Iehova ena Hesiai Gaukarana amo Lau Davaria Moalena
GEORGE BRUMLEY ESE IA SIVARAILAIA
Pavapava Haile Selassie ena pulisi taudia matamatadia be reidio hanamodia gaukarana lau hadibalaidia. Dina ta, sikuli ia doko neganai, idia ta be hehuni ai lau ia hamaoroa ia diba lau be Iehova ena Witness misinari tauna ta. Bena ia gwau: “Mani, lau ura oi ese Baibel lau do oi hadibalaia.”
UNAI negai, gavamani ese aiemai gaukara ia taravatua Ethiopia ai, unai dainai bema egu gaukara idia diba, unai tano amo lau do idia lulua, Witness taudia ma haida idia kara henidia hegeregerena. Hari pulisi tauna ena hereva lau laloa—ia ura momokani do lau stadi henia eiava gavamani ese ia siaia lau do ia tarapua totona. Lau be mai egu adavana bona natuna maragidia toi, unai dainai gaukara gabuna ai lau do idia hadokoa bona lau ura henia tanona bona taudia edia amo lau do idia lulua garina lau gari.
Reana do oi henanadai, ‘Dahaka dainai America tauna mai ena famili ia ura ena hanua bona ena varavara edia amo ia noho daudau Africa ai?’ Mani, do lau gwauraia.
United States ai Lau Tubu Daekau
Lagani 1920 murinai komiuniti sikuli ai lau do sikuli neganai, egu tamana ese Gima Kohorona magasin bona buka haida ladana Studies in the Scriptures ia abidia. Tamagu ese unai buka ia duahidia mai ena moale ida. Ia be fani tauna bona ena kara be Sunday ai aiemai ruma dekenai idia mai taudia ia tirikidia. Ia be mai ena “Buka Helaga,” ena toana be namo herea gauna. Vadivadi taudia dekenai do ia gwau: “Hari be Sunday. Mani oi ese Baibel siridia haida oi duahia ai totona.”
Vadivadi tauna ese buka ia kehoa neganai ia hoa, ena rau be revareva lasi! Bena tamagu ia gwau, ‘Haroro taudia be Baibel ena hereva idia diba lasi,’ bena ia ese Baibel ta ia abia, Genese 2:7 ia duahia. Unai siri be Dirava ese tau ginigunana ia karaia dalana ia gwauraia, ia gwau: “Taunimanima be mauri soulina ai ia halaoa.”—Genese 2:7, King James Version.
Bena tamagu do ia gwau, taunimanima be mai ena souli lasi to ia be souli, kara dika ena davana be mase, bona ta ia mase neganai ia mase momokani, gau ta ia diba lasi. (Kohelete 9:5, 10; Esekiel 18:4; Roma 6:23) Lau do duahiduahi namonamo diba lasi neganai Genese 2:7 ena hereva lau diba. Tamagu ena kara lau do laloa, Baibel ena hereva momokani ia diba bona ma haida dekediai ia gwauraia dainai moale bada ia davaria.
Unai neganai Gima Kohorona be hanaihanai ai abidia, unai dainai emai famili be idia amo ai abia lauma anianina ai moalelaia. Lauegu tubuna hahine be ai ida ia noho, bona ia ese sivarai namona ia harorolaia matamaia guna. Kongregesen be lasi aiemai hanua, Carbondale, Illinois dekenai, to sinagu ese lau mai egu tadikaka hani ia hakaua lao hanua unukahanai, hahine burukadia haida ese Gima Kohorona stadi idia karaia gabuna dekenai. Ai ese haroro gaukarana ai karaia matamaia danu.
Lau Idia Hadiburaia
Lagani 1937 ai, egu lagani be 17 neganai lau headava. Egu moni gaukarana be reidio hanamoa bona unai gaukara hadibalaia gaukarana. Emai natuna rua, Peggy bona Hank, idia vara murinai emai headava ai hadokoa. Kerere be lauegu, badina be egu mauri dalana be Keristen dalana lasi. Peggy bona Hank lau naridia lasi dainai, lau do lalohisihisi noho.
