Micronesia ena Misinari Taudia

ENA be Pacific Gadobadana ai Micronesia ena misinari taudia idia noholaidia motumotudia edia padadia be daudau herea, to lagani ta ta amo idia hebou loulou, “famili” ta bamona. Edeseniai idia hebou? Idia hebou gabuna ena ladana be gavamani ese ia hatoa Jehova Street​—unuseniai be Guam ena branch opesi; iena siahu henunai idia gaukara.

June 1992 lalonai, misinari taudia 56 be branch idia lao, “Diari Loalaia Taudia” Distrik Hebouhebouna lao henia totona. Idia hebamo heheni lou mai edia moale bona mai edia kiri ida. Vaia, Kingdom Hall ena vadavada ai idia gini hebou bena ta ese edia piksa ia abia, bena pata latadia toi ai idia helai diho, misinari anibouna abia totona. Unai neganai, Albert Schroeder, Hakaua Oreana tauna ta, ese ia vadivadi henidia.

Unai misinari taudia momo be lagani ta ta amo edia motumotu maragidia be unai negai mo idia rakatanidia. Unai motumotu be maragi herea. Ebeye Island, Marshall Islands ta, ena bada be hekta 32 mo. Majuro misinari rumana Marshall Islands ai bona Kiribati rumana Gilbert Islands ai, ruaosi be motumotu latadia ai, unai motumotu edia lababadia be mita 800 mo. Unai dainai unai misinari taudia idia moale bada, Guam idia lao negadiai.

Reana haida idia laloa unai bamona motumotuna ta ai do idia haroro be namo herea, to ta ta mo idia hegeregere unai hekwarahi do idia haheaukalaia. Misinari taudia iboudiai be 56, to idia 7 mo be Watchtower Bible School of Gilead amo. Idia momo be Hawaii eiava Philippines amo idia mai, edia tano ai idia be pioneer gaukarana na siahu gabudia ai karaia karana idia manadailaia vadaeni, bona sibodia edia tano amo idia be maoromaoro idia lao edia misinari gabudia.

Micronesia ena motumotu be siahu gabuna ai idia noho dainai, misinari taudia ese dina ena siahu idia hekwarahilaia, edia haroro gaukarana lalonai. Bona idia hekwarahilaia bada gauna ta be inai: Motumotu ta ta ai eiava motumotu oreadia ta ta ai gado be idauidau. Unai gado haida edia diksinari be lasi, bona ta ese ia manadalaidia haraga diba lasi. Baibel ena hereva na unai bese idauidau hadibalaidia totona, Guam ena branch ese bukabuka na gado 11 ai ia printadia, unai gado 9 be Micronesia mo sibona ai idia gadolaidia.

Motumotu haida lao henidia dalana tamona be bouti amo. Tol misinari rumana Chuuk (Truk) ai be unai bamona motumotuna ta ai, bona paua idia abia dalana tamona be dina ena siahu amo idia abia; unai paua be hegeregere hora haida mo ediai.

Micronesia ai misinari rumadia 14 idia noho. Unuseniai, gadobada ena bada be United States tanona ena bada hegeregerena. Taunimanima 400,000 mai kahana be unuseniai idia noho, 1,000 be sivarai namona harorolaia taudia, kongregesen 20 bona grup maragidia 3 lalodiai idia gaukara.

Ena be Micronesia taudia momo be heabidae taudia, to edia hanua taudia edia tomadiho karadia bona edia varavara edia lalo-ani dainai, idia momo ese Dirava ena Basileia sivaraina idia abia dae lasi. Unai dainai, ena be unai pablisa taudia 1,000 ese Baibel stadi 2,000 mai kahana idia karadia, to kongregesen haida bona grup haida be idia do maragi. Tinian motumotuna ai pablisa be 5 sibona, bona Nauru motumotuna ai pablisa be 7 sibona, bona Yap, Kosrae, bona Rota ai kongregesen taudia edia momo be 40 henunai. To misinari taudia haida be lagani 20 bona ma haida edia gaukara gabudia ai idia gaukara noho. Misinari taudia sikis Belau motumotuna ai idia noho, iboudiai be lagani 12 mai kahana idia noho.

Idia haheauka noho taudia ese dava badadia idia abidia. Iehova ena imana karakara gaudia edia hairai idia hoalaia diba. Micronesia ena motumotu be kavabukavabu bamodia, davara lalonai idia hedinarai. Kone latadia ai bona moemoe ai gwarume idauidau momo herea mai edia kala idaidau idia noho, unai dainai taunimanima momo idia lao unuseni bona idia pau dobi idia itadia totona. Dina dina iboudiai, dina be gadobada ai ia diho neganai ena toana be namo herea.

To idia abia davana bada hereana be inai: Iehova ena hesiai idia lao henia, iena gwauhamata namodia be taunimanima ma haida idia harorolai henidia. Micronesia ena misinari taudia ese unai davana idia tahua hanaihanai dainai, Isaia 42:12 ena hereva idia hamomokania: “Iehova do idia imodaia, bona hanamoa herevadia be motumotu ai do idia gwaurai henidia.”

[Map/Picture on page 31]

(For fully formatted text, see publication)

Barrigada, Guam

Santa Rita, Guam

Koror, Belau

Chuuk (Truk) Islands

Tarawa, Kiribati

Kosrae

Ebeye

Marshall Islands

Majuro

Kolonia, Pohnpei

Songsong, Rota

Saipan

Yap

MICRONESIA

MELANESIA

CAROLINE ISLANDS

PACIFIC OCEAN

PHILIPPINES

NEW GUINEA

EQUATOR

[Picture]

Misinari taudia be Guam ai idia hebou, June 1992 ai