Laloa Namonamo—Dokona be Kahirakahira

“Gau ibounai edia dokona nega be kahirakahira. Unai dainai do umui laloa namonamo, mai maoromaoro danu, do umui naria, bona do umui guriguri.”​—1 PETERO 4:7.

1. (a) Dahaka dainai tomadiho biaguna ta mai ena hahediba taudia idia lalohisihisi? (b) Idia laloa do idia vara gaudia idia vara lasi dainai, dahaka henanadai ita gwauraia diba?

“HARI hanuaboi ena guriguri dokona lalonai Dirava ese lau ia boiria. Ia gwau taunimanima 116,000 be guba dekenai do idia daekau bona mai edia abidadama to idia mase taudia 3.7 milion edia gara gabudia do idia kehoa hedinarai.” Mission for the Coming Days oreana ena biaguna be unai bamona ia hereva October 28, 1992 ai, idia gwau unai dina dekenai hahemaoro do idia abia. To, October 29 ia ginidae neganai, ta lasi be guba dekenai ia daekau, bona mase taudia edia gara gabudia idia kehoa lasi. Tanobada ena dokona idia perovetalaia Korea taudia be guba dekenai mai moalena idia daekau lasi, to vaia ena kara bamona daba ia rere bona dina ma ta ia hedinarai sibona. Nega ta ta ai haida ese dika idia perovetalaia to ia vara lasi, to idia hemarai lasi. Keristen taudia be edena bamona idia laloa be namo? Idia laloa tanobada ena dokona negana be kahirakahira lasi, a?

2. Aposetolo taudia dekenai daika ese vaira dinana ta ena hahemaoro negana ia gwauraia, bona idia dekenai dahaka ia gwau?

² Haere ita diba totona, namona be Iesu be ena hahediba taudia ida idia herevahereva negana ita laloatao. Kaisarea Filipi tano ai, Galilea Gohuna ena northeast kahanai, bona Heremono Ororona hairaina be idia murinai, Iesu ia hamaorodia do ia mase. (Mataio 16:21) Murinai mai anina bada herevadia ia gwauraia danu. Ia hadibadia hahediba taudia ai idia lao totona, gau badana be edia mauri lalonai sibodia edia ura idia dadaraia noho, bena ia sisiba ia gwau: “Taunimanima ena Natuna be ena Tamana ena diaridiari dekenai do ia mai, mai ena aneru momo danu, unai neganai taunimanima ta ta ibounai edia kara hegeregerena edia davana do ia henidia.” (Mataio 16:27) Iesu be do ia giroa mai ia gwauraia. To, unai giroa neganai ia be Hahemaoro Tauna. Unai neganai taunimanima be mai edia abidadama danu iena ura idia karaia eiava lasi do ia tahua. Tanobada ena kohu momo idia abia eiava lasi be herevana, Iesu ese edia kara dainai do ia hahemaoro henidia. Iena hahediba taudia be unai idia laloatao be gau badana. (Mataio 16:​25, 26) Unai dainai, Iesu Keriso ese iena hahediba taudia ia hamaorodia do idia gima noho, badina mai ena hairai danu do ia giroa mai bona taunimanima do ia hahemaoro henidia.

3. Iesu ese do ia giroa mai momokani be edena bamona ia hahedinaraia?

³ Murinai Iesu ena hereva ese ia hahedinaraia do ia giroa mai momokani. Ia gwau: “Umui lau hamaoroa momokani, haida idia gini inai be do idia mase lasi ela bona Taunimanima ena Natuna do idia itaia, mai ena Basileia danu do ia mai.” (Mataio 16:28) Dina 6 murinai unai hereva ia guguru. Matahanai lalonai ena hahediba taudia haida vairanai Iesu ena toana ia idau dainai idia hoa. Idia itaia Iesu ena vairana be ia diaridiari dina bamona, bona ena dabua be ia kurokuro momokani diari bamona. Ena toana ia idau ese ia hahedinaraia Keriso do ia hairai bona Basileia do ia abia. Basileia ena peroveta herevadia ia hamomokania dainai goada idia abia! Unai ese hahediba taudia ia hagoadaia idia laloa maoromaoro totona!​—2 Petero 1:​16-19.

