Keristen Lalokauna be Edia Heduru Gaudia amo Idia Hahedinaraia

APOSETOLO Petro ese Keristen taudia ia hamaorodia ‘Keristen taudia iboudiai do idia lalokau henidia’ be namo. (1 Petero 2:17) Unai bamona lalokauna ese bese idauidau taudia, bona taga taudia bona ogogami taudia, bona tano idauidau taudia danu, do ia hatamonadia, tadikaka edia kara korikori hegeregerena. Keristen taudia ginigunadia haida idia dabu neganai, lalokau dainai ma haida ese harihari monina na aposetolo idia henidia, dabu taudia do idia harihari henidia totona. “Edia gau ibounai be idia ibounai edia.”​—Kara 2:​41-45; 4:32.

Unai bamona lalokauna be lagani 1991 ai ia hedinarai. Unai neganai Iehova ena Witness taudia edia Hakaua Oreana ese Watch Tower Society ena branch haida Western Europe ai idia noidia, aniani bona dabua do idia siaidia, edia tadikaka ogogamidia Eastern Europe ai do idia durulaidia totona. Unai branch haida edia ripoti be inai.

Sweden

December 5, 1991 ai, Sweden ai revareva idia siaidia kongregesen iboudiai 348 dekediai, unai tadikaka edia dabu idia hamaorolaidia. Bena kara haraga taraka badana ta be St. Petersburg, Russia, ia lao henia; ia lalonai be paraoa, girisi, buli, Sunshine milika, bona ma gau haida, iboudiai edia metau be 15 ton. Iehova ena Witness taudia unuseniai idia noho ese ikumi 750 na taraka amo idia kokidia bona dabu taudia idia henidia haraga. Gabeai, taraka badadia ma rua ese aniani idia laohaia Russia ai. Sweden amo idia siaia anianina ibounai ena metau be 51.5 ton.

Keristen taudia ese dabua bona tamaka idia henia mai edia ura bada ida, bona Kingdom Hall lalodiai idia haboudia. Idia momo be sibodia edia dabua idia henia, bona haida ese gau matamatadia idia hoidia. Tadikaka ta ese kouti faiv bona piripou faiv ia hoidia neganai sitoa biaguna ia hoa, bena ia hoidia ena badina ia hamaorolaia neganai, ia ese ma kouti faiv bona piripou faiv ia henia, davana lasi. Tadikaka ma ta ese sokisi bona dabua ma haida ia hoidia neganai, sitoa biaguna ese kouti 30 bona piripou 30 ia henia, kouti rua bona piripou rua edia davana hegeregerena. Sitoa biaguna ma ta ese tamaka 100 na tadikaka ia henidia.

Unai gau iboudiai idia abidia lao branch ai. Dabua be momo herea, taraka badadia 40 edia anina gaudia; unai dabua amo branch ena daiutu badadia haida idia hahonudia! Pura haida lalodiai tadikaka bona taihu ese idia haridia, tatau edia, hahine edia, bona memero kekeni edia, bena maua lalodiai idia udadia. Taraka badadia 15 idia gaukaralaidia, dabua be Russia, Ukraine, bona Estonia ai laohaia totona.

Tadikaka ta, Society ena taraka ta be nega eit ia taria lao Soviet Union ese guna ia biagua gabuna ai, be ia gwau: “Iseda tadikaka unuseniai ese ai idia abia dae dalana ai moalelaia bada. Ai idia rosia bona idia kisi henia, bona ena be idia ogogami, to Keristen dalanai ai idia harihari henia bada.”

Finland

Ena be Finland ai bisinesi momo idia dika bona taunimanima momo ese moni gaukarana idia davaria diba lasi, to tadikaka 18,000 bamona ese edia tadikaka, Soviet Union ese guna ia biagudia gabudia ai be idia durudia mai edia ura bada ida. Idia ese aniani 58 ton be maua 4,850 lalodiai idia siaia, St. Petersburg, Estonia, Latvia, Lithuania, bona Kaliningrad ai. Idia ese danu dabua momo herea idia siaia, bona motuka 25 idia henidia, Basileia gaukarana lalonai do idia gaukaralaidia totona.

