Duahia Taudia Edia Henanadai

Bema taunimanima be Keristen kara momokanina idia abia dae lasi bona hisihisi badana ia do matamaia lasi neganai idia mase, do idia toreisi lou diba, a?

Ita ibounai be taunimanima hahemaoro henidia karana ita dadaraia be namo, badina Iesu Keriso dekena amo Iehova ese ia karaia hahemaorona sibona be mai anina bada. (Ioane 5:22; Kara 10:42; 2 Timoteo 4:1) Baibel amo heduru hereva ita abia atai dekenai ia noho henanadai ena haere ita diba totona.

Tanobada hegegemadai Dirava ena Basileia ena sivarai namona harorolaia gaukarana be gau badana, badina unai be ‘Iesu ia giroa mai vadaeni toana’ ena kahana ta. Lagani 1900 murinai unai toana ia hedinarai. Haroro gaukara ese bese idauidau ibounai taudia ia hapararaia, Iesu ia gwauraia “mamoe” bona “nanigosi” parabole herevana ia hagugurua. Unai haroro bona hapararaia gaukarana do ia ore neganai, ‘hisihisi badana’ do ia vara, bona hari nega dikana do ia haorea.​—Mataio 24:​3, 21, 22; 25:​31-46.

Iehova, mai ena Natuna ida, ese hahemaoro gaukara do idia karaia, bona Basileia idia dadaraia taudia, hisihisi badana ia do matamaia lasi neganai idia mase taudia unai, do idia gwauraidia nanigosi taudia eiava lasi. Iesu ia gwau nanigosi taudia be “davana ia dika hanaihanai gabuna dekenai do idia lao.” Unai dainai, ita diba bema Dirava ese taunimanima ia gwauraidia nanigosi taudia, toreisi lou do idia abia lasi. Idia abia hahemaoro be hisihisi badana ia vara neganai hahemaoro idia abia taudia hegeregerena, “idia do ia haorea momokani, bona inai bamona do idia noho hanaihanai.”​—2 Tesalonika 1:9.

To “nega dokonai” idia mase taudia haida be Basileia ena sivarai idia kamonai namonamo lasi bona idia be hegeregere lasi hereva momokanina idia abia dae eiava idia dadaraia totona. Unai taudia be edena bamona?​—2 Timoteo 3:1.

Hisihisi badana ia do matamaia lasi neganai, bona haroro gaukara ita karaia noho lalonai, taunimanima momo idia mase, unai taudia momo be reana toreisi lou do idia abia. Apokalupo 6:​7, 8 ese ia gwauraia haheitalai hosi idia guia taudia edia heau sivaraina ita duahia neganai, unai ia hahedinaraia. Taunimanima momo be tuari amo, doe amo, bona daihanai goreredia amo idia mase. “Mase” taudia be ‘Hade’ eiava mase taudia edia gabu dekenai idia vareai, unai dainai, Keriso ena Lagani 1,000 Lohia Negana lalonai ‘Hade’ ese do ia henidia daekau lou. (Apokalupo 20:13) Do idia toreisi lou taudia momo be reana idia do mase lasi neganai Basileia ena sivarai idia kamonai sisina.

Ita moale badina Iesu ia gwau lasi taunimanima do idia gwauraia hidi daidia be mamoe bona daidia be nanigosi bamona taudia! Goevadae lasi taudia be idia hegeregere lasi unai idia karaia maoro totona, idia diba lasi nega be ia hegeregere eiava lasi taunimanima ta be sivarai namona ia kamonai henia namonamo bona ia abia dae totona. Iena kudouna lalonai ia noho gauna ita diba lasi, eiava ia be kara maoromaoro ia ura henia ita diba lasi, ani? Momokani, ita diba lasi. Reana ia ura ia kamonai to iena ruma bese taudia, iena tomadiho, eiava ma gau ta ese idia koua, unai gaudia ita diba lasi, ani? To, ita diba Iehova Dirava bona Iesu Keriso be iena lalohadai bona kara ibounai idia diba bona ia dekenai edia hahemaoro be goevadae, ia momokani bona ia maoromaoro.​—Deuteronomi 32:4; Isaia 11:​1-5.

Unai dainai, namo lasi ita gwau reana vanegai idia mase taudia haida do idia toreisi lou eiava do idia toreisi lou lasi. Gwaumaoro ita abia lasi unai ita karaia totona. (Luka 12:​13, 14 itaia danu.) Aonega karana be Hahemaoro maoromaoro karaia taudia, Iehova Dirava bona Iesu Keriso, edia hereva ita naria. Unai neganai, ita Iehova ena hesiai taudia be lalo-maino do ita davaria. Danu ita do ia durua ita abia gaukarana do ita karaia namonamo totona​—unai be ‘ita lao bese ibounai dekenai diba tahua taudia do ita halaoa totona, bona Iesu ia henia hereva ibounai idia dekenai ita hadibaia.’​—Mataio 28:​19, 20.

[Picture Credit Line on page 31]

Leicester sheep, Meyers