Ita Laloa Namonamo be Gau Badana

4. Dahaka dainai Keristen taudia be Iesu ena giroa mai negana totona idia gima noho be gau badana?

⁴ Murinai, lagani tamona ia do abia lasi neganai, Iesu be Olive Ororona dekenai ia helai, bona ena hahediba taudia ida ia herevahereva. Ierusalem hanuana idia raraia neganai, do ia giroa mai toana ia hadibadia bena ia sisiba, ia gwau: “Umui naria, badina be umui emui Lohiabada do ia mai negana be umui diba lasi.” Iena hahediba taudia idia gima noho be gau badana badina do ia mai negana idia diba lasi. Idia naria noho be namo.​—Mataio 24:42.

5. Ita naria noho be gau badana ena haheitalai ta be dahaka?

⁵ Lohiabada ia giroa mai dalana be henaohenao tauna bamona. Ma ia gwau: “Inai do umui laloatao! Ruma biaguna bema ia diba guna edena hora dekenai henaoa tauna do ia mai, be do ia naria, ena ruma do ia makohia lasi.” (Mataio 24:43) Henaohenao tauna be ruma tauna do ia hadibaia lasi edena negai ena ruma do ia hamakohia; hehuni ai ia karaia. Unai dainai, ruma tauna ia gima noho be gau badana. To, mai ena abidadama Keristen tauna be ia naria namonamo ena badina be ia gari dainai lasi. To, mai ena hairai danu Keriso do ia giroa mai bona Lagani 1,000 maino negana do ia havaraia dainai, mai edia ura danu idia gima noho.

6. Dahaka dainai ita laloa namonamo be gau badana?

⁶ Ena be idia gima noho, to edena dina ai do ia giroa mai ta ia gwauraia guna diba lasi. Iesu ia gwau: “Do umui hegaegae, badina be Taunimanima ena Natuna do ia mai ena hora be umui diba lasi.” (Mataio 24:44) Unai dainai ita laloa namonamo be gau badana. Bema Keristen ta be dina ta ia laloa bona ia gwau Keriso be unai dina dekenai do ia mai lasi, reana ia be unai dina dekenai do ia mai diba! Momokani, gunaguna mai edia abidadama Keristen taudia be dokona negana idia gwauraia guna toho. To, Iesu ena sisiba hereva be ia momokani, ia gwau: “Unai dina, unai hora gauna, ta ia diba lasi, guba aneru danu idia diba lasi, Taunimanima ena Natuna ia diba lasi, to Tamana sibona ia diba.”​—Mataio 24:36.

7. Keriso murinai ita raka totona, iseda mauri lalonai dahaka ita abia dae be gau badana?

⁷ Vadaeni, dahaka ita abia dae be namo? Keriso murinai ita raka totona, iseda mauri negadia iboudiai ita abia dae inai nega dikana ena dokona be ia kahirakahira.

8. Idaunegai amo Keristen tomadiho kara ai, Keristen taudia be dahaka idia naria noho?

⁸ Unai be Keristen taudia edia lalohadai, bona idaunegai sivarai torea taudia bona Baibel tahua taudia ese unai idia hamomokania. Hegeregere, The Translator’s New Testament halasia taudia be indeks ena hereva “Dina” badinai, idia gwau: “T[aravatu] M[atamatana] ena nega ai, Keristen taudia be inai tanobada mai ena kara dika ibounai ena dokona Dinana (o negana) idia naria noho, bona Iesu be tanobada dekenai do ia giroa mai taunimanima iboudiai do ia hahemaoro henidia, maino do ia havaraia bona tanobada ibounai dekenai do ia Lohia hamatamaia totona idia gima noho.” Encyclopædia Britannica ia gwau: “Keristen tomadiho sibona be tanobada hegegemadai ia bada noho bona Keristen taudia be dokona negana bona Keriso ena lou mai be idia kahirakahira idia abia dae momokani. Keristen taudia dekenai dokona idia naria noho neganai Dirava ena Basileia do ia mai herevana idia lalohadailaia kava lasi.”

