Bahamas Dekenai Idia Davaria Gauna be Idau

FLORIDA bona Cuba huanai, bulu momokani davarana dekenai, Bahama motumotudia idia noho, bona lagani 1992 ai niuspepa, reidio bona televisen idia kikilaia momo. Dahaka dainai? Badina mai edia siahu taudia momo idia laloa lagani 1492 ai, Christopher Columbus ena kada be Bahama motumotudia dekenai ia ginidae, unai laolao neganai ia ese America tanona ia davaria danu. Ia ginidae dinana, October 12, 1992 ai, moale bada karana idia karaia unai nega idia laloatao totona.

Ena be unai dina badana idia moalelaia to dika ia vara danu. National Conference of Black Lawyers namba 23 hebouna dekenai, haida idia gwau John Carew (ia be international studies ena profesa ta), ia gwau Columbus ia ginidae dainai “Caribbean Motumotudia dekenai taunimanima momo idia mase.”​—The Nassau Guardian.

Hari inai negai, Bahama motumotudia taudia korikori 250,000 iboudiai amo ta lasi ese edia tubudia tamadia ginigunadia idia diba. Gunaguna, Columbus ia davaria maino taudia edia toana ia gwauraidia, ia gwau edia “tauanina idia goada bona edia vairadia be mai hairaidia.” Unai motumotu taudia dekenai dahaka ia vara? A History of the Bahamas bukana ia gwau: “Lagani 1500 ia lao 1520 lalodiai Bahama motumotudia dekenai idia noho taudia iboudiai, reana unai be Lucaya taudia 20,000 bamona, be Spain ena gold mine dekenai igui hesiai gaukara idia karaia totona idia abidia lao Hispaniola dekenai.

Bahama motumotudia dekena amo taunimanima momo herea idia kokidia murinai, Britain bona gabeai orea badadia haida, edia ladana be “pavapava abia dae taudia” ese unai motumotudia dekenai idia ginidae, idia “davaria lou” unai. Unai “pavapava abia dae taudia” be North America ai uma badadia idia biagua, bona Britain ese unai gabu ia lohiaia. Britain Pavapavana idia abia dae, bona North America be Britain ena siahu amo do ia siri totona tuari idia karaia gwauraia neganai, unai taudia be idia heau mauri. Hari inai negai idia noho Bahama taudia momo herea be gunaguna idia mai biru taudia bona edia igui hesiai taudia amo idia vara.

Idia Davaria Gauna be Idau

Reana Columbus ia laloa ia be misinari tauna bamona. Haida idia gwau inai bamona ia hereva: “Dirava ese lau ia siaia guba matamatana bona tanobada matamatana lau davaria totona. . . . Ia ese lau ia hadibaia edeseniai do lau davaria diba.” To, murinai ia vara dika bada herea gauna ese iena hereva ia hakoikoia. Dirava ese kara maoromaoro ‘guba matamatana bona tanobada matamatana’ ia gwauhamatalaia, to unai ia davaria lasi, ma nega ta ai haida ese idia davaria.​—2 Petero 3:13.

Lagani 1926 ai, Edward McKenzie bona iena hahine be Bahama motumotudia dekenai idia ginidae. To idia edia kara be gunaguna idia ginidae taudia edia kara amo ia idau, unai manau Jamaica taudia rua idia mai kudou-maoro taudia idia tahudia bona kohu badana ta idia henidia totona. Bahama motumotudia dekenai idia be Dirava ena Basileia ena sivarai namona idia mailaia taudia ginigunadia unai. (Mataio 13:44; 24:14) Idia ginidae laganina tamona lalonai Jamaica tauna Clarence Walters bona Jamaica hahine Rachel Gregory idia ginidae. Lagani 1928 ai, Bahama motumotudia dekenai, Basileia harorolaia pablisa taudia be 7. Lagani hani lalodiai idia gaukara goadagoada unai motumotu taudia dekenai sivarai namona idia harorolaia totona.

Murinai, ia haroro goadagoada tauna, E. P. Roberts be Trinidad amo ia ginidae. Taunimanima idia hebou gabudia dekenai ia ese pablik tok momo ia henia, bona unai amo taunimanima dekenai hahediba koikoi ia hahedinaraia bona Baibel ena hereva momokani sivaraina amo idia momo edia kudouna ia hamareredia. Unai hebou ta dekenai ena lalona ibounai danu ia hakala tauna ta ladana Donald Oscar Murray. Gabeai unai tauna be haroro gaukara ia gunalaia.

