Emu Headava Ia Noho Daudau Totona Dala Oi Karaia
“Dirava ese ia hakapua taudia, be taunimanima ese do idia hapararaia lasi.”—MATAIO 19:6.
1. Hari inai negai, badina be dahaka Keristen taudia momo edia headava idia namo?
HARI inai negai, Iehova ena bese taudia bogaragidiai, taunimanima tausen momo edia headava idia namo noho dainai idia moale. To, idia momo be unai bamona idia noho be ia vara kava gauna lasi. Keristen headava idia namo diba bema headava taudia ruaosi be (1) Dirava ena lalohadai headava dekenai idia matauraia bona (2) iena Hereva ena hahegani hegeregeredia idia noho. Dirava ese headava dalana ia haginia. ‘Tanobada ruma besedia ibounai be ia dekena amo edia ladana idia abia.’ (Efeso 3:14, 15) Headava ia namo dalana ia diba dainai, Iehova ena hakaua herevadia ita badinaia neganai heduru do ita abia.—Isaia 48:17.
2. Headava lalonai Baibel ena hahegani badinaia lasi karana ese dahaka ia havaraia?
2 To, bema Baibel ena hahegani ita badinaia lasi, headava lalonai lalohisihisi bada ia vara diba. Diba momo taudia haida idia laloa, United States dekenai hari inai negai idia headava taudia toi toi amo rua rua be gabeai headava hadokoa dalana do idia tahua. Keristen taudia danu be “nega dokonai metau dikadia” dainai hekwarahi bona metau idia davaria. (2 Timoteo 3:1) Moni ena hekwarahi bona gaukara gabunai metau momo idia vara ese headava ia hadikaia diba. Danu, Keristen taudia haida idia lalohisihisi badina edia adavadia be Baibel ena hahegani idia badinadia lasi dainai. Keristen headava hahinena ta ia gwau, ‘Iehova lau lalokau henia, to lagani 20 lalodiai egu headava ia dika momokani. Egu tau be sibona ia laloa bona ia ura lasi ena kara ia haidaua. Egu mamina be lau dekenai dala be lasi.’ Keristen headava tatau bona hahine sisina momo be unai bamona idia hereva danu. Kerere be dahaka? Headava taudia idia hesiku heheni eiava idia badu heheni karana be edena bamona idia koua diba?
Headava be Nega Daudau Ia Noho Gauna
3 Ena be edia noho be ia namo momokani, to headava lalonai be goevadae lasi taudia rua idia tamona. (Deuteronomi 32:5) Unai dainai, aposetolo Paulo ia gwau “headava taudia be inai tanobada ena metau bada do idia abia.” (1 Korinto 7:28) Edia noho ia dika momokani neganai, reana haida idia parara eiava edia headava idia hadokoa. (Mataio 19:9; 1 Korinto 7:12-15) To nega momo, Keristen taudia be Paulo ena sisiba idia badinaia, ia gwau: “Hahine ese tau do ia rakatania lasi. . . . Tau danu ese iena adavana do ia rakatania lasi.” (1 Korinto 7:10, 11) Momokani, headava be nega daudau ia noho gauna, badina Iesu Keriso ia gwau: “Dirava ese ia hakapua taudia, be taunimanima ese do idia hapararaia lasi.”—Mataio 19:6.
3, 4. (a) Headava dekenai Dirava ena taravatu be dahaka? (b) Badina be dahaka headava be nega daudau ia noho be maoro bona heduru gauna?