Laloa Namonamo Ena Anina

9. Ena be Petro ena lalohadai Mesia ena kara dekenai ia kerere, to dahaka dainai ia goada noho diba?

⁹ Iesu be iena hahediba taudia ida ia herevahereva ena lagani 30 bamona murinai, aposetolo Petro be ia hesiku lasi to dokona negana ia naria noho. Ena be guna ia bona hahediba taudia edia lalohadai Mesia ena kara dekenai be ia kerere, to Iehova ena lalokau bona siahu dainai ia diba ia naria gauna do idia davaria. (Luka 19:11; 24:21; Kara 1:6; 2 Petero 3:​9, 10) Ia gwauraia herevana be Greek Revarevadia lalonai idia torea momo, ia gwau: “Gau ibounai edia dokona nega be kahirakahira.” Bena ena Keristen bamodia idia goada noho totona, ia gwau: “Umui laloa namonamo, mai maoromaoro danu, do umui naria, bona do umui guriguri.”​—1 Petero 4:7.

10. (a) Ita laloa namonamo ena anina be dahaka? (b) Dirava ena ura gau iboudiai dekenai ita diba totona, dahaka ita karaia?

¹⁰ Ita gwau lasi “laloa namonamo” karana ena anina be sibona eda aonega o tanobada ena aonega gaukaralaia karana. Iehova ia gwau: “Lau be aonega taudia edia aonega do lau haorea, bona diba bada taudia edia diba do lau negea.” (1 Korinto 1:19) Petro ia gaukaralaia hereva ena anina be “laloa maoromaoro.” Lauma dalanai laloa maoromaoro be mai anina iseda tomadiho lalonai. Vadaeni, ita laloa namonamo neganai, Iehova ena ura gau ibounai dekenai ita diba; dahaka gaudia be mai anina bada bona dahaka gaudia be anina bada lasi ita diba. (Mataio 6:​33, 34) Ena be dokona negana be ia kahirahakira, to lebulebu amo ia honu mauri dalana ita abia hidi lasi; ita diba ita noholaia negana be ia idau. (Mataio 24:​37-39 itaia danu.) To, iseda lalohadai, ura, bona kara dekenai ita laloa maoromaoro, bona Dirava dekenai (‘ita guriguri’) bona iseda dekena taudia (‘ita helalokau heheni iseda lalona ibounai ida’).​—1 Petero 4:​7, 8.

11. (a) ‘Iseda laloa bona kudouna do ita hamatamataia’ ena anina be dahaka? (b) Diba gaukaralaia karana matamatana ese ita edena bamona ia durua dala maorodia ita abia hidi totona?

¹¹ Laloa namonamo ena anina be ‘iseda laloa bona kudouna do ita hamatamataia.’ (Efeso 4:23) Dahaka dainai ita hamatamataia be namo? Kara dika ia hanaia ita dekenai bona kara dika bogaraginai ita noho, unai dainai, ura dikana ese iseda lalona ia doria lauma gaudia ita dadaraidia totona. Unai siahu ese ita ia doria noho kohu momo bona sibona eda ura ita tahua totona. Unai dainai, ta be Keristen ai ia lao neganai, doria gauna matamatana, eiava lalona matamatana do ia abia, bena do ia doria dala maoronai, lauma dalana unai, bona sibona ena ura do ia dadaraia. Bena, dala ta ia abia hidi gwauraia neganai, hegeregere, edukeisini, aonega ta ia tahua, moni gaukara, moale karana, laga-ani, dabua, eiava ma gau ta, ia ese lauma gaudia do ia laloa guna, tauanina dalanai eiava sibona ena ura do ia laloa guna lasi. Laloa matamatana do ia abia neganai, gau ta ia abia hidi gwauraia neganai, ia laloa namonamo diba badina ia diba dokona be ia kahirakahira.

12. ‘Abidadama dekenai ita gini goada’ noho dalana be dahaka?

¹² Ita laloa namonamo ena anina be lauma dalanai ita gorere lasi. ‘Abidadama dekenai ita gini goada’ noho dalana be dahaka? (Tito 2:2) Aniani korikorina amo iseda lalona ita ubua be gau badana. (Ieremia 3:15) Dirava ena Hereva momokani bona iena lauma helaga ese ita idia durua lauma dalanai iseda lalona ita hadaia maoromaoro totona. Unai dainai, sibona eda stadi, haroro gaukara, bona guriguri noho karadia, bona Keristen hebamo karadia be gau badadia.