Slanti ai, St. Petersburg ena kahanai, unai aniani mauadia haida be kongregesen ta mai ena pablisa 14 ese idia abia. Revareva ta ai edia tanikiu herevadia idia toredia. “Emai kongregesen lalonai be taihu burukadia 10. Ai momo be ai gorere bada, bona ai be hora momo lalodiai laini ai ai gini diba lasi aniani abia totona. To, inai nega dikadia ai, iseda Tamana gubai ia noho ese emai lalodia ia hametaudia lasi, to ia hamoaledia. Ai ese Baibel stadi 43 ai karadia noho.” Taihu ta ese aniani ikumina ta ia abia neganai, ia moale bada dainai ia tai daudau.

Denmark

Inai tano maragina ai, Iehova ena Witness taudia 16,000 bamona ese taraka 19 idia siaidia Ukraine ai; unai taraka lalodiai be aniani 64 ton, maua 4,200 lalodiai; dabua namodia, maua 4,600 lalodiai, bona tamaka matamatadia 2,269 danu. Tadikaka ta Germany ai ese taraka faiv branch ia henia do idia gaukaralaidia, bena ia ese tadikaka Ukraine ai ia henidia. Draiva ta ia lou mai neganai, ia gwau: “Ai mailaidia gaudia ese ai laohaidia gaudia idia hereadia. Iseda tadikaka Ukraine ai edia lalokau bona edia lalohadai namona ese emai abidadama idia hagoadaia bada.”

Soviet Union ese guna ia biagua tanona ai draiva be dala ai idia naria namonamo, badina be dina haida gunanai dadidadi taudia mai edia helikopita bona ipidi ese heduru oreana ta ena taraka faiv be unai dala ai idia koudia. Taraka faiv iboudiai idia abidia bona draiva be dala badinai idia rakatanidia. To Denmark ena branch ese ia siaidia gaudia iboudiai be tadikaka ese idia abidia. Idia ta ese revareva ta English gado ai ia torea mai ena hekwarahi ida bena draiva idia henia; iena revareva be inai: “Dia tadikaka bona taihu Denmark ai: Emui heduru ai abia vadaeni. Dirava ese davana namona do ia henimui.”

Netherlands

Netherlands ena branch ese aniani 52 ton ia siaia, ikumi 2,600 ai. Taraka 12 amo idia abidia lao Ukraine bena unai taraka be unuseniai idia rakatanidia, badinia be tadikaka Germany ai ese idia henidia, Basileia gaukarana East kahana ai durua totona. Tadikaka Ukraine ai ese unai aniani momo idia siaia, Moscow, Siberia, bona idia dabu momokani gabudia ma haida ai. Tadikaka Netherlands ai ese danu dabua bona tamaka momo herea idia henia, bena taraka 11 amo Lviv, Ukraine ai idia abidia lao neganai, motuka ta ese ia gunalaidia.

Dala daudauna amo Germany bona Poland idia hanaia, bena Ukraine tanona ena hetoana idia hanaia, bona daba momokani ai Lviv ai idia ginidae. Draiva idia gwau: “Nega daudau lasi, tadikaka 140 idia ginidae, kohu be taraka amo kokia totona. Unai tadikaka manaudia idia guriguri hebou guna, unai amo idia hahedinaraia Iehova enai idia tabekau. Gaukara ia ore neganai idia hebou lou bena Iehova idia tanikiu henia. Edia heabidae karana ai moalelaia murinai, ai idia hakaua lao ela bona dala badana. Dala badinai idia guriguri guna bena ai idia bamahuta henia.

“Dala daudauna ai ai lou mai neganai ai lalodia lou gaudia be inai: Tadikaka Germany bona Poland ai edia heabidae karana, bona iseda tadikaka Lviv ai edia danu; edia abidadama goadana bona edia guriguri goadalaia karana; ena be idia ogogami, to edia ruma lalodiai ai idia abia dae bona aniani idia henimai; idia hahedinaraia idia lalo-tamona bona idia lalokau heheni; bona idia abia heduruna idia laloa bada. Ai ese danu aiemai tadikaka bona taihu emai tano ai idia noho be ai lalodia, edia hariharibada dainai.”