4 Bema ta ena headava lalonai badu bona lalokau lasi karana ia noho bona ia laloa unai headava ia rakatania diba lasi, reana do ia laloa Iehova ena taravatu ia auka bona unai taravatu ena badina namona ia noho lasi. To lasi. Headava be nega daudau gauna dainai, Dirava idia badinaia headava taudia idia ura edia hekwakwanai idia tahua bona idia hanaia, idia ura lasi hekwakwanai ia matamaia neganai edia maduna idia rakatania haraga. Lagani 20 bona ma haida lalodiai ia headava vadaeni tauna ta be inai bamona ia hereva: “Hekwakwanai negadia oi koudia diba lasi. Nega haida do umui moale heheni lasi. Unai neganai, emu gwauhamata hamomokania urana be mai anina bada.” Momokani, Keristen headava tatau bona hahine idia diba edia maduna badana be headava ia Havaraia Tauna, Iehova Dirava, idia hamoalea.—Kohelete 5:4 itaia.
Kwarana Dagina Bona Kamonai Karana
5 Unai dainai, hekwakwanai idia vara neganai, unai be hekwakwanai rakatania dalana tahua negana lasi, to Dirava ena Hereva lalonai ia noho sisiba badinaia dalana tahua negana. Hegeregere, Paulo ena hereva Efeso 5:22-25, 28, 29 dekenai mani oi laloa, ia gwau: “Hahine e, emui adavana do umui kamonai henia, Lohiabada umui kamonai henia hegeregerena. Badina tau be iena adavana ena kwarana, Keriso be ekalesia ena kwarana bamona. Bona Keriso be ekalesia ena hamauria tauna, ekalesia be iena tauanina. Unai dainai hahine ese gau ibounai lalonai edia adavana do idia kamonai henia, ekalesia ese Keriso ia kamonai henia bamona. Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai. Unai bamona danu, namona be tatau ese edia adavana do idia lalokau henia, idia edia tauanina idia lalokau henia hegeregerena. Adavana ia lalokau henia tauna ese sibona ia lalokau henia noho. Badina be tau ta ese sibona ena tauanina ia badu henia diba lasi. To ia ubua noho bona ia naria noho, Keriso ese ekalesia ia ubua bona naria hegeregerena.”
6. Keristen headava tataudia be edena dala ai tanobada tataudia amo idia idau be namo?
6 Nega momo tatau be edia headava dagi siahuna idia gaukaralaia kerere bona edia adavadia idia biagudia mai kara auka ida. (Genese 3:16) To, Paulo ese Keristen headava tataudia ia hagoadadia tanobada tataudia amo idia idau totona, ia ura idia be Keriso bamona, bona namo lasi edia adavadia edia mauri karadia maragimaragidia iboudiai idia biagudia. Oibe, Iesu Keriso be ia dagedage lasi eiava ia be biaguna aukana ta bamona lasi. Ia murinai idia raka taudia ia hanamodia bona ia matauraidia, ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina be lau be dagedage lasi bona manau tauna. Vadaeni emui laumana be do idia laga-ani.”—Mataio 11:28, 29.
7. Hahine be moni gaukara ia karaia neganai, edena bamona tau be iena adavana ia matauraia diba?
7 Keristen headava tauna be iena adavana ia matauraia ia be uro manoka ta bamona. (1 Petero 3:7) Hegeregere, unai ia laloa bema ena hahine be moni gaukara ia karaia. Iena dala ia noho neganai ia durua bona ia laloa bada. Hahine momo idia gwau edia headava idia hadokoa ena badina badana ta be edia adavadia ese edia natudia bona edia ruma bese idia lalodia bada lasi. Unai dainai, Keristen headava tauna be dala ia tahua, ruma bese lalonai dala namodia ai hahine ia durua ruma bese taudia iboudiai be namo idia davaria totona.