Laloa Namonamo Karana ese Ita Ia Naria

13. Kara kavakava kereredia ita karaia garina laloa namonamo ese ita edena bamona ia durua?

¹³ Bema ita laloa namonamo, unai ese ita do ia naria, kara kavakava eiava kererena ta ita karaia bona mauri hanaihanai do ita haboioa garina. Edena bamona? Aposetolo Paulo ese ‘lalona ena taravatu’ ia gwauraia. Ena abidadama ia goada tauna ese unai lalona ena taravatu ia biagua gauna ia moalelaia unai; ia be “Dirava ena taravatu.” Momokani, “kara dika ena taravatu” ese lalona ena taravatu ia tuari henia. To, Iehova ena heduru amo Keristen taudia do idia kwalimu diba.​—Roma 7:​21-25.

14, 15. (a) Dahaka gau rua idia tuari iseda lalona idia biagua totona? (b) Iseda lalona be edena bamona do ia kwalimu diba?

¹⁴ Paulo be kara rua edia idau ia hahedinaraia, ia gwau kara dika ia ura tauanina ese ena lalona ia biagua neganai, sibona ena namo ia tahua, to Dirava ena lauma helaga ese ia biagua neganai, sibona ena ura ia dadaraia Iehova ia hesiai henia totona. Paulo be Roma 8:​5-7 ai ia gwau: “Tauanina ena ura hegeregerena idia karaia taudia be tauanina ena ura gaudia sibona idia laloa. To Lauma Helaga ena ura hegeregerena idia karaia taudia be Lauma Helaga ena ura gaudia sibona idia laloa. Tauanina dekenai oi laloa, be mase oi davaria, to Lauma Helaga dekenai oi laloa, be mauri bona maino oi davaria. Unai dainai tauanina sibona ia laloa tauna ese Dirava dekenai ia tuari henia, badina be Dirava ena Taravatu ia badinaia lasi, bona do ia badinaia diba lasi.”

¹⁵ Bena Ro 8 siri 11 ai, Paulo ia gwau taunimanima edia lalona be lauma helaga ida idia gaukara hebou neganai do idia kwalimu diba, ia gwau: “Dirava ena Lauma ese Iesu mase dekena amo ia hatorea isi lou. Bema Dirava ena Lauma, emui lalona dekenai ia noho neganai, Keriso mase dekena amo ia hatorea isi lou Diravana ese danu umui emui tauanina, do idia mase gaudia, do ia hamauridia lou. Inai bamona do ia karaia, badina be umui emui lalona dekenai iena Lauma ia noho dainai.”

16. Laloa namonamo karana ese ita ia durua dahaka lalo-ani karadia do ita dadaraidia totona?

¹⁶ Vadaeni, bema ita laloa namonamo, inai tanobada ena lebulebu karadia, unai be sibona ena ura, kohu, bona sihari kava karadia idia tahua, be iseda lalona do idia ania lasi. Ita laloa namonamo dainai, ita diba namona be ‘heudahanai karadia ita rakatania,’ bena unai kara edia huahua dikadia amo do ita roho mauri. (1 Korinto 6:18) Laloa namonamo karana ese ita ia doria, Basileia gaudia do ita tahudia guna totona, bona ita ia naria moni gaukarana be iseda hetura karana Iehova dekenai ia hadikaia garina.

