Mai Emu Kudouna Ibounai ida Oi Raka

“Iehova e, emu dala lau oi hadibaia . . . Lauegu kudouna oi hatamonaia, oiemu ladana gari henia totona.”​—SALAMO 86:11.

1. Iehova ese ia idia badinaia taudia edia davana edena bamona ia henidia?

‘IEHOVA e, oi mo sibona be Dirava.’ (Salamo 86:​8, 10) David ese Dirava ia hanamoa mai ena lalona ibounai ida. Israel ibounai ena pavapava ai ia do lao lasi neganai, Iehova ese Saulo ena amo bona Filistia taudia edia amo ia hamauria vadaeni. Unai dainai ane ia abia, ia gwau: “Iehova be egu nadi-gini, egu kohoro, egu hahemauri tauna. Oi ia badinaia tauna be oi ese oi badinaia.” (2 Samuel 22:​2, 26) Iehova ia badinaia dainai, ia ese hekwarahi momo lalodiai ia naria. David ese ena Dirava ia abidadama henia, to do ia hakaua noho be namo. Ia noia, ia gwau: “Iehova e, emu dala lau oi hadibaia.”​—Salamo 86:11.

2. Iehova ese dahaka ia karaia ita ia hadibaia totona?

² David ese tanobada ena lalohadai bona ena aonega ia dadaraia. Ia ura ‘Iehova ese do ia hadibaia.’ (Isaia 54:13) David ena negai Bible ena buka 9 mo idia noho; unai buka mo sibodia edia hereva ia laloa diba, to unai hahediba Iehova ena amo be ia ese ia laloa bada! Hari ita ese Bible ena buka 66 iboudiai ita stadilaidia diba, bona Basileia bukadia momo danu, “hesiai tauna mai ena kamonai bona mai ena kara maoromaoro” ena amo ita ia henia gaudia unai. (Mataio 24:45) Namona be David hegeregerena, Iehova do ita noia, iena lauma ese ita do ia durua, “Dirava ena laloa dobu gaudia,” “Dirava ese ia abia hegaegae, ia idia lalokau henia taudia edia,” do ita tahudia totona.​—1 Korinto 2:​9, 10.

3. Edena dalai Bible ena hereva ese ita ia durua diba?

³ Bible ese iseda henanadai iboudiai bona iseda hekwakwanai iboudiai ia sisibalaidia. “Buka Helaga dekenai idia torea hereva be ita dekenai hadibaia totona idia torea, vadaeni do ita gini goada bona Dirava dekenai do ita naria mai haheauka danu.” (Roma 15:4) Bema Iehova ena hahediba ita abia dae, unai ese ita do ia hagoadaia, hekwarahi bona lalo-metau do ita haheaukalaidia totona, bona Basileia helarona be iseda lalona ai do ia ara bada noho. Namona be Dirava ena Hereva do ita duahia mai eda moale ida, bona “dina bona hanuaboi” do ita laloa, badina be Bible ena amo ita abia aonegana be “mauri auna, idia dogoatao taudia ediai, bona idia dogoatao namonamo taudia na moale taudia idia gwauraidia.”​—Salamo 1:​1-3; Hereva Lada-isidia 3:​13-18; ma Ioane 17:3 danu itaia.

4. Iesu be edena bamona ia karaia, iena kara do ita tohotohoa totona?

⁴ Dirava ena Natuna, Iesu, iena ladana ta be “Davida ena Natuna,” be nega ibounai Iehova dekenai diba ia tahua. (Mataio 9:27)a Ia gwau: “Natuna be sibona kara ta do ia karaia diba lasi, to ia ese Tamana ena kara do ia itaia, vadaeni unai kara sibona do ia karaia.” “Kara ta danu lau sibona lau karaia lasi, to Tamana ese lau dekenai ia hadibaia hegeregerena lau hereva.” (Ioane 5:19; 8:28) Iesu ese ena kara ena toana ia hahedinaraia, ‘iena aena gabudia ai do ita raka’ totona. (1 Petero 2:21) Iesu ia stadi hegeregerena bema ita danu ita stadi, nega ibounai Iehova ena ura karadia do ita karaia diba. Nega ibounai Iehova ena dala be dala maorona.

5. “Hereva momokani” be dahaka?