Tanobada Ibounai Tuarina Iharuana ia vara neganai gau momo lau lalodia. Ami oreadia ese dagi bona reidio hadibalaia gaukarana lau idia henia toho, to Iehova ena lalohadai tuari dekenai lau laloa momo dainai dina dina iboudiai lau guriguri. Lauegu Gima Kohorona sabskripsen ia doko vadaeni, unai dainai Lucille Haworth be egu ruma dekenai ia mai lau ese sabskripsen do lau abia lou totona. Lucille ena tamana, Perry Haworth, bona ena famili badana kahirakahira iboudiai be Witness taudia, lagani 1930 bamona amo ema. Lucille bona lau ai ura heheni bena December 1943 ai ai headava.
Lagani 1944 ai lau bapatiso, bena egu adavana lau bamoa pioneer gaukarana ai. Nega sisina murinai, gavamani taudia ese lau idia boiria, ami ai do lau vareai totona, to lau ura lasi. Unai dainai, El Reno, Oklahoma ena dibura rumana ai lau idia koua, lagani toi. Lau moale badina be Iehova dainai hisihisi lau ania. Daba daba iboudiai lau noga bona dibura ai lau noho ena badina lau laloa neganai, egu lalona ia hegeregere bona Iehova lau tanikiu henia. February 1946 ai, tuari ia doko murinai, dibura amo lau idia ruhaia.
Pioneer Gaukarana
Lucille lau bamoa lou neganai, ia be taoni maragina, Wagoner, Oklahoma ai pioneer gaukarana ia karaia. Ai be motuka lasi, unai dainai unai taoni ai ai raka loaloa haroro totona. Gabeai ai lao Wewoka, Oklahoma. Unuseniai moni gaukarana lau davaria, reidio steiseni ai. Ena be dina dina iboudiai hora 6 ai moni gaukarana lau karaia bona pioneer gaukarana danu be haraga lasi, to Iehova ena hesiai ai lao henia dainai ai moale. Lagani 1947 ai, motuka gunana ta ai hoia bena hebouhebou badana Los Angeles dekenai ai lao. Unuseniai ai laloa fomu ta do ai torea, misinari gaukarana sikulina, Watchtower Bible School of Gilead dekenai do ai lao totona.
Ai diba unai ena anina be United States do ai rakatania, unai dainai ai ura lasi emai lalona do ai hadaia haraga. Egu natuna dainai lau do lalohisihisi noho, unai dainai gwaumaoro lau tahua lou do ai naridia totona. Egu noho dalana gunana dainai bona guna dibura rumana ai lau noho dainai, gwaumaoro lau abia lasi. Unai dainai emai lalona ai hadaia misinari gaukarana do ai karaia. Gilead ena kalasi namba 12 dekenai ai lao.
Lagani 1949 ai Gilead School ai rakatania neganai, emai gaukara ginigunana be Tennessee ena kongregesen ai vadivadi henidia. Lagani toi lalodiai sekit naria gaukarana ai karaia United States ai, bena Watch Tower Society amo revareva ta ai davaria, idia ura diba emai lalona be hegeregere Ethiopia ai sikuli do ai hadibaia bona haroro gaukarana danu do ai karaia eiava. Unai gavamani ena taravatu ta be misinari taudia ese sikuli idia hadibaia danu. Emai lalona idia hegeregere, unai dainai lagani 1952 ai ai lao Ethiopia.
Ethiopia ai, daba iboudiai komiuniti sikuli ai hadibaia bona adorahi iboudiai Baibel stadi kalasi, davana lasi gaudia, ai karaia. Nega daudau lasi murinai taunimanima momo be Baibel stadi totona idia mai, unai dainai dina iboudiai hora toi o hani lalodiai Baibel ai hadibalaidia. Ai hadibadia taudia haida be pulisi taudia, tisa taudia, bona diakono taudia. Nega haida taunimanima 20 bamona be Baibel stadi kalasi ai idia helai hebou! Idia momo ese tomadiho koikoi idia rakatania bena Iehova ena hesiai idia lao henia. Ai moale dikadika. Unai negai danu, daba daba iboudiai lau noga neganai, Iehova lau tanikiu henia.
