“Ai Herevahereva Hebou be Ia Auka!”

MICHAEL be loia tauna, unai dainai herevahereva hebou karana ia diba be gau badana. Unai be iena gaukara ena maduna. Michael be lagani 16 ai ia headava vadaeni, to gaukara amo iena adavana, Adrian, dekenai ia giroa neganai, ia danu idia herevahereva hebou be ia auka. Michael ia gwau: “Hanaihanai Adrian bona lau ai hepapahuahu, ai badu kava, ai maumau, bona hehuni hereva amo ai hadikaia heheni, bona lau laloa do ai hesiku momokani. Lau laloa hanaihanai lalohisihisi bona badu havaraia karana be headava taudia edia kara. Bema emai headava negana ibounai lalonai unai bamona do ai karaia, headava lau ura henia lasi​—lau hevaseha lasi, lau ura emai headava lau hadokoa. Lagani 20, 30, 40 bamona lalonai do ai heai bona do ai lalo-hekwarahi lau ura lasi.”

Michael bona Adrian sibodia lasi be unai bamona idia laloa. Headava taudia momo edia kara be nega momo idia heai murinai idia maino lou bona gabeai ma idia heai lou. Herevahereva hebou neganai heai ia vara. Haida ese hereva taudia idia gwauraia lasi herevadia idia “kamonai” bamona. Hereva haida idia gwauraia kava. Idia dagedage bona idia samania heheni, bena murinai herevahereva lasi dekenai idia noho. Idia parara lasi, to danu idia be “tau-anina tamona” ai idia noho momokani lasi. (Genese 2:24) Headava dekenai idia noho namonamo lasi. Edia dala be rua, headava do idia hadokoa eiava edia hekwakwanai do idia hepapahuahulaia noho. Unai kara rua amo lalohisihisi do idia davaria, unai dainai edia kudou edia hemami idia dika garina, edia lalohadai idia hahedinarai heheni lasi.

Unai bamona taudia edia headava dekenai ‘aonega ese ia hakaudia’ be gau badana. (Hereva Lada-isidia 1:5) Unai hakaua herevana be Dirava ena Hereva, Baibel, lalonai idia davaria diba. Paulo ena revareva iharuana Timoteo dekenai ese ia hamomokania Baibel ena hereva be ia namo badina “hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa.” (2 Timoteo 3:16) Do ita itaia unai be ia momokani headava lalonai herevahereva hebou ia namo lasi karana hanamoa totona.