8. Keristen hahinedia be kamonai karana idia hahedinaraia neganai, dahaka idia karaia diba?
8 Tatau ese edia adavadia idia matauraidia neganai, unai ese Keristen headava hahinedia ia durudia edia adavadia idia kamonai henidia totona. To ita gwau lasi idia be taunimanima ese idia matauraidia lasi hesiai taudia. Dirava ia gwau lasi headava hahine be igui hesiai hahine, to ia gwau tau ia “durua,” anina be tau ida idia gaukara hebou be ia namo. (Genese 2:18) Malaki 2:14 dekenai, headava hahine idia gwauraia tau ena “bamona.” Unai hegeregerena, Baibel negadia ai, headava hahinedia dekenai taravatu momo idia atodia lasi bona idia be kara idauidau idia karaia diba. Baibel ese “gaukara diba hahinena” be inai bamona ia gwauraia: “Iena adavana ese ia abidadama henia.” Oibe, tau ia diba, ena advana be hegeregere ruma bese ia naria, aniani ia hoia, tano naria ena bisinesi ia karaia, bona bisinesi maragina ta ia haheaua totona.—Hereva Lada-isidia 31:10-31, NW.
9. (a) Baibel negadia ai, Dirava idia gari henia hahinedia be edena dala ai kamonai karana korikorina idia hahedinaraia? (b) Hari inai negai, dahaka ese Keristen headava hahinena ia durua diba kamonai karana ia hahedinaraia noho totona?
9 To, Dirava ia gari henia headava hahine be iena adavana ena dagi dainai ia matauraia. Hegeregere, Sara ese “[Abraham] ena hereva ia kamonai henia, bona ‘lohia’ ia gwauraia.” Unai bamona ia karaia be hemataurai karana sibona lasi, to iena kamonai karana ia hahedinaraia momokani. (1 Petero 3:6; Genese 18:12) Danu, ia ura ena ruma namona Uru hanuana dekenai ia rakatania, iena adavana ida palai rumana ai idia noho totona. (Heberu 11:8, 9) To ita gwau lasi kamonai karana dainai, nega korikori ai hahine sibona ese ena ura maorona ia karaia diba lasi. Mose ese Dirava ia gwauraia peritome taravatuna ia badinaia lasi neganai, iena adavana, Sipora, ese dika ia vara garina haraga herea kara ta ia karaia. (Esodo 4:24-26) Ita gwau lasi idia be goevadae lasi tauna ta sibona idia hamoalea toho. Namona be headava hahinedia be ‘edia adavana do idia kamonai henia, Lohiabada idia kamonai henia hegeregerena.’ (Efeso 5:22) Keristen headava hahine be iena turana karana Dirava ida ia laloa neganai, unai ese ia durua iena adavana ena kerere maragidia bona kara manokadia ia lalodia boio totona, ena adavana be ia dekenai ia karaia hegeregerena.
Hereva Heheni Karana—Headava Ia Durua Noho Dalana
10 Headava hadokoa karana ena dala ia karaia loea tauna ta dekenai headava taudia ese edia headava idia hadokoa ena badina badana be dahaka idia henanadai henia neganai, ia haere, ia gwau: “Idia hereva heheni namonamo diba lasi, edia lalohadai korikorina idia gwaurai heheni lasi, bona idia hetura heheni namonamo lasi.” Oibe, hereva heheni karana be headava goadana ia durua noho dalana. Baibel ia hereva hegeregerena, “herevahereva be lasi neganai taunimanima edia lalohadai gaudia idia tubu namonamo lasi.” (Hereva Lada-isidia 15:22) Namona be headava tatau bona hahine be ‘bamodia namodia’ ai idia lao, bona turana karana goadana mai lalokauna idia moalelaia. (Hereva Lada-isidia 2:17) To, headava taudia momo dekenai hereva heheni karana ia auka, bona unai dainai badu ia siahu ia lao ela bona dika ia havaraia hepapahuahuana ta ia vara. Eiava reana headava taudia be edia badu idia hunia hemataurai kara koikoina amo, bona ta ese ta ena lalohadai ia diba lasi.