Haroro Gaukarana Idia Taravatua
Lagani 1954 ai egu adavana ia rogorogo, unai dainai United States do ai lou lao eiava Ethipoia ai do ai noho be ai lalohadailaia. Do ai noho totona namona be moni gaukarana do lau davaria. Pavapava Haile Selassie ena reidio steiseni ai gaukara lau davaria, unai dainai ai noho.
September 8, 1954 ai, emai natuna Judith ia vara. Lagani rua ai unai pavapava ena gaukara lau karaia, to murinai lau idia hadokoa. Hua ta bamona murinai Police Department ai tu-wei reidio hanamodia gaukarana be tatau matamatadia hadibalaidia gaukarana lau davaria, ena pei ese gaukara gunana ena ia hanaia. Lagani ma toi lalodiai emai natuna ma rua, Philip bona Leslie, idia vara.
Unai nega lalonai Ethiopian Orthodox Church ese gavamani ena lalona ia ania bena Iehova ena Witness taudia edia misinari taudia iboudiai be unai tano amo idia luludia. Society ena hereva dainai egu visa lau haidaua, moni gaukara tauna ena lau abia. Gavamani ese emai misinari gaukarana idia taravatua, unai dainai mai emai aonega ida ai kara. Ai be grup maragidia ai ai hebou, kongregesen heboudia totona.
Pulisi taudia ese Witness taudia haida edia ruma ai buka idia tahudia. To idia diba lasi pulisi tauna ta be Iehova tomadiho henia tauna bona ia diba edena negai unai bamona do idia karaia bena ia ese Witness taudia ia hadibadia. Unai dainai unai negai buka idia davaridia lasi. Sunday iboudiai ai lao pikiniki gabuna ta dekenai, unuseniai Gima Kohorona Stadi ai karaia.
Unai negai, pulisi taudia matamatadia be reidio gaukarana lau hadibadia neganai, hari sivarai ena matamana ai lau gwauraia tauna ese Baibel stadi ia noilaia. Lau laloa lau ia koia toho lasi, unai dainai lau stadi henia. Stadi rua murinai, ma tau ta ese ia bamoa, unai murinai idia be toi. Lau hamaorodia hegeregerena, ta idia hamaoroa lasi idia be lau ida idia stadi.
Lagani 1958 ai intenesenel hebouhebouna dekenai lau lao, New York ena Yankee Stadium bona Polo Grounds ai. Lau moale bada badina be egu natuna ruaosi, Peggy bona Hank, bona egu varavara momo be Witness taudia ai idia lao vadaeni bona unai hebouhebou ai ai hedavari lou, ma danu dina ginigabena ai taunimanima 250,000 mai kahana be unuseniai idia hebou!
Lagani 1959 ai Society ena presiden, Nathan H. Knorr, ese ai ia vadivadi henia Ethiopia ai. Unai negai emai tomadiho gaukaradia be do taravatu, to ia ese karaia daladia haida ai ia hadibaia bona emai famili ena goada lauma dalanai ia laloa danu. Lau hamaoroa ai ese emai natuna be guriguri dalana ai hadibalaidia. Lau nanadaia ia ura Judith ena guriguri ia kamonai eiava. Ia gwau oibe, bena Judith ia guriguri murinai, ia gwau: “Judith, unai be namo herea.” Gabeai, aniani neganai Tadikaka Knorr lau hamaoroa do ia guriguri, bena ia guriguri murinai Judith ia gwau: “Tadikaka Knorr, unai be namo herea!”