⁵ David be ma ia gwau: “Emu hereva momokani ai do lau raka.” (Salamo 86:11) Bena lagani 1,000 idia ore murinai, David ena Natuna, Iesu, ese Pilato ia hamaoroa Iena Basileia be “inai tanobada gauna lasi.” Ma ia gwau: “Oi ese oi hereva lau be king. Hereva momokani gwauraia hedinarai totona lau vara bona lau mai inai tanobada dekenai.” Bena Pilato ese ia nanadaia, ia gwau: “Hereva momokani be dahaka?” (Ioane 18:​33-38) Iesu ese ia hahedinaraia hereva momokani ena anina badana be Mesia Basileiana herevana. Bible ena anina ibounai be, unai Basileia amo Iehova ese ena ladana do ia hahelagaia.​—Esekiel 38:23; Mataio 6:​9, 10; Apokalupo 11:15.

6. Hereva momokani ai ita raka neganai, dahaka dekenai ita naria namonamo be namo?

⁶ Hereva momokani ai ita raka anina be dahaka? Anina be Basileia helarona ita tahua guna. Namona be Basileia herevana momokanina do ita badinaia. Namona be Basileia gaudia do ita tahudia guna mai eda lalona ibounai ida, bona Iesu hegeregerena, dala do ita davaria negadiai Basileia herevana momokanina do ita harorolaia goadagoada. (Mataio 6:33; Ioane 18:37) Bema nega haida mo hereva momokani ai ita raka bona hesiai gaukarana sisina ita karaia, to sibona eda moale tahua totona moale karadia momo ita karaia, eiava bema moni gaukarana ai hora momo lalodiai ‘kohu momo edia hesiai gaukara ita karaia,’ unai be hegeregere lasi. (Mataio 6:24) Unai dala idaudia ta ai do ita boio reana, bena ‘mauri gabuna ia lao dalana aukana’ do ita davaria lou diba lasi. Unai dala amo do ita raka siri lasi be namo! (Mataio 7:​13, 14) Iseda Hadibaia Tauna Hereadaena, Iehova, ese ena Hereva bona ena orea amo dala ia hadiaria, ia gwau: “Emui idiba kahana ai eiava emui lauri kahana ai do umui raka siri neganai, emu taiana be hereva ta emu murina kahana amo do ia kamonai, do ia gwau: ‘Dalana be inai, ia lalonai umui raka.’ ”​—Isaia 30:21.

Gari Maorona

7. Iseda kudoudia be edena bamona ita hatamonadia diba?

⁷ David be ma ia guriguri, Sa 86 siri 11 lalonai ia gwau: “Lauegu kudouna oi hatamonaia, oiemu ladana gari henia totona.” Namona be David hegeregerena ita ura Iehova ena ura karaia karana ai do ita lalo-rua lasi. Inai be Mose ena sisiba hegeregerena: “Israel e, harihari Iehova, emui Dirava, ena ura be dahaka emui ai? Inai mo: Iehova, emui Dirava, garina do umui gari, bona ena dala iboudiai do umui raka. Iehova, emui Dirava, do umui ura henia, bona ena hesiai do umui lao henia mai emui lalona ibounai bona mai emui souli ibounai; bona Iehova ena hahegani bona ena taravatu iboudiai, lau ese umui hanamoa totona hari inai dina ai umui lau gwaurai henia gaudia, do umui badinadia.” (Deuteronomi 10:​12, 13) Momokani, bema Iehova ena hesiai be unai bamona ita lao henia, namo do ita davaria. Unai amo iena ladana mai hairaina ita gari henia maoromaoro. Iehova ena ladana ena anina ese ia hahedinaraia iena palani namodia edia anina do ia hagugurua, bona ia be guba bona tanobada edia biaguna. Dirava ena dagi badana ita matauraia dainai, taunimanima do ita gari henidia lasi. Do ita lalo-rua lasi. To do ita gari, Iehova, Atai Herea Diadina bona Pavapava Badana, habadua karana ta do ita karaia garina, badina be iseda mauri be iena imana ai.​—Isaia 12:2; 33:22.

8, 9. (a) Ita be “tanobada ena lasi,” anina be dahaka? (b) Iboudiai ese ita idia raraia dainai, edena bamona do ita karaia be namo?