Misinari hahine Nancy Porter ese ia do laloatao unai tauna D. O. Murray be ia guriguri goadagoada haroro gaukara dekenai heduru do idia abia totona. Lagani 1947 ai, Watch Tower Society ese Nancy bona iena tau, George, bona ma rua danu, be Bahama motumotudia dekenai idia siaia misinari taudia ginigunadia. Unai nega ia laloa lou, ia gwau: “Ai lao henia hebou ginigunana be do ai laloaboio diba lasi. Ai hebou taudia be 9 eiava 10. Tadikaka Murray be seamani bona hebou be guriguri amo ia kehoa, bona ena guriguri lalonai misinari taudia idia ginidae dainai, ia ese Iehova ia tanikiu henia. Ia gwau heduru idia abia be gau bada, bona ia gwau ‘nega daudau lalonai unai heduru abia totona ita guriguri noho.’ Unai guriguri ese emai kudouna ia hamarerea bada bona ai ura unai gabu dekenai do ai noho, do ai rakatania lasi.” Harihari, ena be lagani 45 idia ore vadaeni, ena be ena tau ia mase, to Taihu Porter be Basileia ena sivarai namona be unai motumotu taudia dekenai ia do harorolaia noho.

Lagani 1947 amo, Bahama motumotudia dekenai heduru bada idia abia Basileia harorolaia gaukarana idia karaia totona, badina pioneer taudia bona ma haida ese bouti amo unai motumotudia idia vadivadi henidia. Gunika hanua taudia dekenai sivarai namona idia harorolaia totona, nega momo edia bouti be dobu lasi ranuna dekenai ia heau bona idia diho kone idia raka henia totona.

Lagani 1950 ai, mai anina bada karana ia vara. Unai lagani ena December huana ai, Nathan H. Knorr, unai neganai ia be Watch Tower Society ena presiden, bona iena seketere, Milton G. Henschel, be nega ginigunana Bahama motumotudia idia vadivadi henidia, bona Knorr ese idia hebou taudia 312 ia hereva henidia. Mai edia siahu taudia haida danu idia hebou, ta be palamen ena memba ta, bona ma ta be unai gabu ena niuspepa karaia tauna. Unai hanuaboina ai, Tadikaka Knorr ese ia hahedinaraia Bahama motumotudia dekenai Society ena branch opesi do idia haginia.

Motumotu Taudia Idia Moale

Bahama motumotudia edia moale taudia ese Basileia ena sivarai idia kamonai henia. To, idia iboudiai haroro henidia dalana be ia auka sisina. Dahaka dainai? Ena be taunimanima momo be edia siti badana, Nassau, bona kahirakahira dekenai ia noho Grand Bahama dekenai idia noho, to momo danu be motumotu badadia ma 15, bona motumotu maragidia ma 700 dekenai idia noho.

Unai gabu bona idau gabu amo idia mai Witness taudia idia diba gaukara be ia bada dainai, haroro gaukara idia durua totona idia momo be motumotu maragidia dekenai idia lao idia noho bona idia haroro totona. To edia hekwarahi amo hahenamo bada idia davaria.

Tau ta mai adavana ese Andros ena motumotu badana dekenai idia lao idia noho totona. Dina ta ai idia be ruma ta ruma ta gaukara idia karaia neganai, Haiti amo ia mai tauna ta idia davaria. Unai tau be mai moale danu ia gwau ia ura ena ruma dekenai Baibel stadi do idia karaia. Unai hanuaboina ai idia karaia hamatamaia, bona French bona English gado bukadia, Mauri Hanaihanai Paradaiso Lalonai idia gaukaralaidia. Murina hanuaboina ai, ena Keristen hebou ginigunana ia lao henia. Daudau lasi murinai, kuku ania karana ia negea, lauma dalanai ia tubu ia lao haraga, bona haroro gaukara ia karaia hamatamaia.