11. Tau bona ena adavana edia herevahereva hebou karana be edena dala amo idia hanamoa diba?
11 Hekwakwanai ena badina ta be tatau bona hahine edia lalohadai hahedinaraia daladia be idau. Hahine momo idia ura edia hemami idia herevalaidia, to tatau idia ura idia vara momokani gaudia idia herevalaidia. Nega momo hahine ese hebogahisi idia hahedinaraia bona idia ura ta ena lalona hagoadaia totona idia heduru, to tatau idia ura hekwakwanai hanaia daladia idia tahua. To hereva heheni namonamo dalana ia noho bema headava taudia ruaosi be ‘hereva idia kamonai haraga, to hereva idia gwauraia haraga lasi.’ (Iakobo 1:19) Umui hereva heheni neganai matana umui raraia, bona umui kamonai heheni namonamo. Henanadai namodia amo ta ta emui lalohadai umui tahua. (Samuel Ginigunana 1:8; Hereva Lada-isidia 20:5 itaia danu.) Emu adavana ese ena hekwakwanai ta ia gwauraia neganai, hekwakwanai hanaia dalana oi gwauraia haraga lasi, to namona be oi kamonai henia namonamo bona umui gaukara hebou hekwakwanai hanaia totona. Bona mai manau ida umui guriguri hebou, Dirava ena hakaua hereva umui tahua.—Salamo 65:2; Roma 12:12.
12. Keristen headava taudia be edena dala amo edia adavana totona nega idia hoia diba?
12 Nega haida mauri ena hekwarahi bona metau dainai, headava taudia edia nega bona goada be lasi idia hereva heheni namonamo totona. To, bema Keristen taudia idia ura edia headava idia matauraia bona edia headava hadikaia gaudia idia koua, namona be edia turana heheni karana ia goada noho. Namona be edia headava idia kara henia ia be gau namo hereana ta bamona, mai anina bada gauna hegeregerena, bona namona be edia headava bona edia adavana totona nega idia hoia. (Kolose 4:5 itaia.) Nega haida, hagoadaia hereva idia gwaurai heheni totona nega idia hoia dalana be televisen idia koua. Nega momo ti eiava kofi idia inua hebou neganai, unai ese headava taudia ia durudia diba edia lalona ena ura idia herevalaia heheni totona. Unai negadia ai, idia be ruma bese gaudia idia ‘herevalaia hebou’ diba. (Hereva Lada-isidia 13:10) Bona aonega gauna be inai, badu sisina idia havaraia gaudia bona daradara gaudia idia herevalaidia hebou bona hamaoromaorodia guna, idia be hepapahuahu badadia havaraia gaudia ai idia do lao lasi neganai!—Mataio 5:23, 24; Efeso 4:26 itaia danu.
13. (a) Mai momokani ida ia hereva bona ena lalohadai ia gwauraia hedinarai karana dekenai Iesu ena haheitalai be dahaka? (b) Headava taudia idia hetura heheni namonamo daladia haida be dahaka?
13 Tau ta ese iena kerere ia gwauraia, ia gwau: “Nega haida lau hekwarahi egu lalohadai lau gwauraia totona bona [egu adavana] dekenai egu hemami lau gwauraia momokani totona.” To, iseda lalohadai ita gwauraia hedinarai be gau badana ita tura heheni momokani totona. Iesu be iena headava matamata kekeni oreana dekenai ia hereva momokani bona ena lalohadai ia gwauraia hedinarai karana oi laloa. Ia gwau: “Harihari ia lao, umui be hesiai taudia do lau gwauraia lasi, badina hesiai tauna be ena biaguna ena kara ia diba lasi. To umui be lauegu turana do lau gwauraia, badina be lauegu Tamana dekena amo lau kamonai herevadia ibounai umui dekenai lau hamaoroa vadaeni.” (Ioane 15:15) Unai dainai emu adavana oi laloa ia be emu turana hegeregerena. Oi gari lasi, to emu adavana dekenai emu hemami oi gwauraia hedinarai. Namona be oi hekwarahi bada momokani hereva amo bona “uduna hereva namodia” amo oi hahedinaraia oi ura henia bada. (Solomon ena Ane 1:2) Nega haida hereva heheni namonamo dalana ia auka, to bema headava taudia ruaosi idia gaukara goadagoada, edia headava ia noho daudau totona gau momo idia karaia diba.