Emai Natudia Ai Naridia United States Ai
Lagani 1959 ai egu kontraka Police Department ida ia doko. Ai ura Ethiopia ai do ai noho, to gavamani ese gwaumaoro ia henia lasi, kontraka matamatana do lau abia totona. Dala lau tahua tadikaka ai idia dabu tanodia dekenai do ai lao, to dala be lasi. Mai emai lalohisihisi ida ai lou lao United States. Ai ginidae neganai, emai varavara iboudiai ida moale hebouna ai karaia; egu natuna ima idia hedavari heheni neganai, maoromaoro idia lalokau heheni. Unai nega amo ema idia hetura heheni.
Wichita, Kansas ai ai noho bona reidio steiseni ai gaukara lau davaria. Lucille be ruma ai ia noho bona emai natudia idia lao sikuli. Monday hanuaboi iboudiai Gima Kohorona stadi lau karaia egu famili ida, bona nega iboudiai dala lau tahua do lau karaia namonamo do idia moalelaia totona. Dina iboudiai emai natudia ai nanadaidia hekwakwanai ta be sikuli ai idia davaria eiava lasi.
Emai natudia be Haroro School ai idia vareai, bona unai amo idia davaria heduruna ese ia durudia idia sikuli neganai. Idia beibi negana amo haroro gaukarana ai ai hakaudia. Ruma ta ruma ta ai Baibel bukadia hariharilaidia dalana ai hadibadia, bona Baibel stadi ai karaia neganai ai idia bamoa.
Emai natudia be mauri ena dala ai hadibalaidia bona ai hamaorodia bema harihari gauna ta be ta ai henia, reana ai be dala lasi unai bamona gauna be oredia do ai henidia. Ai gwau: “Bema emui tadikaka o taihu ta ese gadara gauna ta do ia abia to umui be lasi, umui maumau be maoro a?” Gauna be, nega idaudia ai harihari gaudia be emai natudia oredia ai henidia. Idia iboudiai ai lalokau henidia bona kara tamona amo ai kara henidia.
Memero kekeni haida edia tamadia sinadia ese gwaumaoro idia henidia kara haida do idia karaia, to aiemai natudia be gwaumaoro ai henidia lasi. Nega momo idia gwau: “Ia karaia diba, dahaka dainai ai karaia diba lasi?” Emai taravatu ena badina ai gwauraia toho, to nega haida ai gwau: “Umui be unai famili tauna ta lasi . . . Iseda taravatu be idau.”
Peru ai Ai Haroro
Ethiopia ai rakatania negana amo, Lucille bona lau ai ura dikadika misinari gaukarana do ai karaia lou. Lagani 1972 ai, dala ia kehoa Peru, South America ai do ai lao. Unai be gabu namona aiemai natudia do ai naridia idia bada neganai. Idia ese misinari taudia, special pioneer taudia, bona idau tanodia amo idia mai Peru ai do idia haroro taudia idia bamodia, unai amo idia itaia Basileia gaudia idia tahudia guna taudia idia moale bada. Philip ia gwau unai hebamo ese ia durua bada.
Gabeai, emai turadia haida Kansas ai idia kamonai emai Basileia harorolaia gaukarana ese anina bada ia havaraia, unai dainai idia danu idia mai Peru bona ai ida idia noho. Emai ruma be misinari rumana bamona lau haheaua. Ruma gaukarana lau haria, unai amo ai ibounai be mai emai nega haroro gaukarana do ai karaia. Daba daba iboudiai, aniani neganai, Baibel ena siri ta ai herevalaia. Unai negai ai ibounai ai moale. Danu, daba daba iboudiai lau noga bona Peru ai lau noho ena badina lau laloa neganai, Iehova lau tanikiu henia.
Gabeai, Judith ia headava, bena mai adavana ida idia lou lao United States, badina be ena adavana ese visa ia abia diba lasi, Peru do ia noholaia totona. Philip be lagani toi lalodiai special pioneer gaukarana ia karaia, bena Betele gaukarana ia karaia Brooklyn, New York ai. Gabeai, Leslie danu ia lou lao United States. Mai edia moale bona mai edia lalohisihisi ida Peru idia rakatania, bona nega momo ai idia hamaoroa Peru dekenai ai laohaidia dainai hahenamo badana idia davaria.