17. Moni dekenai hekwakwanai ia davaria neganai, pioneer taihu ta be edena bamona laloa namonamo kara ia hahedinaraia?

¹⁷ Hegeregere, siahu gabunai, Southeast Asia ai, taihu ta be Basileia gaukara ia laloa guna. Nega ibounai hesiai gaukarana ia ura henia bada. Unai gabu ai moni gaukara biagudia idia ura pura iboudiai dina 6 eiava 7 do idia gaukara. Iunivesiti amo ia doko murinai, taihu ena tamana, ia be Iehova ena Witness tauna lasi, ia ura moni bada gaukarana ia abia, ruma bese ia durudia totona. To taihu ia ura dikadika pioneer gaukara do ia karaia, unai dainai dina haida sibona moni gaukara ia abia bona pioneer gaukara ia hamatamaia. Iena tamana be ia badu, bona ia gwau taihu ena kohu be dala dekenai do ia negedia. Ia be kasi dikadika tauna dainai iena abitorehai be bada, bona ia ura ena natuna kekeni be unai abitorehai monina do ia henia. Iena taihuna be iunivesiti dekenai ia lao, to tamana ena abitorehai dainai moni be lasi iena sikuli davana totona. Iena taihuna maragina ia gwau bema ia durua, gabeai moni gaukara do ia abia neganai ruma bese do ia naria. Ia lalo-daradara badina ena taihuna ia ura henia bada bona pioneer gaukara ia ura henia bada danu. Ia laloa namonamo murinai, ena lalona ia hadaia pioneer gaukara do ia karaia totona, bona moni gaukara idauna ta ia tahua. Ia guriguri hegeregerena, moni gaukara namona ia davaria bona unai amo ena ruma bese bona ena taihuna ia durudia diba, bona ia ura henia dikadika pioneer gaukarana ia karaia diba danu.

Ita Laloa Namonamo Noho Totona Iehova Ena Heduru Ita Tahua

18. (a) Dahaka dainai taunimanima haida idia lalohisihisi? (b) Idia lalohisihisi taudia ia hagoadadia Baibel siridia be dahaka?

¹⁸ Keriso murinai idia raka taudia haida be reana idia laloa namonamo noho be ia auka. Inai nega dikana ia ore haraga lasi dainai reana edia haheauka be ia manoka ia lao. Reana unai gau dainai idia lalohisihisi bada. To, dokona do ia mai. Iehova ia gwauhamatalaia. (Tito 1:2) Ia gwauhamatalaia Paradaisona do ia mai danu. Iehova ese ena hereva do ia hagugurua. (Apokalupo 21:​1-5) Tanobada matamatana do ia mai neganai, “mauri auna” do ia noho laloa namonamo taudia iboudiai totona.​—Hereva Lada-isidia 13:12.

19. Edena bamona ita laloa namonamo noho diba?

¹⁹ Edena bamona ita laloa namonamo noho diba. Iehova ena heduru ita tahua. (Salamo 54:4) Ita tabekau henia. Iehova ese iseda turana karana ia ura henia dainai ita moale! Hahediba tauna Iakobo ia torea, ia gwau: “Dirava dekenai do umui kahirakahira lao, vadaeni ia ese umui dekenai do ia raka kahirakahira mai.” (Iakobo 4:8) Paulo ia gwau: “Nega ibounai do umui moale, Lohiabada lalonai umui noho dainai. Ma lau gwau lou: do umui moale. Emui manau bona manada kara taunimanima ibounai edia vairanai do umui hedinaraia. Lohiabada be kahirakahira ia ginidae. Gau ta totona do umui laloa hekwarahi lasi. To emui dabu gaudia do umui abia totona Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia bona emui kudouna idia mamia gaudia ibounai do ia naria namonamo.” (Filipi 4:​4-7) Inai nega dikana be kahirakahira do ia ore, to ena dika oi huaia ena maduna ia metau neganai, namona be Iehova dekenai oi tahoa kau, bona ia ese oi do ia hagoadaia.​—Salamo 55:22.

20. Timoteo Ginigunana 4:10 ia gwau edena dala do ita badinaia noho be namo?

²⁰ Oibe, dokona negana be ia kahirakahira, unai dainai ita laloa namonamo be gau badana! Lagani 1,900 gunanai unai be sisiba namona; hari ia be mai anina bada sisibana. Iehova ese ena tanobada matamatana dekenai ita ia hakaua lao namonamo noho lalonai, namona be iseda diba ita gaukaralaia ia ita hanamoa totona.​—1 Timoteo 4:10.

Edena Bamona Do Oi Haere?

◻ Laloa namonamo karana ena anina be dahaka?

◻ Dahaka dainai ita laloa namonamo be gau badana?

◻ Edena bamona iseda lalona ita biagua siahuna ita hamatamataia?

◻ Iseda lalona dekenai dahaka tuari ita karaia noho be gau badana?

◻ Edena bamona ita laloa namonamo noho diba?

[Picture on page 15]

Guriguri amo Dirava ita tabekau henia karana ese ita ia durua ita laloa namonamo noho totona

[Picture on page 17]

Ita laloa namonamo neganai, tanobada ena lalo-ani karadia ita dadaraidia diba