Hepapahuahu Hanaia Dalana
14 Nega haida hepapahuahu do idia vara. To namo lasi emu ruma bese be ‘heiriheiri amo ia honu.’ (Hereva Lada-isidia 17:1) Namo lasi hepapahuahu ia havaraia diba gaudia umui herevalaidia natudia idia kamonai diba neganai, bona namona be emu adavana ena hemami oi matauraia. Rahela ia gabani dainai ena lalohisihisi ia gwauraia bona Iakobo ia noia natudia ia henia totona neganai, ia be mai badu ida ia haere, ia gwau: “Lau be Dirava, a? Ia ese mero oi dekenai ia henia lasi.” (Genese 30:1, 2) Bema ruma bese lalonai hekwakwanai idia vara, namo lasi taunimanima ta oi gwau henia to namona be hanaia dalana oi tahua. Umui ruaosi sibona umui herevahereva hebou neganai, umui “hereva kava” lasi, eiava ta ese ta ena hereva do ia utua lasi.—Hereva Lada-isidia 12:18.
14, 15. Edena dala amo hepapahuahu idia koua diba?
15 Momokani, reana gau ta dekenai emu lalohadai ia goada, to emu lalohadai oi gwauraia lasi ‘heai, dagedage, badu, hereva dika, bona samania koikoi hereva’ amo. (Efeso 4:31) Headava tauna ta ia gwau: ‘Emui hekwakwanai be hanaihanai gado regena mai manada dekenai umui gwauraia. Bema ta ese badu dainai iena gado regena ia habadaia, hereva umui hadokoa. Nega sisina murinai umui giroa. Hereva umui hamatamaia lou.’ Hereva Lada-isidia 17:14 dekenai inai sisiba namona ia henia: “Heai ia do vara lasi neganai oi raka oho.” Umui ruaosi emui badu ia keru neganai, umui herevahereva hebou lou diba.
Umui Heudahanai Lasi
16 Heberu 13:4 ia gwau: “Headava kara be taunimanima ibounai ese do idia matauraia be namo. Tatau mai edia hahine e, emui headava do umui naria, ia be goevagoeva Dirava ena vairana dekenai. Do ia miro lasi. Badina be Dirava ese heudahanai taudia bona headava hadikaia taudia edia kerere davana do ia karaia momokani.” Heudahanai kara be Dirava kara dika henia karana ta. Unai ese headava ia hadikaia momokani. (Genese 39:9) Headava taudia ia sisiba henidia hahinena ta ia toretore, ia gwau: “Ruma bese lalonai ta ia heudahanai idia davaria murinai, lai-gubana ese ruma ia hadikadia ore hegeregerena, heudahanai ese ruma bese ia hadikaia danu, unai kara dainai abidadama karana bona ta ta be sibona sibona ia laloa namo karana ia hadikaia, bona natudia ia hahisidia.” Reana ia rogorogo diba eiava mahuta hebou karana amo gorere ia davaria diba.