Peru ai moni ena siahu ia maragi ia lao dainai, ai diba ai hegeregere lasi unuseniai do ai noho. Lagani 1978 ai, ai lou lao Wichita. Unuseniai Witness taudia edia grup maragina ta ai davaria, idia ese Spanish gadona idia gadolaia. Ai idia noia do ai noho do ai durudia totona. Kongregesen ta ia gini unai bona ai lalokau henidia, guna ai durudia taudia ai lalokau henidia hegeregerena.
Ai Lao Ecuador
Ena be gorere dikana ta dainai lau raka namonamo diba lasi, to lau ura henia gauna be tano idauna ta ai Lucille ida do ai haroro lou. Lagani 1984 ai sekit naria tauna ta ese ai ia hamaoroa, Ecuador ai kamonai taudia be momo bona Keristen elda taudia ai idia dabu. Lau hamaoroa ruma ta ruma ta gaukarana bada lau karaia diba lasi egu tauanina dikana dainai, to ia gwau ena be egu lagani be 65 bona egu tauanina ia dika sisina, to lau be elda tauna dainai do lau durudia diba.
Ai ia rakatania neganai, unai hanuaboi ai ai mahuta diba lasi; Ecuador do ai lao dalana ai herevalaia. Lau hegeregerena, Lucille danu ia ura dikadika do ia lao. Emai bisinesi maragina hoia herevana ai halasia, bena pura rua murinai ai hoia, bona dina 10 murinai emai ruma ai hoia. Bena, ai buruka neganai ai moalelaia gaukarana, misinari gaukarana idau tanona ai, ai lou henia.
Quito ai ai noho, bona haroro gaukarana ai moalelaia bada. To, lagani 1987 ai, doketa idia gwau kensa gorerena lau abia bona namona be opereisini lau abia haraga. Ai lou lao Wichita opereisini lau abia totona bona unai ese lau ia hamauria. Ai lou lao Quito, to lagani rua murinai kensa lau abia lou. Unai dainai, Quito ai rakatania vaitani, North Carolina, United States dekenai ai lao. Ai be unuseniai ai do noho.
Egu Mauri Lalonai Namo Lau Davaria
Lagani 1989 ai opereisini ma ta lau abia. To, lau be elda tauna ena gaukara lau do karaia diba bona haida be emai ruma dekenai idia mai, Baibel stadi lau henidia totona. Idia hanaia laganidia ai, hereva momokani uhedia hadodia, dairidia, eiava naridia gaukaradia amo taunimanima handred handred ai durudia. Unai amo ai abia moalena ia maragi ia lao lasi.
Lau moalelaia bada gauna ma ta be egu natuna iboudiai ese Iehova ena hesiai idia lao henia. Peggy be lagani 30 ai ena adavana, Paul Moske, ia bamoa sekit naria gaukarana ai. Philip bona Judith be Brooklyn Betele, New York ai idia gaukara vadaeni. Hank bona Leslie mai adavadia ese haroro gaukarana idia goadalaia, bona egu tadikaka bona taihu hani mai edia bese ese Iehova ena hesiai idia lao henia. Egu varavara 80 mai kahana be unai bamona idia karaia. Lucille bona lau be kahirakahira lagani 50 ai headava bona unai negai Keristen hahinena namona ena kara ia hahedinaraia. Egu gorere neganai egu tauanina dikana naria karana ia karaia, to ia maumau lasi.
Momokani, egu mauri lau moalelaia bada. Iehova hesiai henia karana amo moale bada lau davaria dainai, egu ura korikorina be inai tanobada ai do lau tomadiho henia ela bona hanaihanai. Nega ibounai Salamo 59:16 ena hereva lau laloa; ia gwau: “Lau be emu goada do lau anelaia, daba ai emu hebogahisi do lau gwauraia mai egu moale ida. Badina be oi be egu kohoro, bona egu roho mauri gabuna, egu hisihisi dinana ai.”
[Picture on page 23]
George Brumley bona Ethiopia pavapavana Haile Selassie
[Picture on page 25]
George Brumley mai adavana, Lucille