ena ediukeisini sibona ese ia hamomokania lasi ia be taunimanima namona.

Ta ena kopina ena kala, ena ediukeisini, ena moni, eiava ena iduhu be badina korikoridia lasi ita gwauraia taunimanima namona ta. Namo lasi Keristen taudia ese unai gau amo taunimanima edia lalo-namo idia tahua. Vadaeni, dahaka be badina korikoridia, idia dainai taunimanima ita gwauraidia namo be maoro?