17. Edena dala haida ai heudahanai urana ita koua eiava ita dadaraia diba?
17 Tanobada ena lalohadai mirodia mahuta hebou karana dekenai be buka, televisen, bona muvini piksa lalodiai idia hahedinaraia, bona taunimanima haida be unai gaudia idia itaia momo dainai heudahanai karadia idia lalohadailaia. (Galatia 6:8) To unai kara ia vara ena badina idia tahua taudia idia gwau, nega momo heudahanai ia vara lasi ta be mahuta hebou karana ia ura sibona dainai, to ia vara badina unai tau eiava hahine ia ura ia hamomokania ma haida ese idia laloa ia be do mai ena hairai eiava ia ura ta ese ia lalokau henia. (Hereva Lada-isidia 7:18 itaia.) To herevana ena badina be dahaka, Keristen tauna ese lalohadai mirodia iboudiai ia dadaraidia be gau badana. Namona be emu adavana dekenai emu hemami momokanina oi gwauraia hedinaraia. Bema umui laloa ia hegeregere, kongregesen elda taudia amo heduru umui tahua. Reana unai umui karaia neganai, kara dika dekenai do umui moru lasi. Ma danu, namona be Keristen tauna be hahine dekenai eiava Keristen hahine be tatau dekenai iena kara ia naria namonamo. Bema oi headava vadaeni to ma ta oi gahusia unai be Revareva Helagadia ena hahegani badinaia karana lasi. (Iobu 31:1; Mataio 5:28) Namona be Keristen taudia idia naria namonamo gaukara gabuna ai gaukara taudia idia tura henia momo garina. Ena be unai taudia umui kara namo henidia to namona be unai be bisinesi karana ai sibona.
18. Headava lalonai, nega momo mahuta hebou karana ena hekwakwanai ia vara ena badina be dahaka, bona edena dala amo unai hekwakwanai idia hanaia diba?
18 Oi ia naria momokani dalana ma ta be mai emu kara momokani ida emu adavana oi tura henia momokani. Tahua taudia momo idia gwau, nega momo headava lalonai mahuta hebou karana ena hekwakwanai ia vara be tauanina ia kerere dainai lasi to hereva heheni hebou karana ia kerere dainai. Nega momo, bema headava taudia be mai edia hereva momokani danu idia hereva heheni bona hahegani dainai lasi to lalokau dainai mahuta hebou karana idia karaia, unai hekwakwanai ia vara momo lasi.a Unai noho hebou daladia namodia ai, mahuta hebou karana ese headava ia hagoadaia diba.—1 Korinto 7:2-5; 10:24.
19. “Noho hebou namo herea, mai laloa tamona danu” karana be dahaka, bona headava dekenai dahaka ia havaraia diba?
19 Keristen kongregesen lalonai lalokau idia hahedinaraia neganai, idia “noho hebou namo herea, mai laloa tamona danu.” Lalokau idia habadaia neganai, Dirava ena hereva idia badinaia headava tauna bona ena adavana be ‘idia haheauka heheni bona dika idia gwauatao heheni’ diba. (Kolose 3:13, 14) Hahegani ia badinaia lalokauna ese ma haida edia namo ia tahua. (1 Korinto 13:4-8) Unai bamona lalokau umui habadaia. Unai ese umui do ia durua emui headava umui hagoadaia totona. Emui headava lalonai Baibel ena hahegani umui badinaia. Bema unai bamona umui karaia, emui headava be do ia noho daudau bona Iehova Dirava ena ladana do ia hanamoa bona do ia matauraia.
[Footnotes]
a August 1, 1993 ena Gima Kohorona lalonai, “Herevahereva Hebou—Hereva Mo Sibona Lasi” sivaraina ese ia hahedinaraia edena dala ai headava taudia be unai hekwakwanai idia hanaia diba.
Edena Bamona Do Oi Haere?
◻ Dahaka dainai headava be nega daudau ia noho be namo?
◻ Kwarana dagi bona kamonai karana dekenai Baibel ena hereva be dahaka?
◻ Headava taudia be edena dala amo edia herevahereva hebou karana idia hanamoa diba?
◻ Headava taudia be Keristen dalana ai edena bamona hepapahuahu idia hamaoromaoroa diba?
◻ Dahaka ese headava do ia hagoadaia diba?
5. Paulo ena sisiba haida be dahaka headava tatau bona hahine dekenai?
10. Headava lalonai herevahereva hebou karana be mai anina bada, a?
16. Dahaka dainai heudahanai be dika badana ta?
[Picture on page 12]
Bema hahine ese moni gaukara ia karaia, ena Keristen adavana ese iena hahine dekenai metau momo do ia henia lasi