⁸ Ita do idia hahemaraia bona do idia dagedage henia negadiai, Iesu hegeregerena do ita boga-auka; inai tanobada dikana amo do ita gini siri noho. (Ioane 15:​17-21) To taunimanima edia amo ita noho siri lasi. Iesu ese ena Tamana ia guriguri henia, ia gwau: “Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria. Idia be tanobada ena lasi, lau hegeregerena, lau be tanobada ena lasi. Hereva momokani dekenai idia do oi hahelagaia, oiemu hereva be hereva momokani. Tanobada dekenai lau oi siaia vadaeni hegeregerena, lau ese danu idia lau siaia vadaeni tanobada dekenai.” (Ioane 17:​15-18) Iesu hegeregerena, ita danu be ia siaia, Basileia ena hereva momokani do ita harorolaia totona. Iesu ia manau dainai taunimanima ese ia garina idia gari lasi. Ena hahediba dalana amo taunimanima na goada matamata ia henidia. (Mataio 7:​28, 29; 11:​28, 29; Ioane 7:46 itaia.) Ita danu be unai bamona do ita karaia be namo.

⁹ Eda gado namo, eda dabua bona eda tauanina edia toana namona, bona eda manau herevadia goevadia danu dainai, lalo-maoromaoro taudia ese eda haroro herevana do idia abia dae. Namona be eda dabua, lebulebu toana lasi gaudia, ita hahedokilaidia namonamo. Namona be tanobada taudia edia hebamo dikana bona edia lebulebu karadia ita dadaraidia. ‘Ibounai edia matana dekenai ita idia itaia, taunimanima bona aneru danu,’ unai dainai namona be Keristen taudia namodia bamona ita gaukara bona ita noho be namo. (1 Korinto 4:9; Efeso 5:​1-4; Filipi 4:​8, 9; Kolose 4:​5, 6) Unai totona iseda kudoudia ita hatamonadia be namo.

10. Edia kudoudia be hesiai gaukarana helagana ai idia hatamonadia taudia be Iehova ese edena bamona ia lalodiatao?

¹⁰ Ita, iseda kudoudia be Iehova ena ladana garina ai ita hatamonadia, ena palani namo hereadia ita lalodia bona hesiai gaukarana helagana ita goadalaia taudia, be Iehova ese ita do ia laloatao. “Iehova ena matana ese tanobada ibounai idia itaia loaloa, edia lalona ibounai ia dekenai idia henia taudia dainai iena goada do ia hahedinaraia totona.” (2 Sisiga 16:9) Malaki 3:16 ese iseda nega ia perovetalaia, ia gwau: “Unai neganai Iehova garina idia gari taudia be idia hereva heheni, ta ta ena bamona ena bamona ida idia hereva, bona Iehova ese ia hakala henidia bona edia hereva ia kamonai. Bena Iehova garina idia gari taudia bona ena ladana idia laloa taudia lalodiatao bukana idia torea matamaia ia vairanai.” Namona be iseda kudoudia be Iehova garina maorona ai ita hatamonadia!

Iehova ena Hebogahisi

11. Iehova ese ena hebogahisi na ia idia badinaia taudia edena bamona do ia hahedinarai henidia?

¹¹ David ia guriguri goadagoada! Ia gwau: “Iehova, egu Dirava e, oi lau hanamoa mai egu lalona ibounai ida, emu ladana do lau hanamoa ela bona hanaihanai, badina be emu hebogahisi be bada lau dekenai, bona egu souli be mase ena dobu gabuna amo oi hamauria vadaeni.” (Salamo 86:​12, 13) Inai salamo lalonai David ese Iehova na ena hebogahisi​—iena lalokau​—dainai ia hanamoa lou, nega iharuana unai. Ena lalokau be bada herea dainai, gau dika hereadia amo ia hamauria diba. Saulo ese tano gagaena ai ia gavaia neganai, reana David ena darana ia doko bona ia laloa ia be mase ena dobu gabuna ai ia diho vadaeni. To Iehova ese ia hamauria! Unai hegeregerena, hari inai negai danu Iehova ese ena hesiai taudia na hoa daladia ai ia hamauridia, bona ia ese danu kara maoromaoro badinaia taudia ia hagoadadia bena idia haheauka mai edia kamonai ida ela bona mase. Ia idia badinaia taudia iboudiai ese edia davana namona do idia abia; reana idia haida ese toreisi lou amo do idia abia.​—Iobu 1:​6-12; 2:​1-6, 9, 10; 27:5; 42:10; Hereva Lada-isidia 27:11; Mataio 24:​9, 13; Apokalupo 2:10 itaia.

