“Ororo Idia Do Vara Lasi”
“EMAI noho gabuna be oi mo, uru iboudiai lalodiai. Ororo idia do vara lasi, tanobada bona anina namona havaraia tanona oi do karaia lasi, unai negana ema bona hari ela bona hanaihanai oi mo Dirava.” (Salamo 90:1, 2) Unai hereva, ta ese Dirava ia gwaurai henia, ese iseda lalona idia hagoadaia momokani, hari inai daradara negana lalonai!
Bisinesi momo idia dika idia lao dainai, taunimanima momo ese vaira negana idia daradaralaia. Raskol karadia bona drag ania kava karadia idia momo daekau dainai, siti momo be ala-ala karadia amo idia honu. Famili momo idia dika. Taunimanima momo idia hekwarahi bada, badina be edia adavadia ese idia rakatanidia, bena idia sibodia ese edia natudia idia naridia dainai. Tatau momo ese edia adavadia idia dadabadia bona edia natudia idia hadikadia, unai dainai edia famili lalodiai maino be lasi.
Inai hekwarahi momo negana lalonai, daika ese ita do ia hakaua? Taunimanima edia kara sisibalaia taudia bona hadibaia taudia ese sisiba herevadia momo herea idia toredia, to unai hereva momo idia hakoikoi heheni. Nega daudau lalonai Doketa Benjamin Spock be memero kekeni hadibadia dalana sisibalaia karana ia gunalaia. Bena ia gwau iena sisiba be kerere!
Namona be ita ese Dirava na eda “noho gabuna” ai do ita halaoa! Inai heiriheiri negana lalonai, ia be nadi-gini ta, do ia noho “ela bona hanaihanai.” Peroveta tauna Malaki ena amo ia gwau: “Lau be Iehova, lau idau lasi.” (Malaki 3:6) Dirava ena taravatu, Baibel lalonai idia toredia, be ita abidadama henidia vaitani diba. “Ororo idia do vara lasi” neganai ia noho, bona iena sisiba, Buka Helaga lalonai ita davaria diba, be iena noho hanaihanai aonegana hegeregerena. Unai sisiba ese ita do ia hamoalea bona do ia hakwalimua.
Unai dainai, namona be Dirava ena Hereva, Baibel, do oi abidadama henia. Ena hereva do oi tahua, Dirava ena aonega ese oi do ia hanamoa totona. Ia be diari ta, mauri ena dala ai oi do ia hakaua. (Salamo 119:105) Idia abidadama henia taudia mo sibodia ese nega vaira idia laroa mai edia lalo-namo ida.