Unai tau be bapatiso ia abia dinana ena daba kahanai, iena ruma bese taudia Haiti dekenai ese ia dekenai kaset idia siaia. Dahaka idia gwau? Idia be Iehova ena Witness taudia ai idia lao sivaraina idia hadibaia. Idia hadibaia iena taihuna be regular pioneer eiava nega ibounai haroro gaukara ia karaia, bona idia hagoadaia Witness taudia do ia tahudia Baibel dekena amo idia stadi henia totona. Vadaeni, unai tau be bapatiso ia abia neganai, ia daradara lasi, ia diba ia karaia karana be maoro.

Mai goada danu hereva momokani idia abia dae taudia edia sivarai ese unai gabu Witness taudia ia hagoadaia. Idia momo idia lao taudia ese nega ibounai haroro gaukarana idia karaia, bona unai ese idia tubu idia lao noho dalana ia durua. Unai dainai, lagani 1988 ai, Bahama motumotudia dekenai Basileia idia harorolaia taudia edia namba be 1,000. Harihari, kongregesen 19, bona edia Basileia pablisa taudia 1,300 bamona be edia motumotu badadia iboudiai dekenai idia gaukara.

Dina Vairai Totona Idia Hegaegae

Idia momo idia lao dainai, Witness taudia idia hekwarahi davana namona idia gwauraia gabudia idia davaria lagani ta ta ai hebouhebou idia karaia totona. Hebouhebou ta be motumotu rua dekenai idia karaia hutuma herea taudia ese ta idia lao henia totona. Unai dainai, palani idia karaia Assembly Hall bona branch opesi matamatana idia haginidia totona. Unai gaukara idia hamatamaia December 1989 ai. Intenesenel bona unai gabu ena volantia taudia handred momo ese ‘edia kudouna ibounai ida Iehova totona’ unai gaukara idia durua​—Kolose 3:23.

Momokani gauna be inai: February 8 bona 9, 1992 ai, Bahama motumotudia ai, Witness taudia ese edia branch opesi bona Assembly Hall matamatadia idia hahelagaia neganai, idia hebouhebou taudia be idia momo herea bona idia moale bada. Unai motumotudia dekena amo tadikaka idia hegaegae unai hebouhebou do idia karaia totona lalonai, Witness taudia be mai moale danu idia naria noho. Hanuaboi ai ia keru bona medu ia diho, bona kerukeru unai ruma do idia hahelagaia program do idia karaia. To, John E. Barr, Iehova ena Witness taudia edia Hakaua Oreana ena memba tauna ta ese unai ruma rua hahelagaia hereva, ena ladana be “Tiokratik Gaukara Ia bada Ia Lao Anena” ia henia neganai, gau ta lasi ese idia hebouhebou taudia 2,417 edia moale ia hadikaia diba.

Edia kudouna be moale amo ia honu guba Tamana, Iehova Dirava dekenai, unai moale hebouhebouna dainai idia tanikiu henia totona. Unai hebouhebou taudia ese edia lalona idia hadaia mai edia goada ibounai ida lauma hadibaia gaukarana idia durua noho totona.

Columbus ese unai motumotudia ia davaridia, to ia ese ia durudia eiava lasi reana do idia hepapahuahulaia noho. To, Bahama motumotudia dekenai, Iehova ena Witness taudia be mai edia lalo-tamona danu idia moale Dirava dekenai, badina ia ese sibodia edia namo idia tahua lasi taudia ia hasiahudia idia diba lasi gabuna dekenai idia lao, bona guna lauma dalanai idia dibura taudia dekenai sivarai namona idia harorolaia totona. Idia edia gaukara bona unai hanua idia “davaria” dainai, Bahama motumotudia dekenai, hereva momokani idia tahua taudia iboudiai dekenai gau ta ia hanaia diba lasi kohuna idia henidia.

[Map/Pictures on page 24, 25]

Grand Bahama

Abaco

Andros

New Providence

Nassau

Eleuthera

Cat Island

Great Exuma

Rum Cay

San Salvador

Long Island

Crooked Island

Acklins Island

Mayaguana

Little Inagua

Great Inagua

CARIBBEAN SEA

FLORIDA

CUBA

[Pictures]

Straw Maketi ai idia haroro

Kone idia raka henia idia haroro totona

Branch opesi be ororo ai, Assembly Hall ataiai