12. Kerisendom ena haroro taudia be edena bamona idia hekokoroku bona idia dagedage, bona dahaka davana do idia abia?

¹² David ese ia idia dagedage henia taudia ia gurigurilaidia, ia gwau: “Dirava e, hekokoroku taudia ese lau idia tuari henia vadaeni; dagedage taudia ese lauegu mauri abia oho dalana idia tahua, bona oi idia atoa lasi idia vairadiai.” (Salamo 86:14) Hari inai negai, Kerisendom ena haroro taudia danu idia dagedage. Idia gwau Dirava idia tomadiho henia, to ena ladana helagana ena gabunai inai hereva “Lohiabada” idia torea bona idia gwau ia be Toi Tamona, Bible ese ia gwauraia lasi gauna unai. Idia hekokoroku bada! Tano momo ai idia ese danu gavamani ena siahu taudia edia lalodia idia anidia toho, Iehova ena Witness taudia do idia taravatudia bona dibura rumadia ai do idia koudia totona. Unai Dirava ena ladana hadikaia taudia ese edia davana do idia abia, bona Babulono Badana ena kahana iboudiai danu ese, ariara hahinena bamona idia karaia oreadia unai.​—Apokalupo 17:​1, 2, 15-18; 19:​1-3.

13. Iehova ese dahaka kara amo iena namo ia hahedinaraia?

¹³ David be ma ia guriguri, ia gwau: “To Iehova e, oi be hebogahisi bona hariharibada Diravana, oi badu haraga lasi bona emu hebogahisi bona emu kara momokani be bada herea.” (Salamo 86:15) Momokani, iseda Dirava ena kara unai bamodia be hereadae. Gunaguna, Sinai Ororona ai, Mose ese Iehova ia noia iena hairai do ia itaia. Iehova ese ia haere henia, ia gwau: “Lau ese lauegu namo ibounai do lau hahedinaraia oi dekenai, bona lauegu ladana Iehova oiemu vairanai do lau gwauraia.” To ma ia gwau: “Lauegu vairana oi itaia diba lasi, badina be bema tau ta ese lau ia itaia, do ia mauri noho diba lasi.” Bena Iehova be ori ai ia diho, ia gwau: “Iehova, Iehova, hebogahisi bona hariharibada Diravana; lau badu haraga lasi, egu hebogahisi bona egu kara momokani be bada herea.” (Esodo 33:​18-20; 34:​5, 6) David ese unai hereva ia gwauraidia iena guriguri ai. Ita ese Iehova ena kara unai bamodia ita lalodia bada. Ita dekenai idia vara vadaeni gaudia dainai, Iehova ena namo ita laloa bada ani?

“Namo ena Toana Ta”

14, 15. Iehova ese ena hesiai taudia be “namo ena toana ta” edena bamona ia hahedinarai henidia?

¹⁴ David ese Iehova ena hahenamo ia noilaia lou, ia gwau: “Lau oi abia dae bona lau oi bogaia hisi. Emu goada be emu hesiai tauna oi henia, emu hesiai kekenina ena natuna oi hamauria. Namo ena toana ta oi hahedinaraia lau dekenai, bena lau idia inai henia taudia ese do idia itaia, bona do idia hemarai. Badina be, Iehova e, oi ese lau oi durua vadaeni bona egu lalona oi hagoadaia vadaeni.” (Salamo 86:​16, 17) David ia diba ia be ‘Iehova ena hesiai kekenina ena natuna’ dainai ia danu be Iehova ena. Bema iseda mauri be Iehova ita gwauhamatalai henia vadaeni bona ena hesiai ita lao henia, ita danu be unai bamona. Iehova ena hahemauri be ena lauma helaga amo ita abia be namo. Unai dainai ita noia, “namo ena toana ta” do ia hahedinaraia ita dekenai. Iehova ena namo ena anina be ena kara namodia idauidau, ita herevalaidia vadaeni gaudia. Unai hegeregerena, dahaka toa be Iehova ese ita do ia hahedinarai henia?

¹⁵ Iehova be “gau namodia ibounai, bona harihari gaudia namodia momokani ibounai” henia Diravana, bona ‘lauma helaga idia noinoi taudia dekenai ia henidia’ badabada. (Iakobo 1:17; Luka 11:13) Lauma helaga be harihari gauna namo hereana Iehova ena amo! Lauma helaga amo, Iehova ese moale ia henia, dagedage negadiai danu. Iesu ena aposetolo taudia be kota ai idia gini neganai, idia hereva mai edia moale ida, idia gwau Dirava ese lauma helaga na ia idia kamonai henia taudia ia henidia. (Kara 5:​27-32) Lauma helaga ena moale ese “namo ena toana ta” ia haheitalaidia hanaihanai.​—Roma 14:​17, 18.