Switzerland

Switzerland ena branch ena ripoti ena matamanai Iakobo 2:​15, 16 ena hereva idia torea: “Sedira tadikaka ta o taihuna ta be dabua lasi, bona ia be aniani lasi. Vadaeni umui ta ese bema ia hamaoroa ia gwau, ‘Dirava ese oi do ia hanamoa, oiemu kopina do oi hasiahua, bona do oi boga kunu.’ Bema unai bamona umui hamaoroa, to dabua ta o aniani ta umui henia lasi neganai, emui hereva be anina lasi.” Bena ripoti ai ma idia gwau: “Inai siri be ai lalodia, Iehova ena Witness taudia edia Hakaua Oreana ese ai idia noia emai tadikaka ogogamidia do ai durudia neganai.

“Maoromaoro iboudiai idia bisi! Dina rua lalodiai, aniani 12 ton, ikumi 600 lalodiai, be taraka toi amo idia siaia Ukraine ai. Unai taraka be Germany amo, idia henia unuseniai do idia gaukaralaidia totona. Unai aniani ibounai be unuseniai ia kau sivaraina idia kamonai neganai, tadikaka iniseniai be idia moale bada. Kongregesen ese dabua idia gogodia, bena maua, sutkeisi, bona baege momo herea be branch ai ai haboudia! Memero kekeni ese gadara gaudia bona sokoledi momo danu idia udadia, dabua bogaraginai.”

Unai ibounai be edena bamona idia abia lao? Ripoti ia gwau: “France ena branch ese taraka badadia rua bona draiva foa idia henimai. Ma danu, emai branch ena taraka ta bona tadikaka edia taraka foa be ai gaukaralaidia, dabua 72 ton be Ukraine ai abia lao totona.” Unai taraka iboudiai be Lviv ai idia ginidae; unuseniai tadikaka wan handred bamona ese unai dabua na taraka amo idia kokia. Draiva idia gwau, ena be unai tadikaka edia gado idia diba lasi, to edia vairadia edia toana dainai idia diba unai heduru idia laloa bada.

Austria

Tadikaka Austria ai ese aniani 48.5 ton, dabua maua 5,114, bona tamaka 6,700 idia siaidia Lviv bona Uzhgorod ai, Ukraine ai. Idia ese danu aniani 7 ton, dabua maua 1,418, bona tamaka 465 idia siaidia, Belgrade, Mostar, Osijek, Sarajevo, bona Zagreb ai; guna unai tano ena ladana be Yugoslavia. Branch ena ripoti ia gwau: “Ai ese taraka badadia 12 ai hahonudia, bena idia be kilomita 34,000 idia heau. Unai trenspot gaukarana momo be tadikaka ta bona ena natuna ese idia karaia; idia be mai edia taraka bisinesina.”

Ripoti ese dabua ia gwauraia, ia gwau: “Assembly Hall ta lalonai ai haboua. Taraka momo amo idia mailaia ela bona gabu ia honu. Mose ia kara bamona, ai danu ese taunimanima ai haganidia, ma gau ta do idia mailaia lasi. (Esodo 36:6) Murimuri taudia danu ese moni idia henimai. Idia gwau badina be idia diba dabu taudia ese do idia abia. Kampani haida ese maua idia henimai, davana lasi.” Tadikaka bona taihu, dabua idia haridia bona maua lalodiai idia udadia, edia mauri laganidia be 9 amo ela bona 80. Idia ese kouti bona siedi bona neketai idia hahegeregeredia toho.

Ripoti ia gwau: “Gavamani taudia, Austria ai bona tano idauidau edia hetoadia ai, ese ai idia durua bada. Dala idia kehoa aiemai bona gwaumaoro pepadia idia henimai, unai amo idia ese aiemai hekwarahi idia hamaragia.”

Italy

Aniani 188 ton be Roma amo idia siaia, taraka oreadia badadia rua ai. Austria, Czechoslovakia, bona Poland idia hanaidia, Soviet Union ese guna ia biagua tanona idia lao. Unai orea ta ta ai be draiva sikis, mekaniki rua, gado hahanaia tauna ta, kuki ta, doketa ta, gunalaia tauna ta motuka ta ai, bona tadikaka ta mai ena taraka idauna ta, ia lalonai idia mahuta.

