Ia Toreisi Haraga

MEDITERRANEAN gabuna ai, huahua audia bogaragidiai almond auna be idau. January dokonai eiava February ai, nega daudau ia do noho ela bona au idaudia momo do idia noga neganai, ia noga guna, bena ia garakau. Herahera, kurokuro bona mia-kakakaka gaudia, ese au ibounai idia koua. Kurokuro gaudia edia toana be buruka taudia edia huina ena toana bamona.​—Kohelete 12:5 itaia.

Idaunegai Heberu taudia ese almond auna idia gwauraia “ia noga gauna,” badina be ia garakau guna. Iehova ese ena kara ia gwauraia, mai anina bada herevana ta parabolelaia totona. Ieremia ena gaukara ena matamanai, Iehova ese matahanai amo almond auna ena tuhutuhu ia hahedinarai henia. Ena anina be dahaka? Iehova ia gwau: “Lauegu hereva dekenai lau noga noho, ena anina do lau havaraia totona.”​—Ieremia 1:12.

Almond auna ia “noga” haraga hegeregerena, Iehova “ia toreisi haraga” ena peroveta taudia ia siaidia totona, bena iena orea taudia do idia hamaorodia dahaka do idia davaria edia gwau-edeede dainai. (Ieremia 7:25) Ia laga-ani lasi, “ia noga noho” ela bona ena peroveta herevana ena anina ia vara. Unai dainai, ia gwauraia negana ai, lagani 607 B.C.E. ai, Iehova ese gwau-edeede besena Iuda ia panisia.

Baibel ia gwau Dirava ese hari inai negai ia noho tanobadana dikana unai bamona do ia panisia. (Salamo 37:​9, 10; 2 Petero 3:​10-13) Peroveta tauna Habakuku ese unai ia perovetalaia, ia gwau: “Badina be matahanai be ena nega ia do naria noho . . . Oi naria noho; badina be momokani do ia mai. Do ia leiti lasi.” (Habakuku 2:3) Almond heraherana dainai Iehova ena kara ita laloatao. Iena hereva dekenai do ia noga noho, ena anina do ia havaraia totona.

[Picture Credit Line on page 32]

Pictorial Archive (Near Eastern History) Est.