16, 17. (a) Iehova ena namo ena toana, Paulo bona Banaba ediai ia hahedinaraia gauna, be dahaka? (b) Dahaka toa be Tesalonika taudia ia hahedinarai henidia?

¹⁶ Paulo bona Banaba be Asia Maragina ai idia laolao neganai, idia ese hekwarahi idauidau idia davaridia, bona haida ese idia dagedage henidia bada. Pisidia tanona ai, Antioka ai idia haroro neganai, Iuda taudia ese edia hereva idia dadaraia dainai, idia ese idau bese taudia idia haroro henidia. “Inai hereva idia kamonai neganai idia moale bada, bona [Iehova] ena hereva idia hanamoa. Bona Dirava ia abia hidi, mauri hanaihanai abia totona taudia ibounai” be abidadama taudia ai idia lao. To Iuda taudia ese helogo-helogo idia havaraia dainai, unai misinari taudia be tano amo idia luludia. To idia bona unai abidadama taudia matamatadia be unai idia lalohisihisilaia lasi. “Iesu diba tahua taudia ibounai be moale bada, bona Lauma Helaga dekenai idia honu.” (Kara 13:​48, 52) Iehova ese ena namo ena toana ta ia hahedinarai henidia unai.

¹⁷ Gabeai, haida ese kongregesen matamatana Tesalonika ai be idia dagedage henia. Unai dainai aposetolo Paulo ese kongregesen taudia ia tore henidia, ia hanamodia badina be hisihisi idia haheaukalaia dainai. ‘Dirava ena hereva idia abia dae, vadaeni unai murinai taunimanima ese nega momo idia hahisidia.’ (1 Tesalonika 1:6) ‘Lauma helaga ena moale’ ese ia hagoadadia noho; unai moale be toa ta Dirava ena amo.

18. Iseda tadikaka Eastern Europe ai ese edena bamona idia hahedinaraia Iehova ena namo idia laloa bada?

¹⁸ Vanegai, Eastern Europe ai, Iehova ese iena namo na iseda tadikaka mai edia kamonai ediai ia hahedinaraia; guna idia dagedage henidia taudia ia hahemaraidia. Ena be unai dagedage karadia idia ore, to unai tadikaka ese ogogami idia hekwarahilaia dainai idia haheauka noho be namo, bona ‘lauma helaga ena moale’ ese ia hagoadadia noho. Idia moale bada, badina be edia ura-kwalimu matamatana idia gaukaralaia edia haroro gaukarana habadaia totona. Hebouhebou bona bapatiso sivaraidia ese idia hahedinaraia taunimanima momo ese idia kamonai henidia.​—Kara 9:31 itaia.

19. Salamo 86:11 ena hereva be edena bamona ita manadalaidia diba?

¹⁹ Inai stadi herevadia ruaosi ese David ena guriguri idia hahedinaraia; ia ese Iehova ia noia, ia gwau: “Iehova e, emu dala lau oi hadibaia . . . Lauegu kudouna oi hatamonaia, oiemu ladana gari henia totona.” (Salamo 86:11) Namona be inai hereva, lagani 1993 ena siri badana ena, do ita dibalaia namonamo, bona Basileia gaukaradia do ita durudia mai eda lalodia iboudiai ida, bona iseda Dirava, Pavapava Badana Iehova, ena namo bada do ita laloa bada noho.

[Footnotes]

Edena Bamona Oi Haere?

◻ Inai hereva, ‘Iehova e, lau oi hadibaia,’ anina be dahaka?

◻ Eda kudoudia be Iehova ena ladana gari henia totona hatamonadia, anina be dahaka?

◻ Iehova ese ena hebogahisi edena bamona do ia hahedinaraia, ia idia badinaia taudia iboudiai ediai?

◻ Edena bamona Iehova ese “namo ena toana ta” ia hahedinaraia ita dekenai?

[Box on page 16]

Lagani 1993 ena siri badana: “Iehova e, emu dala lau oi hadibaia . . . Lauegu kudouna oi hatamonaia, oiemu ladana gari henia totona.”​—Salamo 86:11.

[Picture on page 15]

Iehova be hereva momokani ai idia raka maoromaoro taudia edia nadi-gini bona edia kohoro

[Picture on page 18]

June lalonai, Iehova ena Witness taudia ese edia “Diari Loalaia Taudia” Intenesenel Hebouhebouna be St. Petersburg, Russia ai idia abia neganai, 46,214 idia hebou bona 3,256 be bapatiso idia abia. Iehova ena namo idia abia mai edia moale ida, ‘lauma helaga ena moale’!