Dirava ese Daidia Ia Lalo-Namo Henidia?
ITA ibounai ita ura iseda bamodia ese ita idia ura henia. Keristen tauna ese ia ura henia bada gauna be Dirava ese ia do ia lalo-namo henia. Salamo 84:11 ese Iehova Dirava ia gwauraia, ia gwau: “Ia na hariharibada bona hairai ia henidia. Iehova ese gau namona ta ia koua lasi, idia raka maoromaoro taudia ediai.” Iesu ia vara neganai, aneru idia gwau: “Dirava ia moale henidia taudia ese . . . maino do idia abia.”—Luka 2:14.
To Dirava ese daidia ia moale henidia o ia lalo-namo henidia? Dirava ena lalohadai be idau, taunimanima edia hegeregerena lasi. Baibel ia gwau: “Dirava ena kara bamona do umui karaia be namo.” (Efeso 5:1) Unai dainai, namona be ita ta ta ita henanadai, Dirava ese ia lalo-namo henidia taudia be lau ese lau lalo-namo henidia a, eiava tanobada taudia edia lalohadai taunimanima dekenai lau abia dae a? Iehova ena lalo-namo do ita abia totona, namona be iena lalohadai ita abia dae.
Dirava ena Lalohadai Hereadaedia
Aposetolo Petro ia gwau: “Dirava ese taunimanima edia toana ia laloa lasi. To bese ibounai lalonai, Dirava dekenai ia gari bona kara maoromaoro ia karaia tauna, Dirava ese do ia abia dae.” Ma ia gwau: “Rara tamona dekenai [Dirava] ese taunimanima bese ibounai ia karaia.” (Kara 10:34, 35; 17:26) Unai dainai, ita diba taunimanima iboudiai edia toana be hegeregere Dirava vairanai. Namo lasi Keristen tauna ese ta ia laloa bada iena bese dainai o ena kopina ena kala dainai. To namona be Iesu Keriso ena kara ia tohotohoa; ena inai taudia idia gwau ia ese taunimanima edia oromana ia laloa lasi.—Mataio 22:16.
Kopi ena kala be herevana. Ta ena kopina ena kala ese ena lalohadai ia hahedinaraia lasi. Daidia do ita bamodia, o daidia ida do ita aniani hebou, o daidia edia imana do ita ude-udea be ita lalohadailaia neganai, namo lasi edia kopina ena kala ita laloa. King Solomon ese ia ura henia kekenina ia gwau: “Egu kopina na koremakorema, to egu toana be namo.” (Solomon ena Ane 1:5, 6) Taunimanima ta ena bese eiava ena kopina ena kala dainai ita laloa bada be maoro lasi, to Dirava garina ia gari bona ia kara maoromaoro dainai ita laloa bada be maoro.
Dirava ia laloa kohu momo be mai anina bada a? Dirava ese ia lalokau henia bada bona ia lalo-namo henia tauna hereadaena be ena Natuna, Iesu Keriso. To, tanobada ai ia noho neganai, Iesu be “mai ena mahuta gabuna lasi.” (Mataio 8:20) Ia be tano lasi, ruma lasi, uma lasi, huahua audia lasi, bona animal lasi. To, Iehova ese ia hanamoa bona lada ta ia henia, lada iboudiai ia hereadia ladana; Dirava ena ladana mo sibona ese iena ia hereaia.—Filipi 2:9.