Aniani be kampani seven amo idia hoia. Branch ia gwau: “Emai kara ena badina idia diba neganai, idia haida idia ura do idia durumai. Idia ese spageti bona raisi momo, bona maua danu idia henimai. Ma haida ese taraka edia sinou taea idia henimai eiava moni idia henimai gwauraia.

“Tadikaka Italy ai be idia heduru mai edia ura ida. Memero kekeni danu idia ura do idia heduru. Mero maragina ta ese moni sisina ia siaia, ia gwau ia ura ‘gwarume tini bada hereana do idia hoia, tadikaka Russia ai edia.’ Kekeni maragina ta be sikuli ai ia kwalimu momokani dainai, ena tubuna ese moni idia henia, harihari gauna ta do ia hoia ena tamana sinana edia. To ia gwau, ‘Egu tadikaka be aniani gaudia namodia ai idia dabu; unai lau diba neganai, lau laloa harihari gauna hereana do lau hoia egu tamana sinana edia be unai tadikaka do lau durudia.’ Moni momo be kontribiusen mauana lalonai ia udaia. Ma ia gwau, ‘Lau ura sikuli ai do lau kwalimu noho, bena moni ma haida do lau siaia diba.’ ” Dokonai, ripoti ia gwau tadikaka Ukraine ai edia tanikiu revarevadia, tadikaka Italy ai edia moale herevadia momo, bona edia ekspiriens namodia unai gau hegaegaelaidia bona laohaidia karadia ai idia abidia, ese idia hagoadadia bona idia hatamonadia.

Hebou Taudia Edia Aniani

Iehova ena Witness taudia be Soviet Union ese guna ia biagua tanona ai idia abia intenesenel hebouhebouna ginigunana be Kirov Stadium ai idia abia, St. Petersburg ai, Russia lalonai, June 28-30, 1992 ai. Unai hebouhebou ena ladana be “Diari Loalaia Taudia,” bona tadikaka 46,200 tano idauidau 28 amo be unuseniai idia hebou. ‘Keristen taudia iboudiai lalokau henidia’ dalana ma ta idia davaria.​—1 Petero 2:17.

Aniani momo herea, Denmark, Finland, Sweden, bona Western Europe tanodia ma haida amo, be hebouhebou taudia, U.S.S.R. ese guna ia biagudia tanodia amo idia mai taudia, idia henidia davana lasi, hebouhebou ai do idia ania totona. Hebouhebou dokonai idia ta ta aniani ikumidia idia henidia, dala ai do idia ania totona.

Inai ripoti ese idia hahedinaraia west kahana taudia ese east kahana taudia na aniani bona dabua idia henidia bona east kahana taudia ese west kahana taudia na lalokau herevadia momo herea bona ekspiriens namodia momo idia henidia. Unai ekspiriens ese edia abidadama idia hagoadaia, badina be idia hahedinaraia Iehova tomadiho henia taudia tausen tausen be hekwarahi bada negana daudauna lalonai idia haheauka mai edia kamonai ida. Inai dala amo kaha rua ese idia davaria Iesu ena hereva be momokani: “Henia kara ena moale be bada, abia kara ena moale be maragi.”​—Kara 20:35.

[Diagram/Picture on page 21]

1. Finland amo: St. Petersburg, Russia; Tallinn bona Tartu, Estonia; Riga, Latvia; Vilnius bona Kaunas, Lithuania; Kaliningrad, Russia; Petrozavodsk, Karelia

2. Netherlands amo: Lviv, Ukraine

3. Sweden amo: St. Petersburg, Russia; Lviv, Ukraine; Nevinnomyssk, Russia

4. Denmark amo: St. Petersburg, Russia; Lviv, Ukraine

5. Austria amo: Lviv, Ukraine; Belgrade, Mostar, Osijek, Sarajevo, Zagreb (unai hanua edia tano ena ladana gunana be Yugoslavia)

6. Switzerland amo: Lviv, Ukraine

7. Italy amo: Lviv, Ukraine

[Pictures on page 23]

Dabua mauadia Sweden ena branch ai

Heduru gaudia idia udadia

Aniani gaudia ikumi ta lalonai

Vamu, Denmark amo

Taraka 11 bona motuka tamona

Ikumi bona sutkeisi Austria ena branch ai

Taraka ena kohu idia kokia, Lviv ai, Ukraine ai