“Dirava ena Hahediba” Distrik Hebouheboudia
IDIA ura Iehova ese do ia hadibadia taudia iboudiai ese “Dirava ena Hahediba” Distrik Hebouheboudia idia naridia mai edia ura ida. Dina hani lalodiai program ese Baibel ena hahediba herevadia do ia hahedinaraidia, inai hekwarahi momo bona heiriheiri negana dikana lalonai Keristen taudia idia gimadia herevadia unai. Do ia durudia, ‘hadibaia hereva momokani negea karana’ do idia dadaraia vaitani bona Dirava ena Hereva do idia hahedibalaia namonamo totona.—1 Timoteo 1:10.
Haheitalai namodia idia noho, ita tohotohodia be namo! Hahediba Tauna Hereadaena be Iehova Dirava! Unai dainai, Elihu ese Iobu ia hamaoroa Iehova “ese ita ia hadibaia, bena uda boromadia ita hereadia, bona ita ia ha-aonegaia, bena atai manudia ita hereadia.” Ma ia gwau: “Hadibaia tauna [Dirava] hegeregerena be daika?” (Iobu 35:11; 36:22) Isaia 30:20 ese Dirava ia gwauraia “Hadibaia Tauna Hereadaena.”
Iehova murinai hadibaia tauna hereana be Iesu Keriso. Taunimanima ese idia gwauraia ‘Hadibaia Tauna,’ bona Evanelia Bukadia ai nega 50 bamona unai bamona idia gwauraia. Ena be hoa dalana ai taunimanima momo ia hamauridia, to idia gwauraia lasi Doketa, idia gwauraia Hadibaia Tauna.—Mataio 8:19; Luka 5:5; Ioane 13:13.
Iesu ese ena hahediba taudia bona ena aposetolo ia hadibadia, ia hegeregerena hadibaia taudia ai do idia lao totona. (Mataio 10:5–11:1; Luka 10:1-11) Guba ai ia daekau gwauraia neganai, ia haganidia taunimanima hadibadia gaukarana badana do idia karaia. (Mataio 28:19, 20) Aposetolo edia Kara bukana bona Baibel lalonai ia murinai idia noho bukadia ese Iesu ena hahediba taudia ginigunadia edia hadibaia gaukarana idia gwauraia, idia gwau idia karaia mai edia goada, mai edia diba, bona mai edia kamonai ida.
Hari inai negai inai hadibaia gaukarana be mai anina bada, badina be inai nega ena dina gabedia ai bema taunimanima ese diba do idia abia lasi, edia mauri do idia boio. Namona be haida ese do idia hadibadia bona do idia durudia, Babulono Badana amo do idia raka lasi bona Iehova bona ena Basileia edia kahanai do idia gini totona, Babulono ida do idia hisihisi hebou garina.—Apokalupo 18:4.
Iehova ena Witness taudia iboudiai be edia hadibaia gaukarana ai ia durudia totona, Iehova ese ena orea ena amo “Dirava ena Hahediba” Distrik Hebouheboudia ia hegaegaelaidia. June huana ai do idia matama, tanobada ena mirigini kahanai. Edia mauri be Iehova idia gwauhamatalai henia vadaeni taudia iboudiai ese dala do idia lailaia be namo, unai hebouhebou ta dekenai do idia lao totona. Namona be Thursday dina tubua ai do idia ginidae, hebouhebou kehoa anena do idia abia bena program ena hereva iboudiai do idia hakala henidia ela bona hadokoa gurigurina, Sunday adorahi ai.