Inai Aniani be mai Anina Oi Dekenai, A?

HUA ia kuboru bona tano ia hadiaria namo herea. Idau negai Ierusalem ai ruma ta ena atai daiutuna dekenai, tatau 12 be patapata ta ai idia helai hagege. Tatau 11 ese idia hakala namonamo edia Hadibaia Tauna ese aria matamatana bona mai anina bada herevadia ia gwauraia neganai. Sivarai ta ia gwau:

“Iesu [Keriso] ese paraoa ia abia, ia hanamoa, ia makohia, ena diba tahua taudia dekenai ia henia, ia gwau, ‘Umui abia, umui ania, lauegu tauanina be inai.’ Ma kapusi ta ia abia, ia hanamoa, ia henia idia dekenai, ia gwau, ‘Umui ibounai umui inua. Inai be lauegu rarana, maino karaia [taravatuna] ena rara, taunimanima momo totona do ia bubua, dika gwauatao totona. Umui lau hamaoroa, inai uaina do lau inua lou lasi, ela bona dina do ia ginidae lau bona umui uaina matamatana do ita inua Dirava ena Basileia lalonai.’ Ane idia abia ore murinai idia raka murimuri dekenai, Olive ororo dekenai idia lao.”​—Mataio 26:​26-30.

Unai ia vara lagani 33 C.E. ai, Iuda taudia edia hua Nisan 14 dinanai hua ia diho murinai. Lagani 1500 C.E. ai, Israel taudia be Aigupito ena igui hesiai amo idia siri, bona Iesu bona iena aposetolo taudia ese unai idia laloatao totona Paseka ariana idia karaia, unai murinai Keriso ese Iuda Iskariote ia siaia lao, bena ia lao Iesu do ia samania totona. Unai dainai, Iesu bona iena abidadama hahediba taudia 11 sibona idia noho.

Unai aria be Iuda Paseka ena aria hegeregerena lasi. Ia be kara matamatana ta, bona taunimanima ese idia gwauraia Lohiabada ena Adorahi Anianina. Unai kara dekenai, Iesu ena hahediba taudia ia haganidia, ia gwau: “Inai bamona do umui karaia, lau dekenai do umui laloa totona.” (Luka 22:​19, 20; 1 Korinto 11:​24-26) Dahaka dainai unai bamona ia hereva? Bona edena bamona unai idau negai ia vara karana be mai anina oi dekenai?