Dirava ese Iesu Keriso ia lalo-namo henia, badina be ia ese kara namodia ia karaia, iena taga be unai. (Timoteo Ginigunana 6:17, 18 itaia.) Iesu ese ena hahediba taudia ia hamaorodia, ia gwau: “Inai tanobada dekenai kohu do umui haboua lasi, iniseniai manumanu ese dabua idia ania ore, bona raraka ese auri ia hadikaia, iniseniai danu henaoa taudia ese ruma idia makohia bona gau idia henaoa. To umui ese emui kohu be guba dekenai do umui haboua, unuseniai manumanu bona raraka ese gau idia hadikaia lasi, unuseni danu henaoa taudia ese ruma idia makohia diba lasi, bona gau idia henaoa diba lasi.” (Mataio 6:19, 20) Unai dainai, taunimanima be mai edia kohu momo eiava lasi dainai be Keristen taudia ese idia haidaudia lasi. Taunimanima mai edia taga Dirava enai be idia tahudia, herevana idia be mai edia kohu momo eiava lasi. Mani oi laloa, “inai tanobada ena ogogami taudia be Dirava ese ia abia hidi vadaeni, iena Basileia do idia abia totona.” (Iakobo 2:5) Bema Dirava ena lalohadai oi abia dae, taga taudia edia lalo-namo do oi tahua lasi.
Ediukeisini be edena bamona? Baibel ese ia hahedinaraia goevagoeva, Dirava ia ura ita ese diba bona aonega ita tahua bona Iesu Keriso be hahediba tauna hereadaena tanobada ai. (Hereva Lada-isidia 4:7; Mataio 7:29; Ioane 7:46) To, Dirava ese tanobada ena aonega o ediukeisini ia laloa bada lasi. Aposetolo Paulo ia gwau: “Umui momo lasi be mai aonega, inai tanobada ena aonega bamona. . . . To tanobada ena kavakava gaudia be Dirava ese ia abia hidi, aonega taudia do ia hahemaraia totona.”—1 Korinto 1:26, 27.
Dirava ese ia lalodia bada taudia be hereva momokanina ena “gado goevadaena” idia diba namonamo taudia; unai hereva be Dirava ena, Baibel lalonai. (Sefania 3:9) Hari inai negai ediukeisini program ta amo Iehova ese iena orea taudia tanobada hegegemadai ia hadibadia. Peroveta tauna Isaia ia hereva bamona, bese iboudiai taudia idia gwau: “Iehova ena ororo ai do ita daekau, Iakob ena Dirava ena dubu ai; ia ese ena kara ita do ia hadibalaia, bona ita be ena dala ai do ita raka.” Unai dainai, Keristen taudia ese tanobada ena ediukeisini idia laloa bada lasi, to inai bamona taudia do idia tahudia: Edia hereva bona edia kara amo idia hamomokania ‘Iehova ese ia hadibadia.’ Unai amo ‘maino bada,’ Dirava ese ia henia mainona, do idia moalelaia.—Isaia 2:3; 54:13.
Dirava ena Lalo-Namo Ita Abia Diba
Oibe, Dirava ena lalohadai be taunimanima edia hegeregerena lasi, unai dainai badina idaudia dainai ia ese taunimanima ia lalo-namo henidia. Iena lalo-namo do ita abia totona, namona be ita ese taunimanima ita lalodia, ia ese ia lalodia bamona. Unai be edena bamona ita karaia diba?
Iehova Dirava ese taunimanima edia lalodia ia tahudia bona inai kara idia hahedinaraia taudia ia lalo-namo henidia: lalokau, kara maoromaoro, hebogahisi, bona haheauka. Namona be Iena kara ita tohotohoa. (1 Samuel 16:7; Galatia 5:22, 23) Taunimanima edia kopidia edia kala lasi eiava edia bese lasi, to edia lalodia ita lalodia be namo. Taga taudia mai edia kohu momo ita tahudia be namo lasi, to Dirava ena lalohadai taga dekenai ita abia be namo, bena ‘kara namodia do ita karaia, eda kohu do ita haria karaia haida durua totona, bona harihari gaudia do ita henia, mai eda moale danu.’ (1 Timoteo 6:18) Dirava ena lalo-namo do ita abia totona, namona be Dirava bona iena Natuna, Iesu Keriso, dibadia goevagoeva dalana ita tahua noho, bona hereva momokanina ena gado goevadaena ita dibaia namonamo. (Ioane 17:3, 17) Unai dala amo ita be Dirava ese ia lalo-namo henidia taudia ai do ita lao.